رواية ذنوب على قيد الغفران الفصل التاسع 9 - بقلم براء

غنى: لحكته للمكتب أول ما دخلت ما حسيت روحي غير انجريت. هاااايييييي شبييييك؟ جعفر: بعصبية، منو هذا اللي نزلتِ من سيارته؟ غنى: دفعت إيده. شبيك أستاذ، شهالأسلوب وعليمن هالصياح؟ جعفر: غنى جاوبيني منو هذا، لتشلعين كلبي لخاطر دينج. غنى: تره ماله داعي هالأسلوب، تكدر تسألني بهدوء وأني أجاوبك. تصرفك هذا مامقبول، وبالنسبة للي وصلني فهذا جوارينه وما جيت ويا وحدي، أخته ويانه. جعفر: وليش تصعدين وياه؟

إذا ناسيه أذكرج، أني سنين أتوسل بيج حتى تصعدين وياي وترفضين بحجة تستحين مني. شو هذا اللي وصلج ما استحيتي منه؟ شنو مو رجال حتى هيج ماخذة راحتج وياه؟ غنى: شنو ماخذة راحتي وياه؟ شنو شفتني بوضع غير أخلاقي حتى تحجي هيج؟ وبعدين أنت شنو تحاسبني أصلاً؟ مالك أي حق تكلي ليش ووين. أني جبيرة وواعية وأعرف شلون أتصرف ومستحيل أسوي شي غلط، لا ويه هذا ولا ويه غيره. جعفر: يعني تردين تقنعيني إنو أنتِ ما عندج شي ويه هذا اللي وصلج؟

غنى: وأنت منو وأني أحاول أقنعك؟ اسمعني زين أستاذ وافتح آذانك عدل... أني من جنت مراهقة ما سويت شي غلط يجيب الحجاية لبيبيتي وهي عدلة، تريدني هسه من صرت جبيرة أسوي غلط وأجيب الحجاية لبيبيتي وهي ميتة؟ شنو أنت ناسي أني منو؟ أني غنى أستاذ، عمري ما سويت ولا حسوي شي يجيبلي الحجاية. جعفر: غنى أنتِ فهمتيني غلط، أني ما جان هذا قصدي... بس من حبي وغيرتي عليج تكون هيج ردة فعلي. شايفه شصار بيه من شفتج نازلة من سيارته؟

غنى: على أي أساس تغار عليه؟ هو شنو اللي بيني وبينك أستاذ؟ وبعدين أنت كلتها شفتني نازلة من سيارة مو بوضع مو زين، فعليش هالهوسة؟ جعفر: تقربت منها. أحنه بينه كل شي غنى... أني أحبج وأريدج وأغار عليج حتى من نرجس. ومن شفتج نازلة من سيارة واحد غريب ترديني ما أنقهر وأعصب؟ هذا شي مو بأيدي. مديت إيدي أريد ألزم إيدها.

غنى: جريت إيدي. أستاذ رجاءً، أني أحترمك وأعتبرك مثل أخويه، بس مع هذا ميحقلك تحاجيني بهالطريقة. أني مو بت شارع ولا ممتربية وتجي أنت تعلمني شلون أتصرف. رجاءً خلي يكون بيناتنه احترامات، أنت أستاذي ومثل أخويه وأني طالبة عندك لا أكثر. ياريت متفكر إنو ممكن نكون غير شي. عفته وطلعت. شفت البنات واكفات كبالي. ما حجيت أي شي غير: يلا بنات امشينه راح تبدي المحاضرات. أروى: شبي هالاستاذ ويه غنى؟ نرجس: والله ما أدري، علمي علمج.

غنى: دخلت للقاعة ذبيت ملازمي وكعدت على الستول. مرتضى: شبيج غنى ليش وجهج أحمر؟ غنى: مابيه شي. مرتضى: اكو شي صاير؟ غنى: ماكو شي مرتضى، كتلك ماكو شي لتلح. مرتضى: شبيج عصبية؟ هسه شكتلك أني؟ غنى: تنهدت. أني جداً أعتذر مرتضى، مو قصدي أعلي صوتي عليك، اعذرني. مرتضى: ابتسمت. ولا يهمج، ما صار شي. فهد: كاعد بغرفة التحقيق وكدامي المتهم. بنفاذ صبر. وبعدين ناوي تطول ياله تحجي؟ المتهم: سيدي، أني ما عندي شي أحجي.

فهد: رفعت حاجبي. إذا ما عندك شي تحجي، أني شكول؟ شوف الأدلة كلها ضدك وماكو غيرك اللي يندل مكان هالسفلة. تحجي لو لا؟ لو أكلك اسمع... خلي أنطيك مقدمة فكر بيها زين. عندك منا لربع ساعة حجيت كان بها، ما حجيت ألجأ لغير طريقة بالتعامل وياك. هم أتونس وهم أخليك تعترف. شتكول؟ المتهم: كتلك ما عندي شي أحجي ولا راح أحجي. إلحاح لتلح، فتهمت. فهد: ضربته بوكس على وجهه. بهدوء من تحجي وياي احجي بأدب، أني مو واحد من جماعتك الصكط.

المتهم: بألم. شتريد تسوي سوي، واعتراف ما أعترف بشي. فهد: كمت. خلص براحتك. صحت للشرطة. تعالوا شدو ونزعوه الي لابسه. المتهم: بس سيدي. فهد: باوعتله. أني شكلت؟ نقاش ما أريد. اشتغلوا يله. أباوعلهم جرو وهو يجر بروحه. ابتسمت. نزعوه من فوك يله. أباوعله. أنت جبتها لنفسك. طلعوا أنتو. أخذت السوط. يله احسب. خلي أكون رحيم وياك. عد منا للخمسين يله راح أبدي. ضربته. المتهم: آآآآخ. فهد: مو كالت عد؟ ليش تخليني أعيد من البداية؟

يله راح أعيد. ضربته. يله عد لك. ضليت أضربه أضربه ما حجه. عفت السوط. تحجي لو لا؟ المتهم: بألم. لو تموت. فهد: رفعت كمام القميص. الواضح اللطف ما يفيد وياك. ضربته بوكس. أباوع الدم كام ينفض من حلكه. استلمه بوكسات لمن كام يبجي. يله عفته. لزمت وجهه مردته بأيدي. بهدوء وين مكانهم؟ المتهم: بس عوفني والله أحجي. فهد: لتجيب طاري الله على لسانك النكس. يله احججججي. المتهم: بألم. احجي احجي بس عوف وجهي. فهد: دفعت وجهه. اسمعك.

المتهم: بدموع. بمنطقة (... يم الصيرفة. فهد: ضغطت على جروح جسمه بأيدي. لو حاجي من البداية موجان حافظت على منظر وجهك المقزز هذا. المتهم: آآآآخ كافيييي بروحك أبوه عوووفني رااااح أموووووت بأيدك. الشرطي: هذا ظلم وحرام ما يصير. الي جاي يسوي هذا يتسمى تعذيب وقتل نفس على البطيء. لخاطر الله هالضابط ماله رداد. الشرطي 2: مو اشتكينا عليه يم المسؤول بس محد حاجة.

الشرطي: اسكت يمعود ليسمعنه وانوب يخلينه بمكان السجين. هذا ما عنده كلب. كلشي يطلع منه. الشرطي 2: الله على الظالم. فهد: عفت وجهه. لسوء حظك أني ما أحب أبويه. بس راح أتركك لأن تقريباً خلص شغلي وياك. عفته وطلعت. أباوع ذوله الشرطيين واكفين يبسبسون. خير. الشرطي: نعم سيدي. فهد: نعم الله عليك. التهي بشغلك وعوف السوالف. الشرطي: حاضر سيدي. غنى: طلعنه أني ونرجس من المحاضرة وكعدنه بالحديقة لأن أروى بعدها لسه ما خلصت محاضرتها.

نرجس: تعالي سولفيلي ليش ما كتلي؟ الي شفنا بالزيارة هو نفسه جوارينه؟ والبارحة أخابرچ متردين عليه تتهربين مو؟ غنى: أدري، لو كتلتج جان لزكتي وأني ما عازتج. وبعدين أنتي ليش مركزة ويه الرجال هيج ولج عيب عليج. نرجس: انجبي. وبعدين أني عجبني يخبل ولج حبابة حاجي أمي خلي أجي أعيش يمكم. غنى: ليش؟ نرجس: حتى أصير جوارينه هذا الحلو. صدك شنو اسمه؟ غنى: باوعتلها صفح. فهد. نرجس: أويلي اسمه رجولي. غنى: رجوليش تره اسم حيوان.

نرجس: دنجبي ما عندج ذوق حبيبتي، هذا اسمه مميز. ومو مكرر. غنى: هسه أحنه ليش نسولف بي؟ ابن عمنه ابن خالتنه. وبعدين أنتي شبيج مشايفة زلم. نرجس: وين شايفة يحسرة. وحتى لو شايفة فهد عجبني. غنى: هزيت إيدي. الحمد لله والشكر. أنتي شبيج يارب كون يطلع مزوج حتى أخلص من نكج. نرجس: منو كال مزوج؟ غنى: ما أدري بس هو جبير فأكيد مزوج. نرجس: لا ما أعتقد. جان كالت أروى. غنى: على العموم الموضوع ميخصني وكافي تحجين بالرجال عيب.

نرجس: كلبت عيوني. ماشي يا أم العيب. غنى: شوية واجت أروى. كعدنه فتره وكمنه لمحاضراتنه وعلى هالمنوال لحد ما خلص الدوام. طلعنه لكينه فهد واكف بره. صعدنه. أروى: شلونك؟ فهد: بهدوء. بخير. غنى: وصلنه للبيت. أروى نزلت بسرعة وأني نزلت وراها. فهد: غنى. غنى: ها. فهد: خو الي صار اليوم ماسببلج مشكلة ويه خطيبج؟ غنى: خطيبي منو؟ فهد: هذا اللي كام يكمز الصبح. غنى: هذا مو خطيبي. فهد: ها فهمت السالفة؟ غنى: شفت فهمت.

فهد: هيج يله روحي لبيتج. غنى: فتحت الباب ودخلت. شفت خالتي لازمة الموبايل وتفتر رايحة جاية. ذبيت جنطتي. أشرتلها شبيج؟ سحر: يله بعدين أخابرج. ها حبيبتي شلونج؟ غنى: فتحت شالي. الحمد لله. شبيج خاله ليش صايرة عصبية؟ سحر: راتب أبوج كطعوه. غنى: فتحت عيوني. ليش؟ سحر: والله ما أدري بس كطعوه. غنى: ياا! وأني جنت مأمنة اكو راتب أصرف منه كل شهر. هسه شلون أدبر أمري؟

عزز جماله أني المفروض أدفع كروة مال خط للجوارين لأن ديوصلوني. دمعت عيوني. ياربي ليش هيج. سحر: بس أريد أفتهم ليش كطعوه. والمشكلة أني حتى فلوس الورث دزيت نصهن لرجلي. شجاية أني استعجلت؟ غنى: تنهدت. لتشيلين هم خاله، عود أرجع أخيط حتى إذا أبدي من اليوم. سحر: ومنين يجوج زباين يايمة؟ قابل الناس تعرفج هنا. غنى: يا الله منين طلعتلي هالسالفة. سحر: شفت الحيرة بعيونها. أني آسفة يمه فوك ضيمج اجيت أني جماله عليج.

غنى: بست إيدها. صدك تحجين خاله؟ أنتي وجودج الي مصبرني على هالعيشة. لو ما أنتي جان أني لحكت مروان وبيبي من زمان. سحر: حضنتها. حبيبت كلبي لتضوجين، يحلها الحلال. غنى: ما أكدر أضل كاعدة وساكتة لازم ألكه حل. إذا مو الخياط لازم أشتغل. إذا كعدت كل شي ما أستفاد. سحر: دكومي يمه بدلي وصلي وتغدي وعود بعدين نفكر بحل. غنى: ما أريد أكل، انسدت نفسي. أني كايمة أصلي وأنام. سحر: ميصير يمه، باوعي روحج راح تنكطمين.

غنى: ما أشتهي خاله، من رخصتج. صعدت لغرفتي. نزعت ملابسي وطبيت سبحت. طلعت صليت وتمددت. أول ما خليت راسي على المخدة نزلت دموعي. ياربي شوكت تنزل دموع فرح من عيوني؟ كافي حزن وتعب، مو كلبي خلص. أروى: صعدت الجاي لفهد. دكيت الباب ودخلت. تفضل. فهد: شكراً. أروى تعالي أريد أحجي وياج. أروى: كعدت. صار. فهد: هاي البنية جوارينه. أروى: قصدك غنى؟ فهد: أي. المهم... هي عدها سوالف موزينة. أروى: لا والله البنية كلش حبابة ومؤدبة إلى درجة.

فهد: هزيت راسي. أكيد. أروى: أكيد بس ليش تسأل؟ فهد: ردت أتأكد منج. ما أريدج تمشين ويه بنات مو راحة. أني أعرفج أنتِ شنو وأدري بيج جبيرة وتعرفين تصرفين. بس الحذر واجب، خاصة إنو أنتِ طيبة واللي مثلج سهل يتأثرن باللي حواليهن. أني مو أشك بيج بس أخاف عليج، لأن بوكتنه تاهت علينة الزينة من الموزينة. أروى: لتخاف عليه، أخت فهد متسوي شي غلط.

فهد: ابتسمت. وهذا اللي متأكد منه. أني خواتي ينضرب المثل بأخلاقهن. وأنّي لوما أخاف عليج وأحبج ما أحجي وياج. أروى: ابتسمت. أروحلك فدوة حبيبي لتشيل هم، أني كد الثقة. فهد: مسحت على شعرها. متأكد من هالشي. أروى: يله أني أروح أنام، تريد شي؟ فهد: لا براحتج. غنى: فتحت كنتوري طلعت الفلوس. أوف الراتب شبه خلص. شسوي هسه؟

صار شهر أحاول أدبر شغل وماكو. قبل فترة رحت للدائرة اللي يشتغل بيها أبويه الله يرحمه حتى أستفسر عن سبب قطع الراتب بس منطوني سبب مقنع ولا حتى صرحوا بشي. وهسه كاعدة وحاطة إيدي على خدي ما أعرف شسوي ووين أروح. حتى المبلغ اللي عد خالتي قرب يخلص والمشكلة بدت امتحاناتنه وحتى على دراستي مداركز. فزيت على إيد خالتي. سحر: ها بعدج تفكرين؟ غنى: باوعتلها. لا على شنو أفكر؟

تنحل إن شاء الله. أني بلغت نرجس تشوف النسوان اللي بالمنطقة يريدن يخيطن حتى أخيط لهن. وهسه منتظرة رد نرجس. هاي شوفي اتصلت عليّ، خلي أشوف. الوو ها نرجس بشري؟ نرجس: والله أني كتلهن ودزيت أمي العصر تروح تسأل منو تريد تخيط بس ماكو ولا وحدة تريد. كلهن يكولن مكانج بعيد. وين يوصلن الج. غنى: تنهدت. وتالي هسه شلون بيه؟ الراتب خلص ومن هالشهر راتب أبوج انقطع. منين أجيب مصرف؟ نرجس: أنتي ليش شايلة هم هيج؟

غنى: أنتي تدرين أني فوك ضيمي طالبة وعندي دراسة. احتاج ملازم وكتب وهوسة. وإذا عدنه بحث لازم أصرف. عوفي هذا كله، أحنه عدنه امتحانات ومابقا شي ونخلص. وفوك هذا البيت يحتاج مسواك ومستلزمات. والاتعس أني وكعت روحي بسالفة تفشل. المفروض أنطي فلوس بعد كم يوم لفهد لأن ياخذني ويجيبني ويه أخته. تعالي كوليلي هاي المصاريف شلون أكدر أدبرها وأني ما عندي شي؟ هو الراتب اللي جان عندي وما يكفي مو أنوب كطعوه.

نرجس: أنقهرت من حسيتها كامت تبجي. خلص نونة لتبجين، والله أني أساعدج. غنى: بدموع. إلى متى تضلين تساعديني؟ شهر شهرين وبعدين شيصير؟ خو موتضلين العمر كله تساعديني. نرجس: خلص أهدي، إن شاء الله نلكه حل. سلمت عليها وسديته. وره شويه خابرتني أروى والي صارت صديقتنه بفترة قصيرة. من حركت كلبي سولفتلها كل شي. أروى: معقولة كل هذا صاير ويه غنى؟ نرجس: أي سودة عليه جانت ومازالت شابعة ضيم. أروى: خطية الله يكون بعونها. ولامبين عليها.

نرجس: غنى تكبت بداخلها. أبد ما تحجي. إنسانة مسالمة ومالها علاقة بأحد. جانت قبل حياتها عبارة عن أخوها وبيبيتها الله يرحمهم. وللأسف خسرتهم وانهارت. تدرين ضلت أشهر معتكفة على نفسها بسبب اللي صار. أروى: ولج مردتي كلبي. بس تدرين تفاجئت؟ عبالي خالة سحر تصير أمها. نرجس: لا خالتها. أهلها توفو بحادث من جانت صغيرة. أروى: يا عيني خطية.

نرجس: لو تشوفيها هسه تكسر الخاطر. خابرتني تنحب وتبجي تكلي فلوسها خلصت ومتكدر تصرف شي. رادتني أبلغ النسوان حتى تخيط لهن بس محد قبلت. آآخ عفيه أروى مو تكلين لغنى سولفتلج تره تزعل مني. واني لوما مخنوكة مجان سولفتلج. أروى: لا يمعودة شلون ترديني أحرجها وأحاجيها بهيج موضوع؟ يله أني أروح بعدين أخابرج. نرجس: باي. أروى: سديت الموبايل. اجت على بالي شغله. يارب كون تضبط. كمت بسرعة طلعت من غرفتي. دكيت الباب. إيمان: تفضل.

أروى: مديت راسي لكيت فهد وأمي كاعدين سوه. يمه عادي أخذ من وقتج شويه. إيمان: تعاي حبيبتي. أروى: كعدت يمها. يمه أريد أحاجيج بموضوع وأريدج تساعديني. إيمان: إذا أكدر من عيوني. فهد: تحبين أطلع حتى تاخذن راحتجن. أروى: لا عادي خليك. الموضوع أنت حتدري بيه بكل الأحوال. باوعت لأمي. يمه أني عندي صديقة محتاجة فلوس وحالتها المادية جداً ضعيفة. إيمان: خطية شكد محتاجة.

أروى: يمه هي متريد فلوس أصلاً. متدري بيه أني أدري بوضعها. المهم هي تشتغل خياطة وخطية جانت قبل تخيط بس هسه ماكو. ويه حظها محد يخيط عدها وهي يتيمة وما عدها أحد. جانت عايشة على راتب أبوها وهسه الدائرة كطعته. فهد: بهدوء. اللي تحجين عليها غنى مو؟ أروى: ها... أي. إيمان: شلون يتيمة وأمها عايشة؟ شبيج يمه. أروى: لا يمه هاي مو أمها، هاي خالتها. شوفي راح أسولفلج قصتها.

سولفتلها. أباوع لأمي دمعت عيونها وفهد ضل ساكت. ولهسبب أريد أساعدها خطية تكسر الخاطر. ونرجس تكول مكضيتها بجي لأن متعرف وين تروح. إيمان: خطية ولج مردتي كلبي. زين أني شلون أكدر أساعدها هسه؟ باوعت لفهد. ما عندك فكرة؟ فهد: لا والله. أروى: أني عندي الحل. إيمان: شنو؟ أروى: سمعو... هي مو تشتغل خياطة؟ والحجية ياسمين الكل يعرف إنو متلبس أي شي جاهز اله تفصال وعلى ذوقها. فليش مندليها على غنى حتى تخيط عدها؟

إيمان: خوش فكرة. وأني هم أخيط عدها حتى لو ما أحتاج المهم أفيدها. يتيمة ونكسب بيها ثواب. فهد: وبنظركم هالكم شغلة اللي راح تسونها راح تفيدها؟ وشتريد تفيدها؟ فلوس الخياط تعوض عن راتب كامل أكيد لا. إيمان: زين ليش منخليها تخبز وتطبخ النه وننطيها راتب كامل كل شهر؟ فهد: أكيد لا. بتصرفج هذا راح تحرجين البنية.

إيمان: لا يمه مابيها إحراج. أحسن ما أحرجها وأنتيطيها فلوس ببلاش، خلي تشتغل ومن تعبها تاخذ الفلوس. الشغل مو عيب ولا ينقص من شأن الإنسان. كلما جانت شغلتك شريفة كلما جان راسك مرفوع بين الناس. وبعدين أني ما راح أحرجها. أني هم محتاجة، تدري بيه صرت مرة جبيرة مابيه حيل مثل قبل أخبز وأطبخ لجيش كامل الله يحفظكم. ونسوان أخوتج كل يوم كابه العيطة بيناتهن. فخلاصاً للمشاكل أنو أخطّي هالخطوة، هم أفيد البنية وهم أفيد نفسي.

أروى: بس يمه ما أعتقد غنى تقبل. وأني مستحيل أحاجيها بخصوص هالموضوع. إيمان: حاولي شوية شوية تفهميها. وأني والله لو أدري بيها تقبل تاخذ فلوس بدون مقابل ما جان قصرت وياها. أروى: هزيت راسي. يله يمه أني أروح من رخصتكم. فهد: مسحت على وجهي. معقولة اكو ناس هيج عايشة؟ والفلس ياثر عليهم. سعاد: سمعوا ولكم أني بعد ما أكدر أتحمل. شوفولكم حل.

فيصل: أني جاي أسوي اللي عليّ. مرتي كلما فهد يطلع تدخل تفتش بالغرفة وتحاول تفتح الخزنة. لمن كشفها الشفيه شلون ما أدري. فبعد ما أدخل. سعاد: باوعت لمنذر وليلى. وأنتو لتكوليلي كل شي ماسويتوا. ليلى: أني شعليه؟ ترديني أندك ويه فهد حتى يطردني؟ ما عليّ. سعاد: أنتو جهال. أنتو تف عليكم. ولكم أني هاي هوستي غير حتى أرجع حقكم اللي باكه فهد وأمه مو حتى أرجع البساط جوه رجليكم. منذر: يمه أنتِ ليش تسوين هيج؟

يعني هاي جزاء فهد محترمنه ومخلينه ببيته وما مقصر ويانه. تردينه نبوكه؟ فيصل: أنت انجب. طول عمرك منحاز لفهد. ولا جن أمي باكت أبونه وحرمتنه منه. سعاد: حشى، أنت مو ابني. والله ابن إيمان. ولك خلي نصير إيد وحدة حتى نرجع الأملاك. مو صار ١٢ سنة نعاني؟ ما مليتو من هالعيشة؟ ما زهكتو؟ ليلى: يمه يعني شنسوي؟ كل شي بأيد فهد. قابل شلون ناخذ الممتلكات منه؟

سعاد: ضربت على رجليه. ولكم آآآخ راح أموت. ما خليت مكان مادورت بي. أريدلي ورقة مستمسك اله علاقة بالورث ماكو. كل شي بح. ولكم كمت أنزل من روحي وأكعد ويه هاي الريفية بت الفلاليح على حسابكم. أني سعاد كمت أكعد ويه أشخاص أدنى مني. أنتَو دتحسون باللي أحسه؟ أكيد لا. لأن ما عدكم كرامة. فيصل: خلص يمه شجاج؟ انهديتي علينه؟

قابل أحنه منكيف نرجع كل الأملاك النه ونطلع فهد وأمه من حياتنه. بس الموضوع خارج عن إيدنه. ما نعرف مكان أي شي يخص الفلوس. لا مستمسكات ولا رمز الخزنة ولا حتى اسم البنك اللي بي الفلوس. فهد متكتم على الموضوع. منذر: كمت أني. بالنسبة إلي طلعوني من هالوضوع. تردون تتعاركون تبوكون هذا شي بينكم وبين فهد. ناركم تاكل حطبكم. أني ومرتي لحد يدخلنه. عفتهم وطلعت. ليلى: وهسه شلون؟

سعاد: مابيها شلون. بقالي بس حل واحد حتى أكدر أوصل للفلوس. هاي إذا ضبط. فيصل: شنو هو؟ سعاد: بتول. صباحاً. غنى: اجت أروى. صبحت عليها وطلعنه للكلية. وصلنه ذبيت غراضي ودخلت لقاعة الامتحان. سميت بأسم الله وبديت أحل. وره نص ساعة كملت وكمت سلمت الورقة. طلعت كعدت بالحديقة. شوية واجت أروى. ها شلونج بالامتحان؟ أروى: لا الحمد لله تمام. أنتي شلونج؟ غنى: سهلة الأسئلة.

أروى: أحم أكول غنى، أني سمعت بيج خياطة. عادي تخيطين لبيبيتي وأمي لأن هنّه ما يحبن اللبس الجاهز. غنى: نرجس سولفتلج مو؟ أروى: لا لا. غنى: أدري بيها سولفتلج. أروى: غنى فدوة لتزعلين منها. والله هي كد ما جانت ضايجة ومقهورة عليج فلتتها كدامي. غنى: هزيت راسي. وأنّتي شفقّتي عليه وودبرلي شغل مو؟

أروى: لزمت إيدها. لا والله أني مو هاي غايتي. بس حبيت أساعدج لا أكثر. وبعدين أني مجذبت عليج، فعلاً الحجية ياسمين وأمي يردن واحد يخيط لهن. يعني مو جابرتهن على مودج. والله ها شكلتي؟ غنى: ما عندي مانع. أروى: أني سمعت راتب والدج كطعوه ولهسبب تردين ترجعين تخيطين مو؟ غنى: تنهدت. أي. أروى: وفلوس الخياط تكفيج؟ غنى: ما أدري أروى لتسأليني. أروى: زين عندي الج اقتراح. والله يخليج لتاخذيه بغير قصد. غنى: شنو؟

أروى: أحنه محتاجين طباخة لأن أمي مابيه بعد توكف وتطبخ ونسوان أخواني دومهن عرك على حساب البيت. فبما إنو بعد فترة نخلص امتحانات أريد... غنى: قاطعتها بهدوء. ترديني أشتغل خدامة عدكم مو؟

أروى: لا والله مو خدامة بس طباخة. والج راتب شهري حاله حال الوظيفة. بدال ما تشتغلين بمول أو تشتغلين بمكان ميناسب وضعج كبنية أو تضلين حايرة. قبلي غنى، والله أني لو بأيدي أساعدج بأي طريقة كانت وماكو غير هالطريقة. وصدكي الموضوع حيبقى بيناتنه محد حيجيب طاري. غنى: بقلبها. وصلت بيج الدنيا تسحبين حتى كرامتي وتخليني أنزل نفسي وأشتغل خدامة عد الناس حتى أدبر عيشة.

أروى: غنى حبيبتي فكري بكلامي. أنتِ ما عندج غير حل. الشغل لا عيب ولا حرام. وأنتي إنسانة رائعة وبنية مثابرة. ماكو وحدة كدج شالت مسؤولية بيت وعائلة وتحملت ضيم وقهر ومع هذا ضلت صامدة. غنى: تنهدت. أشوف خالتي تكول. اجت نرجس ووره فتره طلعنه رحنه للبيت. وصلنه دخلت للبيت بعد ما أكدت عليه أروى حتى العصر نروح لبيبيتها على حساب أشوف شنو تريد. دخلت للبيت سلمت على خاله وكعدت سولفتلها. سحر: أنتي صدك تحجين؟ تردين تشتغلين خدامة؟

ليش شعايزج؟ غنى: شسوي خاله؟ إذا عندج حل انطيني. هاي صارلي شهر ما خليت مكان مادورت عليه بشغل. وين ترديني أروح وشلون أدبر هالعيشة الكشره هاي؟ هالتشوفين الراتب بح ماكو ولا فلس بالبيت. أحنه هسه ما عدنه غير هالبيت وهالكم غرض اللي بي. شلون حنعيش ومصدر عيشته راح شنو نموت من الجوع؟ هاي شوفي حيجي الشتا شلون نفرش البيت واحنه ما عدنه شي. شنو نموت من البرد؟ لازم أشتغل أي شي بس في سبيل أدبر عيشة الي والج.

سحر: إذا مثقلة عليج يمه أروح لتدمرين نفسج على حسابي. غنى: خاله أنتي بوجودج وعدمه أني جنت أسوي هيج. لو باقية وحدي هم الدنيا تبقه تلطش بيه وتاليتي أشتغل خدامة إذا مو بيتهم بغير بيت. سحر: أني خابرت رجلي حيدزلنه فلوس. غنى: خاله رجلج شبه أعلن أفلاسه هناك. وكل ساعة طايح. بدال ما يعالج روحه بهالفلوس تردي يدزهن النه. صدك تحجين. سحر: مشكلته هاي. أنتي مامجبورة تصرفين عليه.

غنى: لا مجبورة، هذا واجبي. شنو نسيتي أنتِ ربيتيني وتعبتي عليه وهاي ضريبة التعب مالتج. سحر: ميخصج. أني ما اعتبت عليج. شغل عد بيت أم فيصل ماكو. غنى: خاله رجاءً لتعرضيلي. أني حخلص امتحاناتي وأكعدلج بالبيت. وين أولى على الأقل أشتغل. سحر: أني أشتغل بدالج. أنتي ما عليج. غنى: خاله أنتي كوه شايلة روحج. ضغطج كل شويه صاعد. تردين تشتغلين هناك؟ أنتِ شايفتهم شكد؟ شلون تكدرين؟ سحر: أكدر. لتتدخلين أنتِ.

غنى: لا أدخل. وقسم بالله يا خاله إذا تعرضيلي بخصوص هالموضوع والله بعد ما أحاجيج. سحر: أستغفر الله. شلون بيه ويه عناد هالبنية؟ أنتي عليمن طالعة؟ غنى: على أمي. أنتِ مو تكولين جانت عنيدة. وأني مصرة على قراري. يله أني رايحة أنام وما أريد أتغده. طبيت لغرفتي بس سديت الباب نزلت دموعي. وينج بيبي تعالي شوفي حالتي. كعدت المن خليتني إلهي لو ماخذني وياهم ولا هالعيشة هاي. فهد: كاعدين نتغده وأروى رجعت فتحت الموضوع ويه أمي.

أروى: يمه غنى وافقت. قبل شويه بلغتني. إيمان: خوش. جا كليلها من تخلصون امتحانات تبدي تجي تساعدني. سعاد: غنى منو؟ تساعدج منو؟ إيمان: راح تجينه بنية تساعدنه بالبيت. آلاء: خدامة يعني. إيمان: بحده طباخة. سعاد: وأنتي شلون تأمنين تجيبين وحدة غريبة تشتغل عدنه؟ إيمان: مو غريبة. أعرفها. وأحسن من نكج جناينج وعركهن من الصبح لليل. يفضل نعفيهن. آلاء: يعني هسه غنى بنت جوارينه راح تصير خدامة عدنه؟

فهد: أخذت كلاص الماي. تصحيح. للمرة الثانية. مو خدامة، طباخة. ليلى: وأنت ليش انتفضت؟ فهد: ما انتفضت بس صححتلها لفظتها للملكة آلاء بنت العز والنعيم. سعاد: باوعتله. وهاي البنية اللي راح تشتغل هنا أهلها شلون يقبلون تشتغل ببيت كله زلم؟ أروى: أنتي كولتيها تشتغل مو تعيش هنا. وبعدين هي راح يكون شغلها لحد العصر يعني متبقة هنا. آلاء: بس هاي مبينة ترفه. شلون تشتغل هنا؟

أروى: الترفه اللي تحجين عليها جانت شايلة بيت كامل على كتافها. فلتكعدين تصنفين عليها خوش. باوعت لامي. صدك يمه العصر كون نروح للحجية حتى تشوف شنو تريد لغنى. إيمان: خوش يمه. أني العصر أروح وياج. بس كون مبلغه بيبيتج. أروى: أي خابرتها قبل شويه. فيصل: أكلك علي باجر أريدك تشوف أسنان آلاء صار فتره ياذنها حتى إذا محتاجة حشوة شي تسويها أنت. علي: من الأكل من الصبح لليل. طبعاً يوجعنها. آلاء: ياا هاي أني أكل منين؟

ياحسرة. من كعدت البيت لا واحد يطلعنه لا واحد يسفرنه. أكيد نكابل الأكل. علي: عود إن شاء الله باجر أشوفهن. فهد: آلاء فرشي أسنانج مو ترحين هيج. فيصل: أحد كلك مرتي وصخة؟ فهد: باوعتله. أنت آلاء. فيصل: لا بس. فهد: قاطعته. كمت لعد اسكت. سفره دايمة. صعدت لغرفتي. أول ما دخلت قفلت موبايلي ونمت هلكان من التعب. غنى: واكفة أبدي وأجت خالتي. سحر: يعني هو عناد.

غنى: حبيبتي خاله، أني حالياً ما عندي شي. امتحاناتي وحخلصها وأكعد بالبيت. على الأقل خلي أشتغل هم ألهي نفسي بشي وهم أكسب. سحر: مو كالت أني أشتغل بدالج؟ ليش تعاندين؟ غنى: أني بعدني بصحتي وأكدر أشتغل وما أريد أجازف بيج وأنتي تعبانة متتحملين شغل. سحر: زين انتظري رجلي يدزلي الفلوس. غنى: لفيت شالي. خاله أني وياج ندري رجلج ما حيدز شي لأن وضعه المادي تعبان هسه.

سحر: ما أعرف شكلج يا خاله تاليها راح تعيدين الزمن وتشتغلين مثل جدج. غنى: أشتغل طباخة وأجيب لكمة بالحلال ولا أشتغل شغل مو زين وأحصل حرام. بستها وأخذت جنطتي. يله الباب تندك. أني راح أروح. طلعت فتحت الباب لكيت أم فهد وأروى. شلونج خاله؟ إيمان: هله بيج يمه. شلونج؟ غنى: الحمد لله. أروى: يله تعالي امشينه. الحجية ياسمين هسه تخبصنه إذا تأخرنه. غنى: ليش تصيحولها حجية؟ أروى: ما أدري والله بس متعلمين.

غنى: مشينه مسافة ووصلنه. مدت إيدها أروى جرت مثل السيم وفتحت الباب. دخلنه جوه. ماشاء الله البيت كلش جبير. دخلنه للصالة. شفت مرة جبيرة بالعمر كاعدة وداير مدايرها بنات وولد. واللي صدمني طلع كاعد يمها... مرتضى. هذا شجابه هنا؟ إيمان: السلام عليكم. الكل: وعليكم السلام. غنى: كعدنه. مرام: همست. منو هاي؟ شهد: علمي علمج. مرتضى: هاي شعندج هنا غنى؟ إيمان: منين تعرفها أنت؟ مرتضى: أحم زميلتي بالكلية. شلونج غنى؟ غنى: الحمد لله.

أروى: حجية هاي البنية اللي كتلتج عليها. غنى: بهدوء. شلونج حجية؟ ياسمين: باوعتلها. هله بيج. أنتِ الخياطة مو؟ غنى: هزيت راسي. ياسمين: تعالي كعدي يمي حبيبة. غنى: باوعت لام فهد. إيمان: ضحكت. كومي يمه شبيج خايفة. غنى: كعدت يمها. ياسمين: ماشاء الله حبيبه. هذا وجهج شتخليله؟ مرتضى: كله طبيعي. هذا حجية هي هيج حلوة من الله. غنى: هذا شبي؟ شنو هالخفة هاي؟

شو بالكلية مو هيج. باوعت للحجية اللي جانت رغم جبيرة بس مبينة بحلاها. تفضلي حجية كليلي شنو الفصال اللي ابالج أو نوع القماش اللي تحبين تستخدميه. ياسمين: شوفي حبيبه، أني أحب الدشاديش الخفيفة والحلوة. راح أراويج القماش اللي مشتريته وأنتي على ذوقج فصليلي. غنى: صار. مرام: أنتي تخيطين بس دشاديش؟ غنى: كلشي أخيط. مرام: يعني إذا راويتج صورة لفستان تعرفين تسوين مثله؟ غنى: أكيد. مرام: وإذا ما طلع مثله؟ غنى: أني أخسره الج.

مرام: ابتسمت. لعد باجر أجي العصر أراويج. لو تحبين تنطيني رقمج وأني أتفاهم وياج. غنى: أنطيتها رقمي. وكعدت أتفاهم ويه الحجية على شنو تريد. شلت راسي شفت فهد دخل هو وولد وياه. فهد: السلام عليكم. الكل: وعليكم. غنى: شفت اجوي هواي ولد. كمت. يله من رخصتج حجية. ياسمين: بعد وقت حبيبه خليج. ماشفنه شي منج. غنى: لا والله عندي امتحان. يله من رخصتكم. ياسمين: يمه فهد كوم وصلها مادام ستوك اجيت. الدنيا مغرب مو مال تطلع وحدها.

فهد: كمت. يله تعالي. مرتضى: انتظر أني أوصلها. اكعد أنت. ياسمين: اكعد أنت. فهد يوصلها. روح يمه ما عليك بي. غنى: طلعت واجه فهد. مشه كدامي شوية. أباوعله طويل وضخم. مو ناعم أو يجوز لأن ضابط صار هيج جسمه. صار شهر تقريباً أني أروح وأجي وياهم. ولامرة شفته تشاقة أو ضحك. دائما هادئ وساكت. وانتبهت عليه نظيف جداً جداً. سيارته تلمع لمع وريحتها تجنن. وطبعاً أني أقيس نظافة الرجال بلبسه ونظافة سيارته. وفهد جامعهن ثنينهن.

فهد: بهدوء. شعجب وافقتي على عرض أمي؟ غنى: تنهدت. الظروف مرات تجبرنه نخضع للأمر الواقع حتى نعيش. فهد: شعجب أنتِ هذا حالج؟ ما عندج خوال عمام يشيلون هالمسؤولية عنج؟ غنى: كلّن ملتهي بحياته ويصيح ياروحي. فهد: زين ليش متفكرين تشتغلين بمول أو أي مكان؟ عندج هواي فرص. غنى: بالمول يردون مواصفات خاصة ولازم أكون كاشخة ومكياج ولبقة بالكلام وووو الخ. هواي أشياء مطلوبة أني ما أكدر عليها ومستحيل أسويها.

فهد: أخذت نفس من الجكارة. ما عرفتي منو اللي دفع لج فلوس العملية؟ غنى: أي عرفت. فهد: وكفت. درت وجهي عليها. منو؟ غنى: عمامي. فهد: ابتسمت. غنى: أول مرة أشوفه مبتسم. صار شهر مبوز بوجهي. وصلنه للبيت. درت وجهي عليه. شكراً فهد. زحمتك. فهد: عفواً. ماكو زحمة. أختي أنتِ. غنى: جنت محتاجة أسمع هالكلمة. أختي أنتِ. أوف شكد مشتاقة أسمعها من مروان. دخلت للبيت بدلت وكعدت أقرأ قرآن. ياسمين: أباوع لمرتضى كالب وجهه. ها ولك بس لا هي هاي؟

مرتضى: ابتسمت. أي هي. شفتها شلون حلوة. ياسمين: وهاي الكيمر تقبل بيك أنت؟ جنك بيتنجانة. مرتضى: ليش شبيه حجية؟ وين تلكه مثلي؟ ياسمين: ليش هذا السوك مليان بيتجان. مرتضى: شنو هاي حجية؟ والله زعلت. ياسمين: تعال ابن النعالة (عفواً) أشاقه وياك. مرتضى: ضحكت. لا جد تتوقعين متوافق عليه؟ ياسمين: ليش يمه شناقصك ومتوافق عليك؟ لتخاف. عود إذا ما صارت الك يعني مو نصيبك. كلّن ياخذ قسمته.

مرتضى: لو تقوم القيامة محد ياخذ غنى غير. واذكرج. ياسمين: نشوف ياسبع البرمبة.

غنى: مر أسبوع على آخر مرة رحت بيها للحجية. وطبعاً وره كم يوم اجن بنات عم أروى يراويني صور فساتين ويردن أخيط مثلهن. ما أجذب فرحت لأن خياط الفساتين يجيب فلوس أكثر من الدشاديش. والحمد لله دا أجمع فلوس. دريت الله ما يعوفني بنص الطريق. واليوم لازم أباشر بشغلي كطباخة عد بيت أروى. اتفقت أني وأم فهد على كل شي. شغلي حيكون من التسعة الصبح للخمسة العصر. وطبعاً الراتب جان كلش عالي ورفضته أكيد. خليت مبلغ مناسب. ما أحب أكون

استغلالية. يمكن لو وحدة غيري جان كيف مجرد إنو تطبخ ويجيها راتب مرتب بآخر الشهر. بس أني عمري ما جنت طماعة ولا حكون. لبست جبه سودة وشال أسود كالعادة. من وفاة حبيبي مروان ولليوم أي لون مالح جسمي غير الأسود. نزلت من غرفتي شفت خالتي كاعدة وناصبة مناحة. وبعدين خاله تره مرايحة أجاهد أني.

سحر: اسكتي غنى. تره روحي واصلة لخشمي. كل اللي ديصير بينه بسبب خوالج الله لا يوفقهم ولا يرحمهم. وعساه بحظهم وبختهم أخذو البيت وكطفوج هالكطفة. لو خالين البيت الج جان أني بعت لج هالبيت وخليت فلوسه بالبنك. على الأقل تصرفين منه لحد ما الله يرزقج وتتلاقين شغل.

غنى: خلص يا حبيبتي. أني قابلة. وبعدين هالشغل مراح يموتني. وأني يمج وشغلي راح يكون بس بفترة العطلة. أحنه هسه خلصنه امتحانات والحمد لله. من يبدي الدوام أعوف هالشغلة ومنا لذاك الوقت الله يحلها. يله تعالي سدي الباب وكافي بجي. مردتي عيونج. سحر: كمت وراها سديت الباب. يارب بجاه حبيبك محمد متريح هالبنية وترأف بحالها وتشيل هالهم عن كلبها. دخلت جوه أغسل الملابس. غنى: دكيت الباب طلعلي ولد. ابتسمت. صباح الخير. أحمد: منو أنتِ؟

غنى: أني اسمي غنى. وأنت؟ أحمد: ابتسمت. أحمد. آلاء: تعال ولك وين طالع. باوعت. هاي الخدامة اجت. أنتِ الخدامة مو؟ غنى: باوعتلها وهزيت راسي. آلاء: تعالي دخلي. غنى: طبيت لبيتهم. أباوع عدهم حديقة جبيرة بس مابيها هواي ورد مثل حديقتي. دخلت للبيت. هاي أول مرة أطب لهم. ماشاء الله البيت كلش حلو وبنائه حديث. مو مثل بيت الحجية مبين قديم رغم كبره. دخلت للكليدور لكيتهم ديتريكون. صباح الخير. إيمان: صباح النور يمه. يله تعالي تريكي.

غنى: بالعافية. سبقتكم. سمعت صوت هبد. شفت أروى تنزل ركض. أروى: حضنتها. شلونج؟ غنى: الحمد لله. وأنتي؟ أروى: تصدقين فرحانة لأن راح أشوفج كل يوم. كون نرجس تشوفنه والله تحكمنه إعدام. غنى: ابتسمت. سعاد: هي هاي الخدامة. إيمان: الطباخة. سعاد: نفس الشي. ثنينهن يشتغلن عد العالم. غنى: أحم. شنو تحبون أسوي غدة؟ إيمان: بكيفج حبيبتي. شيعجبج سوي. سعاد: باوعتلها صفح. سمعي أنتِ شنو اسمج؟ غنى: غنى.

سعاد: أي غنى. سوي برياني على اللحم بس اللحم تبلي واشوي بالفرن. خوش. غنى: هزيت راسي. أروى وين المطبخ؟ تعالي دليني. أروى: لزمت إيدها. تعالي. غنى: دخلت للمطبخ. باوعت لاروى. خو ما عدكم أحد بالبيت؟ أروى: لا. غنى: خوش. رفعت ردانات الجبه. دلتني على مكان غراضهم. طلعت المواد وبديت أحضر الغدة. أباوع نزلت بنية صغيرة تحجي وتكمز. مدري ليش كلبي رف عليها وتذكرت مروان. وردة: هلوو. منو هاي؟ أروى: هاي صديقتي غنى. تعالي سلمي عليها.

وردة: هلوو غنى. أني وردة. أخت هاي الفاهية. غنى: ابتسمت. بوستها. هلو بيج حبيبتي. شلونج؟ وردة: زينة. غنى: كعدت هالوردة يمي هي وأروى يسولفن. صدقة وردة تجنن كلش حبيتها. دمها عسل. بتول: دخلت للمطبخ. أنتِ شكد عمرج؟ غنى: 21. بتول: ها؟ ليش لابسة حجاب؟ نزعيه ماكو أحد.

غنى: لا خاف يجي أحد على ساعة. كملت تحضير المواد وبديت أطبخ. جنت أشتغل باستعجال حتى أخلص بسرعة. ما أريد أتأخر. كملت البرياني. رحت غسلت اللحم وخليته بطاسة جبيرة. خليت عليه زيت زيتون وملح وخل وبهارات وبرشت ثوم وبصل وقلبته حتى ينمزج عدل. تركته ساعة وبعدها. طلعت صواني الفرن وسطرت قطع اللحم عليهن ودخلتهن للفرن حتى يستون. شلت راسي شفت الساعة صارت بالوحدة. هاي شبسرعة مر الوقت. راح وقت الصلاة. أستغفر الله.

أروى: ها حبيبتي تحتاجين شي؟ غنى: لا. كملت بقة بس يستوي الأكل. كعدت هلكانة. بالعاده الشغل ما يتعبني بس همه عائلة جبيرة ماشاء الله عليهم. مدري كم نفر. وأكيد لازم كل وجبة أطبخها لازم تكون كافية الهم. ضليت كاعدة بالمطبخ لحد ما اجوي الكل. يمه متت من الفشلة من طبو الولد للمطبخ. علي: السلام عليكم. غنى: وعليكم السلام. علي: صفنت عليها. أنتِ بنت جوارينه. غنى: هزيت راسي.

علي: أحم. درت وجهي وطلعت من المطبخ. عيب هسه شتكول عليه ملطلط هذا طب يمي. غنى: سمعت صوت فهد. كلي البنات صبي. وطبعاً محد دخل للمطبخ اليوم غير بس بنات خاله إيمان. جناينها أصلاً مشفتهن. كمت أصوب وأجن البنات يشيلن. كملت وكعدت. صاحوني أتغده وياهم بس مقبلت. ضليت كاعدة بالمطبخ. فهد: صيحولها خلي تجي تتغده. إيمان: كتلهالها يمه تكول ما أشتهي. فهد: من الصبح لسه تشتغل. معقولة ما تعبت؟ سعاد: تره هي خدامة هنا. لتكبرون راسها.

فهد: عيب هالحجي أم فيصل. أنتِ مو أحسن منها. على الأقل جاي تشتغل بالحلال مو بالختلة تجمع فلوس لو تحاول تجرب حظها من تطلع العالم. سعاد: شنو قصدك؟ فهد: والله عاد الحليم تكفيه الإشارة يا مرة أبويه. كمت من الأكل. طبيت للمطبخ أغسل. شفتها كاعدة. مدري ليش أشفق على هالبنية. أحسها مظلومة. بعد ماسمعت قصتها. كمت كلما أشوفها أتذكر نفسي من جنت صغير. هم ضكت لوعتها. وأني رجال ما كدرت أتحمل. لعد هي شلون؟ شفتها كامت. استريحي.

غنى: كعدت. أباوعله شلون يغسل. يمه أيديه كمن يوجعني. من شفته شلون غسل. فرك إيديه فرك عبالك عليهن. شو شنو؟ فهد: عاشت إيدج. الأكل كلش طيب. غنى: ابتسمت. بالعافية. فهد: الله يعافيج. عفتها وطلعت. كعدت بالصالة. شكد تمنيت من جنت بكدها وأشتغل أسمعلي كلمة حلوة. الله يساعدك أو شغلك حلو أو أي كلمة تزيح من تعبي. غنى: صبيت جاي للكل. اجت أروى أخذته. بس قبلها راحت طلعتلي كوب. أروى: هاج صبي بهذا. ولو زحمة وودي لفهد.

غنى: صبيتله بأستكان. أروى: ما يحب يشرب بالاستكان. عنده كوب خاص. ميخالف نونة. فهد موسوس شويه. غنى: لا عادي. رحت صبيتله جاي وطلعت. لكيته كاعد على القنفة. تقربت أنطي. ما حسيت غير رجلي نمدتلي. خربطت توازني وما أشوف غير الكوب اندار على فهد. عززززه. سعاد: ياااا هاي شسويتيييي ولج.