رواية شمس لا تغفر الفصل الخامس 5 - بقلم سيليا البحيري

شمس بخوف: إنت مين؟ بصلها من فوق لتحت وقال بسخرية: أنا اللي مين؟ كمل كلامه بصرامة وقال: إنت اللي مين وبتعملي إيه هنا؟ شمس بخوف بصت حواليها وقالت: إيه القطة أكلت لسانك. قالها بعصبية: وبلف. شمس بصتله بدموع وعيطت بصوت عالي وهي بتقول: إنت وحش وحش و بات مان هيجي يموتك عشان إنت وحش خالص. يا جدو تعال خدني من هنا يا ماما تعالييييي. قالت كلامها وهي بتضحك جواها وبتقول: ماشي يا حيوان أنا هعلمك إزاي تتكلم معايا كدا.

نشأت كان في المكتب مع حمزة ولما سمع صوت شمس قام جري. حمزة مشي بهدوء وراه لحد ما وصلوا عند شمس وبصولهم بصدمة. نشأت: مروان إنت بتعمل إيه يبني؟ مروان كان ماسك شمس من إيديها وبيزعق فيها عشان تسكت. مروان: كويس إنكم جيتوا تشوفوا حل في البلوة اللي حلت على دماغي دي، كل ده عشان سألتها إنتي مين، أومال لو كنت ضربتك قلم على سحنتك دي ولا رزعتك بوسة كنت عملتي إيه. شمس جواها: آه يا قليل الأدب أنا انضرب أو اتباس، وحياتك أبوك لهعرفك.

شمس عيطت وطربت مروان بالقلم وقالت: كدا عيب على فكرة ماما قالت عيب ولد يبوس بنت أو يضربها. شوفت يا جدو واحد وحش إزاي خوف شمس وكان عاوز يضربها. مروان عينه احمرت وكان خلاص هيجيبها من شعرها، لكن حمزة منعه وقال: اعقل عشان مزعلكش. نشأت أخد شمس وطبطب عليها بحنان وقال: متخافيش يا حبيبت جدك مش هيعملك حاجة. مروان باعتراض: يا جدي. نشأت بص له بنظرة قاتلة وبص لشمس بحنان وقال: بس يا حبيبتي دا أخوكي وبيحبك، كان بيهزر معاكي.

شمس بصت لمروان اللي واقف مصدوم ومش مستوعب الكلام وقالت قبل ما ترجع تستخبي ورا نشأت تاني: لا لا دا وحش خالص يا جدو، كان عاوز يضرب شمس. ورته دراعها اللي علامات إيده كانت عليها من قوة مسكته ليها. نشأت بص لمروان بعتاب وطبطب على شمس وأخدها في حضنه وهو بيقول: بس يا شمس مش إنت بتحبي جدو، متخافيش يا حبيبتي طول ما أنا معاكي. شمس بابتسامة: إنت و بات مان. قالت جملتها وهي بتشاور على حمزة اللي بدوره ابتسم ليها وقال: أيوة يا شمس.

مروان أعصابه فلتت وقال بعصبية: أنا عاوز أفهم إيه اللي بيحصل هنا ومين دي؟ وأنا أخوها إزاي دي؟ شمس كشت تاني ومسكت في نشأت واتخبت وراه وهي بتقول في نفسها: الله يخربيت صوتك يا أخي عليك صوت يجيب أجل اللي قدامك. حمزة بص له بحدة ومسكه من لياقة قميصه وسحبه لتحت، قابل مازن اللي بص لهم بصدمة وكان لسه هيتكلم لكن ملحقش. لقي نفسه مسحوب بنفس الطريقة.

شمس بصت للمنظر ومقدرتش تمسك نفسها وضحكت بصوت عالي. خلت حمزة لف راسه بصلها وهو ما زال ماسكهم الاتنين من طوق القمصان وغمز ليها بشقاوة. وهي اتكسفت واستخبت ورا نشأت. أما هو كمل طريقه لحد ما مازن قال: ما خلاص بقي يا حمزة ساحبنا زي الحمير كدا ليه، طب هو وعصبك أنا ذنبي إيه أنا لسه راجع والله. حمزة معبروش ودخلهم الاتنين أوضة الملاكمة ورماهم على الأرض بشدة. وقف وبصلهم وهو بيشمر قميصه بعد

ما خلع جاكت البدلة وبيقول: أنا عاوز أعرف ننوس عين أمه كان بيزعق وبيقول إيه وخوف البنت منه؟ مروان بتوتر: إيه يا حمزة بهزر معاها يا جدع، إيه مبتهزرش، ولو قولت أختي تبقي أختي يا جدع حتى لو معرفهاش فهي من اللحظة دي أختي. مازن بشماتة: أخص على الرجالة اللي بتجيب ورا في ثانية إلا ثانية. مروان بص له بحدة فمازن قال بتوتر ومرح: بهزر يا رمضان، إيه مبتهزرش. مروان ضربه بوكس في وشه وقعه على الأرض تاني وهو بيقول: لا يخويا بهزر.

مازن بوجع: آه مهو إنتوا مبتجوش غير على الغلابة اللي زي حلاتي. حمزة بص لهم بنظرة خلتهم الاتنين واقفين متخشبين وقال بصرامة: اسمع يا نطع منك ليه، البنت اللي فوق دي أختكم، أبوكم كان متجوز ومخلفها وأمها ماتت وهتعيش هنا. أشوف حد فيكم مزعلها أو قايل ليها كلمة متعجبهاش بس. بص لمروان بقوة وقال: أختكم تتشال على الراس وتتعاملوا معاها على إنها ملكة، مفهوم، وإلا وربي وما أعبد. مازن بتوتر: خلاص يا حمزة والله حاضر، دي أختنا يا جدع.

بص لهم بصه وسابهم ومشي وهو بيقول في نفسه: شوية عاهات محتاجين الحر. مروان بص لمازن وقال: إنت فاهم حاجة؟ مازن هز راسه بإيجاب وحكاله عن كل حاجة فمروان اتعصب وقال: يعني إيه الكلام ده، لا البنت دي مش أختنا إنت فاهم، وأنا بنفسي هاخدها أطردها من هنا تشوف لها مكان تاني تتنيل فيه. مروان جري بسرعة وكانت وجهته شمس ومازن جري وراه عشان يلحقه قبل ما يعمل تصرف يندموا عليه، لكن ملحقوش.

مازن بهلع: يا مروان يا مروان اهدي واتقي الله في البنت. مروان مسمعش ليه ودخل البيت واتصدم لما لقي أمه واقفة. قال بصدمة: ماما إنتي رجعتي إمتى؟ مازن وصل ولقي أمه واقفة وشمس قدامها. فقال في نفسه: ينهار ألوان دا بينه هيبقي مرار طافح.