رواية توبه الفصل السادس 6 - بقلم منة هاني

في بيت طاهر، البنات تستعد ورافعين حالة الطوارئ. أبوهم قاعد في الصالة: "يا مسهل يا رب نخلص النهاردة." وردة: "هعملك قهوة على ما يخلصوا يا حاج." طاهر: "لأ خليكي جنبي أتملى من جمالك. إيه الشياكة والطعامة دي." ضحكت وردة: "ربنا ما يحرمني منك يا غالي، ويوعد بناتك بعرسان شبهك."

طاهر: "بصي بقى، قبل ما البنات تيجي، العريس ده أبوه حكالي عنه بيني وبينه والكلام ده ما يخرجش بره. يا حاجة، كلام يقلق، إنه نسوانجي. عشان كده عاوزك توصي توبة تتعب قلبه وتربيه. عاوزها تعلمه الأدب." وردة: "بس يا طاهر، ده كدة بنظلمها." طاهر: "بالعكس، بنتك في النيابة مسمينها الوحش من قوتها بالتعامل وسيطرتها. يعني ما يتخافش عليها ولا على واحدة من بناتنا." وردة: "حاضر يا حاج، هاوصيها. بس لازم برضه نديها خلفية."

طاهر: "هي أكيد سألت وعرفت عنه كل حاجة." كنت واقفة ورا الباب وسمعت كل حاجة، ومتفاجئتش لأني فعلاً سألت جماعة حبايبي بالمباحث وعرفت كل ده وأكتر كمان، وكنت محتارة بس عشان بابا مستعدة أغامر بنفسي. رجعت لأوضتي قبل ما يحسوا بيا، وكملت لبسي. وأخواتي خلصوا واتجمعوا وندهوا عليا أول ما خرجت وشافوني. تمارا: "بالذمة دة كلام، إنتي كل مرة بتغطي علينا بجمالك." ماما: "ما شاء الله، ربنا يحفظك. عروسة تفرح القلب." تالا وتالية: "وأحنا."

ماما: "قمرات يا ناس بناتي، ربنا يحميكم من شر العين." بابا: "يالا يا حلوين، هانت. نتأخر كدة." عيلة عثمان وصلت الأول، وفارس كان موصي العمال يجهزوا الدور العلوي للمناسبة. فارس استقبل عيلته هو وابن خالته، وسابهم قاعدين ونزل يشرف على المطبخ. وصلت عيلة طاهر، وقبل ما يطلعوا، فارس سمع العمال بيقولوا في بنات زي القمر داخلين عالمطعم. فارس طلع لقى عمه وبناته. بص للعمال بحدة وقال لباسم: "وصل الجماعة فوق."

وسلم على عمه: "أهلاً عمي." تبادلوا التحية، وفارس بص لي وأنا طالعة وسرح بنظراته، وأنا بتجاهله. أخواتي أخدوا بالهم وفضلوا يضحكوا بخبث. ماما سكتتهم: "بس يابنات عيب." تالية: "أصله تنحلها أوي." عمي قام استقبلنا بحفاوة، ومراته كمان، مع استغرابنا من فرحتها اللي باينة إنها مصطنعة. ولاد عمي قاموا بكل أدب رحبوا بينا، وباسم ابن خالتهم كان محترم جداً ومجتهد. كلنا لاحظنا إنه شخص مؤدب أوي. شوية وفارس انضم لنا وطلب لنا الأكل.

وعمي صمم إنه يقعدني جنب فارس.