رواية روح الفؤاد الفصل الأول 1 - بقلم اسراء ابراهيم

قاعدين في الصالون وهو بدأ كلامه. "طبعًا أنتي عارفة إني جاي أطلب إيدك. حابة تسألي على إيه؟ "أنا أصلا مش موافقة." "ليه؟ "أنت في عقلك؟ أنت المفروض تروح تتقدم لواحدة في مستواك. لأني مش هقبل بيك لأن مستواك أوطى مني." "أنتي بتقولي إيه؟ "في إني مش هقبل بواحد بشهادة دبلوم وأنا تعليم عالي. تيجي إزاي دي؟ أنا واحدة تعبت في مذاكرتي وأهلي صرفوا عليا كتير. وبعد ده كله أتجوز أي حد ولا إيه؟

أنا مش أقل من صحباتي اللي مخطوبة لدكتور واللي متجوزة مهندس أو دكتور برضو. وأنا هتكسف أقول لهم إني مخطوبة لواحد معاه دبلوم. مهما هيكونوا بيتفاخروا بيهم قدامي وأنا هكون قاعدة بسمع كلامهم ومقدرش أتكلم زيهم ولا هقدر أرفع عيني ليه." "قصدك تتفشخري بمستوى تعليمي لخطيبك أو جوزك؟ "أنا صحبتي متجوزة مهندس زيها. أنا عايزة واحد من مستوايا يكون كمان مهندس زيي، مش أي كلية أقل مني كمان. وأنت بقى يا أبو دبلوم، هقبل بيك؟

"انتي اتجننتي؟ إزاي تكلميني بالطريقة دي يا روح؟ لولا إنك بنت خالتي كنت اتصرفت معاكي تصرف تاني. أنتي أصلا طلعتي واحدة تفكيرك محدود وجاهلة وتفكيرك عقيم يا روح. أنتي زي ما يكون متعلمتيش. إيه مستوى تعليم واطي وعالي ده؟ اختراع جديد؟ بتفكري إزاي؟ فين الثقافة؟

أنتي كده بتتساوي زي اللي متعلمش خالص. الجواز مكنش بالتعليم والشكل والمظاهر، إنما بالاحترام والاهتمام والحب والثقة والتفاهم، وإن واحد يكون قادر يصرف عليك وطلباتك تكون مجابة. مش كل اللي واخدين كليات كويسين وطريقة تعاملهم حلو. ممكن ميعرفش إيه المودة والرحمة، كل همه شغله وزعيق طول اليوم ويركنك على الرف. ساعتها هتكوني مبسوطة يعني؟

ومش كل اللي واخدين دبلوم وحشين، ممكن تلاقي معاه الحنية والاهتمام وكل طلباتك عندك ومش هيحسسك بالنقص وبيكون لبق في الكلام. أنا مبقولش كده عشان أنا معايا شهادة دبلوم، أنا أصلا بفتخر بنفسي طالما بصرف على نفسي وعلى أمي وأختي ومش مخليهم عايزين حاجة ومستواي المادي كويس. بس للأسف بسبب كلامك وتفكيرك ده، أنا اللي بقولك مش عايزك زوجة ليا ولا أم لأولادي، لأن أكيد هتعلميهم يفكروا كده وأنا مش عايز كده. وكمان كرامتي متسمحليش إني آخد واحدة هانتني وهي مبتفكرش أصلا. أنا مستغرب إزاي أصلا أنتي مهندسة معندكيش مرونة خالص في الكلام ده. أنتي كمان مش عايزة واحد في أي كلية، عايزة واحد مهندس بذات عينه؟

بجد ده فيه كمية التخلف. على العموم ربنا يسعدك يا بنت خالتي مع الشخص اللي تختاريه واعتبريني أخوكي. أنا أصلا مكنتش عايز أتقدم لك لأن أنتي مش في بالي خالص. أنا معجب بواحدة محترمة وكلها حنية ومن مستوايا وهعرف أتكلم معاها ببساطة وهي طريقة كلامها لطيفة مش متعجرفة. يلا سلام يا باشمهندسة." ده كله وروح مش مستوعبة إزاي قال ليها الكلام ده كله وكمان مكنش مديها فرصة ترد عليه.

أخد فؤاد أمه ومشي وهي عمالة تسأله مالك ولكن مبيردش عليها. وصلوا البيت وكان مضايق جدًا ودخل أوضته وقعد عالسرير وحط وشه ما بين إيديه. وبيكلم نفسه: "ليه هديتي أحلامي اللي بنيتها معاك يا روح؟

دا أنا حبيتك وكنت دايما بدعيلك إنك تكوني حاجة كويسة وناجحة وكنت فخور بيكي. بس بعد كلامك معايا حطمتيني. حرام عليكي. أنا انصدمت من طريقة تفكيرك يا روح. مش هي دي روح اللي كنت بهزر وأضحك معاها وهي كانت بتهزر معايا وبتتكلم معايا باحترام ولطافة. كلامك ده وجعني جدا. يعني أنتي عارفة الظروف اللي خلتني أختصر الطريق وأدخل ثانوي؟ يعني أسيب أهلي محدش يصرف عليهم وأروح أتعلم؟

رغم إني دخلت دبلوم صنايع وجبت مجموع عالي كنت هدخل منه كلية هندسة بس اشتغلت أكتر وبنيت نفسي. لو كنت أعرف إنك بتفكري كده كنت دخلت كلية بعد الدبلوم وعملت معادلة. بس قولت أشتغل أكتر من شغلانة عشان أشتري شقة كبيرة ولما نتجوز نسكن فيها. ولكن كسرتيني بكلامك يا روح." وفجأة نزل إيده وقرر خطوة هياخدها وهينفذها عشان نفسه أولا وبسبب نظرة المجتمع إنه بيحب المظاهر والشكليات. وفجأة جه اتصال له ورد ولكن اتخض وقال: "جاي بسرعة."

ياترى إيه اللي حصل؟ وهيتجوز روح ولا لأ؟ وإزاي؟ وإيه القرار اللي هينفذه؟