رواية رسومات الموت الفصل الرابع 4 - بقلم ولاء خالد

نور: أيوه يا ماما كوثر عايزاني في إيه؟ كوثر: بصي يابنتي هي أمك الحقيقية مش وحشاكي؟ نور وهي بتبص لأوضة نادر: لأ يا ماما كوثر، أنتي أمي اللي ما رميتنيش زي أمي الحقيقية. كوثر: يابنتي أنتي فاهماها غلط، أمك ما رميتكيش، دي خليتك تروحي لجدتك. نور: وليه فتحتي الموضوع ده تاني؟ أنا مبحبش أفتكر، قلبي مش قادر يستحمل كل اللي حصل زمان.

كوثر وهي بتمسح دموع نور: بس أمك دلوقتي بتدور عليكي، شفتها وهي بتعيط في الشارع وبتسأل الناس عليكي. يرضيكي تعملي في أمك كده؟ نور وهي بتقوم وبصتلها بحزن شديد: أنا مهما حصلها مش هروح لها، دي حملتني مسؤولية موت بابا عشان بس صدفة. جرت على أوضتها، كانت أوضتها جنب نادر. نادر فتح الباب وشافها وهي بتعيط. نادر: نور مالك؟ نور وهي بتفتح باب الأوضة: محدش عايزني، محدش بيحبني. قفلت الباب بقوة واترمت على السرير وفضلت تعيط.

نادر راح لأمه يسألها ليه نور بتعيط. نادر: هي بتعيط ليه يا ماما؟ كوثر: يابني أمها بتدور عليها، حرام نسيبها كده ومنوديش نور ليها. نادر: ل... لأ، أنا مش هخليها تروح لها، أنا اتعودت تبقي في البيت، هتخليها تمشي وتسيبنا؟ كوثر: ما أنا زيك، نفسي تفضل هنا. لكن ظلم أمها تتعذب وإحنا اللي نفرح. نادر مردش على أمه وقام وراح لأوضة نور. نادر وهو بيخبط على الباب: نور، أدخل؟ نادر: يا نور متخوفينيش، ردي عليا.

نادر: خلاص، أنا هفتح الباب. فتح الباب لقاها قاعدة على السرير وبترسم، لكن بترسم بعصبية. نادر بخضة: نووور، أنتِ بتعملي إيه؟ نور: هموتها، هموتها وتمشي بعيد عني وأرتاح. هموتها. نادر جري وشد الورقة وبص للورقة، وشهق بصوت عالي. نادر: أنتي حصلك إيه يا نور، وإزاي لحقتي ترسمي بالسرعة دي؟ نور وهي بترمي القلم على السرير بقوة: ده من زمان برسم فيها عشان يبقي موتها يبقي عنيف أوي.

المرسوم في الورقة أم نور مرمية على الأرض وكلها دم، وهدومها، والكلب واقف جنبها وكأنه ماسك قطعة لحمة وبتنقط دم على الأرض. بس لسه مكتبتش وقت موتها. نادر رمى الورقة وجري ينادي على أمه. ونور مبتسمة بشر ومسكت الورقة. نور: مع السلامة، مش هشوف وشك لغاية يوم القيامة. وبالحركة البطيئة كتبت الساعة كانت 8:00. كوثر وهي بتحضن نور: ليه يابنتي عملتي كده؟ نور وهي بتشهق من العياط: ا... أنا مكنتش قاصدة... د... أنا بحبها والله، و...

والله بحبها، معرفش عملت كده إزاي. نادر وهو ماسك الورقة: لازم نروح لأمك وتسامحك على اللي عملتيه، بس قبل 8، وأكيد هتبقي في الشارع بتدور عليكي عشان رسماها بالمنظر ده. نور: والله ما أنا قصدة، أنتوا مش مصدقين ليييه. نادر وهو بيتني الورقة وبيقوم: تعالي ندور عليها، ماعندناش وقت. نور قامت ومسكت إيده وقالت: هتسامحك، متقلقيش.

نور فرحت إنهم لسه معاها ومتقبلين الموضوع. راحوا لكل الشوارع ويدوروا عليها، ويعدي الوقت ومش عارفين هي فين. ولغاية ما جت الساعة 7:30، وبين أنوار الشوارع بتظهر أمها وهي مش قادرة تمشي من كتر ما بتدور على نور في كل الشوارع. نور شافتها وجرت عليها. نور لسه فاكرة شكلها متغيرتش، أما الأم مش عارفة شكل نور أبداً، فمستغربة مين اللي بتجري عليها، بس قلبها حاسس إنها نور بنته.

نور وهي بتحضنها: سامحيني يا ماما، سامحيني. معدش وقت وهتروحي مني. الأم: ن... نور دي أنتي؟ أنتي بنتي؟ نور وهي بتبوس إيدها: أيوه أنا يا ماما، وحشتيني. الأم: يااه، كبرتي خالص وبقيتي جميلة. ليه يا نور سبتي بيت جدتك الله يرحمها؟ ليه مقلتيش إنها ماتت؟ نور بعياط: أنا خفت تقولي أنتي السبب في موتها وإني أنا الغلطانة، فهربت. نادر وهو جاي عليهم: مفيش وقت يا نور، قولي بسرعة هييجي دلوقتي. نور: ا... أنا رسمتك.

الأم بحزن: ليه يابنتي؟ أنا للدرجة دي وحشة في نظرك تقتليني؟ نور: والله لأ، في حد بيجبرني أرسم، معرفش مين يا ماما، سامحيني، سامحيني، مش بإيدي. نادر وهو شايف كلب أسود بعيد ومنتظر الوقت: سامحيها يا طنط، وأنا هخلي بالي من نور، هتبقي في عيني. الأم: مسامحاكي يابنتي، لأني عرفت مين اللي بيتحكم فيكي. نور: مين؟ مين بسرعة؟ الأم: هو... الكلب هجم على أمها ونادر بيشد نور، ونور بتحاول تفلت منه وتروح تساعد أمها.

نور: مااااما، سبني، عايزة مااااما، هتموت يا نادر، هتموت يا أماااامااااااا. كشاف عامود النور طفى في المكان اللي فيه أمها ونور ونادر واقفين عند عامود تاني. صوت الكلب هدي ومعادش فيه صوت خالص. نادر بهمس: أكيد خلص. نور بعياط: ملحقتش أتكلم معاها وأشبع منها. كشاف العامود نور وظهر المشهد اللي رسمته نور. نور من المنظر ومن كتر اللف على أمها وكانت مأكلتش حاجة، اغمى عليها. صحت على صوت الإسعاف

وصوت نادر وهو بيقول: نور، أنتي كويسة؟ فاكرة أنا مين؟ نور وهي بتبص له: ا... أيوه، أنت نادر. نادر: الحمد لله. نور: أنا في عربية الإسعاف ليه؟ نادر: أنتي مش فاكرة؟ نور ظهر قدام عيونها مشهد أمها. نور بعياط: ماما راحت، راحت يا نادر، أنا بحبها والله، ملحقتش أقولها إني بحبك حتى. نادر وهو بيمسح دموعها: نصيبها، متزعليش، ادعيلها بالرحمة وخلاص، أنتي كده بتعذبيها يا نور.

تاني يوم دفنوا أمها وقعدت نور طول اليوم تعيط ومبتاكلش خالص. كل ما كوثر أم نادر تجبلها أكل ترفضه. نادر رجع من الدفنة وسأل أمه على نور وقالتله إنها مبتاكلش والبنت تعبت وضعفت أوي. قالها تجهزلها أكل ويقنعها هو إنها تاكل. نادر وهو بيفتح الباب: مين هياكل دول كلهم؟ نور وهي بترمي عليه المخدة: امشي من هنا أحسن أرتكب جناية. نادر: ياخرابي على لسانك. نور: ما... لو لسان. نادر

وهو بيحط الأكل على السرير: طويل يا أختي، طوويل ومحتاج قطع. نور: نادر، أنا مش ناقصة القط والفار ده، أنت مش شايف حالتي. نادر: شايف حالتك وعارف أنتِ بتحسي بإيه، أنا كمان كنت زيك في موت أبويا. نور بعياط: ب... بس لما يموت حد عزيز عليك بسببك بتفرق... بتفرق إنك حرمتوه منك، بتفرق إنك ملحقتش تشبع منه ومن كلامه. كانت بتوحشني بس مبروحش وأقولكم عشان خايفة أسيب ماما كوثر و... وأسيبكم.

نادر وهو بيمسح دموعها: أنتي بتقسي على نفسك كده عشان خاطري، كلي. مسك المعلقة فضربتوا في كتفه ومسكت المعلقة. نور: أنااا اللي هاكل وبنفسي، متتعشمش إنك تأكلني. نادر بضحك: مش أنا قلت إن لسانك محتاج القطع. بصتله وضحكت، كان هو الوحيد اللي يقدر يخليها تضحك في أيام ما هي بتزعل. نور بدأت تتعود إن ده قدرها ومتقدرش تغير الماضي مهما كان، وإن لازم نتقبله بفرحه وبحزنه. نادر حب ياخد خطوة تغير حياته أو بالأصح يكمل نص دينه.

نادر: نوووووور، قومي من النووم. نور بنعاس: تعالي بعد 10 دقائق بس. نادر وهو بيخبطها بالمخدة: هو أنا منبه وتقوليله بعد 10 دقائق؟ قوومي. نور: يوووه، عايز إيه في الوقت ده؟ استنى الساعة كام دي؟ الساعة 9 يا ظالم. نادر: أنااا، هو أنتِ نسيتي إننا هنخرج النهاردة نتغدى هناك في البحر. نور: مش لما نفطر الأول. نادر: ما أنا بقول نستبق الأحداث عشان يوم حلو النهاردة.

نور: حلو وحش، أهو هخرج وخلاص. ابعد بقاا واطلع بره عشان ألبس هدومي وأجهز. يلا براااا. نادر من الخضة جري وقفل الباب. في المطبخ: نادر: تسلمي يا ست الكل على وقفتك دي. كوثر: ربنا يخليك ليا. طب بص، أنا عملت فراخ مشوية وحواوشي للفطار، ويعني شوية مكرونة على شوية رز. نادر: أنا كنت بقول نص ديني أكمله. تروحي بروح الشيف عندك تعملي أكل بيقضي 10 أشخاص. كوثر بضحك: يابني أسيبها تجوع؟ ولما تتجوزها هوريك إن أكل أمك حلو.

نادر: آه، هنبتديها كيد الحموات. ده استنى لما توافق عليا ونتجوز. نور كانت واقفة وهما مش شايفينها، حاسة إنها هتفقد صاحبها خلاص. نور في نفسها: هيروح ويتجوز مين؟ طب لما يتجوز مش هيجي يكلمني تاني؟ مش هلاقي حد أكلمه. كوثر بصت وراها وشافت نور: إيه ده، جميلة يا نور. تعالي شوفي كده الأكل حلو؟ نور وهي بتبص لنادر: هتخطب مين؟ كوثر: دي... نادر: دي أماني يا نور، هخطبها. نور: ط... طب تمام، ألف مبروك.

كوثر: أجيب لك حاجة تاكليها يا بنتي؟ نور: لأ يا ماما كوثر، نفسي اتسدت. نور مشت، وبصت كوثر على نادر اللي بيضحك على منظر نور. كوثر: عجبك كسرتها اللي ملهاش لازمة؟ نادر: هششش، هتسمعك، ويلا هروح أكلم أماني. كوثر: انتوا الاتنين هبلين. يارب تشغلوا عقلكم في المفيد. نور في الأوضة بتعيط ومضايقة أوي، هي عايزاه يكلمها وميكلمش بنت تانية. نادر قصد يكلم أماني قدامها: أيوه يا قلبي، إيه؟ أنتي عملتي تورته ليا؟

تسلم إيدك. آه يا حبيبتي، هنيجي ناخدك. نور سامعة الكلام وقالت بصوت عالي: هههه، هقتلهاااا، والله لأقتلها. نور راحت على المكتبة تاخد ورقة، لاقت مفيش أوراق. نور: راحوا فين؟ هما راحوا فين؟ نادر وهو بيفتح الباب: عايزة الأوراق دي؟ كان ماسكها، وبصتله نور وعيونها تشتعل غضباً. نور: هاتهم عشان مقتلكش وأقتلها. نادر: أهون عليكي تقتليني؟ وكمان هتقتليها إزاي وإنتي متعرفيش شكلها حتى؟ نور وهي بتجري عليه: هاتهم هااااا.

نور ملاحظتش إن فيه قلم على الأرض وزحلقها، وكانت هتقع، لكن لحقها نادر ورمى الأوراق ومسكه. نادر: اهدي عشان اليوم يبقى حلو. نور وهي بتخبطه وبتبعد عنه وتمسك ورقة من الأوراق المرمية. نادر: نور، هتقتليني؟ نور بصتله بغضب بس اتحكمت في نفسها، وبصتله بحزن، وبعدها بصت للورقة وغمضت عينيها وقطعت الورقة. نور بابتسامة: مهما حصل مش هقتلك. في العربية على الطريق: نادر: تخيلي يا أمي المكان اللي حجزته عامل إزاي.

كوثر: أشوف أحسن ما أتخيلوا. نادر بص في المراية وشايف نور زعلانة، كان نفسه تبقى بتضحك ومبسوطة زي عادتها. وصلوا لبيت أماني وكانت واقفة برا البيت. نور شافت أماني وانصدمت إنها أجمل منها، حتى كانت نفسها تكذب نفسها وتقول إن هي حلوة، بس أماني أحلى منها. ركبت أماني جنب نور، ونور بتبص للشباك ومتجاهلة أماني. أماني: نور صح؟ نور: أيوه، نور. أماني: نادر حكالي عنك، يابختك. نور: يابختي على إيه؟

نادر: يا مجنونة، أقصد يعني إني قلتلها إنك صاحبتي وأقرب حد ليا وكده يعني، صح يا أماني؟ أماني: والله حرام عليك. نور: حرام على إيه؟ ما تفهموني. نادر: ما أسمعش صوت واحدة فيكم لغاية ما نروح، يا إما العربية أخبطها في عربية تانية ننقلب نموت. كوثر: يا لهوي، بعد الشر يابني، في إيه! نادر: شكل اليوم هيتنكد عليا بسببكم. وصلوا المكان على البحر وقعدوا. نور: هو الناس مش عايزة تروح البحر ولا إيه؟ أنا شايفة مفيش ناس هنا.

نادر: أنا حجزت المكان ده، وهما عاملين المكان عشان أي حد يحجزوا. أماني: نادر، ممكن نتمشى شوية؟ نادر: فكرة حلوة، هتيجي معانا يا نور؟ نور: لأ، روحوا ومع السلامة. نادر: براحتك، يلا يا أماني. مشوا مسافة قليلة، نور جرت عليهم. نور: خدونيييي. بعد 5 دقائق: اتصلت كوثر على نادر عشان عايزة زجاجة مياه. نادر: هروح أجيب لأمي زجاجة مياه، خليكم هما، وأنتي طبعاً عارفة المكان كويس للرجوع لو حصل حاجة، تمام؟

أماني: تمام، روح وتعالي بسرعة. نور بصت ل أماني بغضب، ونفسها تخنقها وترمي جثتها في البحر. نور: يالهوي، أماااني. أماني: اااااااااااااا.