رواية صدفة الفصل السادس 6 - بقلم مريم اشرف

بعد أيام.. بسمه نزلت من اوضتها ولقتهم بيفطروا. بسمه بصدمه: إيه ده إيه ده.. إيه كل الأكل الحلو ده يا طنط؟ شروق ضحكت وبصت لأنس: والله البنت دي عسل.. أنا معرفش مبتحبهاش ليه؟ بسمه: آه والله أنا كيوت وقمر أهو يا أنوس باشا. أنس: هقوملك والله لقوم مديكي بالجزمه!! بلعت ريقها بخوف منه وقعدت تاكل بصمت. شروق: حاسة بإيه يا بنتي.. راسك لسا بتوجعك؟ بسمه: الحمد لله بقيت أحسن.

أنس: جهزي نفسك النهاردة هنروح المستشفى عشان يغيرولك خياطة الجرح. بسمه صرخت: لااااااا.. ليه تحسسني بالوجع ده من الصبح حرام عليك. أنس ابتسم بهدوء وقال: أنا بقولك أهو. بعد مدة جهزوا وراحوا المستشفى. في الأوضة: بسمه بخفه: بسبس.. اسمعي إحنا لسا عند اتفاقنا فاكرة؟ الممرضة بذهول: إيه ده انتي تاني؟! بسمه: بالله عليكي قوليلو إني لسا فاقدة الذاكرة، أصل لسا مكملتش انتقامي فيه. في اللحظة دي طلع

أنس من الحمام وزقف بإيديه: براڤو.. لأ براڤو بجد طلع شكي في محله!! الممرضة: احم.. عن إذنكم. بسمه مسكتها من شعرها: إيه ده انتي قولتي له؟! قرب منهم أنس وشال إيديها من على الممرضة: سيبي البت هتموت في إيدك!! الممرضة خرجت. بسمه بتوتر: احم.. الجو حر مش كده؟ قاطعها وهو بيبتسم: لأ دنا هخليه بارد على روحك حالا.. انتي عاوزة تجلطيني ليه.. عاوز أعرف اتحذفتي عليا منين؟

بسمه: طب بص كل الموضوع إني كنت متغاظة منك وحبيت أنتقم منك لطريقتك معايا و.. وكمان عشان مترجعنيش لأهلي. اتكلم بصوت عالي: كان ممكن أعمل كده من غير ما تكذبي عليا!! بسمه بعياط: انت بتزعق ليه.. أنا بخاف منك كده. أنس: مانتي لو كنتي بتخافي مكنتيش تضحكي عليا. قال كده ومشي وسابها. بسمه قامت تجري وراه. دخل العربية وهي خبطت على الإزاز: أنس.. أنس أرجوك متسبنيش.. متسبنيش يا أنس والله مش هكذب عليك تاني.

أنس: لأ يا ماما شوفي هتروحي فين دلوقتي. ضحك باستهزاء. بسمه بعياط: والله لموت نفسي لو مأخدتنيش معاك.. هرمي نفسي قدام العربيات!! أنس بعصبية: وحياتك يا بسمة!! بسمه كانت هتمشي ناحية الطريق بس شده من دراعها جامد وزقها ناحية العربية. أنس: شكلك بتتفرجي على أكشن كتير. بسمه: أكشن.. يعع.. أنا بتفرج على مسلسلات تركي بتعرفها؟ أنس برطم بحاجات. بسمه: أنس ممكن توديني للبحر؟

أنس: انتي ولا يمكن تكوني بني آدمة زينا.. بحر إيه اللي نروحو؟ بسمه: أرجوك يا أنس حابة أغير جو.. أنا عمري ما رحت البحر في حياتي. أنس: هو في حد عمرو ماشاف البحر؟ بسمه بحزن: آه والله أنا.. أهلي مبيخلونيش أروح مطرح. أنس: انتي هتعيطي ولا إيه.. حاضر هنروح. بسمه: تحياتي ليك يا أنوس باشا. أنس: بسمه!!!

في نفس الوقت ببحر اسكندريه الجميل كان زياد بيتمشى مع صاحبه وبيسأله الناس عن بسمه من الصور. فضل إنه يدور عليها في الشط عشان عارف إنها بتحب البحر ونفسها تروحه من زمان. ركن أنس العربية ومشي هو وبسمه ناحية الشط. أنس: هو ده البحر يا أختي اتهنيتي؟ وقفت بإعجاب: ياااه هو ده البحر اللي الناس بتحكيلو مشاكلها.. ممكن يا بحر أحكيلك مشاكلي؟ أنس ابتسم وقال في نفسه: مجنونة والله. فضلت تحكي وتفرغ كل اللي في قلبها لدرجة إنها عيطت.

قرب منها وكان عاوز يحضنها بس اتراجع في آخر لحظة. فجأه وقف شاب وكان زياد. زياد: ممكن أسألك يا أستاذ مشوفتش البنت دي في مكان؟ بص أنس على الصورة وشهق من الصدمة. لفت بسمة على صوتهم وقالت بصدمة: ز.. زياد؟