رواية شمعة الحب لا تنطفئ الفصل الثامن والعشرون 28 - بقلم جنات

ريم وصلت وكان مكان فاضي ومافيش فيه غير مخزن قديم. ريم نزلت من التاكسي ودفعت الفلوس لسواق ومشت ناحيه المخزن ودخلت من الباب اللى كان مفتوح. واتصدمت من اللى شافته. كان عزام قاعد وحاطط رجل على رجل وواقف جمبه مروان وفى مأذون قاعد جمب عزام وباين عليه الخوف. عزام بص لمروان: مش قولتلك بنتي غبيه زي امها وهتيجي اول ما تقرا الرساله. ريم بلعت ريقها بخوف ولسه هتجرى عشان تخرج من المخزن. مسكها واحد من الحرس اللى ظهر فجأه قدامها.

عزام قام من مكانه وقرب منها ومسكها من دراعها بقوة: هو دخول الحمام زي خروجه ولا ايه ياحلوة... مش هتخرجي من هنا الا وانتي على ذمه مروان. ريم: لا مش هيحصل مستحيل اتجوزه. ريم كانت بتقاوم عزام بقوة بس في فرق في القوة. عزام شدها وقعدها جمب المأذون: اكتب ياشيخ. ريم بصت للمأذون: لا مش هيكتب... انا متجوزة والله العظيم. الماذون: انتي ازاي عايزني اجوزها وهي متجوزه؟ عزام: ارمله ياشيخ. ريم: لا مافيش حاجة بتثبت ان مراد مات...

يعني متقدرش تجوزني انت فاهم. مروان: هو انتي عايزة اثبات اكتر من النار اللي شوفتيها وهي بتاكل الفيلا وحبيب القلب جوا. ريم عيطت وقامت وقفت وكانت بتقاوم ابوها بقوة وعضت ايده. عزام من قوة العضة سابها وهى جريت على باب المخزن. ومروان جرى عليها ومسكها من طرحتها: ماتتهدي بقي يابت انتي. ريم كانت بتقاومه بقوتها كلها وفجأة النور قطع. عزام: ايه اللي حصل؟ مروان: مش عارف.... رافت روح شوف القاطع بسرعة.

فجأة مروان اخد ضربة على راسه ووقع على الارض. مروان: ااااااه..... الحق بنتك ضربتني وهربتي. عزام: هربت ازاي.... حد يفتح الكشاف ياحمير بسرعة. رجاله عزام كلهم فتحو كشافات التلفونات وريم ماكنتش موجودة في المكان. ومروان راسه بتنزف وجمبه على الارض طوبة كبيرة وعليها دمه. عزام بعصبية: دورو عليها في كل مكان بسرعة اكيد مش هتقدر تبعد. الكل بدأ يدور على ريم في كل مكان وكأن الارض اتشقت وبلعتها. وعزام كان هينفجر من غضبه وعصبيته.

*** صباح يوم جديد. كارما صحت لاقت نفسها في الاوضة استغربت لانها كانت قاعدة في الريسبشن. وبصت على الاوضة وعينيها دمعت لما افتكرت لما كانت بتختار كل حاجة في الاوضة مع زين. قامت من على السرير وخرجت برا الاوضة ونزلت تحت. وكانت بتتفرج على كل حاجة في الفيلا اللي ماخدتش بالها منها لما جت مع زين امبارح. وتقريبا كل حاجة زي ما اختاروها هي والبنات.

وافتكرت لما كانوا بيخططوا هيعملوا ايه لما يعيشوا سوا وعيطت لانها قاعدة فيها لوحدها. واتخضت لما ظهرت قدامها واحدة. : صباح الخير ياهانم. كارما: انتي مين؟ سوسن: انا سوسن خدامتك ياهانم. كارما اطمنت: كارما اسمي كارما.... انتي جيتي امتى؟ انا فاكرة اني كنت قاعدة هنا ازاي طلعت فوق؟ سوسن: يمكن البيه اللي طلعك ياهانم. انا شوفته نازل من فوق بدري ووصاني افضل معاكي واخلي بالي منك.

كارما ابتسمت بحزن: يعني جه وشالها وطلعها الاوضة. طب ليه خرج قبل ما اشوفه؟ سوسن: تحبي احضرلك الفطار عشان تاخدي العلاج؟ كارما: هو زين اللي قالك؟ سوسن: ايوا ياهانم. كارما: قولولي كارما بلاش هانم دي. وبعدين انتي شكلك اكبر مني عيب لما اخليكي تقوليلي ياهانم. سوسن: حاضر يابنتي كدا كويس. كارما ابتسمت: كويس. سوسن: تحبي تفطري هنا ولا فوق؟ كارما: ماليش نفس لما اجوع هعرفك. كارما سابتها وطلعت اوضتها ونامت على السرير وفضلت تعيط.

*** في قصر الحديدي الكل متجمعين على السفرة ماعدا زين وريم. صفاء: هو زين وكارما وريم لسه نايمين؟ حياه: لا ياصفصف زين وكارما مرجعوش القصر اصلا.... زين جه اخد شويا حاجات وقال انه هيقضي كام يوم هو وكارما سوا وبعد كدا هيرجعو. وريم خبطت عليها مفتحتش قولت يمكن نايمه. صفاء: ربنا يسعدهم. فريده اضايقت من كلام حياه ونادت على فاطمه بعصبية: فااااطمه. صفاء: مالك يافريده؟ فاطمه جت بسرعة: في حاجة ياهانم. فريده: طلعيني اوضتي يلا.

الكل استغربوا طريقتها اللي اتغيرت فجأة. يحيي: انا هروح الشركة. حياه: حاضر ياحبيبي... وانا هطلع اشوف ريم ياصفصف. صفاء: حاضر ياحبيبتي. *** حياه طلعت وخبطت على ريم برضو مش بتفتح. حياه فتحت الباب ودخلت ولاقت الاوضة فاضية. خبطت على الحمام مافيش صوت برضو فتحته كان فاضي. حياه: راحت فين دي؟ حياه طلعت تشوفها يمكن طلعت على السطح ماكنتش موجودة برضو. حياه نزلت لصفاء: هي ريم نزلت من اوضتها ياصفصف؟

صفاء: لا ياحبيبتي انا صاحية من ومحدش نزل. هي مش في اوضتها. حياه: لا ومش على السطح برضو. صفاء: هتكون راحت فين؟ طب رني عليها. حياه: استنى. حياه رنت كان فونها مقفول. صفاء بخوف: هتكون فين ياحياه؟ حياه: اكلم يحيي اعرفه. صفاء: استنى انتي شوفتيها في الجنينة؟ حياه: لا بس انتي قولتي انها منزلتش. صفاء: اخرجي شوفيها يمكن نزلت وانا مش واخده بالي. حياه خرجت الجنينة ودورت على ريم مش موجودة. حياه دخلت لصفاء: مش موجودة ياصفصف.

صفاء بخوف: كلمي يحيي بسرعة ياحياه. حياه: حاضر. *** في شركة الحديدي زين ويحيي قاعدين سوا وزين سمع مكالمة فريده وحكاله على كل حاجة. يحيي: معقول تعمل كدا! دانا قولت اتغيرت. زين: اللي زي فريده دي شبه الحية ومستحيل تتغير. يحيي: وانت ناوي على ايه؟ زين: هبعد كارما عن القصر بأي طريقة وعنها. ويا ريت حياه وريم كمان يبعدوا عن القصر. احنا مش عارفين نواياها.... بس لازم كل حاجة تتم في سرية عشان متحسش بحاجة.

يحيي: المشكلة اننا لو بعدناهم كلهم من القصر هتحس اننا شاكين فيها. زين: انا بحاول الاقي طريقة. يحيي: انت عرفت كارما؟ زين: لا. يحيي: يعني هي مسألتش عن سبب وجودها في الفيلا لوحدها؟ زين: سألت وانا فهمتها انه عقاب عشان خرجت من غير ما تعرفني. يحيي: زين كارما حساسة جدا ومتنساش انها حامل ومش لازم تزعل. زين: عارف يايحيي.... انا هروحلها لان الخدامة قالتلي انها رافضة تاكل. يحيي: ماشي ياصاحبي. زين خرج وفون يحيي رن وكانت حياه.

يحيي: لحقت اوحشك ولا ايه..... مش موجودة ازاى يعني.... طب اقفلي انا جاي. يحيي خرج بسرعة من الشركة وركب عربيته وراح على القصر. *** في الفيلا زين دخل وقابلته سوسن. زين: هي فين؟ سوسن: فوق يابيه ورافضة تاكل اي حاجة. زين: تمام روحي حضري الفطار وهاتيه فوق. سوسن: حاضر. زين طلع ودخل الاوضة كانت كارما دافنة وشها في المخدة وبتعيط. زين دخل وقفل الباب بقوة وكارما اتخضت وبصتله. زين قعد على

الكرسي القريب من السرير: ممكن اعرف انتي مش راضية تاكلي ليه؟ كارما مسحت دموعها: ماليش نفس. زين: لو حضرتك مش خايفة على نفسك خافي على اللي في بطنك. كارما دموعها نزلت: انت كل همك واللي خايف عليه اللي في بطني يازين وانا مش مهم. زين بصلها ومردش وقام وقف واداها ضهره. كارما قامت من على السرير ووقفت قدامه وبصت جوا عينيه ودموعها نزلت: ماكنش ده كلامك ليا على فكرة. قولتلي بتخاف عليه لانى حتة منى....

انا مش مصدقة انك بتعمل كل ده عشان انا خرجت من غير اذنك..... عشان خاطري يازين فهمني بتعمل كدا ليه وانا هفهمك ومش هعترض على اي حاجة بس بلاش توجع قلبي كدا عشان خاطري.... زين انا اتوجعت من كل اللي حواليا بس بلاش انت بالذات عشان خاطري مش هقدر استحمل والله. كارما قالت كلامها وفجأة اغمى عليها. وزين اخدها في حضنه ونيمها على السرير وجاب برفان من الشنطة بتاعتها وقربه منها وبردو مش بتفوق.

زين حاول كتير معاها لحد ما فاقت واول ما عينيها جت في عينه عيطت. زين شدها لحضنه: هشش مش عايز اشوف دموعك وصدقيني اللي بعمله عشان احميكي ياكارما. كارما فضلت تعيط في حضنه لحد ما هدت خالص. والباب خبط وزين بعد عنها وراح يفتح واخد صنية الاكل من سوسن وحطها قدام كارما على السرير: يلا عشان تاكلي. كارما بصتله: هتاكل معايا؟ زين ابتسم: طبعاً انا اصلا ميت من الجوع. زين بدأ ياكلها بأيده وبعد شويا خلصوا اكل.

زين اخد كارما في حضنه وحكالها على كل حاجة تخص فريده. وكارما كانت مصدومة وهى كمان حكتله على فريده بما قالتلها انها هتستنى واحدة صاحبتها ورفضت تطلع العربية. *** يحيي رجع القصر وحياه قالتله انهم دوروا على ريم في كل مكان ومش موجودة. يحيي دخل المكتب لوحده وفتح اللاب وبدأ يشوف الكاميرات وشافها وهي خارجة لوحدها بالليل. يحيي رن على زين وقاله اللي حصل ورن على مراد وعرفه. ***

في البيت اللي في الارض الريفية ريم بدأت تفتح عينيها ولاقت نفسها في مكان غريب. ريم افتكرت اللي حصل معاها وعزام ومروان ولما النور قطع فجأة حد شدها من مروان. ريم: انا مش فاكرة اي حاجة بعد كدا. انا جيت هنا ازاي؟ ريم قامت واخدت طرحتها اللي كانت على السرير وحطتها على شعرها وخرجت من الاوضة. وشافت حد واقف قدام الشباك وضهره ليه. ريم بلعت ريقها معقول ده مراد؟ مراد حس بيها ولف وبصلها وهو واقف مش بيتحرك وعينيها عليه.

ريم كانت بتكلم نفسها: معقول انا بتخيل.... او بحلم؟ ريم قربت منه وبصت في عينيه وبصت على مكان قلبه ومدت ايدها وحطت ايدها على قلبه واتنهدت براحة لما حست بدقات قلبه. ومراد مستغرب هي بتعمل ايه. ريم بصت في عينيه تاني ودموعها نزلت: انا حاسة بدقات قلبك.... يعني انا مش مجنونة ولا بحلم زي ما هما مفكريني..... مراد انت عايش وواقف قدامي صح.... عشان خاطري قولي اني مش بتخيل..... صح يامراد؟ مراد مسح دموعها: صح ياقلب مراد.

مراد شدها لحضنه وهي عيطت كتير وكانت مكلبشة فيه كأنه هيهرب منها: حرام عليك يامراد بدام انت عايش ليه توجع قلبي وتسبني الفترة دي كلها؟ هموت عشانك.... هونت عليك لدرجة دي؟ مراد بعدها عن حضنه ومسك وشها بين ايديه: كنت موجوع زيك ويمكن اكتر كمان.... بس لازم اجيب حقك ياحبيبتي. ريم عياطها زاد: عزام قتل ابننا يامراد قبل ما اشبع منهم. مراد ضمها لحضنه: هجبلك حقك وحقه وحقنا كلنا منه ياريم ده وعد مني. ***

في قصر الحديدي زين دخل القصر وكان يحيي واقف مع صفاء وحياه. زين: ازاي خرجت من القصر ومحدش شافها؟ يحيي: خرجت من باب الخدم يازين. زين: حد شافها؟ يحيي شاورله وزين فهم انه عرف من الكاميرات. صفاء: خايفة يكون عزام خطفها. حياه: مش معقول.... وبعدين هيخطفها ليه؟ يحيي: عشان يجوزها لمروان. صفاء: متقولش كدا يايحيي ودوروا على اختك بسرعة. عزام دخل القصر وكان مضايق جدا لأنه مش عارف مين اللي نزل قاطع الكهربا وازاي ريم هربت منهم.

يحيي قرب منه بعصبية: ريم فين؟ عزام باستغراب: هي ريم مش هنا؟ زين: انت ليك ايد في اختفائها ياعزام؟ عزام: وانا هخطفها مثلا؟ معرفش هي فين. صفاء: حرام عليك اللي بتعمله فينا ده انت مش هتتغير ابدا. عزام: قولتلكوا معرفش هي فين. يحيي: خيال المآتة اللي بيمشي معاك فين؟ اوعى يكون ليه ايد في اللي حصل؟ عزام: مروان عمل حادثة وفي المستشفى وممكن تروحوا تتاكدوا كمان في مستشفى.... الاوضة رقم....

زين بصله وبص ليحيي وعزام سابهم وطلع اوضته. يحيي: معقول مش هو؟ اومال هتكون راحت فين؟ زين: مش عارف انا هتجنن. *** عند فريده قاعدة في اوضتها وبتكلم حد في الفون: مش عارفة هيكون اخدها على فين.... معقول يكون عرف بخططي..... بس هيعرف منين....... تمام اتصرف انت وخلي عينك عليه يمكن نعرف هي فين. فريده قفلت وفضلت تفكر كتير: معقول زين عرف خطتها؟ بس هيعرف منين؟ *** عند مراد وريم اللي ماسكة في مراد ومش راضية تبعد عنه ابدا.

ريم: ده اللي حصل واول ما قريت المسدج خرجت من القصر على طول. مراد: انتي مجنونة ياريم؟ اي حد يبعتلك يقولك جوزك عايش تجري تروحي المكان؟ ريم بصتله: انا كنت مستعدة اعمل اي حاجة واشوفك تاني يامراد. مراد مسك ايدها وباسها من راسها. ريم: انت عرفت مكاني ازاي يامراد؟ مراد: لاني كنت جاي القصر اشوفك لانك وحشاني ولاني بدخل من نفس الباب اللي حضرتك خرجتي منه لمحتك من بعيد وجيت وراكي. ريم: والحمد لله انك شوفتني...

الله اعلم كان عزام واللي اسمه مروان دول ناوين على ايه. ده كان عايز يجوزني لمروان يامراد. مراد: الحمد لله ياحبيبتي. *** بليل في قصر الحديدي زين ويحيي بيراجعوا الكاميرات وشافوا ريم وهي خارجة من القصر من الباب الخلفي. يحيي: هتكون راحت فين يازين؟ احنا دورنا كل مكان ممكن تروحه. زين: لو كانت خارجة وراجعة كانت هتخرج من البوابة الرئيسية. يحيي: ده اللي بفكر فيه. زين كان مركز في الكاميرات.

يحيي: انا كلمت الواد مراد قولتله ولا اتهز... ده حتى مفكرش يتصل يطمن. زين بصله فجأة: هو عرف؟ يحيي: انا عرفته بس استغربت انه مهتمش وقفل.... دا انا قولت هيقفل وهلاقيه في وشي. زين: يبن الاييييييه..... ورحمة امي لو هو اللي عملها هطلع عين اللي خلفوه. يحيي: قصدك تكون راحتله؟ زين: لو كانت مخطوفة ومختفية بجد.... كان هيكون اول واحد بيدور معانا صح؟ يحيي: تصدق صح. زين: بينا نروحله. زين ويحيي خرجوا من المكتب.

صفاء: كنتوا بتعملوا ايه يا ولاد بقالكم ساعة جوا وفي الاخر هتسبونا وتمشوا؟ زين: متقلقيش ياصفصف ريم هترجع وبالف سلامة. زين ويحيي خرجوا من القصر وراحوا على البيت اللي عايش فيه مراد. *** مراد وريم قاعدين ومراد بيقولها اللي المفروض تعمله. ريم بعدت عن حضنه: لا مش همشي ولا هسيبك يامراد. مراد: لازم ترجعي القصر ياريم ابوكى مش لازم يعرف انى عايش... بلاش تبوظي كل اللي خططنا ليه.

ريم: كمل كل خططك وانا معاك عشان خاطري انا مصدقت رجعت لحضنك تاني. مراد: مش هينفع ياريم لازم ترجعي. ريم: طب افرض خطفني تاني؟ مراد: كلها كام يوم وهترجعي لحضني من تاني ومش هبعد عنك ابدا. ريم لسه هترد سمعوا جرس الباب. مراد ابتسم لأنه عارف ومتاكد انهم يحيي وزين. مراد: البسي طرحتك ياريم. ريم عملت زي ما قال ومراد راح يفتح واول ما فتح وزين لمح ريم واقفة وراه ضرب مراد بوكس بكل قوته. ريم جرت عليه: مراد انت كويس....

ليه كدا يازين؟ زين ويحيي دخلو وقفلو الباب. زين: عشان البيه مش جاي على باله يقولنا انك معاه واحنا عمالين نلف حوالين نفسنا عشان نعرف انتي فين. مراد قام وقف وهو بيضحك: اعتبروا ده عقاب عشان قصرتوا في حمايتي. يحيي بعصبية: واحنا قصرنا في ايه! الهانم اللي خرجت من القصر على رجليه. ريم مسكت في مراد بخوف. مراد حكالهم على المسدج اللي جت لريم ولما شافها وراح وراها وازاي خرجها من هنا.

زين: المفروض ياريم كنتي كلمتيني انا او يحيي وتعرفينا حتى لو حقيقة كنا هنيجي معاكي. ريم: اول ما شفت الرسالة مقدرتش افكر وبعدين محدش فيكم مصدق كل كلامي.... ايه ده لحظة هو انتوا كنتوا عارفين انه عايش؟ زين ويحيي بصوا لبعض. ريم: يعني كنتوا شايفني بموت كل يوم وانا بقنعكو اني شوفته بجد ومش مجنونة ومافيش واحد فيكم فكر يقولي؟ مراد: ماكنش ينفع ياريم زي ما قولتلك. يحيي: وانتوا ناوين على ايه الوقت؟ مراد: ريم هترجع معاكوا.

ريم: يامراد مش عايزة ارجع عشان خاطري. مراد: ريم احنا اتكلمنا مش كدا بلاش تصعبي الامور علينا. زين: مراد معاه حق ياريم.... يلا عشان نمشي. يحيي مسك ايد ريم ومشي وريم عينها على مراد اللي ابتسمالها بحب وخرجوا وركبوا العربية ورجعوا على القصر. *** في اوضة فريده فونها رن. فريده: الوال. الشخص: عرفت مكانها. فريده بفرحة: بجد ازاي؟ الشخص: واحد تبعي عينه كانت على زين وقالي انه اخدها وراح على فيلا جديدة بتاعتهم.

فريده: ازاي راحت عن بالي الفيلا دي... تمام روح انت ونفذ المطلوب منك. الشخص: امرك ياهانم. فريده قفلت وابتسمت بشر: واخيرا هخلص منك......