رواية ذات 17 عاما ولكن الفصل الرابع 4 - بقلم ايه طه

هى مش خارجة بالمنظر ده، يا تطلع تغير يا أما مفيش خروج من أصله. رهف: يوووه بقى، أنا متعودتش على التحكمات والصوت العالي ده، وبعدين جدو قال لي أطلع. قام جاسر ومسك ودن رهف: شكلك نسيتي نفسك، أنا "أبيه" جاسر ولازم تسمعي الكلام، وأنا مبحبش أعيد كلامي مرتين، فاهمة؟ رهف تصوت بألم: خلاص فاهمة، فاهمة.

وطلعت وهي تدبدب الأرض من غضبها، تغير ملابسها لترتدي فستان طويل باللون الأخضر وكوتشي وشنطة بيضاء، وما زاد اللون إلا جمالاً وإشراقاً. ونزلت وتقول: ها، حلو كده ولا فيه كلام تاني؟ زين: زي القمر يا حبيبتي. جاسر: أيوه كده. رهف: ممكن بقى تبعت لي طلبات المدرسة علشان ألحق أروح وأجي؟ جاسر: لا. رهف: يعني لا؟ جاسر قام وقف. قامت رهف تستخبى في جدها: والله لو شديتني من ودني تاني لأصوت، وأنت حر بقى يا جدو، بقى خليه يبعد عني.

جاسر: أنا رايح معاكي علشان السواق راح يوصل أمي عند خالتي. رهف: ينهار أسود، هو انت هتيجي معايا؟ لا خلاص، أنا هروح في أي وقت تاني أشتري الحاجة، شكراً. زين ضاحكاً: طب اطلع من ورايا وقولي الكلمتين دول يا جبانة، وبعدين مش انتي قولتي إنك عايزة تشتري حاجات ليكي، ليه تأجليها؟ رهف: بصراحة كده بقى، أنا مش عايزة أخرج مع "أبيه" جاسر، أنا خايفة منه، ليشخط فيا ولا يزعق لي.

زين: لا متخافيش، أنا هضمنهولك، وبعدين هو بيتكلم على مصلحتك، يبقى ليه تخافي. رهف: انت مش شفت يا جدو إزاي صوته عالي وبيزعق، وكمان وداني، آه يا وداني، لسه وجعاني لحد دلوقتي. جاسر: إيه شغل العيال والدلع الماسخ ده؟ مش عايزة تروحي؟ إن شاء الله عنك ما طلعتي، أنا غلطان سايب شغلي علشان أوديكي. رهف: آهو شفت يا جدو، لسه مطلعناش من البيت أهو وزعق لي، أعمل إيه أنا دلوقتي.

زين ضاحكاً: حسستوني إني في حضانة، ما خلاص بقى يا ولاد، وانت يا جاسر يا ابني طول بالك عليها شوية، هي لسه مش متعودة على الجو هنا. ويلا بقى علشان متتأخروش. طلعوا من المنزل وركبوا السيارة، ودقائق ووصلوا المول. جابوا ملابس للمدرسة ومستلزمات المدرسة. دخلت محل ملابس لتشتري لها ملابس تناسب أوضاعها الجديدة، وخلصت. جاسر: هو خلاص كده ولا لسه فيه حاجة تاني؟ رهف: معلش تعبتك معايا، بس هو خلاص كده.

جاسر: خلاص استنيني في الكافيه ده، هطلع أحط الأكياس دي في العربية وأرجعلك، ده انتي نشفتي ريقي من كتر اللف معاكي. رهف: خلاص ماشي، وبعدين مانا قولت آسفة خلاص. جاسر: يابت، هو انتي مش هتبطلي لِمَاضَة؟ أشُدّك من ودنك أدام الناس دلوقتي. رهف: لا خلاص والنبي يا "أبيه"، أنا بهزر معاك، أطلب لك حاجة عقبال ما تيجي، ولا تطلب أنت؟ جاسر: ممكن قهوة مظبوط. وسابها ومشي، وهي راحت الكافيه وطلبت قهوة مظبوط وعصير فريش ليها.

وهي قاعدة ماسكة فونها وفتحت الكاميرا لتطمئن على شكلها مهندم، وتلتقط كام صورة لها، ليظهر في خلفية الصورة شابين ويقتربون على ترابيزتها. الشاب 1: ممكن نتعرف؟ رهف: لوسمحت ابعد، مينفعش كده. الشاب 2: ليه بس، إحنا لقيناكي قاعدة لوحدك قولنا نسليكي. رهف اتوترت من قربهم وقررت إنها تقوم تمشي. الشاب 1 مسك إيدها: رايحة فين بس، إحنا لسه بنتكلم. رهف بتوتر: لو سمحت سيب إيدي، مينفعش كده. سيب إيدي بدل ما أنادي على أمن المكان.

الشاب 2: الحق، بتقول لك مينفعش وتنادي على أمن المكان، هههههه. الشاب 1: ما أنا قلت لك يا ابني، شكلها مش من هنا. ها بقى، قلت لي اسمك إيه؟ وفجأة ضرب بوكس وقع على الأرض. رهف: "أبيه" الحقني يا "أبيه". مسكها ووقفها وراه وفضل يضرب في الشابين لحد ما جه الأمن وبعدهم عن بعض، وأخذوا الشابين وطلعوا برا واعتذروا لجاسر، فهم يعلمون جيداً من هو. جاسر ممسك بذراع رهف بقوة: انتي إيه اللي وقفك معاهم؟ أنا مش قلت لك استني في الكافيه؟

مش بتسمعي الكلام ليه؟ رهف بعياط: والله أنا روحت الكافيه، حتى طلبت لك القهوة، بس طلعت الموبايل آخد صورة ليا، هما طلعوا في الصورة وفضلوا يرخموا عليا وقعدوا معايا على الترابيزة بالعافية، ولما مشيت وسبتهم هما جم ورايا ومسكني وحضرتك جيت. آآآه، دراعي يا "أبيه" بتوجعني. جاسر: طب بطلي عياط، وبيطبطب على كتفها: اهدى يا رهف، خلاص بقى، الناس بتبص علينا. رهف بتمسح دموعها بكفوف إيديها زي الأطفال: طب أنا عايزة آيس كريم.

جاسر: ههههه، آيس كريم؟ ماشي يا أختي، تعالي. وراحوا واشتروا آيس كريم وبيأكلوه. جاسر: شفتي بقى لما زعقت لك عشان تغيري اللي كنتي لابسا، كانت لمصلحتك إزاي؟ لو كنتي نزلت باللي كنتي لابسا كان هيبقى إيه وضعك. رهف: والله يا "أبيه" مش هتفرق كتير، ما أنا غيرت ولبست طويل زي ما حضرتك قولت واتضايقت بردو واتعاكست، فملهاش علاقة باللبس.

جاسر: أي نعم حصل معاكي موقف وحش، بس مش معنى كده إنك بردو تلبسي قصير ولا ضيق، انتي خلاص كبرتي، فاهمة ولا لأ؟ ولو كنتي نزلتِ بالقصير كان زماني اتخانقت عشر مرات مش مرة واحدة، حافظي على نفسك عشان مفيش حد هيعرف يحافظ عليها غيرك، ماشي؟ وبعدين انتي هتقابلي من عينة الناس دي تاني، وتصرفك ده معجبنيش بالمرة. رهف: امال كنت عايزني أعمل إيه يا "أبيه"؟ جاسر: أديله بالقلم على وشه ونادي الأمن.

رهف: ما أنا قلت له هناديلك الأمن، بس هو ضحك عليا ومصدقش. جاسر: هبلة؟ هتفضلي هبلة لحد إمتى مش عارف، يا بنتي بقول لك افعلي يعني اضربي وانادي فعلاً، مش تهدديهم إنك هتعملي ده، فهمتي؟ رهف: أيوه فهمت، بس شكراً يا "أبيه" إنك جيت في الوقت المناسب. جاسر: العفو، متقوليش كده، انتي بنت عمي يعني لحمي وعرضي بردو. وبص لها، وأول مرة ياخد باله من لون عينيها اللي ساحرة، ولكن سرعان ما

خرج من شروده على صوت رهف: مش يلا يا "أبيه"، زمان بابا خلص الجلسة، وحشني أوي. جاسر: آه صح، يلا بينا. وخرجوا وذهبوا للمنزل. أخذت رهف من جاسر أكياس الأشياء وقالت لهم: هطلع أحط الحاجة في أوضتي وأنزل على طول. زين: أنا هقوم أطلع لمحمود أمهد له عقبال ما رهف تنزل، تبعتوها على أوضة محمود، ماشي؟ جاسر: حاضر يا جدو. بعد ما مشي زين. نرمين: إيه، هنشتغلها سواقين وشيالين كمان؟ جاسر: في إيه يا ماما؟ انتي ليه مضايقة من رهف كده؟

على فكرة دي بنت عمي ولسه جديدة على البلد، مش المنطقة، ولازم أكون معاها وأحميها، أنا مش شايف فيه مشكلة خالص. نرمين: يا سلام، ما خالتك نقلت من إسكندرية وجت القاهرة، قعدت أتحايل عليك عشان تاخد خلود بنت خالتك وتعرفها الأماكن ولا تروح معاها مشوار، ما هي كمان جديدة في المنطقة، ولا هو عند رهف حلو وخلود لأ؟

جاسر: يا ماما، أنا كان عندي شغل مهم جداً الفترة اللي فاتت دي، محدش ينفع يشتغل عليه غيري، وبعدين خلود عندها أخوها، أما رهف معندهاش غيرنا.