رواية سيدة القصر الفصل الخامس عشر 15 - بقلم منال عباس

بينما الجميع في جو مليء بالفرحة والسعادة، تأتي وفاء اتصال عن تنفيذ خطتها. وفاء بفرحة: انتظروا مني ميعاد بالتنفيذ. وأغلقت الهاتف وهي تنظر إلى الجميع. وفاء: افرحوا، ليكم يومين. المهم مين هيفرح في الآخر. يمر الوقت ويغادر الضيوف. سعاد: أشكركم على اليوم الجميل ده. يلا يا بنات علشان الوقت اتأخر. أشرقت: ما يصحش تروحوا في وقت متأخر كده. أنتم دلوقتي أهل البيت، والقصر كبير، اتفضلوا اختاروا أي مكان يريحكم.

سعاد: ربنا يخليكي يا ست الكل. بس... ليقاطعها سالم: مفيش رفض بعد رأي ماما. ولازم تتعودي على قوانين العائلة. ماما كلمتها فوق الجميع. سعاد: بس كدا كتير والله. حسام: لا كتير ولا حاجة، وفرصة نقعد مع بعض ونتعرف ببعض أكتر. لؤي: آه يا طنط لو سمحتي. ريم: بس أنا عندي شغل بكرة. لؤي: بكرة خلاص إجازة. وغمز لها. سندس: وأنا عندي جامعة. باسم: هشرحلك كل حاجة انتي وريم. أظن مفيش حجج تاني.

لوسيا: دي فرصة إننا اتجمعنا. يلا بينا كلنا نقعد مع بعض، ولا إيه رأيك يا سامح؟ سامح: طبعًا. نستأذنكم، هنروح نقعد. وأشار لكل من لؤي وباسم بأن يأخذ كل واحد منهم خطيبته وذهبوا إلى الليفنج رووم. أشرقت: ما شاء الله، كل واحد لايق عليه عروسته. سعاد: ربنا يهنيهم. وفاء: أسيبكم أنا، هطلع أستريح علشان مصدعة. ونظرت إلى مراد. وفاء: مراد ممكن تيجي، عايزاك في حاجة. مراد: حاضر. واستأذنهم هو الآخر. حسام: نورتينا يا ست سعاد.

سعاد: منور بوجودكم. سالم: سبحان الله. صدفه غريبه. بس الحقيقة اللي حصل أجمل صدفة. علشان نورتينا النهارده. أشرقت: الحقيقة يا ست سعاد، باسم حفيدي شاب طيب وممتاز في شغله. الوحيد اللي رفض شغل المصنع واكتفى بالطب، وعنده مستشفى وكمان دكتور في الجامعة. سعاد: الحقيقة، سندس بتشكر فيه. أشرقت: ربنا يوفقهم. حسام: واضح عليكي إنك ست طيبة. يكفي إنك اعتنيتي بـ ريم بعد وفاة أسرتها.

سعاد: أهلها كانوا ناس طيبين، وبيحبوا الخير للكل. ووالدتها كانت صاحبتي الله يرحمها. أشرقت: ربنا يرحم الجميع. عند الشباب. لوسيا: أنا فرحانة أوووي النهاردة. إن ربنا حقق ليا أمنيتي بخطوبتي لـ سامح. سامح: يا حبيبتي، أنا اللي فرحان إني فزت بيكي. كانت ريم تنظر على لؤي، خوفًا أن يكون بداخله شيء لـ لوسيا، ولكنها وجدته ينظر إليها هي. سندس: ما تيجوا نخلي القعدة حلوة، وفرفشة. باسم: قولي، في دماغك إيه؟

سندس: نجيب كوتشينة ونلعب الشايب على أحكام. ريم: افرضي وقع في إيدك. سندس: ربنا يستر. بس إيه رأيكم؟ لؤي: أنا موافق نلعب شوية، وبعد كده نتفرج على فيلم سوا. الجميع موافقة. ريم: طب عايزين فشار وحاجة نشربها لزوم السهرة. سامح: أنا هخلي الخدم يحضروا كل حاجة. وأنت يا لؤي هات الكوتشينة. وبدأوا في اللعب والضحك. أصوات ضحكاتهم كانت تخرج للخارج. أشرقت: صوت ضحكهم ده عندي بالدنيا وما فيها.

حسام: أول مرة يتجمعوا كدا ويبقوا متفقين على حاجة. فكروني بنفسهم وهما صغيرين. سالم: الفضل لله، والست سعاد. هي اللي جمعتنا. سعاد وقد شعرت بارتباك، لكثرة مدح سالم بها. سعاد: ربنا اللي بيقدر كل شيء. عند وفاء. مراد: ممكن أفهم، انتي مطلعاني هنا ليه؟ من وقت ما طلعت ما قولتيليش حاجة. وفاء: عايزاني أسيبك مع الست البيئة اللي تحت دي. مراد: حرام عليكي، الست ما عملتش حاجة.

وفاء: هي وبنتها خطفوا ابنك وتقول ما عملتش حاجة. واضح إنهم مرتبين كل حاجة. وفي الآخر يقولوا صدفه. مراد: يرتبوا إيه بس. الست كانت مخبوطة وبتنزف. عايزة تقولي إن كمان سالم رتب معاهم. وفاء: ما أعرفش بقي. كل شيء جايز. مراد: بجد ربنا يهديكي، انتي كدا هتتجنني. وفاء: ما انت السبب. شايف حقنا في القصر بيضيع ولا شاغل بالك. مراد وهو يضرب كف على كف: إحنا أخدنا أكتر من حقنا من زمان ومالناش حق تاني.

وفاء: لا، القصر ده حقنا ومش هتنازل عنه. مراد: أقولك تصبحي على خير أحسن النقاش معاكي مش هيجيب نتيجة. وتركها ودخل في سريره لينام. عند الشباب. لؤي: كفاية كدا لعب، ويلا نشوف فيلم رومانسي. إيه رأيكم في تيتانك. الجميع: موافقين طبعًا. أخذ كل شاب خطيبته بجانبه وأطفأوا الأنوار، وشغل لؤي الفيلم. كان الجو رومانسي، لم يشعر أحد بوجود الآخرين، فكل كابلز لا يرى سوى حبيبه. لؤي وهو ينظر لعيون ريم.

لؤي: نفسي آخدك في حضني. نفسي أسافر وألف الدنيا بيكي. أنا بحبك أوووووي يا ريمووو. ريم: وأنا كمان. لؤي: بجد يا ريم. أومأت ريم برأسها. لؤي: أنا أسعد واحد في الدنيا. مش هقدر، لما تخلصي لسه الجامعة. اعملي حسابك تخلصي الترم ده ونتجوز على طول. ريم: مستعجل ليه كدا. لؤي: أوريكي مستعجل ليه. واقترب منها أكثر وطبع قبلة طويلة على شفتيها، ذابت معها ريم بين أحضانه. باسم: حلو الفيلم ده أووووي يا سندس.

سندس: آه، بس مش بحب النهايات الحزينة. كان هيحصل إيه لو الواد جاك عاش واتجوز البت روز وخلفوا بنت قمر سموها سندس. باسم بضحك: يخربيت فصلانك. جاك وروز اسمهم ولد وبنت وكمان يخلفوا سندس إزاي بس. سندس: تشبيه مش أكتر. باسم: والله هتجنن. دخلتي طب إزاي. سندس: إيه الغباوة دي. بقولك جالي طب أسيوط. باسم: بس بس، حفظت القصة دي. المهم إيه الحلاوة دي. سندس بكسوف: عجبتك. باسم: ما تقربي شوية. سندس: ليه، هو أنا الراجل؟

المفروض انت اللي تقرب وأنا أكسف فتقرب أكتر و... باسم بضحك: والله هموت منك. اقترب منها باسم ورفع شعرها عن خديها وطبع قبلة على شفتيها. سندس: يالهووووي قلبي هيقف. الحب حلوووو أوووووى. باسم: مش هقدر انتظر كتير يا مجننانى، لازم نتجوز في أقرب وقت. سندس: أنا بقول كدا برضو و... سامح: لوسيا مالك. لوسيا: مفيش، دماغي تقيلة شوية من إجهاد اليوم. سامح: طب تعالي حطي راسك على صدري. ودون أن ينتظر وضع رأسها على صدره واحتضنها بيديه.

سامح: سامعة دقات قلبي. لوسيا: قلبك بيدق بسرعة. سامح: ده بقي حالي كل ما تكوني معايا. أنا بحبك يا عمري أنا. لوسيا: ربنا ما يحرمني منك. انحنى برأسه ووضع قبلة على جبينها. انتهى الفيلم واعتدل الجميع في جلسته. لؤي: تحبوا نشوف فيلم تاني. ريم: لا، كدا كفاية علشان ننام. سندس: آه والنبي، أصل لو فضلت لفيلم تاني كدا لازم تتصلوا على المأذون. ضحك الجميع على خفة ظلها. لوسيا: أنا معاكي في الرأي يا سندس. يلا ننام أحسن.

خرجوا جميعًا، لم يجدوا أحدًا في الهول سوا أشرقت. لؤي: نانو لسه سهرانه. أشرقت: ما حبيتش أقلقكم. عمومًا منتظرة البنات علشان أعرفهم بأوضهم. سندس: أووومال ماما فين. أشرقت: الست سعاد نامت في الأوضة اللي جنبي، تحبي تروحي ليها. لوسيا: لا يا نانووو. في أوضة فيها 3 سراير، إيه رأيكم نروح إحنا التلاتة فيها. أنا فرحانة بوجودكم، أنا ماليش أخت بنت وهتكونوا انتوا أخواتي. ريم: أكيد حبيبتي.

سندس: طب يلا والنبي بسرعة، عايزة أروح أسرح شوية قبل ما أنام. أشرقت: انتي دمك زي العسل يا سندس. شكرتها سندس وذهبوا مع لوسيا إلى تلك الحجرة. بينما ذهب لؤي وباسم وسامح، كل واحد إلى حجرة. عند ريم. ريم: الله، أنا رجعت للجنة. أنا بجد مش مصدقة. آينور: دي الحياة اللي تستحقيها يا نور عيني. ريم: طب ليه يا ماما بتمشي وتسيبيني. اقعدي معايا شوية. آينور: باباك منتظرني. أنا بس كنت عايزة أطمن إنك حطيتي رجلك على الطريق الصحيح.

أوعي يا ريم تصدقي كل حاجة هتحصل. لازم تتأكدي قبل ما تحكمي على حد، وخذي حذرك ديمًا. ريم: بتتكلمي عن إيه يا ماما. آينور: خدي حذرك يا ريم. لؤي بيحبك. أووعي حد يضحك عليكي. انتي سيدة القصر. انتي سيدة القصر. وتختفي في دخان. تجري وراها ريم. سندس: بسم الله الرحمن الرحيم، مالك حبيبتي. ريم: ماما كانت معايا. سندس: أهدي حبيبتي، خير الله ما أجعله خير. انتي بتحلمي. تستيقظ لوسيا هي الأخرى. لوسيا: انتي كويسة يا ريم. ريم: الحمد لله.

يسمعون صوت أذان الفجر. ريم: تعالوا نصلي جماعة. لوسيا: بس أنا مش بصلي. ريم: لا يا حبيبتي، ما دام ماعنديش مانع يمنع الصلاة، يبقي لازم تصلي. لوسيا: عندك حق. ربنا يخليكي ليا. وذهبت الفتيات للوضوء.