رواية تزوجني و لكن الفصل الخامس عشر 15 - بقلم ندوشه

كان خالد قاعد مع ابوه وهم الاتنين فرحانين لان خطتهم نجحت وقدروا يتخلصوا من محمد. خالد: اخيرا اتخلصنا منه، طول ما هو جنبها احنا مكناش هنقدر نعمل لها حاجة. الاب: احنا كان لازم نعمل كده، بس انا خايف يطلع منها. خالد: يطلع منها ازاي بس يا بابا، دي جريمة قتل يعني مش لعبة، وبعدين ثابتة عليه. الاب: سيبك انت من الموضوع ده، انا عاوزك في موضوع اهم. خالد: اتفضل يا بابا. الاب: انا عاوزك تروح تجيب اسماء تعيش معانا هنا.

خالد: هنا ليه يا بابا؟ الاب: انت هتفضل طول عمرك غبي، هي لازم تبقى قدامي عينينا عشان نعرف هنعمل ايه معاها وهنتصرف ازاي. خالد: طب افرض ان انا رحت عشان اجيبها، هي هترضى تيجي معايا. الاب: دورك انت بقى انك تقنعها انها تيجي هنا. خالد: ماشي، هحاول. الاب: طب يلا انت امشي دلوقتي وشوف وراك ايه. خالد: مع السلامة. في القسم كان محمد قاعد مع اسماء وسليم، وبدأ يشرح لاسماء هي تعمل ايه وهو بيفكر في ايه. محمد: انتي لازم تعملي كدة.

اسماء: لا طبعاً، من سابع المستحيلات ان انا اعمل كده. سليم: اسماء انتي لو عاوزة تساعدي محمد لازم تسمعي الكلام وتنفذي اللي هو عاوزه. اسماء: يا سليم انت متعرفش الانسان ده اذاني قد ايه، انا مقدرش ابداً اني اعيش معاه في مكان واحد. محمد: اسماء لو عاوزة تساعديني لازم تعملي كده، وعاوزك تعملي حاجة كمان. اسماء: ماشي يا محمد قول، بس انا واثقة ان مش هوافق على اللي انت عاوزه بتقوله ده.

محمد: لازم تبيني انك بتكرهيني عشان ميكتشفوش ان احنا عرفنا الحقيقة وعرفنا خطتهم، وعاوزك كمان تمثلي على خالد انك معجبة بيه. اسماء قامت بسرعة وهي متعصبه من كلام محمد، ازاي عاوزها تعمل كده وهو عارف انها بتكره خالد وما تقدرش تبص في وشه دقيقتين على بعض. اسماء بعصبية: لا يا محمد انت كده اكيد اتجننت، ازاي عاوزني امثل ان انا بحبه، انت عارف قد ايه انا بكرهه ومستحيل اعمل كده. محمد: يبقى انتي مش عاوزة تساعديني.

اسماء: انت عارف ومتاكد ان انا عاوزه اعمل اي حاجة علشان تخرج من هنا. سليم: اقعدي يا اسماء وافهمي من محمد سبب كلامه. اسماء: يعني هيكون ايه السبب مثلاً. محمد: انا هقولك، انتي لما تروحي تسكني هناك معاهم، هتعرفي هما بيخططوا لإيه وعاوزين يعملوا إيه، وده هيساعدني في ان انا اثبت براءتي، ولما تمثلي انك معجبه بيه ده هيسهل علينا خطتنا. اسماء: طب افرض ان انا وافقت وعشت معاهم، اروح اقول لهم ايه، ارجوكم خلوني اعيش معاكم.

محمد: انا متاكد ان عمك مستحيل يسيب الفرصة دي تضيع من ايديه، وهيحاول بكل الطرق ان يخليكي قدامه عشان يعرف احنا بنخطط لإيه. اسماء: انا مش مطمنة للحكاية دي. محمد: متقلقيش. اسماء: امري لله، موافقة. سليم: بس انا نفسي افهم انتوا ايه اللي وصلكم لكده، وليه محمد كان المشتبه الرئيسي في القضية دي. بدأ محمد واسماء يحكوا له على كل حاجة وايه اللي وصلهم لكده، وبعد ما خلصوا انفجر سليم من الضحك ودا خلاهم يتعصبوا.

سليم: يعني انت مثلت انك اتجوزت عليها، قامت هي ممثلة عليك انها اتخطبت، لا ده انتوا لازم تدخلوا العباسية والله بسرعة، لان ده هبل وهطل والله العظيم. محمد: اخرس خالص يا سليم والا هقوملك، وانتي يا اسماء مش عاوز حد يعرف بالكلام اللي اتقال هنا ده ولا يعرف بالخطة اللي احنا بنخططلها، فاهمه. اسماء: فاهمه، فاهمه. سليم: طب يلا اسكتوا لان انا هدخلهم دلوقتي.

دخل سليم جميله وهنادي ومايا، واول ما شافوا محمد حضنوه وهم بيعيطوا وهو حاول يهديهم. محمد: انا ممكن افهم انتوا ليه بتعيطوا دلوقتي، مش فاهم. جميله: يعني انت واقع في المصيبة دي، عاوزنا يعني نعمل ايه نزغرط. مايا كانت واقفه لوحدها وكانت لسه هتلف وهتخرج، بس اسماء مسكتها ووقفتها. اسماء: انتي رايحة فين. مايا: هخرج، انتوا عيلة مع بعضكم مش لازم اكون واقفة هنا. اسماء: لا طبعاً، انتي واحدة من عيلتنا دي، انتي ساعدتينا كتير.

هنادي: ايوه بقى، ايه الموضوع ده، انا عاوزه افهم، انت ازاي مش متجوز مايا، ايه الموضوع ده. محمد: مش وقته، هبقى افهمكم بعدين الحكاية كلها. سليم: انا اسفة يا جماعة، بس لازم يروح الحجز دلوقتي، انا فضلت مأخره لحد ما تيجي وتشوفوه، لكن انتم طبعاً عارفين القوانين. اسماء: طب احنا هنمشي دلوقتي وهنبقى نيجي في وقت الزيارة. مشوا كلهم روحوا، واول ما اسماء دخلت البيت دخلت على اوضتها على طول، هما دخلوا وراها.

هنادي: فهمينا بقى ايه الموضوع ده وكنت بتتكلموا في ايه ده كله وانتي جوه معاه. اسماء: مفيش، كان بيعرفني انه مش متجوز مايا. هنادي: انت هتضحكي علينا يا اسماء، قولي الصراحة، كنتوا بتتكلموا في ايه. اسماء: بصوا انا هحكي لكم على كل حاجة وافهمكم، بس انتوا متقولوش له ان انتم عرفتم. بدأت اسماء تحكي لهم على كل حاجة وهم انصدموا من اللي سمعوه. اسماء: متخافوش، انا... قطع كلامها صوت خبط على الباب، طلعت بسرعة وانصدمت لما شافته.