رواية سأحبك بالتاكيد الفصل السادس والثلاثون 36 - بقلم بتول عبد الرحمن

_هااا... فكرتِ في اللي قولت عليه ولا أنزل صورك يا حلوة. لين: سيب لي وقت أفكر. _: مَ أنا بقالي ٤ أيام سايبك اهو. لين: لو موافقتش! _: أولاً هبعت الصور لأخوكِ... ثانياً هنزلها على كل المواقع وهتبقى أشهر من نار على علم. لين: هو ده وعدك ليا... هو ده الكلام اللي كنت بتقوله... أنت إزاي قدرت تضحك عليا كده... ده أنا صدقتك وحبيتك بجد. _: وهو أنتِ فاكراه إني هتجوز واحدة وافقت تكلمني... وفوق كل ده طلعت معايا شقتي.

لين: عشان كنت واثقة فيك... أنت زبالة... أنا ندمانة على معرفتك السودة دي. _: معلش يا قلبي تعيشي وتاخدي غيرها... هسيب لك مهلة لـ٤٨ ساعة بس... بعدها أنا مش مسؤول عن اللي ممكن يحصل. تاني يوم الصبح ميرنا ودعتهم هناك ورجعت البيت. ميرنا: السلام عليكم إزيك يا ماما. منال: وعليكم السلام ورحمة الله وبركاته... الحمد لله ع السلامة يا حبيبتي. ميرنا: الله يسلمك... عاملة إيه الأخبار تمام. منال: الحمد لله. ميرنا: أومال فين لين.

منال: بقالها أربع أيام في أوضتها مبتنزلش منها ولا حتى بتروح الكلية بتاعتها... بخبط عليها تقولي إنها بتذاكر ومش عايزة حد يزعجها. ميرنا: هيَ كده دايماً! منال: لاَ... ده أنا مستغربة إنها حبت المذاكرة مرة واحدة كده. ميرنا: طب عن إذنك هطلع أشوفها. طلعت ميرنا وخبطت عليها. لين: يا ماما عندي مذاكرة قولتلك. ميرنا: أنا ميرنا يا لين... ممكن تفتحي. لين: معلش يا ميرنا عندي مذاكرة عايزة الحق أخلصها. ميرنا: طب افتحي بس ثواني.

قامت لين فتحت بس وشها كان أحمر من كتر العياط. ميرنا: مالك في إيه. لين: مالي يعني... منَ عادي اهو. ميرنا: أنتِ كنتِ بتعيطي!! لين: هعيط ليه يعني... أنا بس مبنامش كويس. ميرنا: وشك باين عليه خالص على الفكرة. لين وقتها مقدرتش تمسك نفسها وابدأت تعيط جامد. ميرنا: في إيه بس مالك... قولي لي يمكن أساعدك أنا زي أختك. لين: أنا اتدمرت... اتدمرت يا ميرنا اتدمرت. ميرنا: طب تعالي... اقعدي قولي لي مالك.

لين: أوعديني إن محدش هيعرف حاجة. ميرنا: عيب عليكِ... مفيش كلمة هتخرج بره. لين: هتساعديني! ميرنا: أكيد لو هقدر. لين: أنا من سنتين اتعرفت على واحد معايا في الجامعة واتشديت ناحيته وهو كمان فضل يلمح لي إنه معجب بيا وخدنا أرقام بعض وبدأنا نتكلم واليوم مكانش بيعدي غير لما أشوفه أو أسمع صوته... حبيته أوي وكان هو أول اهتماماتي... كان بيحصل بينا مشاكل بس برجع أصالحه وأي حاجة كان بيطلبها مني كنت بنفذها علطول.

ميرنا: قبل ما تكملي كده الارتباط حرام يا لين. لين: ليه الارتباط حرام.

ميرنا: مبدئياً كده حرام لأنِك بتعصي ربنا وده ارتباط غير شرعي يعني حرام وده مش جوزك يعني أكيد كنتِ بتتضحكي وتهزري وترققي صوتك وبتقابلي وده أكبر غلط لأن ربنا قال في كتابه "فلا تخضعن بالقول" يعني كل اللي بتعمليه أو كنتِ بتعمليه ده حرام شرعاً وبيدخل تحت العلاقات المحرمة لأنه مش جوزك أو حتى خطيبك وحتى لو خطيبك فالخطبة ليها قواعد برضو زي ما قال قبل كده شيخ محترم "علاقتك بيها قبل الزواج كفيلة إنها تدخلك النار لو متوبتش" بس

ممكن تتوبي وأبواب التوبة مفتوحة اه أنتِ بتغلطي كتير بس طول ما حد وجهك للصح وطنشتِيه يبقى هتتحاسبي عليه ربنا رحيم وهيقبل توبتك في أي وقت وخليكِ متأكدة إن الارتباط حرَامَ حتى لو أهلك عارفين لأنك بتعبدي ربنا مش أهلك وربنا محرم الارتباط وأصلاً مستحيل ولد يتجوز بنت كان بيكلمها لأن بكل بساطة طول ما البقرة بتديله لبن ببلاش هيشتريها ليه عفّي نفسك الرسول عليه الصلاة والسلام وصفنا بالمؤنسات الغاليات وخليكِ غالية علشان اللوم

أول حاجة بيبقى عليكِ أنتِ مش عليه.

لين: طب مَ أنا بحبه أوي وهو قالي إنه مش جاهز دلوقتي وطلب مني أصبر عليه. ميرنا: وعمل إيه في الآخر. لين: فلاش باك. _: أنتِ وعدتيني إنك هتيجي تشوفي ماما... أنا عايز أعرفك عليها. لين: أنا والله عايزة أتعرف عليها بس لو حد اعرفه شافني خارجة معاك من الكلية ممكن يقول لعمر أو ماما. _: متقلقيش يا ستي هنركب أوبر... ولا معاكِ عربيتك. لين: لاَ عربيتي مش هتنفع. _: خلاص أوبر... وبعدين أنا عايز أديكِ الفلوس اللي استلفتها منك.

لين: مش مهم يا حبيبي... لو أنت محتاجهم خليهم معاك عادي. _: لاَ طبعاً أنا هفضل أخد منك فلوس كل شوية كده. لين: مش مهم... المهم إنك تكون مبسوط. _: هكون مبسوط لو عرفتك على ماما. لين: بلاش تزن عليا بقى... مش هينفع صدقني. _: خلاص براحتك. لين: يووووه... أنت هتتقمص... طب قوم يلا. بابتسامة خبيثة: يلا. اخدها البيت وطلع الشقة وفتحها وهيَ دخلت معاه بس مكانش في حد. لين: أومال فين طنط. _: أكيد موجودة... ممكن تكون نايمة.

دخل جابلها كوباية عصير برتقال. _: اشربي دي على ما أصحيها. لين: مش عايزة... أنا بس عايزة أروح بسرعة. _: هزعل منك لو مشربتيهاش. لين: خلاص يا أحمد هاات. خدتها منه وشربتها وهو كان واقف مراقبها. غابت عن الوعي وفاقت لقت نفسها نايمة على سرير بقميصها ودماغها واجعاها.

بدأت تركز إيه اللي حصل وهيَ فين وافتكرت كل حاجة قامت لبست هدومها ومشيت بسرعة وروحت البيت قالت لمامتها إنها عندها مذاكرة وطلعت أوضتها لقته باعت رسالة بيقولها فيها "أنا صورتك يا حبيبتي... كل اللي طالبه منك مليون جنيه... أنا عارف إنك هتعرفي تتصرفي فيهم... لو مجبتيش الفلوس هنزل صورك وابعتها لأخوكِ... هسيب لك مهلة تفكري". لين: وأنا جهزت مبلغ بسيط ومش عارفة أتصرف في الباقي. ميرنا: ده اسمه هبل...

إنك تدفعي له اللي هو عايزه علشان بيهددك. لين: مش قدامي حل تاني. ميرنا: لاَ قدامك... أولاً أنتِ ممكن ترفعي عليه قضية عادي جداً... ثانياً أنتِ ممكن تشتكي به لمباحث الإنترنت. لين: مَ أنا مكانش ينفع أطلع معاه شقته برضو. ميرنا: ولو... ده اسمه استبزاز... سيبي أنتِ الموضوع ده عليا.....