رواية صغيرة العاصي الفصل السادس والعشرون 26 - بقلم ندى احمد

فيروز: مش مهم مين اللي بعته ده صح ولا غلط. عاصي وهو بينزل راسه: أيوه صح. فيروز: طلقني. عاصي: فيروز العقد ده قديم وأنا نسيت الموضوع ده، موضوع قديم جدا. أكيد هند اللي بعتته علشان تخرب علينا. فيروز: والمفروض أصدق؟ أنت مشوفتش بتعملك إزاي في المستشفى. أنا كنت بكذب نفسي بس خلاص كل حاجة اتكشفت، وأنت حتى مانكرتش، بالعكس بتتكلم عادي جدا. عاصي: لأني زي ما بقولك موضوع قديم. والله ما لمست ست من ساعة ما دخلتي حياتي يا فيروز.

فيروز فجأة حسيت إن توازنها اختل ووقعت على الأرض. بتعيط وهي من جواها مقهورة، وكانت نفسها عاصي يقولها إن ده كذب. وبتحاول تبان قوية بس انهارت فجأة. عاصي مسكها من كتفها وقومها ودخلها جوه حضنه. فيروز بانفعال: ابعد عني، ابعد. عاصي وهو بيضمها أكتر: والله يا فيروز بحبك، ومافيش أي حاجة بيني وبين أي حد. أنا مش بشوف غيرك ولا عايز حد غيرك. فيروز فضلت تعيط. عاصي: وحياتي يا فيروز ما تعيطي. فيروز: مش قادرة يا عاصي، مش قادرة بجد.

عاصي: والله قطعت علاقتي بيها في نفس اليوم يا فيروز، والله وقطعت الورق بإيدي. فيروز: أنا مش قادرة أتكلم. عاصي: لأ، مش هسيبك كده غير لما تنسي وتسمحيني. فيروز فجأة بقوة مزيفة خرجت من حضنه وبجدية تامة: أنا طالعة أنام، تصبح على خير. عاصي بص باستغراب من تغيرها فجأة. تاني يوم الصبح. عاصي فضل يدور على فيروز في البيت. عاصي: فيروز. فيروووووز.

وخرج الجنينة لقى فيروز قاعدة بتقرا في كتاب ولابسة بنطلون قماش أسود وتوب مبين نص بطنها، وعاملة شعرها كحكة وخصلات شعرها نازلة بعفوية وشكلها كان جميل. عاصي اتسمر مكانه من جمالها. فيروز فضلت تقرأ في الكتاب كأنه مش واقف. عاصي: فيروز. فيروز رفعت راسها ببرود: صباح الخير. عاصي: صباح النور. كنت بنادي عليكي كل ده مش سامعة؟ فيروز: لأ مسمعتش. في حاجة؟ كنت بتنده عايز حاجة؟ عاصي: مالك يا فيروز؟ متغيرة كده ليه؟ فيروز: مالي؟

ما أنا زي ما أنا أهو. عاصي: لأ، مش زي ما أنتِ. فيروز بصت في الكتاب تاني وبدون اهتمام له: عادي، مش أنا بس اللي بتغير، أنت كمان اتغيرت. عاصي بص على اسم الكتاب فطس من الضحك. اسم الكتاب: الجريمة الكاملة. عاصي: ناوية تقتليني يا فيروز؟ فيروز: أنا أبداً، أنا بأخد فكرة بس. وبعدين خلي بالك كانت طالعة موضة من قريب. مسمعتش عن اللي قطعت جوزها ونسيت الصوابع تحت السرير؟ عاصي: صوابع إيه يا فيروز؟

أنتِ هتخليني أخاف أنام معاكي في نفس البيت. فيروز بغيرة واضحة: علشان تعرف تحب في هند حلو وتيجي ليك المستشفى تحب فيك قدامي. عاصي: وأنتِ بتغيري بقى أهو. وحلوة، أومال مالك؟ كنتي عاملة مش فارق معاكي. فيروز: المفروض تحترم وجودي. وخلي بالك أنا مش ناسية حوار جوازك ده. وقفت الكتاب وأدته له بعفوية وقامت. عاصي: البت ناوية تقتلني وأنا نايم. عاصي قام وراها لاقاها دخلت المطبخ. عاصي جه وحضنها من ضهرها. فيروز حاولت تتحرك معرفتش.

عاصي: مش هسيبك غير لما تسمحيني. فيروز لفت له وأدته وشها. فيروز: مش بالساهل كده، أنت كسرت قلبي. عاصي: عمري ما أقدر أكسر روحي، أنت روحي يا فيروز. فيروز: عاصي، يعني أنت مفيش حاجة بينك وبين هند؟ عاصي: أبداً يا فيروز، ولا أي حاجة. فيروز: بجد يا عاصي؟ عاصي: بجد يا عيون عاصي. فيروز ابتسمت ابتسامة خفيفة وعاصي بدأ يقرب منها. ولسه هيقرب الباب خبط. عاصي فتح. عاصي باندهاش لاقى هند وهاشم. عاصي: أنت إيه اللي جابك أنت وهي؟

هاشم: ....