رواية صعب الاختيار الفصل الثامن والثلاثون 38 - بقلم اسراء ابراهيم

استيقظت نجلاء وتبحث عن جواد. بصت له بخضة وقالت: "إيه دا؟! نظرت له نجلاء بخضة، وهي ترى وجهه يتصبب عرقًا وتعبيرات وجهه تدل على أنه يحلم بكابوس مزعج؛ فقالت بسرعة: "جواد اصحى ده كابوس." وبدأت تهز فيه لكي يستيقظ. وفجأة فاق بخضة وحضن نجلاء. تصنمت نجلاء من فعلته هذه، فهو شد عليها بقوة، وكأن كان شخص ما يطارده؛ فوضعت نجلاء يديها على ظهره وبدأت تطبطب عليه، وتقول: "ده كان مجرد كابوس يا جواد اهدى."

جواد وهو مغمض عينه قال: "كنت بحلم بأمي وأبويا، وهما بيموتوا قدامي وأنا متربط ومش عارف أعمل لهم حاجة وكل لما أقرب منهم هما يبعدوا لغاية ما لقيتهم اختفوا فجأة وأنا فضلت أجري هنا وهناك أدور عليهم ولكن سامع أصواتهم وهما بينادوا عليا." نجلاء: "مجرد حلم يا جواد وربنا يرحمهم." جواد: "أنا السبب يا نجلاء أنا اللي جبت لهم العلاج منتهي الصلاحية يا ريتني ما جبته."

نجلاء: "أنت مش السبب ولا حاجة ده قضاء ربنا وخلاص عمرهم انتهى حتى لو ما كنتش جبت لهم الدوا وخدوه كانوا بردوا هيموتوا خلاص يا جواد." جواد فتح عيونه، ولكن وجد نفسه حاضن نجلاء؛ فبعد عنها بسرعة وهو محرج وقال دون أن ينظر في عينها: "آسف يا نجلاء بس بجد مش عارف كنت بعمل إيه ولا عملت كده إزاي؟! نجلاء بإبتسامة لكي تخفف عنه إحراجه لأنه ما كان يعرف بيعمل إيه؟

قالت: "محصلش حاجة قوم بقى خد شاور عشان تفوق وأنا هدخل حمام الضيوف أتوضى وأصلي الضحى؛ لأني كنت صحيت صليت الفجر." جواد: "طب بصي بعد كده ابقي صحيني أصلي الفجر يعني لو لقيتي إني مازلت نايم؛ لأن من يوم وفاة أهلي مبقتش بصحى للفجر وبيروح عليا نومة." نجلاء بإبتسامة: "عيوني حاضر يلا بقى." *** خرجت نجلاء وذهبت لكي تتوضأ، وتصلي، ولكن وجدت فوقية تتحدث في الهاتف؛ فقالت نجلاء: "السلام عليكم ورحمة الله وبركاته يا ماما."

فوقية: "وعليكم السلام ورحمة الله وبركاته يا عيون ماما، جواد صحي ولا لسه؟ نجلاء: "آه صحي بس بتكلمي مين كده! فوقية: "دي كانت أم ياسر بتبارك ليا على جوازك، وقالت هتيجي بعد ساعة تبارك ليكم." نجلاء: "ماشي." ودخلت إلى الحمام، وبعدها خرجت وصلت الضحى وذهبت لكي تعد الفطار لها ولزوجها. دخل جواد لكي يغتسل، وبعدها خرج صلى الصبح وبعدها الضحى، وخرج ألقى السلام على فوقية

التي ابتسمت له بحنان قالت: "أخبارك يابني أتمنى تكون مرتاح أصل البت نجلاء نومها يقرف كأنها بتتخانق مع النوم." جواد بإبتسامة: "لأ خالص مش أزعجتني ولا حسيت بيها أصلا." نجلاء من خلفهم: "طب ليه الفضايح دي يا ماما يعني كده ممكن يخاف ليصحى يلاقي نفسه مرمي عالأرض." جواد بإبتسامة: "عادي ما هو سريرك وأنا مقدرش أتكلم، بس أنا عايز مصحف عشان أقرأ وردي." نجلاء: "مصحفي في الدولاب مخصصة ليه مكان فيه." جواد: "تمام ممكن تجيبيه!

نجلاء: "حاضر." ودخلت الغرفة وأتت به، وهو أخذ وبدأ يقرأ ورده. دخلت نجلاء ووضعت آخر طبق عالسفرة، وذهبت لمامتها، وقالت: "فطرتي يا ماما! فوقية بإبتسامة: "أيوا يا حبيبتي فطرت مع باباكِ أكيد يعني بفطر معه، وأنتِ بقى استني جواد لما يخلص وافطروا مع بعض." نجلاء: "ماشي أروح أنا بقى أروق الأوضة لغاية ما يخلص." فوقية: "ماشي." ودخلت نجلاء لكي تروق الغرفة وفتحت الشباك، ورشت الغرفة معطر وخرجت كان جواد بيضع المصحف جنبه.

نجلاء: "يلا يا جواد عشان نفطر." جواد: "طب نادي على مامتك عشان تفطر معنا." نجلاء: "هي فطرت مع بابا مش بتسيبه يفطر لوحده." جواد: "ماشي." وجلسوا وبدأوا ياكلوا. *** في بيت ياسر كان مازال في غرفته متسطح على فراشه، ومغمض عينه، وهو يتذكر عندما كان يذهب إلى بيت نجلاء وهو يرخم عليها، ويقول في نفسه: "معقول محستش إني بلمح ليها إني معجب بيها لا وكمان بحبها، طب هي فعلا لو لاحظت كانت هترضى بيا!

يارب ريح قلبي أنا فعلا غلطت لما سيبت قلبي يحبها." دخلت والدته له، وتقول: "إيه يا ياسر مش نزلت الشغل ليه؟! ياسر: "مليش نفس يا ماما." صباح: "يابني زعلك ده لا هيقدم ولا هيرجع اللي فات بس أنا عايزة أقولك يعني قرار مش عارفة رد فعلك هيكون إيه؟! ياسر: "قولي." صباح: "رجع مني لحياتك." فتح ياسر عيونه وجلس بهدوء، وقال: "ليه؟ صباح: "هو إيه اللي ليه؟!

يعني هي أصلا بتحبك وكمان عشان بنتك تتربى هنا يعني يكون حواليها والدها ووالدتها." ياسر: "لأ مش هرجعها يا ماما عارفة ليه؟ لآني كده هظلمها أوي عن المرة الأولى رغم إني فكرت أفتح قلبي ليها بس بردوا معرفتش أحبها فما بالك دلوقتي أنا حبيت واحدة تانية وهي هتعمل إيه أنا تعرف، وبعدين أنا أكون بفكر في نجلاء وتكون مني على ذمتي دي هتبقى خيانة يا ماما لمنى."

صباح: "طب ليه يا بني مش تنسى نجلاء وتشوف حياتك هي خلاص بقت لواحد تاني، وبما تفكر في واحدة متجوزة ولا حتى لأ ده حرام فاهم؛ فنصيحة مني انساها وده الأفضل ليك فاهم." ياسر: "هحاول ماشي، بس مش هقدر أرجع منى." صباح: "دي نبقى نشوف موضوعها بعدين." وخرجت من الغرفة. ياسر بزق: "بجد حياتي بقت ملخبطة." وقام يأخذ شاور لكي يفوق، وبعدها خرج صلى فرضه، وفتح شباك غرفته وبدأ ينظر منه. دخلت مرة أخرى صباح له وقالت: "الفطار جاهز يلا."

ياسر: "مليش نفس." صباح: "طب يلا يا ياسر مش تناهدي فيا، وكمان أنا مش فطرت لسه." ياسر: "طب يلا يا ماما." وخرج يفطر، ولكن أكل بعض اللقمات، وقال: "شبعت." *** في بيت إسراء كانت تجلس مع والدتها. إسراء: "ها يا ماما قولي يا حبيبتي مقعداني جنبك ليه كده! بقالك ربع ساعة بتبصيلي." روحية: "بصي يعني لو حد اتقدملك الفترة دي هترفضى ولا هتوافقي؟!

إسراء: "مش حكاية هرفض ولا هوافق بس أنا ممكن أكون رافضة الموضوع، وبعدها يجي واحد وهو ده من نصيبي وفجأة تلاقي رأيي اتغير من رفض لموافقة." روحية: "حلو الكلام يعني لو قولتلك إني في حد متقدملك وأنتِ تعرفيه، ويعني عايز يعرف رأيك." إسراء: "لو من نصيبي فسبحان الله هتلاقيني موافقة إزاي الله وأعلم بس مين العريس." روحية: "إسماعيل هو العريس." إسراء بذهول: "إسماعيل! روحية بخوف لترفضه قالت: "أيوا هو العريس مالك انصدمتي كده!

إسراء: "يعني اتفاجئت أصل يعني يا ماما بحس من نظراته إنه معجب بيا قبل ما تبصيلي كده أنا بعتبر إني بفضفض مع صاحبتي اركني الأمومة دي على جنب شوية." روحية: "ماشي بس هو محترم على فكرة وشخصية حلوة، وكمان طيب وهيراعي ربنا فيكِ." إسراء: "طب اديني فرصة أفكر الأول وبعدين هقولك قراري." روحية: "ماشي اللي أنتِ عايزاه." *** في بيت منى كانت تكنس البيت، ورن جرس الباب؛ فذهبت لكي تفتح ولكن وقفت مصدومة إنه إزاي يتجرأ

ويجي ليها هنا قالت بتوتر: "جاي ليه يا يسري تاني قولتلك سيبني في حالي وانساني." يسري: "وهو اللي بيحب من قلبه يقدر ينسى حبيبه قوليلي يا منى هو بالسهولة دي يعني أنا مش أستاهلك ليه بتعملي فيا كده، ده أنتِ حتى مش عايزة تديني فرصة أعرفك عالحلو اللي جوايا." وكمل بدموع محبوسة في عيونه: "ليه مش عايزة تفهميني والله أنا مش وحش وكل اللي بعمله ده عشانك على فكرة."

منى: "يا يسري احنا مش لبعض ومش عايزة أتجوز تاني خلاص أنا جربت حظي، وأنا عايزة أربي بنتي وبس." يسري: "طب ليه مش عايزة تكوني ليا؟! أنا والله هخليكِ أسعد واحدة في الدنيا." منى: "مش عايزة، وانساني وشوف واحدة تقدر حبك وتسعدك وأنت كمان اديها السعادة." يسري: "مش عايز غيرك يا منى." وهنا جاء ياسر، وقال بذهول: "أنت بتعمل إيه هنا؟! يسري: "حضرتك جاي في موضوع مش يخصك."

ياسر بعصبية: "اتكلم عدل، ويلا يا حلو من هنا أنا مش عارف أنت معندكش كرامة ولا إيه؟! يسري: "لأ معنديش عندي أخسرها عشان منى فاهم وأنت مش طلقتها خلاص جاي بقى ليه؟! ياسر بسخرية: "أكيد يعني مش جاي عشان حبي فيها أنا باجي لبنتي يا أستاذ." زعلت منى جدًا من كلام ياسر، وهما كانوا بيتخانقوا، وبدأت تقارن ما بينهم، وفعلا شافت الفرق ما بين اللي بيحبها وما بين اللي مش بيحبها،

وزعقت بعلو صوتها وقالت: "كفاية بقى اتخانقوا بعيد عن بيتي." وقفل الباب في وشهم، وجلست خلف الباب وهي تبكي. أما ياسر مشي وهو مضايق أمل يسري نظر إلى الباب بحزن، وقال: "أنتِ ليا يا منى بس اديني فرصة وأنا هوريكِ إني بجد أستاهلك بس كفاية عذاب فيا يا منى." ومشي بسرعة. كانت منى تسمع حديثه، وبكت أكثر فهو يحارب من أجل أن تكون له، ولكن ياسر فهي لم تفرق معه ولا تعني له شيئًا فلماذا لا تحب يسري ولو ربع الحب اللي بيحبه ليها. ***

في بيت نجلاء دخلت لكي تُخرج ملابس جواد من الحقيبة، ولكن وجدت ورق فتحته وبدأت تقرأ فيه بذهول؛ فأخذته وذهبت لجواد وقالت: "ده بجد يا جواد! جواد بإستغراب: "قصدك إيه! نجلاء: "إنك محضر الماجستير، ودلوقتي بتحضر الدكتوراه! جواد: "أيوا فعلا بس تعرفي دلوقتي مبقاش عندي شغف أكمل يا نجلاء." نجلاء بإستغراب: "ليه؟!

جواد: "لأن أمي هي اللي كانت بتدعمني عارفة كنت بعمل كل حاجة عشان أشوف الفرحة في عينيهم قبل ما تكون الفرحة في عينيا يعني كنت بفرح لفرحتهم." نجلاء: "طب يعني أنت مفكر لو توقفت دلوقتي ويئست هما هيكونوا مرتاحين دلوقتي؟! أكيد لأ." جواد: "غصب عني بجد كرهت كل حاجة." نجلاء: "بس أنا هكون معاك وهدعمك يا جواد." نظر لها جواد نظرة طويلة لم تفهمها، وتنهد: "بجد يا نجلاء تعرفي لما حضنتك الصبح كنت حاسس براحة."

اتكسفت نجلاء عندما تذكرت فعلته الصبح؛ فهي أيضًا شعرت بشعور غريب. نجلاء: "يبقى هتكمل يا جواد عشان احنا هنكون سعداء جدًا بنجاحك وقبل مننا أهلك." جواد بإبتسامة: "حاضر يا نجلاء هكمل، وأنا واثق إنك هتكوني الدعم ليا." نجلاء: "خلي عندك ثقة بالله وكل حاجة هتبقى تمام، وربنا يرزقك من العلم من حيث لا تحتسب." جواد: "يارب، قوليلي بقى أنتِ عاملة إيه في دراستك! نجلاء: "الحمد لله كله تمام." *** في بيت سونيا دخل عادل عليها،

وقال بفرحة: "سوسو عايز أقولك على إني مبسوط." سونيا: "قول يا حبيبي." عادل: "خلاص يا سونيا بكرة بالظبط هتكون الشقة جاهزة." سونيا: "بجد! عادل: "إن شاء الله هروح بقى أعرف بابا وأقوله على دارين عشان يعمل حسابه نروح ليهم على بعد بكرة، وبكرة أكلم باباها وأقنعه على كتب الكتاب على طول." سونيا: "يا فرحة عمري ربنا يتمم على خير." عادل: "يارب." ***

في بيت دارين كانت تجلس كعادتها تقرأ في الرواية، ولكن جاء إليها رسالة أخرى من نفس الشخص، وقال: "هاجي أتقدملك قريب ويارب توافقي عليا ومتخذلنيش لأن بجد بحبك." دارين بصدمة: "هو اللي قريته ده حقيقي ولا أنا بتخيل؟! طب مين ده؟ أنا أتصل بالبت سونيا أقول ليها الأول." اتصلت على سونيا التي أجابت عليها فورًا وهي مبسوطة. سونيا: "ازيك يا دودو! دارين: "الحمد لله يا عيون دودو بس باين في صوتك إنك فرحانة." سونيا: "جدًا."

دارين: "فرحيني معاكِ ولا مليش في الفرح نصيب." سونيا: "لأ ليكي طبعًا بصي يا ستي أخويا خلاص الشقة تشطيب فيها، وهيروح يتقدم للي بيحبها بعد بكرة." دارين بحزن شديد: "آه ربنا يسعده يا حبيبتي." سونيا: "حساكِ زعلتي صح! دارين: "مبقاش فارق يا سونيا المهم كنت عايزة أقولك إن الشخص اللي بيبعتلي بعتلي مسج النهاردة وبيقولي هيتقدملي قريب وياريت أوافق عليه ومش أخذله." سونيا بصد*مة: "نعم! طبعًا أنتِ مش هتوافقي صح؟!

دارين بدموع مهددة بالسقوط: "ليه يا سونيا مش أوافق ها؟! أخوكِ خلاص هيتجوز اللي بيحبها، وأنا بقى مش ليا نصيب أفرح وأوافق على اللي بيحبني ولا أفضل عايشة في حزن! سونيا في سرها: "يعني البت دي هبلة ولا إيه؟ هتخليني أقول ليها إن أخويا بيحبها وأبوظ المفاجأة وبعدها يزعل مني." دارين: "روحتِ فين يا سونيا؟!

سونيا: "أهو يا حبيبتي بس مش قصدي اللي فهمتيه، أنا قصدي مش تتسرعي في موافقتك على أي شخص وخلاص حتى لو بيقولك بيحبك كل يمكن ده إعجاب وهيروح مع الوقت يا دارين وبعدين هو شافك فين؟! دارين: "ما هو ده اللي مجنني يعني شافني فين ويعرفني؟! سونيا: "مش عارفة بصراحة ما يمكن شخص بيتسلى." دارين: "مش أعتقد ده، وإلا ما كان هيقولي إنه هيتقدملي قريب." سونيا: "فعلا طب بصي مش حدد معاد يعني!

دارين: "لأ بس ممكن بكرة بعده ده اللي فهمته من كلامه." سونيا: "يا حلاوه! طب بصي لو جالك مش تقولي رأيك له غير لما تعرفيني." دارين: "ماشي وده اللي كنت هعمله." سونيا: "برافو يا حبيبتي." *** وقفت معها، وجريت على غرفة أخوها وقالت: "عادل الحق البت هيروح ليها واحد يطلبها من أهلها بكرة أو بعده." عادل: "طب وفيها إيه؟! سونيا: "نعم يابا فيها إيه؟!

عادل: "أيوا أنا متأكد إنها ليا وبس مهما حصل مش ده اللي قولتي ليا إني أخلي عندي يقين بأن لو من نصيبي محدش هياخدها مني وكمان أنا بدعي ربنا إنها تكون من نصيبي وعندي يقين تام إنه مش هيخذلني." سونيا: "لا أقنعتني الصراحة، وبعدين صح أنت هتكلم باباها بكرة." عادل: "فعلا يلا بقى عشان ورايا شغل مهم." سونيا: "ماشي سلام." ***

في بيت نجلاء كانت صباح وصلت لهم لكي تبارك لهم خرجت لها نجلاء بالعصير طازج بدون سكر ولا مايه عشان عارفة إنها تعبانة؛ ووضعت الصينية وقالت: "اتفضلي يا طنط كوبايتك." صباح بإبتسامة: "تسلمي يا حبيبتي." وأعطت نجلاء كوباية لجواد وكوباية لمامتها وأخذت الكوب بتاعها. جلسوا يتحدثون مع بعضهم البعض، وبعد نصف ساعة استأذنت أم ياسر ومشيت. دخلت فوقية إلى المطبخ وغسلت الأكواب، ووضعتهم يتصفوا. أما جواد قال لنجلاء: "يعني دي حماة منى صح!

نجلاء: "آه فعلا، وهي بتيجي لينا عادي." جواد: "طب احكيلي الحكاية." نجلاء: "حاضر." وبدأت تسرد له ما حدث عندما وجدت رفيف، وكل الأحداث، وكان يستمع إليها، وأحيانًا يتعصب عندما يعرف معاملة صباح لمنى، ومرة ملامحه تلين ومرة يظهر عليها الشفقة والحزن لغاية ما حكت له الحقيقة الكاملة. جواد: "يعني يسري ده بيحب منى بجد ولا بيضحك عليها؟

نجلاء: "آه لأنه دايمًا بيلح عليها إنها توافق عليه، وبيوقفها لما بيشوفها في أي مكان ومراقبها في كل وقت بس هي مش شايفة حبه ليها، وبجد صعبانة عليا، وهي كمان صعبانة عليا لأنها حبت واحد مش شايفها قدامه، لو كانت اتجوزت يسري كانت أكيد هتحبه أصل أنا بآمن بمقولة إن الحب بيجي بعد الجواز لأن من معاملة الطرفين لبعض هينتج الحب ولو كان موجود فيتثبت في قلوبهم وهيزيد كل يوم يعني لما هو كان هيهتم بيها ويسعدها ويعمل اللي يريحه ويكون معها في الحلوة والمرة ده كان هيخليها تحبه غصب عنها حبه هيتسرّب لداخل قلبها بدون ما تحس."

جواد وهو سرحان في كلامها وهو بيتخيل إن ممكن يحبوا بعض في يوم من الأيام ولا هيفضلوا كده! نجلاء: "سرحان في إيه؟! جواد: "في كلامك، بجد جميل ياريت الناس تعرف ده." "بس ممكن سؤال؟ نجلاء: "اتفضل." جواد: "هو احنا ممكن نحب بعض؟ نجلاء دُهشت من سؤاله،

ولكن قالت: "طالما فكرت في كده يبقى ممكن يحصل؛ لأنك عايز تعيشه عشان عارف إنه حلو لما يكون في الحلال، وعشان عايز تدي لعلاقتنا فرصة ومش تبقى مبنية على احنا ولاد عم وبس بل نبقى زوجين مثالين وتنشأ ما بين قصة حب بس ده مش بيحصل بالكلام ولكن بالأفعال بكل موقف هيحصل في حياتنا حتى لو كان بسيط ده هيولد الحب جوانا، ولو احنا فعلا عايزين نوطد علاقتنا ومتقبلين بعض كزوج وزوجة والأيام هي اللي هتبين لينا ده."

جواد بإبتسامة: "فعلا معك حق، الأيام هي اللي هتثبت لينا كل حاجة." ورن جرس الباب، وذهبت نجلاء لكي تفتح الباب، ولكن وقفت مذهولة، وقالت: "ياسر! ياترى هيحصل إيه؟! هل ياسر هيقول حاجة أو يحاول يوتر الجو ما بين نجلاء وجواد؟! ولا جاي ليه؟!