رواية طليق اختي الفصل الرابع 4 - بقلم اية زين

يوسف: روكا.. أنا رايح أشوف مكان عشان نفتح الشركة بقا. رقية: أنت هتسيبني أنا ومحمد لوحدنا؟ لا يا باشا رجلنا على رجلك.. ده هيبقى بيتنا التاني يا عم. يوسف: بت! أنا كنت مخدوع فيكي.. أنا متجوزك عاقلة والله إيه اللي جرالك! رقية بدلع: ما كان فيه شوية هبل كده مخبياهم للحبايب.. ارجع زي الأول ولا إيه!

يوسف بيقرب منها بسرعة: لا أول إيه.. ده إحنا ما صدقنا ناخد شوط يا ست.. وبعدين ده أنتِ تشيلي لي أي حاجة وأنا قابلها منها وعلى قلبي زي العسل. رقية بحب: هتستحملني دايماً يا يوسف! يوسف بيضمها ليه: أنتِ كل عيلتي.. لو مستحملتش أمي وأختي وحبيبتي ومراتي هستحمل مين أنا ها! وبعدين أنا اللي المفروض أسألك السؤال ده.. ده أنا بقيت لازق فيكي زي العيل الصغير.

رقية بتمسك وشه: أحلى عيل صغير واخد قلبي والله.. تعرف إن طريقتك دي اللي بتحسسني إني عايشة! طول ما أنت جنبي بحس إنك ابني فعلاً.. وأنا فخورة إنك ابني يا چو. يوسف بحب: وأنا بحبك يا أحلى ماما في الدنيا. رقية بكسوف: طب إيه بقا! كده هنتأخر على الشغل ومش هنلاقي ناكل. يوسف: طب يلا يا ست البسي على ما ألبس محمد ونروح نشوف المكان سوا. ~~~~~ بعد مرور شهر. رقية قاعدة ويوسف حاطط راسه على رجلها وشايل محمد.

يوسف بزعل: أنا مش عارف محدش راضي يشتري مني ولا يأجر عندي ليه! أنا تعبت يا رقية. رقية بتلعب في شعره: بس أنا عارفة.. ممكن أتكلم ومتتعصبش! يوسف: أنا بقلق من دخلتك دي. رقية بتوتر: م.. ما هو بصراحة الموضوع ممكن يعصبك وأنا بخاف منك. يوسف بيبوس إيدها: طب ممكن تحكي لي في إيه وأنا مش هتعصب! رقية: طب أنا دلوقتي هحكي ليوسف ابني.. ها ابني.. اللي مينفعش يعلي صوته على مامته صح! يوسف: يا ست احكي يلا قلقتيني والله.

رقية: الجواب ده جالي النهاردة. يوسف بهزار: يالهوي! بتديني ورقتي! رقية بدموع: قبل ما تقرا اللي مكتوب أنا آسفة وأنا راضية بقرارك.. حتى لو هتطلقني. يوسف يقوم ويشيل محمد بفزع: طلاق إيه! على جثتي.. رقية.. أنا عندي أموت ولا إني أعيش من غيرك. رقية بتحضن وشه: بعد الشر عنك يا عيوني.. القرار في إيدك أنت.. حتى لو عايزني مجرد أم لمحمد وأنت تتجوز غيري أنا موافقة. يوسف بيحط محمد

على الأرض ويرد بصوت عالي: وأنا مش موافق.. للدرجة دي أنا مش فارق معاكي! عادي تقولي لي كده! قلبك طوعك على كلامك ده! رقية بدموع: لا.. قلبي واجعني.. بس لو وجودي هيضرك يبقى أبعد عنك أحسن.. القرار في إيدك يا يوسف. تجري رقية على الأوضة وتقفل على نفسها. يوسف برجاء: روكا.. طب افتحي لي طيب ومش هزعلك.. أنا آسف إني عليت صوتي عليكي.. إيه اللي حصل لكل ده! أنا آسف والله حقك عليا.. يوسف بدموع: الجواب.. فين الجواب.. يفتح يوسف الجواب.

"رقية.. أنا عارف إنكم أكيد هتبدأوا تفكروا إنتوا ليه مش عارفين تلاقوا شقة زي ما أنتم عايزين.. أنا هقول لك ليه.. أنا أحمد جوز داليا أختك.. هي اللي كانت عايزة تنتقم منكم.. شايفة نفسها مظلومة وهي الظالمة الوحيدة.. كانت بتاخد فلوس من حساب يوسف وتحطها في حسابها على أساس إنها بتجيب هدوم وبتخرج.. كانت بتاخد الضعف على طول.. رصيدها وصل يجي 100 ألف.. آه ما مرتب جوزك كان عالي برضه.. بس عارفة!

مع إن يوسف عرف ده كله وكان عايز يطلقها بس أختك خبثها كان أكبر.. كانت حامل في الوقت ده في محمد.. ساومت يوسف إنه ميطلقهاش وإلا هتنزل البيبي.. وطبعاً يوسف خاف تنزله فعلاً فمرضاش يطلقها.. لكن بعد ولادتها وإهمالها لابنها يوسف مستحملش أكتر من كده.. بس أختك برضو استغلت طيبة يوسف وقالت له لو مطلقهاش هترفع قضية خلع على أساس إنه بيخونها معاكي.. أيوة دخلتك في الموضوع وأنتِ ملكيش ذنب.. في النهاية أختك اتطلقت وخدت أكتر من حقها..

وبصراحة أنا ونور كنا معاها خطوة بخطوة.. بس أنا مقدرتش أسكت لما عرفت إنها دخلتك بينهم وحاولت والله أخرجك عشان كده اتقدمت لك.. وفعلاً أنا بحبك وكنت بتمنى لك تكملي معايا حياتي.. بس أنتِ اخترتي تتخلي عني وتبيعي حبي ليكي.. فلو فعلاً بتحبي اختك اتطلقي من يوسف وأنا هطلق أختك وهتجوزك.. عشان لو ده محصلش فانا هنتقم من يوسف وداليا عشان هما اللي بعدوكي عني.. وفي الآخر هتبقي ليا برده"

يوسف بعصبية: آآآه يا ابن ال.. وربنا ما أنا سا.. وفجأة يسكت وهو سامع صوت عياط محمد. يوسف بتوتر: خلاص يا حبيبي خلاص.. متعيطيش.. طب أعمل إيه.. رقييييية.. يا رقيييية. رقية بخضة: في إيه يا يوسف! ماله محمد! يوسف: شكله كان بيحاول يقف و.. محمد ببطء: م.. ماما. رقية بتحضنه وتبوس فيه: حبيب ماما والله.. أخيراً قولتها يا روحي! أنا أحلى ما.. يوسف بغيرة: ما خلاص بقا كفاية في إيه! ما أنا بقول لك ماما مبتعمليش معايا كده ليه!

رقية باستغراب وهي بتطبطب على محمد: بس هو أول مرة يتكلم يا يوسف.. ده أنا من ساعة ما اتجوزتك وأنا عايزة أسمعها منه. يوسف بيشيل منها محمد: ولا.. أنت تقولها يا رقية بس.. ولا أقول لك! متقولهاش حاجة خال.. رقية بتلاحظ إن محمد بيعيط: يوسف! هتعمل عقلك بعقل عيل عنده سنة! ده ابنك على فكرة في إيه! يوسف بزهق: أووووف.. ماشي ماشي يا رقية خليكي عارفاه. رقية: ماشي هخليني عارفاه ولسة هتمشي.

يوسف يمسك إيدها: ده أنا حبيت الواد ده عشان بس خلاكي تطلعي من الأوضة. رقية: طلقني يا يوسف. يوسف: لما تقولي لي إنك بتكرهيني ومش عايزاني هطلقك يا رقية. رقية بدموع: بكرهك ومش عايزك يا يو.. يوسف بيدخل محمد أوضته ويشدها لحضنه: ده مكانك يا رقية.. مجتش ولا هتيجي اللي هتاخد مكانك.. عايزة تحرميني مني بعد ما لقيتك ليه! رقية: أنا هتعبك يا يوسف.. يوسف: ياريت كل التعب أنتِ والله.. ده أنا أتعب عمري كله عشانك ولا أشتكي.

رقية بتضم نفسها ليه: عايز يحرمني منك بعد ما لقيتك يا يوسف.. عايز يأذي داليا.. والله أنا مسامحاها بس مش عايزاه تعاني.. أنا قولت لماما تحذرها منه امبارح قالت لها إنها غيرانة منها. يوسف بيطبطب عليها: متقلقيش عليا.. طول ما ربنا معايا وأنتِ ومحمد بعد كده أنا مش عايز حد والله.. وداليا دلوقتي مراته.. هي اللي اختارت كده.. دي وصلت لدرجة إنها تقول إنها هتتجوزه من غير موافقة أهلك.

رقية بتبعد بدموع: أنا خايفة عليك أوي.. وخايفة عليها.. أنا وجودي دايماً بيضر اللي حواليا. يوسف بيقرب منها: وجودك أحياني يا روحي.. هنبدأ سوا من جديد وهنأسس حياتنا سوا.. مش لازم نيأس. رقية: بس ا.. يوسف بيضمها: متقوليش حاجة.. ويكمل بعصبية: وأنتِ إزاي يا أستاذة مقولتليش على أحمد ده! إزاي تخبي عليا إن حد غيري حبك! رقية بكسوف: ما أنا مكنتش أعرف إنه بيحبني.

يوسف بيشدد على ضمته: متقوليش كده تاني.. أنا بس اللي بحبك.. عمر ما حد حبك ولا هيحبك غيري أنا بس.. رقية بتحضن وشه: أنت عيوني اللي بشوف بيها.. ممكن متزعلش مني عشان أنا السبب في مشاكلك! يوسف بحنية: أنا هزعل منك فعلاً لو قولتي إنك هتبعدي عني.. أنا مكتفي بيكي أنتِ بس. رقية بتضمه ليها: يديم وجودك ليا يا عيوني. ~~~~~~ أحمد: وسيادتك لابسة ورايحة لفين كده إن شاء الله! داليا: هخرج شوية اتخنقت من البيت.

أحمد: لا مفيش خروج.. ادخلي اعملي لي أي حاجة بدل ما أنتِ فاشلة في كل حاجة كده. داليا: طب البس وتعالى معايا نخرج شوية. أحمد: أنا قولت مفيش خروج.. أنتِ مبتفهميش! داليا: ما أنا زهقت يا أحمد.. إحنا لسه متجوزين جديد مش عايزة أتحبس كده. أحمد بيضربها: أنا هعرفك بقا الحبس على أصوله عشان تعرفي تتكلمي حلو بعد كده. داليا بعياط: كفاية يا أحمد كفاية خلاص.

أحمد: جتك البلا عليكي وعاليوم اللي اتجوزتك فيه.. حطي لي أكل يا أختي أهو أستفاد منك في حاجة. داليا تقوم تغير هدومها وتعيط وتفتكر يوسف. فلاش باك. يوسف: في إيه داليا أنتِ خارجة ولا إيه! داليا بزهق: أيوه يا خارجة شوية.. زهقت إيه! أموت يعني! يوسف: لا متموتيش ولا حاجة.. بس هو أنتِ رايحة لأهلك يعني! لو كده أجي معاكي بدل ما تروحي لوحدك.

داليا: لا هخرج لوحدي.. وخليك أنت هنا.. عايزة أفك عن نفسي شوية.. زهقت من البيت وعايزة ألف شوية.. إيه ممنوع! يوسف: لا يا ست مش ممنوع ولا حاجة.. بس طالما هتخرجي لوحدك يبقى أجي معاكي.. أو تروحي عند أهلك عشان أطمن عليكي. داليا: يووووه.. خلاص هروح عند بابا بس مش عايزة معاك.. ده أنت ممل. باك. ~~~~~ *أنت يا زفتة اللي اسمك داليا. داليا: في إيه يا أحمد! صوتك عالي ليه!

أحمد بعصبية: أنا صوتي يعلى زي ما أنا عايز.. وبعدين فين الأكل! داليا: بس أنا معلمتش أكل النهاردة.. قولت هنطلب من برة. أحمد: نعم يا عنيا! ليه هو أنا لاقي فلوسي في الشارع ولا إيه! ما الأكل جوا هو.. مشغولة بإيه سيادتك إن شاء الله! داليا بخوف: هبقى أعمل ب.. بكرة يا أحمد خلاص.. اطلب أي حاجة دلوقتي. أحمد بيزقها على المطبخ: نص ساعة لو ملقيتش الأكل جاهز مش عايز أقول لك هعمل فيكي إيه.. جتك داهية.

داليا تبدأ تعمل الأكل وهي بتفتكر حياتها مع يوسف. فلاش باك. يوسف: إيه داليا! أنتِ معملتيش غدا النهاردة ولا إيه! داليا: لا معملتش.. وبعدين ما إحنا بنطلب من برة دايماً.. أو أنت بتعمل لك أكل عادي يعني مش أول مرة. يوسف: بس أنا عايز أحس إني اتجوزت وفيه روح بتشاركني الشقة.. طب أنتِ تعبانة! داليا: خلاص بقا يا يوسف بلاش أڤورة المفروض تتعود على كده أنا مش خدامة هنا.. ولا بتستخسر فيا! يوسف: لا طبعاً.. بس عايز أح..

داليا: يبقى قوم اطلب لنا أكل يلا. باك. داليا بدموع: يا ريتني ما اتطلقت منك يا يوسف.. بس لا.. مش هشمت حد فيا.. طالما مشكلة أحمد الفلوس هبقى أديله من اللي معايا في البنك.. وأهو جوزي برده.. يوسف مكنش أحلى حاجة برده.. وبعدين أحمد بيحبني وأكيد مش هيهون عليه وهيصالحني. أحمد بصوت عالي: أنتِ يا غبية يا اللي جوة.. فين الأكل ولا هاجي أكمل عليكي عشان تعيطي لسبب صحيح.