رواية طوق الحب الفصل الحادي عشر 11 - بقلم هدير عبد العليم

رنا بعصبية: فيه إيه يا طنط، هي جميلة أوي على فكرة ولفة الطرحة قمر. ندي بعصبية: محدش طلب رأي حضرتك على فكرة. داليا: إيه قلة الذوق دي؟ رغد: إيه يا بنات مفيش حاجة حصلت.. أنا كده كده كنت ماشية و شاورت لسيف ييجي. رنا: لو مشيتي إحنا كمان هنمشي. ندي: والله دي قلة ذوق. رغد بحزن: أنا هرتاح لما أمشي.. معلش لازم أمشي المكان تقريبًا مش ليا. رنا بحزن: يبقى إحنا كمان لازم نمشي. سيف: فيه إيه؟ وصوتكم عالي كده ليه؟

رغد: احممم.. مفيش يا حبيبي كنت عايزة أمشي ورنا مصممة أقعد معاهم شوية. رنا بكل حب وحضنتني: سيف أنا بحب رغد أوي بجد، يبختك بيها. رغد: وأنا بحبكم أوي. ندي بسعادة: كأن معاك حق لما حاربت عشانها بجد مراتك دي قمر. سيف: إيه اللي حصل لكل ده؟ وآيه الحب اللي هيولع في الضرة ده، انتوا مش عارفين رغد أوي؟

داليا: ولاد الأصول بيتعرفوا من أول يوم.. ولاد الأصول بيخافوا على مشاعر الناس أكتر من مشاعرهم.. ولاد الأصول لما بيحبوا بيعرفوا يقدروا اللي بيحبوهم وييجوا على نفسهم عشانه يا سيف. سيف بحضن: دي حبيبتي وشريكة حياتي وسندي و.. رغد بابتسامة: وأنا ملقتش ونس للعمر أحسن منك. سيف بضحك: أنا هقعد معاكم هنا. رغد بابتسامة: سيف عيب، أقعد هناك مع أصحابك بنتكلم في حاجات بنات.

(مكنش ده السبب إني أطلب من سيف يقعد بعيد.. بس كنت حابة لو حصلت حاجة سيف ميعرفش يمكن أم العروسة تيجي تقولي حاجة تاني.. أو العروسة.. أنا حد أقل كلمة بتأثر فيه.. بس كله اتنسى بمجرد ما حسيت إن أخوات سيف معايا وإنهم كانوا بيدافعوا عني بكل حب) سيف مشي يقعد مع أصحابه والشباب. رغد: بجد أنتِ جميلة أوي. رغد: ده جمال عيونك. ندي: أنا مبسوطة أوي إنك رفضتي تقولي لسيف اللي حصل.. عشان ميحصلش مشكلة بين سيف وسليم.

رغد: متخفيش أنا مش عبيطة.. أنا هتجوز سيف عشان يقرب منكم أكتر مش يبعد عنكم ومن النهارده انتوا أخواتي يا عيال.. آسفة على كلمة عيال بس.. رنا بدموع: بجد أجمل أخت. ندي بحضن: من النهارده إحنا تلات بنات أخوات.. لا لا أربعة عشان داليا أختنا برضه. رغد: بحبكم أوي. ندي: كنت ناوية أكون عمة الحرباية بس عيالك هيكونوا زيك وزي سيف هادئين. رنا بضحك: عمة الحرباية لعيال سليم. داليا بضحك: أو خالتوا الحرباية لبنت رنا. رنا بضحك: بنتي؟!!

مش هخليها تيجي عندها أساساً. ندي: فكك من كله ده.. المهم بقولك عاملة إيه مع خطيبك وفرحك إمتي؟ داليا: أنا؟!! ندي: آه. داليا: يااها سؤال بيرجعني لأول يوم في خطوبتي.. فاكراها اليوم ده أوي.. عارفة يا نودي اليوم ده كنت خايفة أوي عارفة مشاعري كانت مختلطة ما بين إني خايفة أظلم حد معايا لأن قلبي متعلق بحد مات.. وفرحانة لأن فيه حد بيحبني وجاي يتقدم لأنه حاسس إنه شبهي.. بابتسامة حزين عارف يومها قولت لطارق إيه؟

قولتله كل اللي في قلبي بدون خوف قولتله.. رنا: إيه رأيكم نطلع نشرب أي حاجة في كافيه ونتكلم بره أحسن؟ رغد: مش هينفع عشان بابا وسيف. ندي بضحك: سيف مين؟!! رغد بضحك: زوجي قُرة عيني. رنا: أنا هكلمه. نادت على سيف. ندي: عايزين منك طلب. سيف بضحك: قولي يا ندى هانم عايزة إيه؟ رنا: رغد هتخرج معانا بره. رغد: والله أنا رفضت وقولتلهم إنه مش هينفع لكن.. سيف بضحك: مش هينفع ليه؟ عادي يلا وأنا هطلع معاكم.

رنا بضحك: مين ده اللي يطلع معانا؟ ندي: ما بلاش إنت تطلع معانا؟!! سيف بضحك: ليه بقا إن شاء الله؟ رنا بضحك: هنتكلم في خصوصيات. سيف: ده بجد؟!! ولا؟ داليا بضحك: لا عادي تعالى دا أنت أكتر حد عارف اللي حصل. سيف بضحك: انتوا هتتكلموا في إيه.. مش مطمن ليكم؟!! داليا: يلا ونتكلم بره. سيف: يلا. في الكافيه. ندي بلهفة: آه يا دودو إيه اللي حصل مع طارق؟

داليا بابتسامة: قولته أنا مش زيك ولا زي حد.. أنا اللي زيي وشبهي مات.. ولو وافقت على جوزي ليك هظلمك.. بس هو قالي مش شرط تحبيني دلوقتي كل اللي عايزه إني أفضل جنبك وبس.. وقتها مكنتش عارفة أرد وأقوله إيه بس كنت عمالة أفكر ليه حد ييجي على نفسه بالطريقة دي عشاني و.. سيف: لأنه حاسس إن فيكِ حاجة منه.. لما بنحس إن فيه حد قريب مننا بنحاول نقرب منه أكتر.

داليا: قولت مش مشكلة هحاول زي ما طارق طلب وخلاص.. مش فارق معايا أي حاجة الشخص اللي كنت بحبه خلاص مات.. بابتسامة وبتـبص لسيف أنت أكتر حد كنت فاهمني في الفترة دي.. كنت من أصعب فترات حياتي. سيف بابتسامة: كملي الجزء الحلو بقى.

داليا: ودي أجمل خطوة أخدتها في حياتي من يوم ما اتخطبت لطارق وأنا ربنا فعلاً عوضني بيه.. حاسة إن ربنا عوضني بحد شبهي.. وعرفت كمان إن مش البنات بس اللي بتكون محتاجة حد زيها.. كلنا محتاجين نحس بالأمان مع الناس اللي شبهنا لما الدنيا تيجي علينا نلاقي حد يسمعنا عشان بيحبنا.. ولما نحب نتكلم.. نتكلم في أي حاجة بدون ما يشوف إننا تافهين.. بابتسامة فاكرة كمان كلمتك يا سيف مش كل يوم هتقابلي حد يستحملك وأنتِ في أسوأ حالاتك ف لما تقابلي حد شايفك جميلة وأنتِ منطفئة ف حافظي عليه لأنه بيحبك بجد مش مجرد حب مزيف.

سيف: أكيد طبعاً.. رغد عايز أقولك إن داليا هي سبب إني أجي أتقدملك رغم إن كله كان رافض جوازي. رغد: رنا قالتلي كل حاجة. سيف بضحك: والله؟ رنا بضحك: أما إحنا هنضيع وقت. سيف: بس بجد بقى والله فعلاً الجواز ده ما بين القدر والنصيب.. ما بين إنه مكتوب ومقدر وما بين إنه المفروض تبذل كل مجهودك عشان توصل للي شبهك. داليا: كلام من دهب. رنا: يا لهوي الوقت عدى بسرعة أوي.. الساعة 10 ونص. رغد: دا بجد؟

ومسكت الفون: يالهوي يا سيف بابا اتصل كتير أوي وأنا نسيت إني عاملة الفون صامت. داليا: كان عندي ليكم مفاجأة. رغد: بجد؟! داليا…