رواية طيف الفيروز الفصل السابع 7 - بقلم غير معروف

بصيت ع الباب المقفول وبصتله. الباب مقفول يا مراد، ومينفعش تخرج أصلا عشان حراس الملك. سكتت فيروز لما لقيته بيطلع منه ضوء أزرق وبدأ يمشي اتجاه الباب المقفول ودخل منه وكأنه باب سحري وفجأة اختفى جواه. ظهر مرة تانية من الباب ومدلي إيده وهو بيقول بحماس: يلا. بصتله بتردد، بس نظرة من عيونه طمنتني. متخفيش. قربت منه وحطيت إيدي في إيده ومشيت معاه ودخلت فعلاً من الباب وكأنه سحري.

حسيت برعشة وأضواء كتيرة في وشي وفجأة، لقيت نفسي في مكان كأنه قطعة من الجنة. شجر وورد كتير وعصافير أكتر وشلال ميه وفي آخره بركة جميلة أوي فيها سمك ملون. صوت العصافير عامل بهجة في المكان ودا زوده حلاوة وجمال بشكل لا يعقل. سيبت إيده ومشيت ناحية الشلال لحد ما وصلت عند بركة السمك. بصيت ع السمك وهو بيلعب كان شكلهم أجمل من قريب. بصيت عليه وهو كمان بصلي وكأنه بيضحكلي.

مشيت شوية وأنا بلمس الورد بأنواعه وألوانه اللي تبهج القلب قبل العين. قلعت الكوتشي بتاعي وبدأت المس الزرع وهو طري. مرة واحدة لقيت شوية عصافير من اللي كانوا في السما بدأوا يلفوا حواليا. ضحكت بفرحة ومن قلبي وفتحت إيديا وبدأت أجري وأنا بضحك وفضلت ألعب والعصافير حواليا كأنهم بيشاركوني اللعب بصوت زقزقتهم وكأنها ضحكات بيبي صغير. جريت وقفت قدام مراد وأنا بضحك وعيوني بتلمع بفرحة وسعادة محستش بيها قبل كده.

رفع إيده وحطلي طوق ورد ع شعري. كان أبيض بورد أزرق في النص. مسك إيدي وقعدنا. ظهر قدامنا مانجة كتير. ضحكت جامد وعيوني دمعت من الفرحة الضحك. ضحك ع ضحكتي وفجأة قرب مني وحط جبينه ع جبيني وهمس بحب: دموعك غالية ممنوع تنزل بعد كده مفهوم. ابتسمت وحسيت برعشة جميلة في قلبي ورديت: مفهوم. رجع مكانه وهو مبتسم. وبدأنا نأكل ونتكلم في كل حاجة وأي حاجة تيجي ع بالنا. فيروز برقة: مراااد. مراد همس وهو مغمض عيونه ع العشب الأخضر: عيونه.

حسيت برجفة في قلبي وابتسمت وقولت: إحنا هنا من بدري ولسه الشمس زي ما هي دافئة ولطيفة. رد وهو لسه مغمض عيونه: عشان يا فيروز إحنا في عالم الأطياف، وعالم الأطياف مفيهوش ليل. عشان كده أنا مش بنام ومحدش في العالم ده بينام. بصتله وأنا مصدومة لثواني وبحاول أستوعب أنا فين. ثواني كده! إحنا فين؟ ضحك ع شكلي وقال: إنتي عالمي، عالم الأطياف. فيروز بعدم تصديق: يعني أنا موجودة دلوقتي في عالم العفاريت؟ قعد قصادي وهو بيضحك

جامد وعيونه قلبت بني وقال: إحنا أطياف مش عفاريت. وبعدين مكنش فيه مكان آمن نخرج فيه غير هنا وبس. عشان دا آخر مكان ممكن حراس الملك يظهروا فيه. اطمني. كنت لسه هصرخ لقيت في دوشة كتيرة وألوان كتيرة بتظهر في الجو. مسك إيدي بسرعة وشدني وراه وبدأ يهمس بكلام شبه الكلام اللي همس بيه في شقتي قبل ما ندخل العالم ده. فيروز بخوف: مراد فيه إيه؟ مراد بتوتر: حراس الملك جايين ع هنا و.... فيروز بخوف أكبر ورجفة: وإيه يا مراد؟

مراد غمض عيونه: عرفوا كل حاجة. فيروز بصدمة: ايييييييه.