رواية صغيرة في قلب صعيدي الفصل الثاني والعشرون 22 - بقلم دعاء احمد

جاد وصل بيت عمه، البيت كان مليان إضاءة ورجالة البلد قاعدين، والشباب بيرقصوا مع زين ابن عمه. صوت ضرب النار زاد أول ما شافوا جاد المحمدي عضو مجلس الشعب. جاد بجدية ونبرة آمرة: چنا، خدي ملاك وادخلي عند الحريم دلوقتي. چنا بضيق: حاضر. ملاك دخلت مع چنا، وجاد راح للرجالة اللي رحبوا بيه، وراح لزين. جاد وهو بيحضنه: ألف مبروك يا عريس، والله فرحتنا. زين بابتسامة: الله يبارك فيك يا كبير. روحت فين طول النهار؟ خلعت أنت فاجئة كدا.

جاد: سيبك مني دلوقتي وخلّيك في نفسك. ألف مبروك. زين ابتسم وربت على كتفه بود. ملاك كانت قاعدة جنب الحجة فاطمة، وسما كانت فرحانة لأول مرة تخرج وتحضر فرح معاهم. چنا كانت قاعدة وكأنها بتستعرض شياكتها قدام البنات، لكن كانت حاسة إن الأنظار كلها على ملاك، ومعظم حريم العيلة عايزين يتعرفوا عليها ومنبهرين بيها. اتضايقت وقامت من جانبهم، كانت خارجة تكلم مامتها في الموبايل، لكن قابلتها مرات عم جاد. صفية:

أهلاً يا مرات الغالي، منورة. چنا: بنورك يا أم زين. صفية: إيه رأيك في مرات ابني؟ مش زي القمر. چنا بلامبالاة: بتعرفي تنقي. صفية حبت تحرق دمها: زي جاد بالظبط، هو كمان عرف ينقي وجاب واحدة تقول للقمر قوم وأنا أقعد مكانك. يوه، مش قصدي أضايقك يا حبيبتي. چنا بضيق وغرور: تضايقني؟ لا يا أم زين، محدش بيعرف يضايقني. وبعدين ما أنا اللي مختارة معاه البنت دي. أنتِ عارفه هو عايز يخلف وأنا بقا مش عايزة أبوظ جسمي.

صفية ضحكت وقربت منها بخبث: يعني مش علشان أنتِ أرض بور مش هتعرفي تخلفي؟ وبصراحة كدا أنا أول مرة أشوف ست بتختار لجوزها واحدة زي القمر كدا. دا انتي لو بتقوليله طلقني كان هيبقى أهون. أصل بصراحة أنا فرحانة أوي لجاد أنه اتجوزها، البت حلوة ونغشة، ضحكتها كدا تخطف القلب. ابقى احفظي بقا على جسمك كويس بدل ما يبوظ. بالاذن يا حبيبتي. چنا كانت بتبص لها بقرف وغضب. بعدت عنهم علشان ترد على والدتها. فاطمة بهمس: أنتِ قولتي لها إيه؟

صفية بود: حرقت دمها بكلمتين. حاكم البت دي حارقة دمي من زمان وهي حاطة مناخيرها في السما كدا وفاكرة نفسها بنت بارم ديله. خليها تشرب بقا. المهم يا فاطمة، إحنا لينا قعدة طويلة، لازم نتكلم. بقالنا كتير مقعدناش وانشغلت بموضوع جوازة زين. فاطمة: هنقعد، بس خلي الليلة دي تعدي ونفرح بالعيال. صفية بابتسامة: طب إيه؟ مش هنفرح بجاد قريب ونسمع خبر حلو؟ فاطمة: يارب يا صفية. في أوضة من أوض البيت. نا: بغضب: أنتِ غبية يا چنا؟

إيه العك اللي عملتيه دا؟ قلت لك حاولي تكسب جاد لصفك وبلاش مشاكل مع البت دي لحد ما أجلك. تقومي تتفقي مع أخوكي تخطفوها؟ دا أنتم أغبيا. چنا في الموبايل: ماما، أنا مش ناقصة ومش حمل كلمة. كارم كان فاكر إنه كدا هيخلصني منها وما يبقاش غيرها. لكن جه جاد عرف، ومن امبارح وأنا معرفش هو فين وجاد عمل فيه إيه. نا بحدة:

إنتي تسمعي الكلمتين دول وتنفذيهم. ابعدي خالص عنها. بعد اللي حصل دا، جاد عينه هتفضل عليها، وحاولي ترجعي ثقته فيكي. إنتِ فاهمة؟ وأوعي تقعي قدامه بالكلام ويعرف إنك كنتي متفقة مع كارم. كيد كارم مقالش حاجة عنك، لأنه لو كان قال كان زمانك عندي ومطلقة. وأنا وأبوكي هنيجي بكرة أو بعده نشوف المهزلة اللي أنتم عملتوها دي، وربنا يستر وجاد ميعملش حاجة في أخوكي. انتي سامعة؟ أنا قلت إيه؟ چنا:

سمعت يا سمعت. أنا مش عارفة البلوة دي جتني من أنهي مصيبة. چنا نزلت بعد شوية، لقيت سما بترقص مع العروسة وفاطمة وصفيه بيصقفوا، لكن ملاك مش موجودة معاهم. نزلت قعدت جنب فاطمة بهدوء، وهي بتدور على ملاك بعينيها وسط البنات، لكن مكنتش موجودة. لكن مردتش تسأل حد لأنها عارفة إنهم مش طايقينها. فضلت قاعدة لحد ما سما جت قعدت جنبها. چنا بهمس: هي ملاك فين يا سما؟ مش باينة. سما: ملاك مش عارفة، بس تقريباً شفتها خارجة من شوية مع جاد.

چنا: راحوا فين؟ سما: مش عارفة يا چنا. متقلقيش، مدام مع جاد أكيد كويسة. چنا: آه، أكيد كويسة. سما: ما تيجي ترقصي. چنا كانت بتشيط حرفياً، لكن مكنتش عايزة تخسر كل اللي حواليها، فقامت معاها. في عربية جاد. ملاك باستغراب: أنا مش فاهمة، أنت أخدتني ومشّينا فجأة ليه؟ وبعدين سبنا ماما وسما وچنا. جاد بابتسامة مراوغة: ماما وسما وچنا هييجوا مع مصطفى. وليه أخدتك وفجأة كدا؟

علشان زهقت من القعدة هناك، وفكرت كدا قلت ليه مهربش وأخدك معايا. ملاك بابتسامة: طب هربنا هنعمل إيه؟ جاد غمز لها بخبث: لما نوصل هقولك. بعد مدة، رجعوا القصر. ملاك خرجت من أوضة الملابس بعد ما غيرت فستانها ولابست بجامة مريحة. لقيت جاد قاعد على طرف السرير. رفع عينيه وابتسم لها. جاد: تعالي يا ملاك. قعدت جنبه، لقيته بيطلع علبة قطيفة صغيرة من الدرج. ابتسم وهو بيطلع منها خاتم ماس شكله جميل. مسك إيدها ولابسه ليها. ملاك بدهشة:

دا ليا؟ جاد بابتسامة: إيه رأيك؟ حلو؟ ملاك بتوتر: دا شكله غالي أوي. جاد: يا ستي، هو أنا قلت لك ادفعي حقه؟ دا خاتم جوازنا أصلاً. أنا فكرت كدا وعرف إنّي مجبتش لك أي حاجة من وقت ما اتجوزنا. وبعدين هو مش غالي أوي يعني. المهم عجبك. ملاك بابتسامة وهي بتحاوط رقبته بدلال: أوي، شكله جميل أوي. جاد ابتسم بحب ومال عليها، باسها برقة. بعد ساعتين تقريباً. مصطفى وصل البيت وهو ووالدته، وچنا، وسما.

چنا لمحت عربية جاد مركونة برا. نزلوا من العربية ودخلوا البيت كلهم. فاطمة بصوت عالي نادت على الشغالة: يا توحة، بت يا فتحية. فتحيّة جت بسرعة وباين إنها كانت نايمة: نعم يا ست فاطمة. فاطمة: مشوفتيش جاد بيه؟ فتحيّة بحرج: كان هنا هو وملاك هانم. سما: أيوه، يعني هو راح فين دا؟ سبنا من ساعتين تقريباً. چنا كانت حاسة بنار جواها من فكرة إنه يكون مع ملاك: تلاقيه في أوضة الجنينة بيخلص شغل كالعادة. مصطفى جه

بعد ما ركن العربية وسمعهم: لا، جاد مش هناك. الأوضة فاضية. تلقيه فوق لأن عربيته مركونة برافو. فاطمة بابتسامة: ربنا يسعده. ياله يا مصطفى، خد مراتك واطلع، وأنا هستنى أبوك على ما يجي هو وسليم. چنا طلعت أوضتها وهي متضايقة من نفسها إنها أول ما خرجوا مخرجتش وراهم. تاني يوم الساعة حداشر. كانوا قاعدين على السفرة والفطار قدامهم كلهم. صحيوا متأخر لأنهم كانوا سهرانين في الفرح. الحج محمد:

غريبة، جاد أول مرة يتأخر كدا. دا مشي قبلنا كلنا امبارح. معقول لسه نايم لحد دلوقتي؟ دا الساعة 8 بالظبط بيكون بيفطر. فاطمة بابتسامة خبيثة: ما تسيبه يا حج، يعني هو كل يوم لازم يصحى على معاده بالظبط؟ تلاقيه كان سهران. وبعدين دا عريس جديد. چنا بصوت عالي وغضب: فتحيّة، يا فتحيّة. فاطمة: في إيه يا چنا؟ براحة. وبعدين ما تتكلمي بصوت واطي. فتحيّة بسرعة: أيوه يا هانم. چنا بحدة وهي بتفرغ فيها غضبها:

بقالي ساعة بنادي عليكي، أنتِ أطرشيتِ؟ سما: في إيه يا چنا؟ براحة، مش كدا. أنتِ تكلميها كدا ليه؟ چنا بغرور وتكبر: أنا أكلمها زي ما أنا عايزة. أنا چنا الشافعي، وبعدين دي حتة شغالة، لا راحت ولا جت. محمد بغضب وحدّة وهو بيضرب على السفرة بغضب: وإنتي هنا في بيت المحمدية، يعني اللي يقعد فيه يقعد بأدبه. وبعدين كلنا خدامين لقمة العيش. سما بضيق: معلش يا فتحية، أصل في ناس جواها كبت وملقتش غيرك تعرف تطلعه عليه. چنا بهدوء:

امشي، اطلعي لجاد بيه وقولي له إننا مستنينه على الفطار. فتحيّة مشيت وهي مفوضة أمرها لله من أعمال چنا، وهي بتلعن الحاجة اللي خلتها تشتغل عند واحدة زي دي. فتحيّة لنفسها: ربنا على الظالم، والله تستاهلي اللي مراته تعمله فيكي. في أوضة جاد. صحي على صوت خبط على الباب. فتح عينيه بنوم، ابتسم وهو شايف ملاك نايمة في حضنه. جاد بصوت عالي نسبياً: مين؟ فتحيّة: أنا فتحية يا جاد بيه. چنا هانم بعتاني أصحى حضرتك. جاد:

طيب، روحي أنتِ دلوقتي. جاد ابتسم بخبث وهو بيصحي ملاك: ملاك... ملاك، قومي يا حبيبتي. ملاك بنوم وعدم وعي: أنا عايزة أنام. جاد: ملاك، فوقي. قومي. ملاك فتحت عينيها بنوم وبصت له بخجل وهي بتبعد. جاد بابتسامة: صباحية مباركة يا حبيبتي. ملاك بابتسامة: صباح الخير. هي الساعة كام؟ جاد: تجيلها حداشر ونص. ملاك: إحنا اتأخرنا أوي، زمانهم تحت بيقولوا. جاد بابتسامة خبيثة: بيقولوا إيه؟

وبعدين تلقيهم أصلاً لسه صاحيين، لأن أكيد جيهم من الفرح متأخر. ملاك بخجل: بس إحنا سبناهم من بدري وأنا مكسوفة أنزل. جاد بابتسامة: متشغليش بالك بيهم، وبعدين واحد ومراته محدش له عندهم حاجة. ياله، كفاية توتر. بعد مدة. جاد كان واخد دش وقاعد مستنيها لحد ما تخرج وهو فرحان. ملاك خرجت من أوضة الملابس لابسة دريس طويل أحمر وحجاب أوف وايت. بصت له بتوتر. جاد بدهشة: إنتي دا كله ما غيرتيش؟ ملاك باستغراب: مانا لابسة أهو. جاد بغضب:

أحمر... لا على جثتي. ملاك بقوة: بس هو عجبني وكان نفسي ألبسه. أظن أبسط حقوقي إني ألبس اللي يعجبني طالما محتشم ومحترم. وبعدين فيها إيه ما چنا بتلبس اللي هي عايزاه وأنت مش بتعترض، اشمعني أنا؟ جاد: ملاك، ما تختبريش صبري ولا غيرتي عليكِ، لأنها نار ممكن تدمر كل حاجة وأي حد. غيّري الفستان ده وكفاية تحطي نفسك في مقارنة مع چنا. لأنك مش زيها. و علشان خاطري ادخلي غيري الفستان ده. كمل كلامه وهو بيحاوط خصرها بحب:

وبعدين بقا أنا بغير عليكِ من عيوني، أقوم أسيبك تنزلي كدا قدامهم كلهم. ملاك ابتسمت وأخدت نفس عميق بارتباك: طب انزل أنت دلوقتي وأنا هغير وأنزل وراك علشان يعني محدش يقول حاجة. جاد بصرامة: لا، هننزل سوا. ياله ادخلي غيري، هستناكي.