رواية ظننا انه باب الامل الفصل الخامس والثلاثون 35 - بقلم ملك ناصر

عدا اسبوعين من غير احداث جديدة. غير ان جاسر قال للعيلة ان كيان رجعتلها الذاكرة. ومحدش جاب سيرة اللي حصل. وسافروا الاتنين شهر عسل وخدوا روز معاهم بطلب من كيان. كانت نايمة روز في حضن كيان بين جاسر وكيان. أما جاسر فكان صحي من النوم بس فضل قاعد يتأمل جمالهم وهما نايمين مع بعض. وفرح جدا من حب كيان لروز. كيان فتحت عيونها بهدوء ودعكت في عنيها زي الاطفال. كيان: صباح الخير. جاسر: صباح النور يا كياني.

كيان باست روز برقة على خدها وقامت. جاسر: طب انا مليش نصيب انا كمان ولا ايه. كيان ضحكت ودخلت تاخد شاور. بعد وقت. كانوا في المطبخ بيحضروا الفطار. كانت كيان بتعمل الاكل وشعرها نازل على عينيها ومضايقها ومش عارفة ترفعه علشان إيديها مكنتش نضيفة. جاسر قرب منها ومسك شعرها بهدوء. كيان بتوتر وكسوف: انت بتعمل ايه. جاسر من غير كلام عملها شعرها ضفيرة. وكان نازل خصل قصيرة على وشها ورقبتها وكان شكلها جميل جدا.

جاسر لفها لعندوا بعد ما خلص. جاسر: تعرفي اني بحب شعرك اوي. كيان بابتسامة: اممم ماهو اصلا شعري يتحب. جاسر: فصيلة. كيان بضحك: هههههه يابني قولتلك مش بحب شغل الرومانسيه والمسلسلات التركي دي. جاسر ضربها بخفة على راسها: طب يالا ياختي كملي اللي فيايدك. جت من وراهم روز وهي بتدعك في عينيها. روز: بابا. جاسر فتحلها دراعه علشان تحضنه وروز جريت وحضنته. كيان بغيره مصطنعة: الله اشمعنى هو وانا فين.

روز بعدت عن جاسر وحضنت كيان وباستها من خدها. كيان بحب: يا روحي. صباح الخير يا قلبي. روز: ثباح النور يا كوكي. كيان: الفطار جاهز ممكن تساعدني يا جاسر نوديه للسفرة. جاسر: عيوني يا قلب جاسر. وفطروا هما الاتنين. وهما قاعدين بيفطروا جاسر اتكلم. جاسر: احنا هنرجع القصر بكره يا بنات. روز وكيان بزعل: ليه كده. جاسر: هههه علشان ورايا شغل كتير احنا بقالنا هنا اسبوعين ولازم نرجع. وبعدين انا حجزت الطيارة خلاص.

كيان: جاسر بلاش طيارة خلينا نروح بعربية اصلا المكان مش بعيد. جاسر: بس انا مش معايا عربية هنا خالص وفي دهب مفيش عربيات توصلنا لهناك. كيان بتفكير: امممممممم ينفع تقول لعدي يبعتلنا حد من هنا يجي يجيبنا. جاسر: تمام اللي تشوفي يا حبيبتي هقوله. اصلا في سواق جديد جابوه من اسبوع تقريبا هقول لعدي يبعتوا. تاني يوم. كانت كيان واقفة قدام الدولاب وبتحضر هدومها بهدوء. وجنبها روز اللي بتتفرج على التليفون.

جه جاسر وراح حضن كيان من ضهرها وهي كانت سرحانة. كيان بفزع: جاسر خضتني. جاسر: سلامتك من الخضة يا قمر. انا كلمت عدي والراجل خلاص قرب يجي لهنا. فضلوا ساعة تقريبا. كيان: تمام انا خلاص رتبت الشنط كلها وجاهزة. جاسر: تمام. بعد وقت. وقفت كيان قدام جاسر وهي ماسكة لفت. كيان: ايه رأيك. كانت لابسة دريس ازرق طويل وبكم وكان محتشم شوية عن اللبس اللي هي بتلبسه. وكانت رافعة شعرها لفوق ومش حاطة اي ميكب.

جاسر باعجاب واضح وفرحه: جميل اوي عليكي يا حبيبتي ياريت تلبسي كده على طول. كيان: مانا فعلا هعمل كده. وكمان بفكر اتحجب. جاسر بصدمة وفرحه: بجد انتي عايزة تتحجبي. كيان هزت راسها بـ اه. جاسر: يالا يا كيان. جاسر وكيان وروز خرجوا بره الفيلا اللي كانوا فيها. ولقوا شخص شعره فيه خصل بيضة وواقف بضهره قدام العربية. الشخص لف راسه لما سمع صوتهم. الشخص: اهلا وسهلا يا جاسر بيه.

كيان اول ما شافته الابتسامة اختفت من وشها وتعبير وشها اتملى بالصدمة. كيان بصدمة: ا. انت.