رواية شبيهتي القوية الفصل الخامس 5 - بقلم نشوة عادل

شاف خيال بيجري ادامه. غمض عيونه وفتحها لقى الخيال بيجري عكس الاتجاه. جرى يوسف ناحيته وهو بيقول: "استنى اقف عندك ي جبان." خرج الجميع ع صوت يوسف العالى، لكن صدمتهم كانت كبيرة لما لقوه بيتكلم مع حد مش موجود وبيتخانق معاه. يوسف: "انت لو راجل هتواجهني وش لوش مش هتعمل زي الحرامية." ماهر بتعجب: "انت بتكلم مين ي ابني؟ يوسف: "بكلم الحيوان ده ي بابا هكون بكلم مين يعني." ماهر: "يوسف مفيش حد غيرنا."

يوسف بصريخ: "يعني إيه مفيش اومال اللي انا ماسكه ده يبقى مين انتم عاوزين تجننوني." رجاء بحزن: "اهدى ي حبيبي معلش اصل احنا خايفين عليك بس سيبه ونتفاهم." ماهر بوشوشة: "يسيب مين انتي كمان هو أنا اللي اتعميت ولا إيه؟ رجاء: "ارجوك ي ماهر هاوده وخدوا ع قد عقله لحد ما نتصل ع الدكتور عصام يجى يكشف عليه." ماهر: "خلاص ي يوسف سيبه والحرس هيعلموه الأدب يا سيف خد أخوك ع اوضته عشان يرتاح."

بالفعل أخده سيف ع اوضته وبمجرد ما دخل نام ع طول. وبعد مدة بسيطة وصل دكتور عصام وكشف ع يوسف وخرج ليهم. رجاء: "خير ي دكتور؟ عصام: "لازم يوسف يحلل ضروري واشوف التحاليل دي بكرة." وهنا خطرت بدماغ ريهام فكرة وقالت بعلو صوتها: "ي دكتور عصام يوسف بياخد من العلاج اللي حضرتك كتبته ليا." عصام: "قصدك البرشام اللي حذرتك منه؟ ريهام: "ايوة ومن أول يوم كمان."

عصام: "دي كارثة ده معناه إن يوسف أدمنه وبكده لازم يتنقل ع مصحة نفسية ف اقرب وقت عشان نلحقه." بدأت ريهام تراقب رياكشنات كل الموجودين وكانت عنيها ع ماهر وسلمى وسيف بالاخص ولاحظت توتر سلمى وأنها بتفرك بايدها وشافتها بتهرب وتدخل ع اوضتها. عند ملك واسراء... حكت ملك اللي حصل لاسراء اللي كانت بتسمع ليها باستمتاع: "والله جدعة كان نفسي اكون موجودة عشان أشفي غليلي."

ملك: "المهم دلوقتي انتي لازم تعملي تحاليل عشان نعالجك من الزفت ده ف اقرب وقت." اسراء: "إن شاء الله هبدأ من بكرة صحيح هى ريهام مجتش معاكي ليه؟ ملك: "هي قالت إنها عاوزة تروح من بدري الفيلا عشان تمخمخ ليهم." اسراء: "طب رني عليها كده عاوزة أكلمها ضروري." بالفعل رنت ملك ع ريهام اللي دخلت ع اوضتها وردت. اسراء: "الو ي ريهام كنت عاوزة أحكيلك ع حاجة." وبدأت اسراء تقولها ع اللي دار بينها وبين احمد.

ريهام بفرحة: "بجد طيب هو فعلا متعافي ولا بيضحك عليكي؟ اسراء: "معتقدش لان شكله وكلامه ما يدلش أبدا إنه واحد متعاطي." ريهام: "طيب بصي مترديش عليه واهربي منه بأي حجة أوك." اسراء: "أوك معرفتيش مين اللي بيحطلي البرشام؟ ريهام: "أنا شاكة بس قريب أوي هتأكد وعاوزة أقولك إن السحر اتقلب ع الساحر." اسراء: "إزاي يعني؟ ريهام: "اللي اسمه يوسف طلع بياخد من البرشام ده وأدمنه ودكتور عصام قال إنه لازم يتحول لمصحة عشان يتعالج."

اسراء بدموع: "إيه؟ يو... يوسف! لا يوسف لا طب ..طب هيعمل إيه ولا هيبقى كويس إزاي؟ ريهام: "ما قولتلك لازم يروح مصحة." اسراء: "أنا جاية حالا لازم أشوفه وأطمن عليه بنفسي." ريهام: "إنتي مجنونة تيجي فين كده أمرنا هيكشف." اسراء: "مش هقدر ي ريهام لازم أشوفه وأطمن عليه عشان خاطري بليز." ريهام: "خلاص استنى لحد ما يروح المصحة وابقى روحي زوريه هناك وخلاص." اسراء: "م..ماشي بس خلي بالك منه عشان خاطري."

ريهام: "إن شاء الله ماما كويسة؟ اسراء: "اه الحمدلله أنا هروح ليها دلوقتي." ريهام: "أوك باي." قفلت ريهام ونزلت ع المطبخ وشافت رحاب وصفاء واقفين بيتكلموا. ريهام: "احم مساء الخير." صفاء: "مساء النور ي بنتي محتاجة حاجة؟ ريهام: "كنت عاوزة أشرب بس." صفاء: "الا صحيح اللي سمعناه ده ي ست اسراء." ريهام: "إيه اللي سمعتوه؟ صفاء: "إن أستاذ يوسف طلع مدمن."

ريهام: "للأسف أيوه طلع بياخد من البرشام اللي كان مكتوب ليا والبرشام طلع متبدل يعني فيه حد كان عاوز يأذيني." كل ده وعيونها ع رحاب اللي اتوترت وكانت بتبعد نظرها عن ريهام اللي قربت منها: "انتي بعضمة لسانك قولتيلي إنك انتي اللي بتجيبيلي البرشام لما بيخلص ومبتخرجيش غير لما بتتأكدي إنها أخدته يعني إنتي كنتي عارفة كويس إن البرشام ده متبدل." رحاب بتوتر: "مين ... أنا ... لا طبعا مستحيل أعمل حاجة زي دي أبدا."

ريهام: "امممم حلو أوي الكلام ده يبقى لما تيجي بقى قدام الظابط قولي الكلمتين دول وخلي بالك أنا سجلت كلامك يعني إنتي هتشيلي الليلة وتروحي ف ستين داهية." رحاب وهي بتمسك إيدها: "أبوس إيدك ي ست اسراء أنا مليش ذنب حتى أقسم بالله العظيم ما أعرف إن البرشام بيتبدل لإن مش أنا اللي بجيبه أصلا." ريهام: "اومال مين؟ رحاب: "عمك هو اللي بيجيبه ليكي دايما." ريهام باستغراب: "عمي؟ رحاب: "ايوة."

ريهام: "يعني هو اللي طلب منك تتأكدي إنها بتاخده مش كده؟ رحاب: "لا مش هو دي الست سلمى." ريهام: "وكدبتي ليه عليا وقولتي إن ماما هي اللي طلبت منك كده! رحاب: "ست سلمى هي اللي طلبت مني كده عشان يعني انتوا ع خلاف دايما بس هي بتحبك وعاوزة مصلحتك." سرحت ريهام شوية وابتدت تفكر هل سلمى وماهر متفقين مع بعض ولا فيه حاجة تانية هي لسه متعرفهاش. فاقت ع صوت رحاب:

"والنبي يا ستي سامحيني أنا والله ضحية وممكن أقول كده قدام الظابط عادي أنا فعلا مظلومة." ريهام: "خلاص ي رحاب اهدى أنا هطلب منك خدمة واحدة وانتي كمان ي دادة صفاء الكلام ده ميطلعش برة لجنس مخلوق لا جوة البيت ولا برا." رحاب وصفاء: "حاضر." طلعت ريهام ع غرفتها وسمعت صوت سلمى بتتكلم مع حد وسايبة باب الأوضة مفتوح. وقفت ريهام وسمعتها بتقول: "بقولك يوسف أخويا طلع بياخد من البرشام اللي كنت باخده للزفتة اللي هنا وووووو.....