رواية تحت امر الحب الفصل الثامن والعشرون 28 - بقلم شيماء صبحي

هو أنت هتروح الصعيد بكرة؟ هز رأسه بالإيجاب، فقربت أكتر منه وقالت: "طيب أنا هاجي معاك." عمار بص لها وهز رأسه بالرفض وقال: "لا خليكي علشان الطريق هيكون طويل وأنتي هتتعبي..! داليدا بعدت عنه وقالت بصوت طفولي: "يعني هتروح لوحدك وتسيبني هنا…" عمار رفع حاجبه باستغراب من طبقة صوتها المختلفة فقال بتساؤل: "هو الصوت دا خرج منين.." داليدا ضمت حاجبها وقالت بغيظ وهي بتشاور على بوقها: "من هنا؟ ابتسم على حركات وشها فهز رأسه وقال:

"طيب متزعليش تعالي معايا بس افتكري إني قولتلك تفضلي هنا." هزت رأسها بحماس ووقفت وهي بتقول: "طيب في هنا لبس ليا! عمار هز رأسه واتجه لغرفة الملابس وهي دخلت وراه، وأول ما شافته بيقرب من دولاب كبير مليان بفساتين واضح إنها غالية من شكلها، قالت بتساؤل: "هو أنت كنت متجوز قبل كده؟ عمار حرك رأسه وقرب من فستان هادي وقربه منها وقال: "لا مكنتش متجوز دول علشانك." أدالها الفستان وهي فضلت تبصله ومصدومة..

عمار أخد هدوم ليه وبدأ يغير قدامها وهي من كسوفها لفت وشها بسرعة وبعد ما وشها هدي لفت علشان تشوفه، لكنها لاقته وراها على طول جسمها اتنفضت بخضة وقالت بتساؤل: "إيه دا أنت لسا ملبستش؟ عمار ابتسم على وشها الأحمر وهز رأسه بغنى: "لأ.." داليدا هزت رأسها وقالت وهي بتتسحب: "طيب أنا هستناك بره على ما تخلص وـــ! عمار شدها من وسطها ليه وهو كان عاري الصدر، داليدا خبطت في جسمه وحطت إيديها ورا ضهرها لأنه كان ماسكها من وسطها..

اتكلمت وهي بتاخد نفسها بصعوبة من شكل عضلات جسمه اللي شكلها مغري: "إهم هو أنت مش هتلبس.." حرك رأسه وهو بيبص في عينيها وقال: "هلبس بس أنتي رايحة فين.." داليدا لفت وشها بخجل وهي بتبص على الباب وبتقول: "هستنى برا لحد ما تخلص براحتك.." رفع حاجبه بضيق وقال: "لا متخرجيش غيري هنا..؟ داليدا بلعت ريقها وهزت رأسها وهو ساب إيده، وأول ما أخدت نفسها بعدت عنه بمسافة صغيرة وبدأت تغير هدومها، وأول ما رفعت بلوزة البيجاما معرفتش تطلع

دماغها فقالت بصوت مخنوق: "ساعدني!! لف لها بسرعة وشافها وهي بتحاول تخرج رأسها فبدأ يسحبها وهي كانت بتشد معاه لحد ما هو مسك إيديها ونزلها وقال: "نزلي إيدك وسيبيني أتصرف.." نزلت إيديها وأخدت نفسها وهو بدأ يطلع البيجاما من رأسها براحة، وقبل ما يبعدها خالص في زرار مسك في شعرها فقربت إيديها من صدره وضربت عليه وقالت: "آه حاسب شعري شعري.." فكلها شعرها بسرعة وبعد ما خلص كانت هي ماسكاه من جسمه..

عمار بص لإيديها بابتسامة وهي من خجلها نزلتها بسرعة، وأول ما انتبهت إنها واقفة قدامه شبه عارية بعدت بسرعة عنه وبدأت تلبس الدريس… وصلت عربية رشاد للقصر وكان معاه زين. رشاد بص له وقال: "قبل ما ننزل عاوز أقولك إن داليدا متعرفش إنك السبب في الهجوم اللي حصل وعمار فهمها إنهم جايين علشانه يعني أنت قدامها لسا ملاك؟ زين بص له بضيق وقال: "أنا معملتش حاجة من اللي بيقولوا عليها كل الحكاية إنهم عايزين يلبسوهالي مش أكتر!

رشاد هز رأسه ونزل من العربية وبص له وزين نزل وراه وهو بيبص حواليه.. رشاد شاور لواحد من الرجالة يركنوا العربية في الجراج وبعدها بص لزين وقال: "تعالى ورايا!! زين كان بيبص للقصر بإعجاب شديد ومكنش مصدق إن داليدا متجوزة واحد غني للدرجة دي؟ رشاد بص لزين وقال: "هما أكيد نايمين دلوقتي. فـ أنت هتنام هنا لحد ما تقابلها بكرة؟ زين هز رأسه ورشاد مسك إيديه واتحركوا للدور التاني ودخلوا أوضة بعيدة تمامًا عن جناح عمار وداليدا..

زين أول ما شاف الأوضة عجبتها وهز رأسه لما رشاد سأله: "عجبتك الأوضة؟ زين رد عليه: "شكرًا؟ رشاد هز رأسه وقبل ما يخرج قال: "هتلاقي عندك في الدولاب دا هدوم تقدر تغير لو حبيت والصبح أول ما داليدا هتصحي الخدم هيصحوك..؟ زين هز رأسه ورشاد خرج من الأوضة واتجه لجناحه وأول ما دخل نام على السرير بتعب ومن غير ما يبدل هدومه؟؟

جهزت داليدا وخرجت من غرفة الملابس وهي بتاخد نفسها بصعوبة، قربت من شنطتها وطلعت منها الميك أب الاحتياطي بتاعها وعملت لنفسها ميك أب خفيف.

خرج عمار من الأوضة وهو بيبص عليها وشايفها مركزة مع المراية وبتحط لمسات بسيطة من أدوات التجميل، ابتسم ابتسامة خفيفة وقرب منها ووقف وراها وهي اتوترت جدًا وفضلت تبصله في المراية لحد ما هو قرب من البيرفيوم بتاعه وأخده ورش على عنقه رشة خفيفة، داليدا استنشقتها برضا لأن ريحتها كانت نادرة وكأنها أول مرة تشمها؟ بعد عنها بعد ما سرح شعره وهي فردت شعرها ورا ضهرها وبعدها مسكت شنطتها وبصتله وقالت: "أنا خلصت!

عمار انتبه ليها وبص لشكلها وأطلق ابتسامة خفيفة وقال: "طيب خلينا نتحرك! داليدا هزت رأسها وهو قرب منها ومسك إيديها وقال بهمس: "امشي على مهلك خالص احنا مش ورانا خالص! داليدا ابتسمت وهزت رأسها وبعد ما مسكت في إيديه خرجوا الاتنين من جناحهم ونزلوا لتحت، أول ما شافهم واحد من الحراس جرى على عمار وقال: "سيادتك خارج! عمار هز رأسه وقال: "عايز العربية السودا! الحارس هز رأسه واتجه للجراج بسرعة وبعد دقايق قرب منهم بالعربية

ونزل وقال باحترام: "إتفضل سيادتك." عمار هز رأسه وقرب من الباب الجانبي وفتح لداليدا الباب وبعدها اتجه لمقعد السواقة وقعد وبعد ما الحارس قفله الباب اتحرك عمار لخارج القصر… وفي منزل دنيا كانت قاعدة بتبص للطفلة العنيدة وهي بتستجوبها وكأنها ظابط بيحقق مع مجرم! دنيا أخدت نفس وهي بتقول بتعب: "ممكن نأجل كلامنا لبكرة يا جميلة؟ جميلة قربت منها وقالت بزعل: "أنتي مش عايزة تقعدي معايا! دنيا قربت من خدها وضغطت عليه بابتسامة وقالت:

"لا يا روح قلبي متقوليش كده بس أنا تعبت أوي النهاردة وعايزة أرتاح! جميلة هزت رأسها وهي بتقول: "طيب ماشي بس علشان أنتي اتأخرتي أوي عليا لازم تجيبيلي حاجة حلوة! دنيا هزت رأسها بالموافقة وقالت: "أوعدك إني هجبلك حاجة حلوة ومن عيني دي لعيني دي! جميلة ابتسمت بحب واضح في عيونها وقربت منها وقالت: "طيب شيليني بقى! دنيا قامت وقفت وقربت منها شالتها في حضنها واتجهوا الاتنين لغرفتهم، وأول ما دنيا نيمتها على السرير فتحت

دراعها باستقبال وقالت: "يلا يا ماما! دنيا هزت رأسها وقالت وهي بتقبل جبينها: "إسمحي لماما بس تغير هدومها في دقيقة واحدة وهتجيلك! جميلة هزت رأسها بالموافقة ودنيا مشيت! وبعد دقيقة بالظبط رجعت دنيا وهي لابسة بيجامة خفيفة وقربت من جميلة وحضنتها وغمضت عينيها بتعب، وفي خلال دقايق كانوا الاتنين ناموا نوم عميق!!!!

في صباح يوم جديد وصلت عربية عمار وداليدا قدام بيت كوثر، نزل هو الأول وفتح لداليدا الباب وساعدها تخرج وبعد ما قفل العربية قربوا الاتنين ووقفوا قدام الباب الكبير ورنوا الجرس.. عدّي كام دقيقة وفتحت بنت من الخادمات وهي بتبصلهم بنص عين وبتقول: "مين حضراتكم! عمار قال بجزء: "أنا عمار الصاوي ومعايا مراتي.." البنت انتبهت ليه فهزت رأسها بترحيب وقالت: "أيوة يا باشا اتفضل أهلاً وسهلاً ثواني وهصحي الست هانم؟

عمار وداليدا دخلوا وقعدوا في الصالون.. اتجهت البنت ليهم تاني بسرعة وقالت: "هروح أصحي الهانم لحضراتكم..! عمار وقفها وقال: "لا متصحيهاش احنا هنستناها لما هي تصحي براحتها.." البنت تراجعت أول ما سمعت كلامه فهزت رأسها وقالت: "طيب تحبوا أحضرلكم حاجة تشربوها..! عمار بص لداليدا لقاها بتهز رأسها بالرفض فقال: "لو مش هتعبك اعمليلي فنجان قهوة سادة وهاتي ماية للمدام! البنت هزت رأسها بابتسامة واتجهت على المطبخ على طول… عمار

بص على الساعة لقى الوقت: ٦ صباحًا بص لداليدا وقال: "الساعة ٦ لسا أكيد محدش فيهم بيصحي دلوقتي..! داليدا هزت رأسها بالإيجاب وقالت: "صح هو محدش بيصحي دلوقتي أصلاً.." قالت كلامها وهي بترجع رأسها لورا وبتغمض عينيها.. عمار أخد نفس وهو بيفكر في الكلام اللي هيقنع خالته بيه علشان تسيب ملوك تروح معاه، وأول ما فكر في نقاش بص لداليدا وقال: "تفتكري يا دا…" داليدا كانت نامت وكان باين على وشها الإرهاق..

ابتسم ومسك جسمها براحة وحطه على صدره بهدوء وهي أول ما حست بيه ضمته بحب وبعدها هو فرد جسمه،، عدّي دقايق وخرجت البنت وهي شايلة القهوة والماية قربت منه وقالت باحترام: "القهوة!

طلب منها تحطها قدامه والبنت هزت رأسها وقبل ما تمشي خطفت نظرة سريعة للبنت اللي في حضنه وشافته وهو بيمشي إيديه على شعرها السايح فبعدت بسرعة وهي بتبتسم لأنها أول مرة تشوف حد بيعمل كده ولأن من عاداتهم إن الراجل ميغازلش مراته غير وهما في أوضة نومهم فكان الموضوع غريب وجديد عليها… عمار شرب القهوة وطلع موبايله وبعت رسالة لرشاد وبلغها فيها إنه في الصعيد ومعاه داليدا علشان يجيبوا ملوك تقعد معاهم في القاهرة..

خلّص كلامه بسؤاله عن تأخير زين في القسم واستنى لما هو يرد عليه!!! وبعد ساعتين صحيت ملوك وأول حاجة عملتها مسكت تيلفونها وبصت فيه لقت إن عمار مبعتلهاش حاجة لحد دلوقتي قالت بحزن: "أوعي تكون بتضحك عليا يا عمار! قالت كلامها ووقفت علشان تغسل وشها وأول ما دخلت للحمام سمعت صوت رسالة جت على تيلفونها، خرجت بسرعة وقربت من التيلفون وأول ما بصت للرسالة وشها اتقفل تاني لأنها كانت رسالة من شركة الاتصالات!!!

صحيت كوثر ودخلت للحمام وأول ما بصت في المراية افتكرت المنظر اللي شافته إمبارح لما كانت ملوك في حضن زين؟ قالت بغضب من نفسها: "أنا آسفة يا أبو ملوك أنت عندك حق أنا فعلاً مش قد المسؤولية؟؟ خرجت بعد وقت صغير وبدأت تغير هدومها وبعد ما خلصت خرجت من أوضتها ونزلت تحت.. أول ما عمار شافها صحّى داليدا بلطف وقال: "قومي يا داليدا!!

داليدا فاقت بسرعة وهزت رأسها ليه وأول ما شافت كوثر اللي بتقرب منهم وعلي وشها الصدمة عدلت جلستها بسرعة! كوثر قالت بتساؤل: "إيه المفاجأة الحلوة دي يا عمار مكنتش أعرف إني هصحى بشوفك؟ عمار وقف وبص لداليدا تقف علشان تسلم عليها وقال: "صباح الخير يا خالتي إن شاء الله أكون وشي حلو عليكي أنا وداليدا! كوثر ابتسمت وهي بتحضنه وبتقول: "وهي دي محتاجة تتعرف يا حبيبي طول عمرك وأنت وشك حلو.." عمار ابتسم وكوثر بصت لداليدا

وسلمت عليها ببرود وقالت: "ازيك يا حبيبتي! داليدا هزت رأسها وقالت: "الله يسلمك يا طنط..! كوثر هزت رأسها وقالت: "استريحوا يا حبايبي نورتوا البيت! عمار شاور لداليدا تقعد وبعدها بص لخالته وقال: "البيت منور بناسه يا خالتي طمنيني عليكي عاملة إيه؟ خالته هزت رأسها وقالت: "الحمدلله يا حبيبي طمنيني أنت عليك عامل إيه وأخوك عامل إيه! عمار هز رأسه وقال: "احنا كلنا بخير الحمدلله! كوثر هزت رأسها بابتسامة وقالت: "الحمدلله."

عمار بص لداليدا واخد نفس وبعدها بص لكوثر وقال: بصراحه يا خالتي انا وجودي هنا انا وداليدا علشان موضوع مهم لازم نتكلم فيه! كوثر بصت لداليدا بضيق وقالت: موضوع بيني وبينك ماشي انما ايه دخل مراتك فيه! داليدا حست بالإحراج من كلامها فكانت هتقوم لولا إيد عمار اللي منعتها وقال: انا ومراتي واحد يا خالتي وزي ما بعتبر اهلها اهلي هيا برضو بتعتبر اهلي اهلها. داليدا هزت راسها له وهو بص لخالته بجدية وقال:

انا مش عارف ايه اللي حصل امبارح بس اللي انا متأكد منه ان ملوك لازم تيجي معايا القاهرة!! كوثر وقفت بصدمة أول ما سمعت كلامه فقالت بصوت عالي وغاضب: انت اتجننت يا عمار ملوك مين اللي تيجي معاك القاهرة انت فاكرني هنا ايه مليش كلمة؟ عمار اتتصدم من كلامها وتحكمها الشديد اللي واضح في نبرة صوتها فقال بصوت غاضب هو كمان:

انا مكنتش حابب اني اعلي صوتي عليكي بس انتي اللي اضطرتني اعمل كده بس انا جيت هنا بطلب من ملوك اللي كانت منهارة ومش عايزة تفضل هنا فعشان خاطري خليها تيجي معايا من غير ما نصعب الأمور؟ كوثر اتعصبت لما سمعت كلامه فقربت من السلم بغضب وهي بتتجه لأوضة ملوك وبتقول: بقى حصل إنها تشتكيني ليك والله عال عالي دي باين عليها عايزة تتربى من أول وجديد! داليدا كانت مصدومة من جبروت كوثر وأسلوبها الشديد والمخيف مع بنتها فبصت لعمار وقالت:

امنعها يا عمار تقرب منها! عمار وقف بسرعة وقرب من خالته ومسك إيديها بكل قوته وقال: بلاش تعملي كده هتخسريها زي ما خسرتي حسناء وصدقيني هي طلبت مني أجي علشان مش عايزة تعمل زي أختها؟ كوثر بصت له بحزن كبير ولكن غضبها كان أقوى سحبت إيديها جامد وبعدته عنها وقالت: حسناء هربت وانا نايمة ولكن انا دلوقتي صاحية واقدر أمنع ملوك تخرج من هنا وانا قولتها لها مرة لو خرجت من هنا لا هتكون بنتي ولا أعرفها؟؟؟

لو هعيش عمري كله تحت تحكماتك فيا يبقى الموت أفضل ليا يا أمي. دا كان كلام ملوك اللي كانت واقفة وراها وبتتكلم بكل حزن! كوثر لفت بجسمها وبصت لبنتها وقالت بلوم: بقى انا بتحكم فيكي..؟ بتسمي تربيتي وخوفي عليكي ده تحكم؟ عمار قرب من ملوك وخلاها تقف وراه وقال وهو بيبص لكوثر:

اللي انا شايفه ده دلوقتي ملوش علاقة لا بخوف ولا تربية يا خالتي دي تحكمات قاسية بتفرضيها عليها علشان أختها مقدرتش تستحملها، عارف ان أبوهم الله يرحمه كان طبعه حاد شوية بس هو مطلبش منك تقفلي عليهم حياتهم كده؟ كوثر بصت له بغضب وقالت: انت شايف اني بتحكم فيهم، انا خايفة عليها من الدنيا؟ عمار بص لملوك اللي حضنها من ضهرها وقال:

وهما آخر ناس فيها علشان تركزي معاهم وبعدين سيبيهم يتوكلوا على ربهم وكل واحدة تختار بنفسها هي عايزة إيه، زمان لما حسناء هربت كتبت لك انها آسفة بس كانت مضغوطة ولكن ملوك مهربتش ملوك طلبت النجدة وانا بقى مش هسمح ان ده يتكرر تاني كفاية؟ داليدا كانت واقفة تسمع كل الحوار اللي بينهم وأول ما رفعت عينيها وشافت ملوك حاضنة عمار حست بغيرة شديدة ظهرت في قلبها ضغطت على إيديها بقوة واستنيت يبعدها عنه؟؟ ملوك بعدت عن

عمار وقالت وهي بتبص لأمها: انا طلبت من ابن خالتي ياخدني معاه القاهرة ولو انتي رفضتي انا هعمل فيكي محضر وأظن ان من حقي أختار المكان اللي أعيش فيه! كوثر أول ما سمعت كلام بنتها اتتصدمت ومقدرتش تتمالك أعصابها ووقعت على الأرض..!