رواية ساكن الروح الفصل التاسع 9 - بقلم ميادة يوسف

خير فيه إيه يا سلمى؟ مالها أختك؟ ماعرفش، يا أبويا. أنا دخلت عليها لقيتها كده، متشنجة. هاتي مفتاح العربية بسرعة. يالهوي يا حاج، فيه إيه مالها؟ سحر إيه جرا؟ ما خبرش، على المستشفى طوالي. في المستشفى: الدكتور: هي الحالة دي، جت لها قبل كده؟ سميرة: (بدموع) هي كان ممكن تسخن، تصدع، ترفض الأكل، إنما كده لأ. أول مرة تيجي لها. خير، مالها طمني بالله عليك؟

الدكتور: خير، إحنا هنعمل لها تحاليل، وأشعة، وهي اللي هتفسر الحالة. عايزكم تطمنوا، بس الأشعة دي هتتعمل بره، مش هنا. شاهين: كل اللي حضرتك عايزه. جيلنا بس العنوان، واكتب لنا كل حاجة. عند غنيمة: غنيمة: مالك يا بت؟ بتولدي ولا إيه؟ لسه لك شهر على ما تولدي؟ صابرين: مش قادرة يا عمتي، تعبانة جوي، وحاسة إني بموت. عايزة أروح للدكتورة.

غنيمة: بطلي تدلع ماسخ. القطط بتولد في الشارع، هو الحمل كده. تلاقيها تتداير، اجمدي أومال وصلبي حيلك. صابرين: (بسرها) منك لله يا عمتي، ربنا يورينا فيكي يوم. عند شاهين وسميرة، بعد أسبوع: شاهين: البسي شهلى يا سميرة، عايزين نلحق ميعاد الدكتور. وبطلي بكى ودموع، كله خير. سميرة: جولى يا ربي. أنا جهزت سحر. بعد ساعة: الممرضة: اتفضلوا، الدور عليكم. الدكتور: (يطلع على الأشعة) شاهين: خير يا دكتور؟ طمنا، الأشعة فيها حاجة تخوف؟

الدكتور: الحقيقة أنا مش هخبى عليكم، هي عندها أورام حميدة بنسبة ٨٠% ولازم لها علاج، وتتعاملوا معاها برعاية شديدة، وعلى نظام معين في الأدوية والأكل. سميرة: يعني إيه الكلام ده؟ يعني بنتي هتروح مني؟

الدكتور: يا مدام، إحنا مؤمنين وموحدين. شوفي حضرتك، الحباية اللي بتظهر فوق الجلد دي تنتمي للأورام. أي فيروس، أو التهاب جلدي، بينتمي للأورام. وبإذن الله تعدي على خير، والحالة سهلة التعامل معاها، والثقة بالله موجودة، والعلاج كل يوم عن يوم بيتطور. والله الشافي. اتفضلوا، ده عنوان دكتور متخصص في الحالة دي، وهو هيقوم باللازم كله. السلامة. شاهين وسميرة قاعدين في العربية، في حالة صدمة. شاهين: (بص على سحر) إيه يا سحورة بابا؟

عاملة إيه؟ أجيب لك حاجة؟ حاسة بحاجة واجعاكي؟ سحر: لا يا بابا، أنا الحمد لله حلوة. بس يلا عشان عندي مذاكرة، ثانوية يا جدعان، ولا إيه؟ شاهين: لأ يا حبيبي، هنروح وهتنجحي وتتفوجي، وتبقي اللي نفسك فيه، يارب. بس فيه علاج لازم ناخده، ونسمع كلام الدكتور تمام. سميرة: لازم نسمع الكلام، دي مافيهاش عند. عند سلمى في الكلية: سلمى: أخيراً، أخيراً! اليوم الأخير في الامتحان. يا رب نخلص على خير.

سارة: إن شاء الله. إحنا تعبنا قوي السنة دي، ويارب نخلص تعليم بقى. سلمى: شوفي كده، مش ده اسمه إيه، اللي اتزحلق يوم المطر؟ محمد: السلام عليكم. آنسة سلمى، ممكن كلمتين على انفراد؟ سارة: طب استأذن أنا، هاروح أشرب حاجة ساقعة. سلمى: إيه اللي حضرتك عملته ده؟ كلمتين على انفراد إيه؟ هو فيه بينا كلام أصلاً؟ أحرجت سارة.

محمد: عن إذنك. سلمى، لو سمحتي، أنا جاي مخصوص ليكي، ولازم أتكلم معاك، دقيقة واحدة، لو سمحتي. ممكن نروح الكافتيريا اللي قدام الجامعة؟ سلمى: أكيد، أنت مش وعيك؟ لأ طبعاً. ارجوك خليك محترم. نقابل بعض بره؟ إيه، تصدق أنا غلطانة إني سمعت كلامك ووقفت معاك أصلاً. وإياك تتعرض لي تاني. محمد: أنا آسف، فهمتني غلط. أنا بس... محتاج أتكلم معاك في موضوع مهم، حياة أو موت. ارجوك، ممكن؟ سلمى: اتفضل، خير. إيه اللي ممكن أقدمه لك؟

محمد: أنا بحبك، ومن يوم ما شفتك، وانتي بقيتي ساكنة روحي بجد، مش بأفور الموضوع. انتي بقيتي معايا وأنا صاحي وأنا نايم. ورحت طلبت إيدك، أبوكي رفضني وطردني من البيت عندكم. سلمى: تصدق؟ وأنا بطردك من هنا. أنت إزاي تسمح لنفسك تيجي وتقولي كده. حضرتك بجى المتجوز، إيه؟ امشي من وشي بدل ما أجيب لك الأمن. وإياك تعترض طريقي مرة تانية. سارة: إيه يا بنتي؟ أنتِ جاية بسرعة ليه كده؟ ومالك وشك أحمر كده ليه؟ هو عمل لك إيه أخينا ده؟

سلمى: اسكتي شوية والنبي... تصدقي إنه هو اللي جه اتقدم لي وبابا طرده. أنا مجهورة جوي. سارة: إيه؟ هو ده المتجوز؟ يا خسارة. ولا يهمك. سيبك منه، بكرة يجي اللي يستاهلك. بس تعالي، مقهورة من إيه بقى؟ هو أنتِ... سلمى: بقولك إيه، يلا خلينا نروح، واسكتي. بلا كلام ماسخ. على باب الجامعة: شاهين: سلمى، يا سلمى. سارة: مين الحلو ده اللي بينادي عليكي؟ سلمى: بابا! إيه المفاجأة الحلوة دي؟ سارة: باباكي؟ الله!

حلو قوي الجميل ده. أبوكي، والله ما يبان. أترى مامتك وضرتها بيتخانقوا عليه؟ سلمى: تعالي نعدي له وبطلي بتعاكسي بابا قدامي. بابا، طب كنت قولي إنك جاي هنا. شاهين: كان عندي مصلحة قريب، جلت أجي أعدي عليكي. دي سارة بجى؟ سارة: آه يا عمو، إزيك حضرتك؟ والله أنا فرحانة إني شفت حضرتك. على العموم، أنا كنت جاية لكم البلد. شاهين: يا مرحب، أهلاً وسهلاً. سارة: أعزمكم على خطوبتي يوم الجمعة الجاية.

شاهين: من غير عزومة، جايين بإذن الله. دي سلمى، ما فيش سيرة لنا إلا عليكي. وألف ألف مبروك. ربنا يتمم على خير. سلمى، مالك؟ فيه حاجة؟ أنتِ متغيرة. إيه حلتي حلو في الامتحان النهاردة؟ سلمى: طبعاً الحمد لله. تلاقي بس ردة امتحانات آخر يوم، وخلصنا السنة على خير. شاهين: طب تعالي نوصلك في طريقنا. سارة: شكراً يا عمو، أصل أنا مستنية خطيبي، نازلين نشتري حاجات لي عشان الخطوبة. أهو وصل هناك أهو. عن إذنكم.

شاهين: يلا يا سلمى، عايز أجيب دوا سحر الأول. مالك شكلك متغير؟ سلمى: ابدا ولا حاجة والله. خلينا نخلص نجيب الدوا. أنا جعانة نوم. هو جمال مش هيجي قريب؟ شاهين: آه، إن شاء الله. عند أمينة: أمينة: إيه يا بت يا سعدية؟ هتحايل عليكي يعني؟ جولت لك عايزة الشيخ ده، ما بتسمعيش الكلمة ليه؟ وبعدين يا بت انت، أنا هديكي فلوس كتير جوي.

سعدية: لأ يا ست أمينة، أنا أشارك في قتل، لأ. آه، ساعدتك قبل كده، بس عشان كنتي صعبانة عليا، وجوزك مهملك لحالك. جولت ما يضرش يعني، أفرحك ويجي لك. إنما أساعد في موت روح، لأ. أنا عندي عيال برضو، وأخاف عليهم. لربنا ينتقم مني، لأ. ماليش صالح أنا بالموضوع ده. أمينة: كده ماشي. غورى من هنا، ومترجعيش عندي تاني. آخر يوم ليكي هنا. ولو لسانك لبلب كده ولا كده، هقطعهولك. غورى. سعدية: الأرزاق على الله. عند محمد وسمر:

سمر: معلش يا محمد، عيد كلامك تاني كده؟ محمد: بقولك، عايز ألغي الجوازة. أنا آسف يا سمر. سمر: لا والله آسف. طب وإيه الأسباب بقى عشان نلغي الجواز فجأة كده، والفرح كمان يومين؟ أنت عارف إحنا في مدينة صغيرة، والناس هنا بتسمع دبة النملة، لأ وبيكبروا المواضيع وبيألفوا كمان عليها. إزاي تكسر قلبي كده؟ عملت لك إيه؟ وإيه بقى مبرراتك؟ محمد: الصراحة يا سمر، أنا حاولت كتير عشان أتقبل فكرة الجواز. أنا شايفك زي منال أختي، سامحيني.

سمر: وجاي تقول بعد كتب الكتاب؟ طب كنت عملت كده وإحنا مخطوبين؟ إزاي مش فكرت؟ وأنا بقى المفروض عليا أقول حاضر، واللي انت عايزه، وأخرج برة دلوقتي وأكسر فرحة بابا وماما؟ طب عمتك ما فكرتش فيها؟ طب خالو باباك ما فكرتش فيه؟ هو أخته الوحيدة، هتبقى علاقتهم مع بعض هتبقى عاملة إزاي؟ أنت أناني قوي يا محمد. وطبعاً البنت اللي ظهرت في حياتك هي السبب؟ ربنا ينتقم منها ويكسر فرحتها زي ما كسرت فرحتي. محمد: (مصدوم) اخرصي!

أوعي تدعي عليها. أنتِ أصلاً عرفتي عنها من مين؟ سمر: من خالو. حكى لي كل حاجة. محمد: هي أصلاً مالهاش علاقة بأي حاجة. وأنا، وهي ما فيش كلام بيني وبينها. إياك تجيبي سيرتها على لسانك تاني. أنتِ فاهمه؟ سمر: كمان بتكلمني بالأسلوب ده عشانها؟

طب أنا ماليش علاقة بإنك تلغي الجواز، وأنا رافضة. وعايز تتكلم في إنك تلغيه، روح اتكلم أنت مع العيلة كلها. طبعاً أنت جاي لي عشان أنا اللي أنهي. مش بقولك أنت أناني قوي. اتفضل اخرج لهم أنت لو عندك الشجاعة. وغير كده، ما فيش كلام معي. عند شاهين وسلمى: شاهين: سلمى، تعالي عايزك. جولى بجى مالك؟ سلمى: ولا حاجة والله. أنا بس... شاهين: (يشاور لها) اسكتي. أومال إيه الرسم اللي في كراساتك ده؟ سلمى: يا أبويا ده...

ياترى محمد وسلمى هيكملوا؟ إيه في كراسات سلمى؟ وأمينة وغنيمة، إيه الجديد عندهم؟ يتبع...