رواية طفلة الأدم الفصل السابع 7 - بقلم ملك موسى

في صباح اليوم التالي عند غزل صحت غزل من النوم، أخذت شاور ولبست بيجامة من اللي كانت مديهالها آيات، وطلعت لقت آيات بتحضر الفطار. آيات بابتسامة: صباح الخير. غزل: صباح النور. أساعدك في حاجة؟ آيات: لا يا حبيبتي، شكرًا. غزل وهي واقفة في المطبخ: آيات عندك نسكافيه؟ آيات: آه، افتحي أول درج هتلاقي علبة. غزل: تمام، شكرًا. أعملك معايا؟ آيات: ماشي، اعمليلي واحد لو مش هتتعبي. غزل: تعبك راحة، دا كفاية إنك شيلاني في بيتك.

آيات: متقوليش كده، إحنا أخوات. غزل اكتفت بابتسامة وعملت اتنين نسكافيه. غزل: اتفضلي يا آيات. بقولك أنا عارفة إني متقلة عليكي، بس والله هنزل النهاردة أدور على شغل، وإن شاء الله ألاقي. آيات: ليه بس شغل؟ إنتي لسه صغيرة على المرماطة دي يا شيخة. وبعدين إيه متقلة عليكي دي؟ قولتلك إنك أختي. وبعدين مفيش حد معايا زي ما إنتي شايفة أهو. قولي يا رب بس. غزل: معلش ريحيني، هنزل أشوف شغل، أنا حابة كده. آيات: خلاص، على راحتك.

وقعدوا يفطروا ويتكلموا. عند آدم صحى، أخذ شاور ولبس بدلته ونزل. آدم: أهلاً. ملاك: أهلاً، صباح الخير. آدم: صباح النور. فين ماما؟ ملاك: مش راضية تطلع تاكل، هانم. طلعتلها أكلها خلاص. آدم بحزن: تمام. النهاردة بإذن الله هحاول تاني ألاقيها. ملاك: تمام. فطر آدم وخد أخته ملاك وصلها للمدرسة ومشى راح على الشركة. آدم وهو في مكتبه: "تقلبوا عليها الدنيا، إسكندرية كلها تتشقلب، لو عرفت إن حصلها حاجة." وقفل. (كان بيكلم الرجالة بتوعه)

وابتدأ آدم الشغل. قعد يشتغل كتير ومش عايز يفكر فيها. دخل فهد وهو بيطبل. آدم: إيه يا بهيم، في حد يخبط كده؟ فهد: يا جدع احترمني شوية. بقولك تعالى ناكل النهاردة بعد ما نخلص شغل في مطعم جامد فاتح جديد في سموحة على البحر. (للناس اللي متعرفش إيه سموحة دي، هو مكان في إسكندرية هادي جدًا) آدم: مش فاضي. فهد: يا عم بقى، اخلص. بقولك إيه، كفاية نكد بقى. نخلص شغل ونطلع على المطعم، أشطا؟ يلا سلام. ومشى.

آدم بضحك: والله مجنون. وكمل شغل. عند غزل آيات: غزل، أنا نازلة رايحة الشركة، تمام يا قلبي. غزل: تمام. وأنا هنزل أشوف شغل برضه. آيات: لسه مصممة برضه؟ غزل: معلش ريحيني. آيات: تمام يا بنتي، براحتك. وأهي عندك أوضة الدريسنج روم، شوفي هتحتاجي إيه وخديه. يلا باي يا غزل. غزل بابتسامة: باي يا يويو. نزلت آيات وغزل. لبست بنطلون بوي فريند على تيشرت أبيض واسع ودخلته جوه البنطلون، ونزلت وأطلقت لشعرها الحرية ونزلت.

قعدت تدور على شغل مش لاقية وعمالة تترفض عشان سنها صغير. لحد ما دخلت مطعم كبير واتكلمت مع صاحب الشغل إنها هتكون قد المسئولية، هو بس يثق فيها. وبالفعل الراجل وافق وقالها إنها هتبتدي من النهاردة، وبالفعل بدأت شغل. جاء الليل. عند آدم خلص شغل هو وفهد وراحوا المطعم عشان يشتغلوا. فهد: شوفت بقا، أهو المطعم جامد أهو وعلى البحر كمان. آدم: آه يا خويا، اخلص طيب شوف هتطلب إيه عشان ناكل. فهد: ماشي. ويتر لو سمحت.

جت بنت وهي بتقول: أفندم، تحب تطلب إيه حضرتك؟ فهد: شوربة سي فود واتنين لنجري سوشي. شوف يا آدم عايز إيه. آدم بصدمة: عايز واحد... غزل.