رواية طفلة التميم الفصل الثالث والعشرون 23 - بقلم مارينا عبود

أنا مستحيل أشاركِكِ في ده، قالتها شيري وهي مصدومة. مكنتش متوقعة إن الموضوع يوصل للقتل. صفية التفتت وبصت لها بسخرية. وأنتِ فاكرة إني هحتاج مساعدة من وحدة هبلة زيك؟ فوقي يا شيري ومتنسيش نفسك. شيري بغضب مكتوم. خالتي، اللي أنتِ بتفكري فيه ده غلط. لو سمحتِ متوصليش الموضوع للقتل. صفية بسخرية. إيه يا بت، خايفة عليه ولا إيه؟ شيري بتوتر. وأنا أخاف عليه ليه؟

هو ميفرقش معايا، بس أنا خايفة عليكِ. مالك لو حصله حاجة سوزان ممكن تتهمك. صفية بسخرية. لا يا أختي متخافيش. واتفضلي اطلعي على أوضتك. شيري بصتلها بغضب وراحت أوضتها. أخدت شنطتها وطلعت من الفيلا. صفية بشر. بدأ العد التنازلي لتدمير عائلة جلال. قالت كده وفضلت تضحك بجنون. *** مالك طلع من الكافيه لقى تولين واقفة جنب العربية وسرحانة. مالك اتنهد ورحلها. مسك إيدها وخدها ووقفوا في جنينة هادية قريبة من الكافيه. تولين بهدوء.

مالك، أنا عاوزة أرجع البيت. مالك كان واقف مديها ضهره ومردش عليها. تولين اتعصبت ووقفت قدامه. مالك، بقولك عاوزة أمشي. مالك أخد نفس عميق وبصلها. تولين، هو أنتِ فاكرة إني عاوز أبدأ معاكِ حياة جديدة عشان أنسى فرح؟ تولين بحزن. أومال عشان إيه؟ أكيد محدش هينسى حب عمره في يوم وليلة. والأكيد إنك محبتنيش في الفترة دي. مالك ابتسم وقرب مسك إيدها.

بس أنا مقولتش كده. تولين، أنا عاوز أبدأ من جديد وأنسى أي حاجة متعلقة بالماضي. عاوز أدي قلبي فرصة يحب من جديد. وبما إني هتجوزك، فأ ليه متكونش الفرصة دي ليا وليكِ عشان نبدأ من جديد. تولين بحيرة. الموضوع مش بالسهولة دي. مالك بابتسامة. عارف، بس متأكد إنك هتساعديني أتخطى كل حاجة. مالك مد لها إيده وغمزلها. موافقة؟ تولين ابتسمت وحطت إيدها في إيده. مالك بتنهيدة. طيب يلا عشان زمان الأكل برد بسببك وأنا جعان.

تولين ضحكت وشوحت له بإيدها. مالك بضحك. هي وصلت لكده؟ طيب يلا يا أختي قدامي. مسك إيدها ورجع الكافيه. *** وفي مكتب تميم كان غسان قاعد وبيشرب عصير ببرود وتميم شارد وبيفكر. غسان بغيظ. بقالي ساعة قاعد معاك وبرضه مقولتش أنتَ عاوز إيه. تميم فاق من شروده وبصله. بص، أنا عاوزك تراقب شيري. غسان بتسرع. من غير ما تقول، بعت أراقبها. تميم بصله بصدمة. نعممممم؟ غسان ببرود.

متستغربش. أنا بعت ناس يراقبوهالي ويقولولي على تحركاتها. متفكرش إنه موضوع شيري أنا نسيته. واللي منعني أعرف حقيقة اللي حصل يومها إنه صفية هانم في نفس يوم الخناقة بتاعتكم أنتَ ومالك أخدت شيري وسافرت. وأنا كمان والدي قرر يرجع إسكندرية وكان لازم أرجع معاه وقتها. لكن أنا لحد دلوقتي واثق ومُتأكد إن مالك مستحيل إنه يخونك لأنه مش كل اللي عينينا بتشوفه بيبقى الحقيقة. مالك صاحب صاحبه ومستحيل يخون حد مننا. تميم بغضب.

هو إيه الحكاية؟ كلكم دلوقتي بقيتوا الصح وأنا الغلط والمذنب الوحيد في الحكاية. غسان بهدوء. إحنا مقولناش كده يا تميم. أنا عارفك لما بتتعصب مش بتعرف بتقول إيه. بس أنا كنت أتمنى يكون عندك ثقة أكبر في صديق عمرك. على الأقل كنت حاولت تعرف حقيقة اللي حصل وقتها. تميم مردش واتعصب وسابه ومشي. غسان بتنهيدة. مش هتتغير. بس أنا مش هسيب شيري في حالها غير لما أعرف الحقيقة كلها وأرجع علاقة صحابي ببعض. ***

مالك وتولين طلعوا من الكافيه ومالك أخدها وفضلوا يتفسحوا وهما مبسوطين. وهما ماشيين في الشارع مالك خبط في واحدة. مالك بأسف. احم، أنا آسف. حضرتكِ كويسة؟ البنت رفعت رأسها وكانِت شيري. مااالك! مالك بغضب. هو إنتِ؟ شيري قامت وقربت منه بدلع. كنت متأكدة إنك عمرك ما هتنساني. تولين اتعصبت ووقفت قدام مالك وزقت شيري وقعتها على الأرض. مالك بصلها وحاول يكتم ضحكته. تولين بغضب. إيه يا روح الماما، مش مالية عينكِ ولا إيه؟ شيري بغضب.

أنتِ مين يا بتاعة إنتِ؟ تولين ابتسمت باستفزاز وقفت جنب مالك ومسكت دراعه. خطيبته يا روحي، وكم يوم وهبقى مراته. آه صحيح، إنتِ معزومة؟ تولين بصتلها بغضب وشدت مالك ومشيت وسط صدمة شيري. مالك بضحك. يا بنت المجانين، إيه اللي عملتيه ده؟ تولين بغضب. آه يا خاين يا كذاب يا... مالك بمقاطعة وضحك. إيه يا ماما، في إيه؟ اهدى شوية. تولين بغيظ. مين السلعوة دي؟ مالك مسك إيدها عشان يمشوا. تعالى نرجع البيت وهقولكِ.

تولين شدت إيدها من إيده وبصت له بغضب وصوت عالي. الأول فرح ودلوقتي السلعوة؟ أنتَ حكايتك إيه بالظبط؟ مالك بضحك. اهدّي بس واسمعيني. تولين اتعصبت وزقته. مش عاوزة أسمع منك حاجة. ابعد عني. تولين فضلت تمشي في الشارع وهي متضايقة وهو بيحاول يلاحقها. يا بنتي، وقفي وبلاش جنان. تولين مكانتش مهتمة بكلامه وكانت بتعدي الشارع ومش واخدة بالها من بوق الشاحنة اللي جاية قدامها. مالك بصلها بصدمة ورعب و... ***

الوقت اتأخر وفرح كانت قلقانة على تميم ورايحة جاية في الأوضة بقلق. وبعد وقت تميم رجع الفيلا وهو مضايق ومهموم. طلع أوضته، دخل وقفل الباب بس اتصدم أول ما...