رواية صدفة الفصل الحادي عشر 11 - بقلم مريم اشرف

بعدما خلصت الحفلة نزل أنس ومساعدته لأوتيل. بس قبل ما يدخلوا أوضهم، ناداها بلهفة: –ها يا ندى، عملتي اللي قلتلك عليه؟ ابتسمت: –آه، كانوا جايين في عربية وأنا ركبت عربيتي ورحت وراهم من غير ما يحسوا بيا. أنس: –وبعدين؟ ندى: –ساكنين في عمارة رقم 8 شارع **. هو ده العنوان. بس إياك تقولي رقم الشقة، مش جنيه أنا! أنس ابتسم:

–مش عارف هقولك إيه، ولا من غيرك هعمل إيه. شكراً يا ندى على وقوفك جمبي. شكراً لإنك أختي اللي مخَلّفتهاش أمي. ندى ضربته على كتفه بممازحة وقالت: –يا كَشِي يِثمِر فيك يا أخويا وأشوفك في الكوشة مع مراتك. أنس ضحك: –مستعجلة أوي يا ندوش. ندى: –أوعى من قدامي يله. أنا تعبانة أوي وعاوزة أنام. رن تيليفونها وبصت على الرقم بحب. أنس: –حبيب القلب. سي يونس مش كده؟ ندى حمحمت ودخلت أوضتها بسرعة.

ضحك عليها أنس ودخل أوضته هو كمان بيفكر، هو اللي هيعملوه هيبقى صح ولا غلط. *** عند بسمة، فدخلت أوضة زياد تشوف البيبي من غير ما تكلم سهام ولا حتى تبصلها. بسمة بحب: –كوتي كوتي، قد إيه إنت حلو وصغير. زياد ضحك: –حظك يا ابني، عمتك عبيطة. يا ريت متطلعش زيها. بسمة كشرت: –ماشي يا زياد. متسمعش منه يا حبيبي، أبوك بيكذب عليك. أنا والله عقلي سليم، هما بس اللي مبيفهمونيش. كملت: –آه صحيح، هتسميه إيه؟ سهام جزت على سنانها:

–اسمها هنسميه إيه! ولا أنا ليا رأي في البيت ده؟! بسمة: –مقصدتش كده. قاطعتها: –زياد، قول لأختك تطلع، عاوزة أنام، تعبانة. طلعت بسمة بسرعة ودموعها على عيونها ودخلت أوضتها. زياد: –مش عارف جايبة الحقد ده منين؟ سهام برّقت: –أنا؟! أنا بحقد يا زياد؟! أنا بس قلتلها تطلع عشان أنام. هو مش من حقي؟! زياد: –حقك طبعاً. بس تجيبهالها بالراحة، مش تزعقيّلها وتخليها تمشي مكسورة. رقية:

–خلاص يا ولاد، هو انتوا هتتخانقوا عشان حاجة تافهة زي دي. يلا ناموا، تصبحوا على خير. زياد اتعصب وراح لبسمة. بسمة: –أيوه يا زياد، جاي ليه؟ زياد: –زعلتي مش كده؟ بسمة ابتسمت غصب عنها: –لأ طبعاً، أزعل ليه. عادي يعني. تصبح على خير. زياد ابتسم: –بصي، اسم البيبي إنتي اللي هتختاريه. بسمة: –بس... زياد: –مفيش بس يا بسمة. أنا واثق فيكي. عاوزك تذهليني. حضنته بسمة وقالت: –بحبك يا زياد. زياد: –وأنا أكتر يا بسبوستي. يلا نامي. ***

بعد يومين. بسمة: –ماما!! يا ماما، الباب بيخبط من زمان، متفتحي طيب!! رقية من الحمام: –إنتي عاوزاني أفتح إزاي وأنا جوا؟! ماتفتحي يا بت وبطلي هبل!! بسمة جمّعت كتبها اللي بتراجع فيها عشان الدراسة اللي قربت وقامت تفتح. فتحت وملقتش حد. بسمة صرخت: –إنت يا زفت يا مراد! هقول لأمك على اللي بتعمله ده!! طلع من ورا السلم واتكلم: –خطيرة يا بت يا بسمة. بسمة بصدمة: –إيه ده، أنس؟! أنس ابتسم ودخل البيت: –آه أنس يا أختي. بسمة بفرحة:

–إنت جاي ليه؟ وإزاي عرفت بيتنا؟ أنس كان هيتكلم بس قاطعته رقية: –إنت مين يا ابني؟ أنس: –احم... ممكن أتكلم مع حضرتك شوية بخصوص الآنسة ب... دورت راسها عشان ميقولش اسمها قدامها، فاكتفى بالآنسة. رقية: –اتفضل، خش الصالون على يمينك. أنس: –اتفضلوا شوية حلويات وكده. رقية ابتسمت: –تعبت نفسك يا ابني. احم... قومي معايا يا بسمة، عاوزاكي في كلمتين. بسمة مشيت وراها. رقية: –بتعرفي الولد ده منين؟ بسمة بتوتر:

–معرفوش يا ماما. أكيد شافني من البلكونة. رقية: –بلكونة إيه، هتستعبطي؟ خشّي أوضتك، البسي حاجة عدلة ومشطي شعرك على الأقل!! أكيد جاي يتقدملك. بسمة: –حاضر حاضر، بالراحة عليا. أنا رايحة أهو. أما في الصالة، فكان قاعد أنس وهيموت على نفسه من الضحك. دخلت سهام المطبخ عند حماتها وقالت باستغراب: –مين الشاب اللي قاعد في الصالة يا حماتي؟ رقية: –معرفش يا بنتي، بيقول إنه عاوزني في كلمتين بخصوص بسمة بنتي. أكيد عريس وعاوز يتقدملها.

سهام عوّجت بقها بغيرة: –عريس آآه. وكملت بخفوت: ده ولا نجوم السينما، لأ وكمان جاي بعربية آخر موديل. يا بنت المحظوظة يا بسمة، ويا حظك الوحش يا سهام. رقية اتصلت بزياد عشان ييجي يقعد معاهم وحضرت العصير وقالت بترحاب: –أهلاً وسهلاً يا ابني. اسفين لو اتأخرنا عليك. أنس رد بابتسامة: –لأ، خدوا راحتكم. هي الآنسة بنت حضرتك فين؟ بسمة قعدت جنب مامتها: –أنا هنا. هز راسه بابتسامة، فقالت مامتها:

–نعم يا ابني، إنت قلت إنك عاوزني بخصوص بسمة بنتي، مالها؟ أخد نفس عميق وبسمة غمضت عيونها بانتظار. أما سهام فبصت لهم بقرف. أنس: –أنا جاي النهارده طالب إيد الآنسة بسمة للجواز. بسمة بصدمة: –عملتها يا ابن شروق!! واغمى عليها من الفرحة.