رواية شبيهتي القوية الفصل الثالث 3 - بقلم نشوة عادل

فيه إن البرشام اللي إنتي بتاخديه ده هو السبب في التهيوّات اللي كنتي بتشوفيها بليل، وده معناه إن فيه حد هنا عاوز يجننك. إسراء بدموع: إيه الكلام اللي بتقوليه ده يا ريهام وإزاي عرفتي؟ ريهام: العلبة عكس الشريط اللي جوه ده تمويه عشان إنتي متعرّفيش الحقيقة، ولأنهم عارفين إنك هبلة. إسراء بوجع: عندك حق، أنا فعلاً أكبر هبلة.

ريهام: أنا آسفة، متزعليش مني، والله مقصدتش. أنا بس عاوزاكي تفوقي، لأن الطيبة الزيادة دي مش كل الناس تستحقها. ومتقلقيش، أنا هعرف مين ورا الموضوع وغايته إيه. إسراء: أنا متشكرة أوي ليكي يا ريهام، وحقيقي بشكر الصدفة اللي عرفتني عليكي. ريهام بابتسامة: ولا يهمك يا قمر، خلي بالك من ماما وسلّميلي عليها كتير. قفلت ريهام وقالت بصوت عالي: شكل الحوارات وراكي كتير يا إسراء، بس أنا هعرف أجيبلك حقك بعون الله.

مسكت فونها ورنت على ملك اللي كانت لسه نايمة. ملك: كنسلت عليكي مرة، افهمي إني مش عاوزة أكلمك وعاوزة أنام، يارخمة. ريهام: مش وقت استظرافك، فُوقي كده عشان ورانا مشوار. ملك وهي بتتعدل: مشوار إيه إن شاء الله؟ ريهام: هنروح عيادة دكتور عصام. ملك باستغراب: اشمعنى؟ ريهام: مش هنقعد نرغي على الفون كتير، خلينا نتقابل وهفهمك في الطريق. ملك: أوك، مسافة السكة. بالفعل قامت ملك لبست وراحت لريهام، اللي أول ما شافتها قرصتها.

ملك: عاااا! إنتي حيوانة! إيه اللي عملتيه ده؟ ريهام: عشان تبقي تقوليلى يابيئة تاني، العلامة دي بقى تخليكي متنسيش إني ريهام مش إسراء. ملك: أعوذ بالله، يلا احكيلي. بدأت ريهام تحكي كل حاجة لملك، اللي كانت مصدومة ومش مصدقة. ملك: يخبر! طب مين ليه مصلحة يعمل كده؟ وبعدين إنتي رايحة لدكتور عصام ليه؟ ريهام: هتفهمي لما نوصل. أول ما وصلوا على العيادة وكشف عصام على ريهام على إنها إسراء.

عصام: عال أوي، صحتك أحسن كتير، وقفي العلاج بقى. ريهام: أي علاج؟ عصام: كل الأدوية اللي أنا كنت كاتبها ليكي. أخرجت ريهام العلبة من شنطتها وقالت: قصد حضرتك على البرشام ده؟ عصام: أيوه. بعدها خرجت شريط وقالت لعصام: طب وده؟ عصام بصدمة: إيه ده؟ مين اللي كتبلك البرشام ده؟ ريهام وهي بتراقب ريأكشناته وكلامه: هو مش حضرتك اللي كاتب ليا العلاج ده؟

عصام: لا طبعاً، مستحيل أكتب لأي مريض دوا زي ده يابنتي، ده جرعة زيادة منه ممكن تخلي الإنسان يدمنه ويكون سبب في جنانه وانتحاره. ملك بصدمة: ينهار أزرق، ده طلع بجد. عصام: مين اللي خلاكي تاخدي من الدوا ده يابنتي؟ ريهام بسرعة: لا، مش أنا اللي باخده، دي... دي واحدة صاحبتنا، وكنت عاوزة أتأكد من حضرتك إذا كان العلاج ده كويس أو لا. عصام: اطلبي منها توقفه، وكمان تباشر مع دكتور عشان تعرف مدى تأثيره عليها.

ريهام: تمام، شكراً يادكتور، بس ممكن أطلب من حضرتك طلب؟ عصام: طبعاً يابنتي، اتفضلي. ريهام: مش عاوزة حد يعرف إني جيت كشفت النهاردة من البيت، ممكن؟ عصام باستغراب: طب ليه؟ إنتي بقيتي زي الفل. ريهام: عاوزة أدلع عليهم شوية وأعرف غلاوتي عندهم. عصام بضحك: ماشي يستي، حاضر. بعد ما خرجوا ونزلوا. ملك: تعالي هنا، فهميني إنتي جيتي هنا ليه؟ ريهام: كنت عاوزة أتأكد الدكتور ده متفق معاهم ولا لا، وواضح إنه ما يعرفش حاجة، فهمتي.

ملك: ياسلام يختي، وحتى لو كان هو كنتي هتعملي إيه يعني؟ ريهام بضحك: معلش، مش هعتب عليكي أصلك لسه متعرفنيش، يلا قدامي عشان تروّحيني. ملك: إيه؟ مش هتقابلي إسراء وتزوري مامتك؟ ريهام: النهاردة لا، عاوزة أروح أقعد هناك من بدري وأمخّمخ لهم. ملك بضحك: ربنا يستر عليهم. عند إسراء، كانت نازلة من بيت ريهام بعد ما استأذنت من أمها عشان كانت مخنوقة خصوصاً بعد اللي عرفته من ريهام. لقت شاب عمال ينده عليها بس هي مش سامعاه، فمسك إيدها.

الشاب: ريهام، لو سمحتي اسمعيني. إسراء وهي بتبعد إيده: ابعد إيدك عني يجدع إنت، وبعدين أنا مش ريهام. الشاب باستغراب: مش ريهام إزاي يعني؟ إسراء بسرعة بعد ما استوعبت: إنت مين وعاوز مني إيه؟ الشاب باستغراب أكتر: أنا مين؟ إنتي نسيتي حبيبك خلاص ياريهام؟ أنا عارف إني بقالي سنة غايب عنك، تنسيني بسرعة كده. إسراء باستيعاب: لا، مش قصدي كده، أقصد إنت جاي عايز مني إيه دلوقتي؟

الشاب: عاوز أفهمك أنا اختفيت ليه وراجع ليه، ممكن بس نقعد في مكان ونتكلم. إسراء باستسلام: اتفضل. راحوا على أقرب كافيه وقالها: بعد ما إنتي عرفتي إني مدمن قررت أعالج نفسي وروحت مصحة نفسية، والحمد لله في تلات شهور اتعافيت نهائي وبدأت أصلي وأقرب من ربنا، وربنا كرمني وسافرت الإمارات واشتغلت هناك في شركة وكمان بكمل الماجستير زي ما إنتي كنتي بتتمني. أنا قررت أبعد فعلاً عشان لما أرجع أرجعلك زي ما كنتي إنتي عايزاني.

إسراء: طب الحمد لله إنك اتغيرت لنفسك قبل أي حاجة، بس أنا مش فاهمة إنت عاوز مني إيه دلوقتي يا... الشاب: أحمد ياريهام، وأكيد يعني عاوزك تسامحيني وتديني فرصة. إسراء: أيوه، بس أنا مش ريهام وووووو....