رواية تربية حواري الفصل السادس والثلاثون 36 - بقلم ولاء حامد

حور غيرت طريقها في لحظة وحودت العربية وخلال دقايق كانت نزلت بهيبة معروفة عن حور القادرة. رأسها مرفوعة وصلبة طولها وشامخة زي الجبل، عينيها حددت هدفها ولا اتلفتت يمين ولا اتلفتت شمال، ودخلت على طول بخطوات ثابتة متهزتش. وبصوت حاد وعينين مترقبة: السلام عليكم. همام رفع عينه والصدمة لجمال لسانه للحظات، وقدر يرد بعد دقايق: وعليكم السلام ورحمة الله وبركاته. ازيك يا بنتي.

حور قعدت بهدوء: أولاً أنا مش بنتك، أنا بنت عامر النصراوي الله يرحمه. بنتك اسمها جميلة، في بيتك. ثانياً تمام الحمد لله. همام: شكلك لسه شايلة من ناحيتي. حور بثبات: بص يا حاج همام، أنا مش بنت ذوات. دانا تربية حواري، يعني تقدر تقول كده شلق بس مع اللي يمس طرفي. وأنا حذرتك انت وأهل بيتك مرتين. الأولى في ورشتي، والتانية في بيتك لما مراتك قالت أصلها. والتالتة ثابتة، وانت اللي بدأت. همام بقلق من نبرة صوتها الحادة

رغم برضه عدم نرفزتها: قصدك إيه بالكلام ده. حور: السوق علمني اللي بيقول مبيعملش، واللي يعمل مبيقولش. هاسيبك تشوف بعينك اللي بيقصدني بعمل فيه إيه. همام ووشه اصفر من هول الموقف: إيه اللي حصل تاني. حور بسخرية ومطت شفايفها لقدام: اممممممم يعني متعرفش إن ابنك راح قال لابن عمي الوساخة اللي عملها فيا بيتباهي. وعوجت بوقها يمين وشمال بحركة شعبية مشهورة. بس بيتباهي بإيه يا حسرة. ما علينا، خلي الطابق مستور. همام واخيراً

فهم الموضوع: والله اللي حصل سوء تفاهم، وأنا بتعهدلك وبوعدك إن جبل مش ها يتعرضلك تاني ولا حتى ها يجيب سيرتك حتى لو بينه وبين نفسه. حور بسخرية: لامؤاخذة في الكلمة يا حاج، الوعد اللي زي النيش منظر ميلزمنيش. وعدت مرتين وكان طق حنك وكلام اتكب على الأرض. أنا بوعدك عدها أيام على صوابعك وها يوصلك ردي. وزي ما دخلت خرجت بهيبة ولا هيبة السلطان، وركبت عربيتها في طريقها لشغلها. مسكت التليفون وعملت مكالمة. حور: الو، ازيك عامل إيه.

: تمام الحمد لله. خير إيه سبب المكالمة. حور: عايزاك في مصلحة متعشية على الضهر. مستنياك في الورشة، سلام. قفلت المكالمة.

وبعد وقت قصير وصلت وركبت العربية ونزلت تطل على الشغل. دقايق لفت في الورشة واطمنت إن كل شيء ماسي زي الساعة، بس برضو لازم تتأكد بنفسها خصوصاً في غياب ديشا وسبارس بعد عجنتهم امبارح في البركة. طلعت المكتب وخدت دفتر ونزلت المخزن تعمل جرد عشان تعرف القطع الناقصة واللي قربت تخلص وتعمل بيهم طلبية جديدة. خدت أكتر من ساعتين بتلف في المخزن، وكانت خلصت كل المطلوب. طلعت وهي فاصلة، اتهبدت على كرسي المكتب.

حور بتعب: اوووف يخربيت كده، كان لازم اعمل شنعة منعة وانزل انهارده. اهو اليوم بان من أوله سحلة. غمضت عينيها وهي بتفرك فيهم جامد. فضلت دقايق مغمضة لحد ما فاقت وحست إنها أحسن شوية. بدأت تركز في الشغل اللي في إيدها. شوية والباب خبط ودخل شخص: مساء الفل يا بنت الغالي. حور بابتسامة صافية: داحنا لسه الضهر يا يا حاج راضي.

راضي: أقول كله وقت وبيعدي. خير طلبتيني مع إن الأفضل إن اللي عايز يروح للي عايزه. ولا نسيت سيرة السوق يا بنت عامر. حور بابتسامة: لا محستش، بس برضو انت عارف ومتأكد إنه لو كان ينفع أظهر في الصورة كنت جيتلك لحد عندك مش العكس. راضي ظهر على وشه معالم الاقتناع: تمام، لو كده يبقى عداني العيب. خير جايباني على ملا وشي. حور بهدوء شديد: ليك عندي مصلحة متعشية. راضي بإنصات: سامعك، ارمي اللي عندك.

حور على نفس وضعها: عارفة إن الشغل عندك نايم، اديله فترة والمحل الشغل فيه معادش زي الأول. راضي بتهكم: البركة فيكي. وقفتي مع حماكي ونسيتي عشرة العمر اللي بيني وبين أبوكي الله يرحمه. ومع ذلك أول ما طلبتيني مقدرتش أتأخر عن بنت الغالي. حور بهدوء: اللي حصل مع اللي كاااااااااااااااان اوي علشان تصححله المعلومة شيء طبيعي. زي ما بيقولوا بالبلدي كده، أنا وأخويا على ابن عمي، وأنا وابن عمي على الغريب. فطبيعي إني أقف معاه.

راضي: وأنا فاهم، بس برضو مش فاهم. جايباني ليه هنا ومصلحة إيه اللي بيني وبينك. لا كاري تفهمي فيه ولا كارك أفهم فيه. يبقى إيه. حور: اصبر على رزقك. أنا عارفة إن أزمة الدولار رفعت الأسعار والناس بتدور على السفر، ومحل الحاج همام واكل الجو لأنه مقلل السعر عن سعر السوق وكمان لأنه شامل كل حاجة لجهاز العرايس، يعني محدش لايقعد يلف ويدور ويدخل ويخرج، فالكل استسهل واستقرب.

راضي: كل ده كلام أنا عارفه. وعارف إنه في الأول وفي الآخر رزق ربنا بيبعته لصاحب نصيبه. برضه إيه العبارة. حور بمكر: العبارة إني نويت أشاركك. راضي بذهول: وإنتي تفهمي إيه في الكار ده. حور: مبفهمش فيه، بس بفهم في السوق وعارفة دواخله وزخانيقه من الألف للياء. راضي بسخرية: عروستي.

حور بابتسامة: مفيش فايدة فيك. طيب بص يا حاج راضي، السلعة عشان توصلك بتلف لفة كبيرة. بتيجي من بلدها للمستورد الرئيسي في مصر، ومنه المستورد على تاجر جملة الجملة، ومن تاجر جملة الجملة لتاجر جملة التجزئة، ومن تاجر جملة التجزئة لتاجر القطاعي أو المحلات. كل واحد على حسب معرفته، وكل واحد بيزيد مكسبه بعد حسبة تكاليفه ومشالته وعمالته. يعني على ما بتوصلك بيكون السعر زاد بالميت الضعف. يعني الحتة أم 100 جنيه بيكون أساسها 40 أو 50 جنيه من بلدها.

راضي هز راسه: كلام مظبوط. برضه إيه في راسك. حور: ناويه أخنق الله دي كلها وأوفر لك. راضي بإنصات شديد: إزاي؟ فطميني. حور: طيب اسمع يا حاج، أنا ناويه أجيب القطع من بلدها الأصلية ومن المينا عليك طوالي. راضي بذهول: إزاي؟ وهاتوصل لي ليهم إزاي. حور بسخرية: إيه يا حاج؟ الحال؟ مكنتش خريجة تجارة ومتربية في السوق يعني كيف وازاي دي لعبتي.

راضي: عارف، بس الكلام حاجة والفعل حاجة تانية. ودي فيها فلوس متلتلة هاتتدفع، وميرضيكش الخسارة ليا. حور بثبات: ومن امتى بنت عامر النصراوي بترمي فلوسها في الأرض ولا بتدخل تجارة خسرانة. راضي: معاكي، وعارف إن دماغك حتة ألماس. بس برضو رسيني. مبحبش أمشي زي الأطرش في الزفة. فهميني. اقتنعت يبقى استبينا ونقول أمين. مقتنعتش يبقى يادار ما دخلك شر.

حور بحسم: أول هام يا حاج، أنا مش هارمي فلوسي أنا كمان على الأرض، لأن زي ما قولتلك هاشاركك. بس برضو حقك كيف وازاي. أنا عملت حصر لكل المصانع الرئيسية اللي بيتعامل معاها المستوردين في مصر. وعرفت كل كمية أقدر أستوردها. هانستورد من هناك ونجيب لمصر ورق الجمرك والكلام ده كله عليا تخليصه. متسألش إزاي. راضي باعتراض: لأ طبعاً لازم أسأل في الصغيرة قبل الكبيرة. ده شغل والشغل شغل.

حور بنفخة طويلة: زي ما بخلص ورق قطع الغيار اللي بتدخل. راضي بهزة راس: تمام. طيب عندك مشكلتين معملتيش حسابهم. حور بتركيز: إيه هما؟ مش يمكن أكون عرفاهم.

راضي: مظنش، بس نشوف. الأولى الدولار هاتدبريه إزاي، ولو قولتي سوق سودا ها أقولك فرق السعر ها يفرق معاكي كتير أوي. والمشكلة التانية الكمية اللي مطلوبة هاتبقى كبيرة أوي، هاتعملي إيه في الباقي منها. المحل مش ها يستوعب كل الكمية دي. وكل يوم بيطلع الحديد والكل بيطلع يجري على الجديد.

حور بنظرة طويلة: مش بقولك نسيت إني متربية في السوق ومستهون بيا. حتة العملة دي أنا ها فتح حساب استيراد بعد ما نعمل بطاقة استيرادية. فبالتالي ها أقدر آخد من البنك العملة المطلوبة بحكم إني مستورد. يعني الحكومة اللي هاتوفر لي العملة. ولو قصرت ها فتح حساب دولي أحط في مصر بالجنيه واسحب من هناك بالدولار بنفس سعر البنك وسعر الجنيه المتعارف عليه في البورصة العالمية. وغمزت له بعينها كاتوضيح يعني من دقنه وافتله.

راضي بذهول من تفكير حور: كلام موزون ويكفي. بس في مشكلة الكمية هاتعملي فيها إيه.

حور بتهكم: يالله منك. ها أقولك علشان عارفاك. بص يا حاج، إنت ها تاخد اللي يكفيك وزيادة. والباقي الكل بيدور على الوفر زي ما قولتلك. يعني التجار اللي على مستوى الفيوم تقدر تديهم بسعر تاجر جملة الجملة. يعني مكسبين. المكسب الأول إنك ها يجيلك بسعر المصنع مع دفع التكاليف وتبيع عندك بسعر التجزئة بعد تخفيض الأسعار بمبلغ محترم. وده ها يخلي السوق كله يجري عليك. يعني هنا مكسبين محترمين ووفر. والتاني إنك هاتكسب كل تجار الجملة والمحلات. لأنك ها توفرلهم أكتر من نص اللي بيدفعوه لتجار جملة الجملة أو تجار جملة التجزئة والموزعين. فهمت.

راضي بعينين مبرقة: يا شيخة يسلم زند اللي رباكي والله وفتحت فيكي ترباية عامر يا بنت أبوكي. طيب وناوية تبدأي من امتى إن شاء الله. حور بثبات: من امبارح لو ينفع. بس اللي فات ولا ومات. من انهارده المحامي بتاعي ها يجهز العقود وبكرة تتسجل. ومن بعدها هو ها يتولى معاك كل حاجة. وخلال شهر بالكتير ها يكون اسمك مسمع في السوق زي الطبل. راضي: آمين. معاكي وأيدي على كتفك. حور: يبقى استبينا. راضي: استبينا. يلا فوتك بعافية.

حور: الله يعافيك. والمحامي ها يعدي عليك انهارده. اعمل حسابك وفضي روحك الكام يوم اللي جايين. راضي بهزة راس وسابها ومشي. حور وهي عينيها ثابتة في نقطة وهمية قدامها: انتوا اللي بديتوا والبادي أظلم. *** ثريا كانت نايمة في أوضتها في بيت عاصم بعد ما فضلت طول الليل تندب حظها زي كل يوم على بختها واللي جرالها. صحت على زغدة جامدة في جسمها.

أميرة مرات عاصم اخوها: قومي يا أختي. إيه فاكرة نفسك في لوكندة. قومي يا أختي مش خدامين بيت أبوكي إحنا. يلا وراكي شغل كتير. ثريا بزعيق: إيييييه في إيييه. مصدقتي يا بنت النفسية تفردي قلوعك عليا. يحقلك مهو الدلدول اللي أنا واحدة زيك في بيته هو السبب. خليكي ركبتي ودلوقتي رجليكي.

أميرة بزعيق: أخوكي مهواش دلدول. أخوكي أب محروق من اللي عملتيه. أوعي سامعة يا ثريا. أوعي تفتكري إني لو بموت وعدى ألف عمر فوق عمري هانسي. كل ما أبص على بنتي وأشوفها افتكر اللي عملتيه. كل ما افتكر اللي جرالي من تحت راسك ناري تقيد. ثريا: إيه عملت إيه لده كله؟ كنت عيلة وغلطت. عمالين يعلقولي المشنقة. ومن ساعة ما حطيت رجلي في المخرب ده اللي إلهي وانت جاهي يخرب على نفوخكم. عمالين تذلوا فيا.

أميرة بسخرية: عيلة. لا بجد يا ثريا. عيلة يا شيخة. قولي كلام غير ده. دانتي كنتي شحطة معاكي عيال. عيلة مين يا أم عيلة. انتي شر يا ثريا. أوعي تكوني نسيتي أو افتكرت إن السنين هاتنسي. لا والله عمرها محدش يلوم من إذاكي، لا كبير ولا صغير. ثريا بصراخ: عملتلكم إيه للسواد اللي جواكم ده كله؟ غلطة وراحت لحالها. سيبوني في حالي بقى.

أميرة بضحكة وجع: غلطة وراحت لحالها. قولي والله العظيم كده يمكن أصدقك. غلطة إيه اللي تخليكي تعملي ده كله يا شيخة. دانتي شيطان. قطع صوت زعيقهم صوت جبل اللي كان عايز يطمن على أمه زي ما متعود من يوم ما خرجت بييجي كل فترة يطمن عليها من باب صلة الرحم. ولأنه طول عمره متربي دلوع ماما. جبل بصدمة من منظر أمه ومن زعيق مرات خاله ليهازعق بصوت عالي: إيه في إيه؟ بتزعقيلها كده ليه وبأي حق وبأي صفة إيه. قبل ما ترد كان عاصم اللي طلع

على صوتهم ورد بصوت أعلى: في إيه يااض؟ صوتك ميعلاش في بيتي. إيه نسيت تربيك. لو نسيت محدش كبير على التربية يا ابن ثريا. فوق يا جبل. اللي قدامك دي اللي دمرت حياتك وخلتها خراب. اللي قدامك دي أذت كل اللي حواليها. جبل جرحه اتفتح من جديد ورجع ينزف، بس منظر أمه كان أصعب: غلطت واعترفت، وأنا سامحت في حقي. عملتلك إيه لده كله مخليك بتكرهها كده.

عاصم بسخرية: يااااااه. سؤال متأخر ييجي 15 سنة يا ابن أختي. بس عندك استعداد أسمع أمك من ييجي 15 سنة كده. نزلت إجازة طويلة كانت عملت لأبوك مشاكل هناك ومحدش فينا يعرف أصلاً. ونزلها تقعد هنا عشان تستقر شوية على ما يحل مشاكله اللي عملتها أمك هناك. بس بلغنا إننا وحشنا أمك وعايزة تشوفنا وتقعد هنا معانا شوية. قولنا يا مرحب ويا ألف أهلاً وسهلاً. وشرد بتفكير للي حصل زمان. فلاش باك

زي عادتهم كل يوم بيتجمعوا بالليل. عاصم وأميرة وعيالهم، وعبد الفتاح وماها وعيالهم، ومحمد ورشا وعيالهم، وسعد وسهر وعيالهم. والكل متجمع وبيضحك من قلبه. قطع جمعتهم صوت خبط على الباب. قام عبد الفتاح من مكانه فتح الباب، والمفاجأة كانت من نصيبه وهلل بصوت عالي: يا ألف مرحب. البيت نور يا بنت قلبي. الكل طلع من جوه على صوت ترحيب عبد الفتاح وصوته العالي وترحيبه الحار أوي.

ثريا بابتسامة باردة: منور بيك يا أخويا. عاملين إيه يا جماعة. الكل: الحمد لله تمام. عاصم بفرحة: ادخلي ادخلي يا بت. وحشتيني يا أروى. دخلت ثريا ودخل وراها الشنط. أخواتها وقعدت وسطيهم. عبد الفتاح باستفسار: مقولتيش ليه إنك جاية؟ كنا جينا لك المطار. قبل ما ترد كان عاصم بيبص عليها وعلى الشنط وفضول واضح في عينه مقدرش يكتمه: اومال فين جوزك؟ جابك هنا وراح فين.

ثريا بمكر وخبث: لأ همام مجاش معايا. أصل انتوا وحشتوني. وبيني وبينك بقالي كام سنة منزلتش. قمت عملت إيه؟ فضلت أزن أزن على ودن همام لحد ما زهق ووافق إني أنزل عندكم أشوفكم شوية. بس الكل بص لبعضه بس عدم الاقتناع موجود جواهم بس محدش قدر يتكلم. ثريا بصتلهم بتكبر وكملت وهي رافعة حاجب ومنزلة حاجب: إيه؟ في مشكلة إني أقعد في بيت أبوووووويا وسطيكم. واتكت على حروف بيت أبويا أوي. الكل بإبتسامة صافية هز رأسه.

محمد بترحيب: إن مشالتكيش الأرض نشيلك فوق راسنا. دانتي الدلوعة يا بت. ثريا بغرور وهي بتعدل حجابها عشان تبين الغوايش الدهب اللي مالي دراعاتها: يحق لي. هو أنا أي أي ولا زي زي. سعد بهزة راس: مفيش فايدة فيكي. على العموم الشقة بتاعتك موجودة ومحدش قاعد فيها ومفروشة من مجمعة ونضيفة. يلا اطلعي افردي جسمك انتي والعيال. ثريا وهي بتقوم من مكانها: طيب فوتكم بعافية. أحسن قعدة الطيارة كسرت عضمي من كتر التكتيفة.

سابتهم وطلعت شقتها. ومر اليوم مرور الكرام. بس الكل جواه قلق من ثريا لأن طبعها معروف. اتجمع الأربع سلايف يجهزوا الفطار الصبح. وكل واحدة عمالة تبص للتانية وتتنهد. أميرة باستغراب: مالكم؟ فيه إيه من الصبح عمالين تبصوا لبعض وكأنكم شايلين هم فوق صدر كل واحدة منكم. مها ردت وهي بتسمي عينيها وبتهز راسها: مجية ثريا يعني مشاكل مبتخلصش. أميرة باستغراب: ليه يعني؟ هاتأكلك ولا هاتأكلك.

مها: انتي مش فاهمة حاجة. ثريا قوية وشديدة ومغرورة. شايفة نفسها مركز الكون وإنها فوق والناس كلها تحت رجليها. ثريا في الشر محدش يتوقعها. أميرة بعدم اقتناع: مش للدرجة دي. أنا آه أسمع عنها بس مش لدرجة الشر دي. ممكن تكون مجرد غيرة عادية. رشا ردت بقلق: مش غيرة. ثريا بتكره أي حد تحس بس لو مجرد إحساس إنه أحسن منها. أميرة بتبصلهم والخوف اللي جواهم بدأ يتنقل ليها.

بس اتمالكت أعصابها: يا جماعة والله انتوا بتهولوا الموضوع. يمكن كانت لسه طايشة. أنا سمعت إنها اتجوزت صغيرة. سهر: مش صغيرة. دي كانت بنت 16 سنة. وبعدين طبعها متغيرش. وده واضح من كلامها امبارح وطريقتها إنها تتباهى بالدهب اللي لابساه. ملحتيش وهي بتسمي دراعاتها عشان تبين الدهب اللي لابساه. ربنا يستر من الأيام اللي جاية.

الكل بص لبعضه ورجع يكمل اللي في إيده. وبعد وقت كان الكل حط الأكل على السفرة واتجمعت كل العيلة بما فيهم ثريا. بدأ الكل ياكل. وثريا في لحظة بصت لرشا وبلغة أمر قدام الكل: قومي هاتيلي ملاحة من جوه وحطي عليها فلفل أسود على الملح. الأكل ماسخ مش عارفة أبلعه. رشا اتمالكت أعصابها ببرود مميت: والله يا أم جبل الملاحة قدامك. وجمبها على طول الفلفل الأسود. يعني مش ها تتعبي روحك لو رديتي من دي حبة ومن دي حبة. ولا إيه.

وسابتهم وكملت أكل ولا كأن شيئ حصل. محمد قبل ما يتكلم رشا حطت إيدها على رجله فبصلها هزتله براسها بمعني سيبك منها. خلص الأكل وقام الكل يشيل الأكل إلا ثريا. غسلت إيديها وقعدت تتفرج على التلفزيون. والكل. أميرة جات شايلة صنية الشاي وحطتها على الترابيزة. ثريا بصت لها

بقرف ودقايق واتكلمت بسم: إيه يا أميرة. عاملة في روحك كده ليه يا حبيبتي. شكلك عامل زي ستوتة. اهتمي بروحك واخفي كرشك المدلدل ده زي الحامل في شهر ولادتها. لحسن أخويا يبص بره. وبصراحة يحقله. أصل عاصم طووول عمره عايب من يومها. أميرة اتصدمت من الكلام وبصت لعاصم بعينين بتلمع من الدموع. عاصم قرب من مراته وخدها في حضنه قدام الكل وطبطب عليها. وبص لأخته: مالها أميرة؟

اسم على مسمى. وأنا مش الشاب الهايف اللي بياخد بالشكل. أنا طول عمري بدور على الجوهر. وإنتي مغلطيش. أميرة فعلاً حامل وفي تؤام. عشان كده تعبها مضاعف وحجم بطنها كبير. ادعيلها من قلبك ربنا يقومها بالسلامة ويرزقك زيها. واخد مراته وطلع شقته. والكل بص لثريا بإستحقار ماعدا عبد الفتاح بزعل. وثريا وكأن شيئ لم يكن.

ثريا لنفسها: بقى المعفنة دي تخلف تاني وتؤام وأنا معرفش أخلف تاني بعد البت. لأ. هي مش أحسن مني. ماااااشي. اصبروا عليا وأنا ها أعرفكم مين هي ثريا. وأعرفكم إن الله حق. مرت الأيام بحلوها ومرها. وكل يوم ثريا تخترع مشكلة شكل. لحد ما مر على قعادها في بيت أبوها 3 شهور. لحد آخر أسبوع زادت المشاكل بين ثريا وكل البيت. وكانت أميرة وصلت للشهر السابع. الكل اتجمع يجهز الأكل زي كل يوم. رشا وهي ملاحظة

تعب أميرة بقالها كام يوم: مالك يا أميرة؟ مش قادرة تصلبي طولك. أوعي يا بت تكوني هاتعمليها في السابع. أميرة: لالا. ده بس مغص شوية. متي عارفة بقى الشهور دي بتبقى صعبة. مها بقلق: طيب بقولك إيه. اطلعي ريحي نفسك وافردي جسمك على السرير في أي أوضة. ولما نخلص الأكل تيجي. أميرة بهزة راس: يا جماعة أنا كويسة. واللهم.

مهما وهي بتسندها: كويسة مين بس. انتي بقالك كام يوم على ده الحال. لو مروقتيش ها أخلي جوزك يوديكي للدكتورة آخر النهار. سندت أميرة وخلتها ترتاح. والكل كمل تجهيز اللي في إيده وغرفوا. خلصوا الأكل وطلعت كل واحدة تنادي على جوزها وعيالها. ياترى إيه اللي بيحصل لأميرة؟ ياترى ثريا عملت إيه وصل الأخ يكره أخته؟ ياترى حور هاتعمل إيه في همام تاني؟ هانعرف في الحلقة الجاية.