رواية طفلي الصغير الفصل الثلاثون 30 - بقلم هدير عبد العليم

مريم بخضة ودهشة: ها مين؟ زين: في أي مالك؟ بقولك جاي ومعايا عمو فارس. مريم بدهشة: اللي هو بابا؟ زين بابتسامة: آه والله. مريم بخوف: استنى هقولك كل حاجة، باسم هو السبب صح؟ لسه بحكي لماما. زين بدون فهم: السبب في أي؟ مريم بتتردد إنها تقول وبتسأل: بابا جاي لي؟ زين بهدوء: جاي يتأكد… مريم بسرعة: أقسم بالله لسه بحكي لماما وبقولها اللي حصل مش كده يا يارا. زين بدون فهم: اللي حصل في أي؟ مش فاهم. يارا: هو عمو هيفضل بره؟

زين طلع بسرعة ينادي لبابا: اتفضل يا عمو فارس دا بيتك. مريم بخوف وقلق وإيديها بترتعش: أزيك يا بابا عامل إيه؟ فارس: أزيك يا مريوم عاملة إيه؟ وحشاني خالص. مريم: الحمد لله، أنت عامل إيه يا بابا، وأنت كمان وحشتني أوي. فارس: ماشي يا ستي أنا حسيت إني وحشتك قولت أجلك. مريم بهدوء: تنور يا بابا. فارس: أزيك يا أم سليم. يمنى: الله يسلمك. فارس: كنت عايزك في موضوع يا مريم. يمنى: بعد إذنكم هدخل أعمل عصير. يارا: وأنا ماشية.

زين: وأنا جوا يا عمو أول ما تخلص عرفني علشان أوصلك. مريم بدأت تخاف أكتر وبنفس عميق: منور يا بابا. فارس: مريم أنا بعدت عنكم آه بس يعلم ربنا بحبكم إزاي، أنا مليش غيركم أصلاً. مريم بسرعة: وإحنا ملناش غيرك يا بابا. فارس: أنا جاي النهارده علشان أسألك سؤال واضح وصريح وجاوبي بدون إحراج لأنه جواز. مريم قلبي بدأ يقف فعلاً أكيد بابا جاي يسألني رأيي في باسم والشخص التاني اللي باسم قال إنه متقدم: جواز؟ فارس: إيه رأيك في باسم.

مريم بخضة: باسم لا دا إنسان زبالة. بدموع بدأت أحكي لبابا اللي حصل ودي كانت أول مرة أحكي لبابا حاجة تخصني. فارس بسرعة: إزاي يعمل كده دا أنا هعلمه الأدب، من النهارده متخفيش. مريم: ربنا يخليك يا بابا. فارس: البسي بسرعة وتعالى معايا. مريم: هنروح فين؟ فارس: يلا يا مريم بدون أسئلة. مريم: حاضر. *** يمنى بعصبية: أنتِ رايحة فين؟ مريم بهدوء: مع بابا. يمنى بخوف: فين؟ مريم: مش عارفة. يمنى: يبقى مش هتطلعي.

مريم بهدوء: بابا بيخاف علينا دا أب ومفيش أب مش بيخاف على عياله دا إحنا جزء منه زي ما إحنا جزء منك يا ماما وله الحق فينا زيك. يمنى بهدوء ونفس عميق: أنا مش خايفة من أبوك وأنتِ عارفة، أنا خايفة من مراته اللي مش عارفة ممكن تعمل لك إيه، استني أكلم ليلى تروح معاكِ أو خدي سليم. مريم بهدوء: حاضر يا ماما هاخد سليم. *** مريم: بابا سليم جاي معانا. فارس: تمام، يلا. مريم: أنت بتتصل باسم؟ فارس: استني بس يا مريم.

مريم بعد المكالمة: بابا باسم مش شبهي مش عايزة أتجوزه. فارس: … مريم: أنت ليه قولته يجيلنا في حديقة؟ فارس: ممكن تهدئي. مريم بنفس عميق: حاضر. *** فارس بعصبية وصوت عالي: اسمع بقا من غير سلام ولا كلام، مفيش جواز من مريم ولو عرفت إنك قربت منها محدش هيشرب من دمك غيري فاهم. باسم: بنتك بتحب زين أيمن. مريم بدهشة: أنا؟ فارس ببرود: ولو بتحبه أنت مالك؟ احفظ الكلام اللي قولته لك عليه محدش هيشرب من دمك غيري، سلام. ***

فارس: تعالوا نخرج مع بعض شوية لأني عايزك يا مريم. مريم بهدوء وحب: بابا أنا فعلاً مسنودة بيك ومش عارفة من غيرك كنت عملت إيه. فارس بحضن: مريم أنا مش بكرهكم أنتوا عيالي وبحبكم أكتر من نفسي بس كلنا بنغلط وأكبر غلطة عملتها لما اتنازلت عنكم، لما بعدت عن أمكم، أدركت دلوقتي إن كل حاجة ممكن تتعوض إلا الحنية والحب اللي مش موجودين من بعد ما مشيتوا، اتجوزت آه بس ديما أنتوا في بالي. سليم: وأنت ديما في بالنا. *** في نفس الوقت

وعند يمنى ليلى بتزعق: أنتِ إزاي توافقي إن مريم تنزل مع بابا. يمنى بهدوء: أنتِ عبيطة؟ مفيش حد يقدر يبعد أب عن ولاده ولو ده حصل هتقوم حرب ونار محدش هيقدر عليها. ليلى: بس أنتِ مش ضامنة بابا ممكن يعمل إيه؟ يمنى بهدوء: دا أب فاهم يعني إيه؟ يعني لازم تكوني عارفة إنه هيخاف عليكم حتى لو ظاهر عكس كده. ليلى: ماما كلام كله مش صح.

يمنى بعصبية: لا كلامي كله صح، أنا انفصلت عن أبوكم بس مجتش مرة اتكلمت عنه وحش قدامكم، كنت ديما بفتكر المواقف الحلوة اللي عملها عشانكم عشان تفضلوا ديما فاكرينه بالحلو، أنا اخترت أبوكم كأب ويمكن غلطت في الاختيار وكلنا للأسف اتحملنا نتيجة القرار الغلط ده بس دا هيفضلوا أبوكم ولازم كلكم تحترموه.

ليلى: للأسف إن اختيار الأب لو كان غلط، عيلة كاملة بتدمر وعيال بتروح ورا الشمس وهي ملهاش ذنب، الحمد لله إنك كنتي حكيمة وعرفتي تكوني جنبنا وربنا يبارك في بابا أيمن فعلاً. يمنى بهدوء: الحمد لله إن أيمن كويس، زين اتقدم لمريم واتكلم مع بابا فارس. ليلى بدهشة: بجد؟ يمنى: آه اتقدم من فترة. ليلى: تفتكري بابا هيوافق. يمنى: إن شاء الله يوافق. *** عند مريم وفارس فارس: عايز رأيك في موضوع كده ممكن يا سليم تقعد هناك دقيقة بس.

سليم: حاضر يا بابا. مريم بخوف: في إيه يا بابا؟ فارس: إيه رأيك في زين؟ بتحبه؟ مريم بسرعة: أنت صدقت باسم؟ مفيش بينا حاجة والله، دي ماما خلتنا بعدنا في كل حاجة حتى الأكل عشان الاختلاط وكده. فارس: توافقي تتجوزيه؟ مريم بخضة: إيه؟ فارس: مالك؟ مريم: …