رواية تار صعيدي الفصل الثامن 8 - بقلم ملك شاهين

فراس جاله مسدج على موبايله خلته يتصدم، كانت من هيثم فقام طلع على الجناح علطول. دخل الجناح فجأة لقى فلير كانت بتتكلم في التليفون، وأول لما شافته نزلته وخبته. فراس بهدوء: كنتي بتكلمي مين؟ فلير بتوتر: بكلم بابا بس الخط قطع. فراس وهو بيربع إيده قدام صدره: والله! طب يا مسلمة احلفيلي كده على مصحف. فلير بتوتر: أنت مش مصدقني ليه؟ أنا ماكدبش على فكرة وهكدب ليه أصلاً، قلت بكلم بابا. فراس: أنا قلتلك إنك بتكدبي دلوقتي؟

بقولك احلفيلي على مصحف... وأتمنى تبقي عارفة كفارة الحلفان كذب على مصحف. فلير: لا مش هحلف على مصحف، أنا مش كذابة المفروض تصدقني من غير حلفان. فراس طلع تليفونه واتصل بباها وفتح السبيكر، سالم رد عليه. فراس: ألو، إزيك يا عمي؟ آسف على الإزعاج. سالم: إزيك يا حبيبي، لا مفيش إزعاج ولا حاجة... كمل بقلق: هي فلير فيها حاجة؟ فراس: لا يا عمي هي كويسة، مش هي لسه قافلة معاك؟ سالم باستغراب: لا ما كلمتنيش النهاردة خالص، هو في حاجة؟

فراس وهو بيبص للواقفة قدامه عمالة تدعك في إيديها وباصة في الأرض: لا يا عمي مفيش، أصل إحنا أجلنا السفر، فهي كانت هتتصل تعرفك بس. سالم: ليه يا ابني؟ فراس: طلع لي شغل مفاجئ كده هخلصه ونسافر. سالم: ماشي يا حبيبي، سلم لي عليها بقى وقولها احتمال بقى مارب تيجي تقعد معاها كام يوم. فراس: يوصل يا عمي... وتنور طبعًا بيتها. فراس قفل الموبايل وحطه في جيبه وراح قعد على الكرسي الهزاز وحط رجل على رجل

وفضل يهز في الكرسي وقال: لا صادقة فعلًا ومش كذابة خالص. فلير بتوتر: أنا أنا... بص هقولك. فراس: امممم سامعك. فلير بتهته وتوتر: أنا أنا كنت بكلم... قطعها صوت تخبيط على باب، فراس قام فتح الباب. الخدامة: فراس بيه، بدر بيه مستنيك تحت. فراس: قوليله نازل. الخدامة: أمرك يا بيه. فراس قفل الباب وبص لفلير. فراس: ما تفتكريش إنك كده نفذتي، أنا طالعلك وهعرف كنتي بتكلمي مين، لو مش منك يبقى بطريقتي.

وخرج ورزع الباب وراه، نسمة كانت واقفة برا أول لما شافت فراس خرج دخلت لفلير. نسمة وهي بتضربها في كتفها: فلير! فلير! فلير! فلير كانت سرحانة. فلير: ها، في إيه يا نسمة؟ نسمة: بقالي ساعة بناديكي... كملت بغمزة: إيه اللي واخد عقلك يا جميل؟ فلير: ولا حاجة، كنتي عايزة حاجة؟ نسمة وهي بتديها تليفون وفتحاه على شات: بصي كده. فلير: إيه ده؟ ده اللي قلتلي عليه؟ نسمة: أيوة بيحاول يرجعلي وندمان والهبل ده بس أنا مش فارق معايا على فكرة.

فلير: طب عيني في عينك كده. نسمة: يعني بصي، أول لما بعت ما صدقتش الصراحة وكنت هرد بس افتكرت كل حاجة عملها فالفرحة راحت وسبت التليفون وجتلك، أنا عارفة إنك هتقولي خلاص انسى وما تحاوليش ترجعي تاني حتى لو هيتجوزني وإنه لو كان خيرًا لبقى والكلام ده بس أنا فعلًا كنت هنسى كل ده وهكلمه بس افتكرت كل اللي عمله وكلامك فجتلك. فلير: جدعة... بس تعالي هنا، إيه لو كان خيرًا لبقى دي؟

المقولة دي مش صح على فكرة، ممكن الخير إنه مشي أصلاً مش لازم أي حاجة راحت مننا أو أي حد مشي وسابنا نقول مهو "لو كان خير لبقى" لا الجملة الصح تتقال "خيره كان في مضيه". نسمة: عندك حق... المهم هو في إيه؟ فراس خارج مش طايق نفسه ومكشر ليه؟ هو آه طول عمره مكشر وما بيضحكش إلا كل أربع سنين مرة بس حساه في حاجة. فلير بصوت واطي: أنا عارفة، عاملي فيها المحقق كونان. نسمة: بتقولي إيه؟

فلير: هاا بقولك حلقة المحقق كونان هتبدأ دلوقتي افتحي التليفزيون يلا. تحت عند فراس وبدر. فراس بضيق: خير يا بدر؟ بدر: إيه يا ابني مالك ضارب بوز كده ليه؟ فراس بعصبية: قلتلك خير يا بدر اخلص. بدر: في إيه يا فراس؟ أومال لو ما كنتش واحد صاحبك كنت هتعاملني إزاي؟ فراس بيحاول يسيطر على نفسه: مفيش يا ابني عادي شوية مشاكل في الشغل، ها بقى في إيه؟ بدر: مفيش حاجة يا فراس كنت جاي أشوفك...

كمل وهو بيوقف: على العموم إن شاء الله المشاكل اللي في الشغل تتحل، عن إذنك. فراس مسكه من دراعه قبل أما يمشي: أنت زعلت ولا إيه يا بدر؟ خلاص يا عم قلبك أبيض، قلتلك مضايق شوية. بدر: لا ما زعلتش وعادي خلاص أنا همشي وهبقى أكلمك ونبقى نتقابل برا. فراس: خلاص تمام. بدر مشي وفراس طلع على فوق لقى الجدة خارجة من جناحها ومعاها نسمة وفلير. فراس: إيه ده؟ هو في إيه؟

الجدة: أبدًا يا ولدي، رايدة نسمة وفلير يناموا ويايا، عندك مانع لحسن مراتك قالت إنك هتمنع ولازمن أقولك ما تعرفش تأثير ستك عليه. فراس بص لها جامد وهي نزلت عينيها في الأرض وبعدين بصت لجدته: تمام يا تيته مفيش مشكلة. تاني يوم الصبح على الفطار كانوا كلهم متجمعين حتى فراس. دخلت الخادمة عليهم: فراس بيه، أخت فلير هانم برا و... فراس: خليها تدخل، أنتِ موقفها برا ليه؟ فلير بصتله وبعدين بصت لطبقها. ماري دخلت: هاي. هارون

وهو بيقوم لأنه خلص أكل: كيفك يا بنتي، اقعدي افطري وياهم. ماري: كويسة... لا لا أنا مش بفطر على الصبح كده. هارون باستغراب: وه أومال بتفطري بالليل؟ ماري: Oh no أكيد مش قصدي كده، يعني أنا مش باكل لما بصحى حاجة علشان وزني ما يبوظش. هارون سابها ومشي. ماري: إزيك يا فراس؟ فراس: كويس. ماري: يا ريت ما أكونش هتقل عليكم بقعدتي هنا. فراس: أنتِ بتقولي إيه؟ ده بيتك. ماري: ميرسي. فلير بعصبية وهي بتقوم

من على الأكل علشان تطلع: عن إذنكم، شبعت. ماري: استني يا فلير هطلع معاكي عايزة في موضوع كده. بعدها دخلت سمية. سمية: كيفك يا ستي؟ الجدة: بخير يا بنتي اقعدي كلي. سمية: لا سبقتك... بصت لفراس: كيفك يا ولد خالي؟ فراس: كويس، إزيك أنتِ يا نسمة؟ سمية: بخير أومال فينها مراتك؟ الجدة: طلعت مع أختها جاية تقعد معاها كام يوم. سمية: أنا كمان جاية أقعد معاكم كام يوم أكده. الجدة: وه بيتك يا بنتي تنوري طبعًا. فراس: عن إذنكم أنا طالع.

نسمة وهي بتكلم نفسها: هو أنا شفافة؟ محدش عاملي اعتبار خالص كده... يلا الله يعينك يا فلير على الحربيتين دول الأيام اللي جاية. ماري وفلير طلعوا فوق ودخلوا الجناح، ماري كانت متأكدة إن فراس هيطلع وراهم. فلير: خير عايزة إيه؟ ماري بخبث: هعوز منك إيه؟ أنا جاية أقولك اللي بتعمليه غلط. فلير بعصبية: وأنتِ مالك أصلاً غلط ولا صح؟ ماري بمسكنة: يعني أنا غلطانة إني خايفة على أختي؟ فلير: أختك! لا يا شيخة وده من إمتى بقى؟

ماري وهي بتبص على باب من تحت واتأكدت إن فراس واقف: آه أختي، وبقولك يا فلير إن اللي بتعمليه غلط. فلير: أنا ما بعملش حاجة غلط يا ماري تمام، وملكيش دعوة بيا ولا بحياتي، ما تعمليش دور الأخت الكبيرة الناصحة اللي خايفة على أختها لحسن الدور مش لايق عليكي.

ماري بصوت عالي: يعني أنتِ عايزاني أفضل ساكتة واقف أتفرج على أختي وهي بتخون جوزها حتى لو مش بتحبه ومتجوزاه غصب بس ده ما يديكي ش الحق إنك تعملي كده، خلاص يا ستي اطلقي منه وروحي اتجوزي حبيبك. فلير كانت مصدومة ولسه هتتكلم وترد عليها الباب اتفتح ودخل فراس اللي عينه كانت بتطلع شرار من اللي سمعه. فلير بتقطيع وصدمة: فـ فـ فرااس.