رواية شيطان في بيتي الفصل السادس عشر 16 - بقلم زهرة الربيع

اخرج وخد الباب في ايدك. اختك هتفضل معايا، يمكن يهفني مزاجي عليها بعد المزة اللي معايا. ها يا بنت البشوات، تحبي ابدأ بيكي ولا بيها؟ الاختيار ليكي. اسيا بصتله بغضب، وبقت تحاول تفك ايده اللي قابضة على وسطها بقوه وقالت بغضب: شيل ايدك يا قذر، سيبني ابعد بقولك. كامل لسه هيرد، بس لؤي شد اسيا بقوه

منه ووقف قدامها وقال بغضب: كامل، فوق لنفسك ومتتعداش حدودك. هحاول اعدي السفاله بتاعتك دي لانك مش صاحي لنفسك. بس مش هقبل باي اهانه لاختي، لا قدامي ولا في غيابي. سامع؟ كامل ابتسم بخبث وقال: خلصت... يلا طرقنا. اديك شايف بنفسك مزتين انقح من بعض ومحتاجين مجهود. هنا لؤي فقد اعصابه وضربو بوكس قوي جدا، اصتدم في الحيط لانو كان دايخ اصلا من شدة السكر. البنت اللي معاه اتخضت ولسه هتجري عليه.

لؤي شخط فيها وقال: خليكي عندك، متخطيش خطوه تاني هنا. سامعه. ويللا وريني عرض اكتافك، بدل اقسم بالله ابيتك في القسم انهارده. يلاااا. البنت اترعبت من صوته وتهديده وجريت وخرجت جري، مش بس من الاوضه كمان من البيت كله. كامل وقف بالعافيه وهو بيضحك بسخريه وقال: تمام... يعني اخترت تتفضح قدام جوز بنت عمك. وانا احب ما على قلبي. للامانه علشان مبقاش كدبت عليك، حتى لو كنت مشيت كنت هبعتله الفيديوهات.

اسيا بصتله بغضب وقالت: اتجرأ وعملها علشان تبقى جنيت على نفسك يا وسخ. كامل قال بغضب وتحدي: بكره تشوفي الوسخ ده هيعمل فيكم ايه. اسيا لسه هترد، لؤي قال بغضب وزعيق: باااس، خلصنا بقى. وبص لاكامل وقال: اللي معاك اعمله، ومش هقاطعك فيه. بس الا اسيا. شيلها من لعبتك ومن انتقامك. خليها على جمب احسنلك، لان صدقني لو قربتلها حتى لو بكلمه مش هتتخيل اللي ممكن اعملو، مش هتعرفني يا ابن عمي. ومسكها من ايدها

بقوه ومد ايده قدامه وقال: انا السد اللي اللي لازم تتخطاه الاول حتى تفكر تقرب منها. سد صعب وعالي اوي عليك وعلى الف من امثالك. قال كده ومشي بيها، عايزها تبات بعيد عنه الليله. اسيا كانت بتبصلو بفخر ودموع. بس قبل ما يخرج من الاوضه وقفت وبصتلو بحب وقالت: انا هفضل هنا يا حبيبي، اطمن هكون بخير. محدش يقدر يقربلي وانت موجود. بصلها باستغراب وقال: تعالي معايا، باتي في اوضه تانيه انهارده علشان ابقى مطمن. اسيا ابتسمت

وحطت ايدها على خده وقالت: متقلقش انت عارفني كويس، محدش يقدر يجي ناحيتي. ولو احتاجتك انت جمبي، بنا اوضه ولا اتنين. اتنهد وقال بصوت واطي: احم... مش هتعرفي تتعاملي معاه انهارده، مش شايفه حالته. اسيا التفتت لاكمل وكان بيحاول يعد شعر راسه شعره شعره قدام المرايه ومضايق انو كتير. وبيتتلخبط ويرجع يعدو من الاول. اسيا اتنهدت

بضيق والتفتت للؤي وقالت: متقلقش يا حبيبي، ما انت عارف اختك ولا 10 زيو يخوفوني. يلا انت تعبت انهارده، روح ريح شويه لو سمحت. لؤي اتنهد وهو متاكد انها مش هتسمع كلامه واللي في دماغها هتعملو وقال: على راحتك. خلي تليفونك جمبك ومتتكلميش معاه، احس. اسيا ابتسمت وحضنها شويه وخرج. اسيا قفلت الباب وراه ولسه بتلتفت شهقت بخضه لما لقتو في وشها و قريب منها قوي وابتسم بطريقه مريبه وقال: اشمعنا هو حضنتيه؟

ولا اكمنو حليوه عاجبك وعينك منو؟ طب ما انا ممكن اسبغ واحط لنسز. لو هتحن وننجز. عند فرحه كانت بتفكر في لؤي ومبسوطه جدا ولسه هتنام. جاتها مكالمه من رقم غريب. بصت للتليفون باستغراب وردت وقالت: الـ. جاها صوت تعرفه كويس وقال: وحشني صوتك يا حب. فرحه وقع قلبها في رجليها وقالت بخوف شديد: ع... علي. علي ضحك بخبث وقال: كنت متاكد انك مش هتنسي صوتي. مهو انت حبيبي برضه. فرحه بلعت ريقها وحاولت تقوى وقالت: عايز ايه يا علي؟

انا سبتلك اسكندريه كلها جاي ورايا هنا. سيبني في حالي حرام عليك. علي قال بسخريه: اممم بس انا مفتكرش انك سبتي اسكندريه علشاني يا جميل. على الهموم بما انك سألتيني عايز ايه فأنا هقولك. انا عايزك يا فرحه. فرحه ارتعب التليفون في ايدها ومقدرتش ترد ونزلت دموعها لما ضحك ضحكه عاليه، قد

ايه اتمنت متسمعهاش وقال: اهدي يا قلبي، انتي خوفتي ولا ايه. متخافيش انا عايز اقابلك بس. لازم نتكلم. هبعتلك عنوان مستشفى تيجيلي عليها. اياكي تتأخري والا هسمع عنك اخبار وحشه وانا ميرضنيش. قال كده وقفل السكه وهيه كانت بتسمعو برعب ودموع ورمت نفسها على المخده وبقت تبكي بحرقه. عند اسيا كانت بتبص لاكمل بزهول من هبله

وكلامه المش مفهوم وقالت: هو انت اصلا من غير اي حاجه عبيط كمان رايح تشرب وتبوظ اخر فيوز عندك. هو مين اللي عيني منو يا اهطل. ده اخويا روح نام ولا خدلك حمام يمكن تفوق بلاش قرف. ولسه هتمشي شده بقوه بقت بين ايديه وبص لعيونها جامد. اسيا بقا تحاول تفك ايده بس كان ماسكها بقوه وبيبصلها جامد وقال: مظبوطه بالملي يا بنت البشوات. زي كحك العيد موزونه بالجرام. انا السكر علي عندي من نظرات عيونك بس. اتسعت عينيها

بزهول من كلامه وقالت: لا ده انت سرفلت منك على الاخر. سبني بدال ما السكر يعلى فجاه وتروح فيها وتريحني. اكمل ابتسم وهو بيبصلها باعجاب واضح وقال: مهو حتى لو تعبت لمسه من شفايفك تقويني من تاني. ولسه هيقرب دفعتو وقالت بغضب: الشفايف دي اخرك تتشتم بيهم. اتلم ومتجبش لنفسك التهزئة. وراحت نامت بضيق شديد منه. اكمل ضحك وراح جمبها وقلع

بدلته ونام جمبها وقال: ااااه اخيرا هنام جمبك يا جميل. انتي متخيله الوضع. انتي نايمه جمبي على نفس السرير. اسيا نفخت بخنقه وقالت: فعلا وضع محدش يتوقعه. بس مؤقت متقلقيش.

اكمل ضحك بخفه وقال بسخريه: طبعاً كنتي بتحلمي بحد تاني مكاني. بوظتلك اجمل ليله في حياتك. ولسه هبوظلك حياتك كلها. ومش انتي بس. كلكم. الجاني على المجني عليه. مش هسيب حد. حتى اخوكي الغلبان اللي مزعلنيش بل بالعكس كان بيدعمني من اول دقيقه هيبقى اول الضحايا. لان السيئه تعم يا بنت العم. بصتله بغضب شديد وقالت: لا ده لانك. بس قاطعها وقال بسرعه: ابن حرام. فعلاااا. انا كده وبكره هثبتلكم بالافعال مش بس بالكلام.

والتفت الناحيه التانيه ونام وهو بيتوعدلهم وفي عيونه لهيب مبيطفاش. اسيا اتوترت بسبب كلامه وخافت على لؤي بس اتوقعت انو بيقول كده من شدة السكر وحاولت تهدى وهيه ناويه تتكلم معاه اول ما يصحى ويفوق. في اليوم التاني وقبل الفجر بدقايق قامت سهيله من النوم ووقفت بسرعه وهيه بتقول بعض الادعيه ودخلت علشان تتوضأ. بعد دقايق خرجت وحطت سجادة الصلاه وقعدت عليها تستنى الفجر.

نزلت دموعها مع صوت الاذان وهيه بتفتكر اجبار ابوها ليها على الجواز وكلام منتصر عليها وقالت بهمس: انا مسامحه يا الله. مسامحه. وبقت تبكي بدون صوت بس هديت على صوت منبه تليفون منتصر. اتنهدت بضيق وفضلت مستنيه دقايق انو يصحى ويحس الصوت بس مكانش حتى حاسس بالصوت ولا مضايقو. سهيله اتغاظت جدا منه وفي نفس الوقت مرضيتش تتجاهل انو عايز يصحى للصلاه. اتنهدت وقامت بقت

تصحيه وتهزه بخفه وقالت: حضرة الظابط. حضرة الظابط. منتصر باشا. انت يا اخيس منتصر. منتصر كان نومه تقيل بطريقه غاظتها قوي. نفخت بخنقه وقالت: انت يا بتاع انت قوم الصلاه هتفوتني قصادك. ايه ده معقوله مش سامع كل ده؟ فاصل فيشة ودانك قبل ما انام. بس برضو مصحاش. بصتله بخنقه وابتسمت بخبث وجابت كباية ميه من على الطاوله وكبت شويه منها في رقبته من ورا. منتصر قام مخضوض لان الميه ساقعه وقال بفزع: ايه فيه ايه؟ هضرب بالنار.

سهيله كانت عايزه تضحك عليه بس قالت بجديه: ده انا. مش راضي تصحى هتضيع عليا الصلاه. انصحك تقفل المنبه ده مش هيفيدك بحاجه. اشتري قنابل احسن او مدفع رمضان. منتصر اتنهد وقالت بخنقه: خلصتي تريقه. حد يصحي حد كده. عايزه ايه. سهيله قالت بضيق: انت اخر واحد ممكن اعوز منو حاجه. انا بس لقيتك ظابط المنبه بتاعك على صلاه الفجر قولت اصحيك واكسب ثواب فيك وفي البلد كلها اللي صحيت على صوت تليفونكم. منتصر وقف بضيق وقفل التليفون

وبصلها بسخريه وقال: اممم طيب متشكرين. اتفضلي روحي نامي. اسف اني ازعجتك. قالت بضيق: انا كنت صاحيه اصلا. اتفضل روح اتوضأ وسيبني اصلي. الصلاه هتفوتنا احنا الاتنين. رفع حاجبه بسخريه وقال: لا لا متقوليليش بتصلي. مصدقك. بصتله بخنقه وقالت: انا اللي يهمني ان ربي يصدقني. انما انت اخر اهتماماتي. قالت كده وراحت بدأت صلاتها وهو فضل يبصلها بخنقه واتنهد وهو بيستغفر ودخل يتوضأ.

بعد فتره كان خلص صلاته وبيشتغل على اللاب بتاعه ومتابعها بعيونه وهيه بتقرأ ورد القران اليومي بتاعها وفضل يتأمل ملامحها الهاديه ويحاول يسمع صوتها لانو كان عذب جدا رغم انها بتقرى بصوت واطي قوي. اتنهد وهو محتار جدا. معقوله الافكار اللي بتيجي في دماغه تكون وهم؟ الي قدامه انضف من اي حاجه فكر فيها. فضلت تقرى وقت طويل واول ما خلصت ورفعت السجادة والمصحف قال بسخريه: حرما يا شيخه سهيله. لسه مفكرتيش في اي كذبه تبرري بيها موقفك.

اتنهدت وقالت بخنقه: استغفرك ربي واتوب اليك. اه لسه. ولسه عند موقفي. مش حابه اتكلم معاكم. منتصر وقف بغضب وقرب منها وقال: انا مش هستحملك كتير على فكره. انطقي ايه اللي بينك وبين الشاب ده؟ علاقتك معاه وصلت لفين.

سهيله قالت بغضب: وانا لاخر مره هقولك مش من حقك تسألني. انا قولتلك اللي بيني وبينه قبل ما اتجوزك ولا اعرفك حتى. سيبني في حالي واطمن. انا مستحيل افكر فيه تفكير حتى طالما على ذمتك. وده اللي ليك عندي. فكفايه بقى ومش كل شويه تفكرني.

اتنهد وحاول يهدى وقال: طيب انا مكنتش عايز اقولك بس مسبتليش اختيار تاني. يوم ما اتقبض عليكي في الحجز وقولتيلي انك كنتي مع زميلك اللي بتحبيه وراح صيدليه. انا عارف المكان ده وانه مفيهوش صيدليات ابدا. وعلشان كده فضلت مراقب. بصتله بدهشه وقالت: مراقبني.

منتصر قال بهدوء: ايوه. راقبتك وشوفت الشاب ده معاكي. واصبح من واجبي انبهك. الجدع ده زي ما قولتلك قبل كده. ديلر مسجل وكان محبوس كمان وشغله مش نضيف. مكنتش بكرهك فيه والسلام. انا اتحريت عنو كويس. فهمتيني. فلو فيه اي حاجه بنكم اي شيئ مهما كان صغير صارحيني بيه يا سهيله. سهيله كانت بتبصلو بزهول من كلامه ورغم انها مش شاكه في علي ابدا لكن كلامه وثقته صدمتها جدا.

عند لؤي كان قام من النوم وصلى فرضه واخد فوطه وقزازة ميه وطلع على اوضه في البيت مخصصه للرياضه. كان الجميع لسه نايم ومفيش حركه في البيت. بس انتبه على صوت حد بيمشي. اتحرك باستغراب ناحية اوضه فرحه بس اتفاجأ لما لقاها خارجه تتسحب على اطراف اصابعها وقفت باب اوضته. لؤي استخبى بسرعه قبل ما تشوفه وهيه خرجت و بتبص حواليها بحذر ونزلت بسرعه.

لؤي استغرب جدا وراح وراها واتفاجأ اكتر لما خرجت بره البيت كله واتكلمت مع الحارس وقالتله انها عايزه تجري شويه ومتعوده تجري في الفجريه. الحارس فتح لها وهيه خرجت جري ولؤي خرج وراها وهو مصر يعرف مخبيه ايه. عند سهيله رمشت بعيونها بدهشه بس ابتسمت بسخريه وقالت: لا والله صدقتك انا كده. بقى علي مسجل وكان محبوس كمان. بجد برافو. منتصر قال بخنقه: سهيله اسمعيني انا.

بس قاطعتها وقالت بغضب: اسمع انت يا سيادة الظابط مش علشان المرض اللي في دماغك تتبلى على بني ادم نضيف. انا وعلي مفيش بنا حاجه من اللي بتفكر فيها. وكفايه كده عيب والله عيب. ولسه

هتمشي مسك ايدها وقال بغضب: افهمي انا قلقان عليكي. اعمل ايه علشان تصدقي. بقولك ده بني ادم حقير ممكن تطلع منو اي حاجه. طيب بلاش انو قرب منك. هحاول اصدق انو عمرو ما لمس طرفك وانك كنتي عايزه تهربي لمجرد انو بيحبك. ماشي. طيب المكان اللي رحتيه معاه يوم ما قبضوا عليكي كنتي رايحاه ليه. اتكلمي يا سهيله خلينا نحاول لو فيه حاجه تتحل نحلها. سهيله دفعت ايده بغضب وقالت: انا قولتلك اننا كنا رايحين صيدليه. مبتفهمش. حل عني بقى.

ومشيت ولسه هتطلع من الاوضه قال بغضب: سهيله بقولك الشاب ده تاجر ممنوعات. ادالك حاجه غريبه قلك اشربيها. اوعي تكوني وثقتي فيه لدرجة تشربي حاجه متعرفيش مصدرها. اديني جبتهالك على بلاطه يارب نفهم. عند اسيا فتحت عيونها وقعدت بسرعه وقلق لما ملقتش اكمل جمبها وقالت بقلق: راح فين ده. معقوله يكون بعت الفديو زي ما قال. يا رب لا. ولسه هتقوم لقت رساله جمبها

مسكتها ولقت مكتوب فيها: صباح الخير. اكيد بتدوري عليا. طبعا علشان الفديو. للعلم انا هبعتو على الساعه ٧ بالظبط. اديني بقولك المعاد. لو حابه تلحقيني. ولحد الساعه ٧ هتلاقيني تحت مع اخويا وحبيبي عدي. حابب اسأله عن معلومه محدش يعرفها غيره وكنت نفسي اعرفها من زمان. يا ترى ايه احساس وائل جسار لما غني اعذريني يوم زفافك مقدرتش افرح زيهم. واه. على فكره استحمي يا اسيا. ريحتك صعبه. منيمتنيش طول الليل. ايه ده.

اتسعت عينيها بزهول من بروده وكلامه المستفز. ومن قلقها انو ممكن يبعت الفديو لمنتصر. لا وكمان راح يضايق عدي. اكتر من حاجه وترتها في رساله واحده. قامت بسرعه عايزه تلبس وتنزل قوام. بس اتفاجأت ووقفت باستغراب لما حست بريحه وحشه جدا.

بقت تحاول تلاقي المصدر وبانت علامات الدهشه والاشمئزاز لما لقت الريحه بالفعل منها. كانت هتتقيئ حرفيا. كانت مش فاهمه حاجه. هدومها فيها ريحه مش طبيعيه. ولسه هتتحرك اتفاجئت بعلبه صغيره على السرير. قربت وكانت علبه لمضاد للحشرات وريحته سيئه جدا. غمضت عيونها وضغطت على اسنانها وقالت: اممم. بدأتها بدري يا اكمل بيه. شكلك حابب تلعب. والمصيبه انك متعرفش لعبي. وراحت على الحمام بسرعه لان مفيش وقت عايزه تلحقه قبل ما يبعت الفديو.

عند سهيله وقفت بزهول من جملته والتفتتله وقالت: انت. انت قولت ايه. هو اي كلام وخلاص. عيب كده متتبلى على الخلق بقى. قال بغضب: انا بقول الحقيقه. ده مجرم وتاجر ممنوعات ومش من هنا من اسكندريه وبس. قطع كلامه لما سمع نغمة تليفونه. مسكه بسرعه واتصدم بشده من اللي شافه. عند فرحه ركبت التاكس وطلعت بخوف علشان تشوف علي. ولؤي كان وراها بعربيته وسايب مسافه علشان متشفوش.

استغرب جدا لما راحت المستشفى. نزل ودخل وراها وهو مصر يعرف جايه لمين. عند اسيا خلصت في وقت قياسي ونزلت وهيه بتقفل الزراير على السلم من الاستعجال ومن غير ما تمشط شعرها. اكمل اول ما شافها نازله بالطريقه دي ابتسم بخبث واتقدم عليها وقال: والله برافو عليكي. بقى معقوله اسيا الانصاري يجيلها يوم تصحى وتستحمى وتجهز من الصبح كده قبل ما تيجي ٨. حتى صدمتيني. قالت وهيه بتنهج لانها اخدت السلم جري: بعتوا.

اكمل ضحك بخبث وقال: اممم اتأخرتي. اسيا غمضت عينيها بحزن وغضب لانها ملحقتهوش. بس اكمل ابتسم وقال: ميهونش عليا زعل عيونك يا جميل. متقلقيش لسه مبعتوش. بس هبعته حالا يعني مش هتفرق. اسيا ابتسمت بسعاده و قالت بسرعه: بجد. طب. طب بلاش تبعته. احم. انت مش هتستفيد حاجه. هتبقى هيصه على الفاضي وهتضايق الكل. وقاطعها وقال بسرعه: طالما هضايق الكل. ابقى هستفاد اكيد. كانت عايزه تزعق فيه بس حاولت تضبط اعصابها

وقالت من بين اسنانها: لو سمحت متعملهاش. منتصر مجنون وهيتخانقوا تاني. واكمل قاطعها وقال: اشش انتي عارفه ان ميهمنيش. بالعكس انا اتمنى انكم تولعوا في بعض. انتي اكتر واحده عارفه بعزكم قد ايه. اسيا اتنهدت بخنقه وقالت: عارفه والقلوب عند بعضها. ايه المطلوب انجز. اكمل ابتسم بخبث وقال: ايوه كده. مدام وصلتي للمطلوب يبقى نتفاهم. وقرب منها

قوي وقال بهمس عند ودنها: بدلة الرقص اللي اشتريتهالك اللي لو حماتك كانت عايشه كانت لبستها. هتلبسيها لجوزك يا بنت البشوات وترقصي بيها كمان. اسيا اتسعت عينيها بزهول شديد وهو بصلها بابتسامة انتصار وقال: وانتي باديا دول هحزمك. اسيا بلعت ريقها وهيه بتحاول تسيطر على اعصابها وقالت: لو. احم. لو عملت كده. اضمن منين انك هتمسح الفديو. اكمل ابتسم بخبث وقال: مفيش ضمان. انتي عارفه اني مليش كلمه. تربية عوالم بقى.

بصتله بغضب وحقد وقالت: تمام يا اكمل. انا. بس قبل ما تكمل اتصدموا بصوت منتصر بيقول بزعيق شديد: هو فين. الحييواااان القذر فييييين. اسيا بصت لاكمل بزهول وغضب وقبل ما تنطق منتصر اتقدم عليها بغضب وقال بزعيق: اخوكي الواطييي فيييين. انطقووواااا.