رواية سكان العمارة الفصل الرابع 4 - بقلم زهره عصام

أروي يا رب أنا تعبت أوي اجعل تعبي بفايدة. سجدة: أروي الحقي. أروي: أروي إيه يا بنتي في إيه. سجدة: اطلعي بسرعة نتيجة الأوائل ظهرت. أروي: بجد يا سجدة استني. تجّهت أروي إلى أبيها تستأذنه بالصعود إلى رفيقتها سجدة للاستعلام عن النتيجة. أروي: بابا أنا هطلع عند أستاذ ياسين عشر دقائق أشوف النتيجة وهاجي. محمد: مطوليش يا أروي، مش عاوز أسمع كلمة من حد.

أروي: حاضر يا بابا. وبعدين دا أستاذ ياسين اللي هو أطيب واحد في العمارة اللي غم دي. بكرة أبقى مهندسة قد الدنيا وأبني لك عمارة باسمك. محمد: يا رب يا حبيبتي تحققي كل اللي نفسك فيه. صعدت أروي على السلم ولكن قابلت غزل نازلة وتنّظر لها بسخرية. غزل: ........ -يا فندم زي ما بنقول لحضرتك كدا أنسب واحد للمهمة دي هو الرائد صخر حسين الرخاوي. -إنت اتجننت وإلا إيه؟ إنت عارف دا يبقى ابن مين؟ عاوزني أبعته لمهمة زي دي كلها إرهاب؟

دا أنا وانت نترحل على المقابر بدري يا ابني. -يا فندم اسمعني بس، إحنا لو عرضنا عليه القضية مش هيرفض، بالعكس هيكون أول المتطوعين. -يا سيادة النقيب عاوزني أروح أقول لحسين الرخاوي وزير الداخلية معلش عرض ابنك للخطر؟ دا كان يبقى آخر يوم ليا في الداخلية كلها.

-يا عماد بيه إنت مش متخيل خطورة الموقف، دول إرهاب ومنتشرين في البلد بحالها، لازم يتطحطلهم حد، والعملية دي احتمال كبير تدمر قاعدة مهمة جدًا من قواعد الإرهاب في مصر. صدقني معالي الوزير نفسه هو اللي هيبعت ابنه، وبعدين صخر باشا وصل لمركزه بمجهوده مش بنفوذ أبوه. عماد: أنا عارف يا مصطفى إن صخر وصل لكل حاجة بمجهوده وإنه حتى مكنش بيذكر اسم والده عشان محدش يعمله حساب. بس اللي بتقول عليه دا صعب أوي.

مصطفى: يا فندم بجد العملية صعبة ومحتاجة حد ذكي وفي نفس الوقت متمكن من قدراته، وأنا شايف إن صخر هو الأنسب. الموضوع يستاهل إننا ناخد الريسك يا فندم، دا رجل المهام الصعبة. عماد: هشوف وهبقى أعرفك يا مصطفى، اتفضل إنت على شغلك. ....... غزل: أهلاً أهلاً بالناس الشحاتة اللي قاعدة على طول عند الناس الأعلى منها في المستوى. هنا: غزل عيب كدا، هي معملتلكيش حاجة ليه تجري شكلها كدا.

غزل: ملكيش دعوة إنتي يا هنا، أنا بتكلم مع الناس البيئة دي مش معاكي. هنا: وترجعي تزعلي في الآخر لما بابا يزعقلك. أنا آسفة يا أروي، اتفضلي شوفي كنتي رايحة فين. أروي: متتأسفيش يا هنا، إنتي معملتيش حاجة. طب عن إذنكم أنا بقى أصل نتيجة الأوائل بانت وهشوفها. غزل: قال عاملة نفسها مجتهدة أوي وطالعة من الأوائل. يلا يا بنتي هنتاخر على النادي وزمان ياسمين وفيروز مستنيانا هناك. هما دول الصحاب اللي من مستوانا.

أروي: سلام يا هنا، وإن شاء الله السنة اللي جاية تكوني خلصتي الثانوية العامة بتاعتك ودخلتي اللي نفسك فيه. هنا: تسلمي يا أروي. غادرت أروي وتحدثت هنا قائلة: هو إنتي على طول كدا أول ما تشوفيها لازم تسممي بدنها بكلمتين؟ ما تسيبها في حالها بقى، دا الرسول بيقولك "من كان يؤمن بالله واليوم الآخر فليقل خيراً أو ليصمت". أي يا ست فكيها وملكيش دعوة بيها كأنك مش شايفاها.

غزل: وفري نصايحك لنفسك يا ست الشيخة. وبعدين مين دي اللي أحطها في دماغي؟ بنت البواب؟ يلا يا أختي نروح النادي. هنا: نادي إيه؟ بتقولك النتيجة هتظهر، إيه مش هتستني تشوفيها؟ إنتي مش كنتي ثانوية السنادي؟ غزل: كنت أديكي قولتي. يلا يا أختي أنا عاوزة أفسح وأشم هوا. هنا: لله الأمر من قبل ومن بعد. ....... طرقت على الباب برفق ففتح لها الصغير عمر. عمر: ادخلي يا أروي، دي سجدة عمالة تحمل في الموقع من الصبح بس تقيل أوي.

أروي: بهدوء، معلش هتلاقي عليه ضغط يا عمر. أومال فين هبة؟ عمر: قاعدة جمب ساجدة عاوزة تعرف النتيجة أكتر منكم. أروي: عاوزة تاخد حافز عشان الثانوية العامة اللي داخلة عليها، عبالك إنت كمان يا عمر لما تخلص الإعدادية بتاعتك دي وتدخل ثانوي بقى. حضرت أسماء في هذا الوقت وقالت: إيه يا أروي واقفة على الباب لي؟ ادخلي جوه، الأوضة البنات مستلمّين اللاب توب من الصبح عشان بس يجيبوا نتيجة الأوائل. أروي: أنا داخلين أهو يا طنط أسماء.

أسماء: يلا على ما أحضرلكم حاجة حلوة تاكلوها. أروي: متتعبيش نفسك، دا أنا عشر دقائق ونازلة. أسماء: لا طبعاً، إنتي هتقعدي تتغدي معانا ومفيش اعتراض، بقالك كتير مش بتيجي هنا. أروي: بابتسامة، حاضر أمر لله. أسماء: شاطرة يا حبيبتي، يلا ادخلولي مع القرود اللي جوه دول. أروي: حاضر. دلفت أروي إلى الغرفة وجلست بجانبهم على الأريكة وقالت: ها يا سجدة الموقع فتح؟

سجدة: لسه يا أروي، تقريبًا في ضغط جامد عليه، أنا دخلت خمسين مرة مش راضي يفتح. أروي: طب حاربي تاني كدا. سجدة: حاضر هجرب أهو. حاولت سجدة أن تفتح الموقع مرة أخرى، ولكن هذه المرة قد أصابت وبدأ الموقع في التحميل. هبة: هيييييي الموضوع فتح أهو وهيحمّل، متشوقة أعرف الأوائل، وإن شاء الله السنة الجاية نكون قاعدين نفس القعدة دي عشاني. أروي: إن شاء الله يا حبيبتي، ربنا هيحققلك اللي بتتمنيه، إنتي طيبة وتستاهلي كل خير.

احتضنتها هبة وقالت: شكرًا يا أروتي على الدعوة الجميلة دي، أنا بحبك أوي. أروي: وأنا كمان بحبكِ أوي. سجدة: استنوا الأولي أهي ظهرت. هبة: مين؟ حد نعرفه؟ سجدة: الأولى على الجمهورية شعبة علم رياضة حبيبة موسي. أروي: يا رب، كنت طمعانة إني آخد الترتيب الأول على الجمهورية، يلا حصل خير. هبة: اصبري على رزقك، أنا حاسة إن اسمك بعدها على طول. أروي: هو الموقع بيحمّل ببطء كدا ليه؟

عمر: الضغط يا أختي الضغط، استني بقى بدأ يجمع، بتأتي أهو. سجدة: الثانية على الجمهورية شعبة علم رياضة أروي محمد سلطان. أروي وعمر وهبة: هيييييي اللهم لك الحمد. عمر: تستاهليها يا أروي، إنتي تعبتي أوي. أروي: تعبي كله راح ساعة ما سمعت الخبر دا. هبة: طب شوفي اللي بعده كدا، يمكن ربنا يكون نفخ في صورتك وطلعتي إنتي كمان. سجدة: أنا عارفة حظي، مش هطلعه. هبة: شوفي بس. سجدة: بلا مبالاة، الثالثة على الجمهورية شعبة علم علوم.

انتبه الجميع، هنا قالت سجدة بصدمة: سجدة ياسين التهامي. سجدة: يلهوي دا أنا.. نهار أسود! أنا طلعت من أوائل الجمهورية! لولولولولوي! علت صوت صياحهم إلى أن جاءت أسماء وقالت: إيه في إيه؟ الفرحة دي كلها؟ هبة: بلّي الشربات يا ماما بسرعة، أروي التانية على الجمهورية، وبنتك ربنا نفخ في صورتها وطلعت التالتة. أسماء: بصدمة، إنتوا بتتكلموا بجد؟ هبة: آه والله. أسماء: بفرح، أنا لازم أتصل بياسين أعرفه الخير الجميل دا. .......

غزل: ها يا ياسمين قاعدة كدا لي؟ ياسمين: مفيش يا غزل، ملل. غزل: طب ما تشوفيلنا كدا نتيجة الأوائل بتاع الثانوية العامة. ياسمين: أوعي تقولي إنك هتطلعي من الأوائل. غزل: أوائل إيه اللي أطلع منهم؟ هو أنا فتحت كتاب طول السنة؟ دا أنا لو نجحت هبوس إيدي وش وضهر. ياسمين: أومال عاوزة تعرفي نتيجة الأوائل لي؟ كادت أن تتحدث ولكن قاطعتها فيروز: عشان تشوف أروي طلعت من الأوائل ولا لأ. غزل: صح.

ياسمين: وهو إنتي لسه حطاها في دماغك يا غزل؟ ما تسيبك منها بقى واعملي زينا، ولا كأننا شايفينها. غزل: وإنتوا مفكريني هحط واحدة زيها في دماغي؟ مجرد فضول مش أكتر. ياسمين: تمام، تعالي نشوف. ..... مني: مالك يا أحمد؟ أحمد: حيران يا مني. مني: من إيه بس؟ أحمد: هو اللي إحنا عملناه مع أروي دا صح؟ وإنه بعدنا الولاد عنها؟ مني: طبعًا صح، إنت مش عارف كانت ممكن تعلمهم إيه.

أحمد: أروي طلعت الثانية على الجمهورية، وسجدة اللي كانت مصاحبها وبيذاكروا مع بعض طلعت الثالثة على الجمهورية. مني: دا بجد؟ أحمد: أيوه، تعالي شوفي أنا جايب النتيجة من بدري وقاعد مصدوم. ..... -الو يا حبيبي. -الو يا نورا، طمنيني النتيجة بانت؟ نتيجة الأوائل بانت. -لا يا حبيبي، النتيجة لسه ما ظهرتش. -يوسف: أومال فين الولاد؟ -نورا: غزل وهنا في النادي، ويزيد نايم. -يوسف: طبعًا بنتك مطلعتش من الأوائل ولا أخدت مركز.

-نورا: وهي بنتي أنا لوحدي؟ مهي بنتك إنت كمان. -يوسف: اصبري تعرفي إن أروي طلعت الثانية على الجمهورية، وسجدة بنت ياسين طلعت الثانية. -نورا: نعم؟ بنت البواب تطلع من أوائل الجمهورية وأنا بنتي لا؟ ..... مصطفى: ها يا فندم، قررت إيه؟ هتكلم معالي الوزير عن رجل المهام الصعبة وإلا إيه؟ عماد: أيوه يا مصطفى، هناخد الريسك، بس يا ترى معالي الوزير هيوافق؟ مصطفى: ....