رواية تمارا الفصل الثاني 2 - بقلم مريم احمد

لأخر مرة يا خليل، لو عايز تكمل شغل هنا، متخليش بنتك تكلم بناتي. نهااائي، وعرفيها كدا الفرق بينا. أنا مش ناقص عيالي يتعلموا حاجة من كلام الشوارع. قال جملته ومشي. جميلة بصتلهم بأسف ومشيت هي كمان. خليل بكسرة: ليه كدا بس يا تمارا؟ ردت عليه بعياط: أنا آسفة يا بابا. خليل: تعالي يا إلهام ثواني. مشيت إلهام وهي ساكتة. خليل: إيه يا إلهام؟ أنا مش منبه عليكي إنك متخليهاش تحتك بعيال زين بيه نهائي؟ عجبك الكلام اللي سمعناه دلوقتي؟

ولا إحنا لازم كل يومين نتعاير بفقرنا؟ إلهام: أحمد ربنا، إحنا أحسن من غيرنا. وبعدين دي طفلة يا خليل، أنت مبتشوفهاش بتبقى عاملة إزاي كل يوم وهي قاعدة لوحدها؟ خليل: ملك موجودة تقعد معاها. إلهام: ملك على طول بتبقى معايا وبتساعدني يا خليل. خليل: خلاص يبقى تسيبيها توفر ليها جزء من يومها على الأقل، ولا لو حصل حاجة تاني وجابتلنا الكلام هنمشي ونسيب الشغل كله. إلهام: خلاص معلش، أنا هقولها حاضر. *** ليه كدا يا زين؟

ليه بتتعامل معاهم كدا؟ هما مش بني آدمين برضو ولا إيه؟ اسكتي يا جميلة وكملي أكلك أحسن. سكتت جميلة بغضب وهي بتدعيله بالهداية. حلا: أنا قولت لنور على فكرة يا بابا، متتكلمش معاها. زين: شاطرة يا حبيبتي. فرحت حلا وكملت: أيوا وكمان هما أقل مننا بكتير. إحنا عايشين في بيت كبير وهما بيشتغلوا عندنا. مينفعش بنتهم تصاحبنا. قالتلها جميلة بغضب: عيب كدا يا حلا، إنتي جبتي الكلام دا منين أصلاً؟

قام زين بغضب: لأ مش عيب وكلامها صح، وأنا اللي قولتلها كدا. جميلة بصدمة من تصرفاته: إنت نسيت إن النعم دي كلها بفضل ربنا؟ ولا نسيت إنت كنت إيه قبل ما يبقى معاك فلوس؟ مسك زين دراعها بغضب وقالها بعصبية: أنا مش قولتلك قبل كدا متفتحيش سيرة الموضوع دا تاني؟ جميلة: إيه يا زين بيه؟ هي الحقيقة بتزعل أوي كدا؟ ولا إنت نسيت لما كنت شغال في ورشة العربيات عشان تعرف تصرف على كليتك اللي بسببها دلوقتي إنت عايش هنا؟

دا إنت مكنتش بتعمل أي حاجة غير إنك بتغسل وتنضف في عربيات الناس. زين بغضب: اخرررسي يا جميلة. وإياك أشوف واحدة فيكوا قاعدة مع بنت الجنايني تاني، فاهمين؟ نور بإستغراب: ليه بس يا بابا؟ زين: هي كلمة، واتفضلوا يلا، كل واحدة فيكوا تروح على أوضتها. خافت نور وطلعت تجري بعياط عكس حلا تماماً. لف زين بتوعد وغضب جحيمي وهو بيقولها قبل ما يمشي: لو جبتي السيرة دي تاني يا جميلة، مترجعيش تندمي بعد كدا.

فضلت واقفة بحزن وهي باصة على طيفه بسخرية.