رواية يأس القلوب الفصل الحادي والأربعون 41 - بقلم رودة

ما گدرنة نزور عتبة بابهم ذوله المأذينه واحنه أحبابهم سارة فتحت باب الغرفة وكلت بخوف: شصاير حسوني؟ كال بعصبية: ماكوو شي اطلعي وسدي الباب. تقربت بهدوء. كعدته علئ الجربايـة وخليت ايدي السليمة بايده وكلت: اهدأ ياعيني انت ليش هالعصبية؟ موزين عليك. وهسة اهدأ واحجي الي كلشي. باوعلي وعيونه حمر دم ويمسح علئ شعره كل وهوة يلعب بالحلقة الي بايده. فدك وسكت. كتلة: شبيها؟

كال: اليوم عود رايد افاتح ابوي بتحديد موعد الخطبة بس تدرين صارت هاي. السالفة وسكتت ماكدرت احجي لين ابد مومال خطبة بهيج ضروف. والتهيت ماراسلتها هسة من فتحت. وخابرتها وحجيت الها تكلي: وانت تضل تأجل هيج كل يومية؟ وكالساع تكلي كذا يوم احاجيه ومتحاجيه. ضال تطلع حجج. اني تقدملي دكتور وياي بالمستشفئ وصراحة بابا جاي يضغط علية علمود. اوافق عليه وارفضك لين يكلي هوة من مكانتي ومقامي وانت مو من مكانتي اني دكتورة وانت.

محامي وتعرف الفرق. وخلت ابوها هسة يخابر بابا يكلة: اعذرنا مانتشرف بيكم. شسوي كليلي شسوي اني. هيج فدك تسوي بية وابوي يتفشل من وراي. بلعت ريكي وكلت: عزا العزاها هاي صدك حسين لعد مو علئ. اساس تحبك وميتة بيك وحب سنين. ابتسم بقهر وكال: هوة هذا الكاتلني عود علئ اساس حب سنين بس شو من. كلت احنا حب سنين ومتفرقنا هيج امور تكلي: اني مجنت اعرف من البداية انو راح تصير هيج فروقات. واكيد انت تعرف الدكتور من مستواي.

وسكت ورجع كال: احب بقوة عظيمة واتخلئ بنفس القوة... ما حبيتها، راح أتخلى من عندها وبهذا تصرفها طاحت من عيني. ذرة من حبي الها ما تستاهل، كلشي ما تستاهل. صدقي، هو أني صوجي وعلي صوجي. وضرب تاج الغرفة بيده وكال: "سوي زين وذب بالشط، ما يغزر". وياهم ما يغزر. مسحت دمعتي اللي طاحت وكتله: "ختولي، تروحلك ستين فدوة. والله وين تلكى منك؟

هية اللي خسرتك. خلي تفيدها المقامات والمبادئ والمستويات. خلي نشوف تاليها وين تصير". هز رأسه وساكت، ميحجي. بس صافن وعيونه حمر دم. وأني صافنة عليه. همس بهدوء: "الإنسانة اللي جنت كلش أخاف أكسر خاطرها". بفديوم. تالي هية اللي كسرت خاطري وراحت. وكام سحب السويج والمحفظة وطلع. وأني بقيت كاعدة على الجرباية. يالة، هاي منين اجتنا نوب؟

خاف أحنا ناقصين. استغفر الله ياربي. الحمد لله على كل حال. بس وين وصلت الحقارة بهاي الناس. صدق سوي زين وذب بالشط. حسين طلعت بالكراج وأبوي صاحني. درت وكتله: "ها يابة؟ تقرب وكال: "ها وين؟ كتله وأني أمسح كصتي: "هيج جاي أطلع أشم هوا، مالي خلك". هز رأسه

وهمس وهو يطبطب على ظهري: "بوية، لا تشيل هم أبوها وخلي يحجي. يحجي. أني لخاطرك ما حجيت وياه شي. ما ردت الأمور تتعقد أكثر. ومادام هي رايدتك وأنت رايدها، عوفها عليّ. أجيب لك ياها من حلك السبع. لا تضوج نفسك. مادام أنت رايدها، هاهية. من هاي العين قبل هاي". كتله: "سالمة عيونك يابة. مستحيل. هاهية بعد أشيلها من بالي. شنو أخليك رايح راد الهم؟

والله علمودها. أكلك ياها من الأخير. بوية، البنية بلسانها كالت مارايدتني. رايدة الدكتور. لين المحامي ميشرفها". وعلى هذا كلامها لو بعد مادري شيصير. لساني ما يطخ على لسانها. أول شي علمتني إياه أحافظ على كرامتي. وهاي أني جاي أحافظ عليها. وبوية، أني لو رايدها ما أخلي أحد يجيبها إلي من حلك السبع. أني أجيبها. بس هاهية. انتهى كل شي. وما أهتم. عادي مثل كل مرة تهون وتصير سوالف. طبطب على جتافي وكال: "هذا حسين اللي أعرفه".

هزيت راسي بهدوء وكلت: "من رخصتك يابة". وركبت بالسيارة وكبل طلعت. أسوق ومادري وين رايح. تايه، ما أعرف وين أروح. تاه عليّ كل شي. لكيت نفسي واكف يم جسر الجادرية ومنتجي على السيارة وصافن. وتذكرت لحظة لحظة عشناها سوية. شلون عدها هيج كلب بارد وقاسي حتى تتخلى بهل سهولة. كل شي ما جاي أستوعب. الشي الوحيد اللي وصلت له أنو أني أريدها وهي ماتريـدني. وبوكتها حسيت كل حياتي تتمحور على مقولة: "يا فرحة ما تمت". ريحانة

فزيت على واحد يكعد بيه. فتحت عيوني شفته بابا. كتله بنعاس: "ها بابا؟ ". كال وهو يكّومني: "كومي يابابا. وين نايمة؟ أدري قحط فراش. هسة ضهرج يكوم يأذيج". شمرت روحي بحضنه وكالت وأني شابكته: "جنت أباوع وي محمد على الفلم وغفيت". ضحك وباسني براسي وكال: "وهسة يلا اكعدي. وكت مغرب. كومي صلي". كتله: "أي رايحة". وخرت منه ورحت للحمام غسلت وجهي وتوضيت وطلعت. شفت سارة تباوع من شباك المطبخ. تقربت على كيفي وكمزتها وكلت: "شتسوين ولج؟

كالت وهي تضربني: "الزركة! كمزتيني شبيج؟ ". كتلهـا: "شعندج تباوعين؟ شكو؟ كالت: "اففف، متدرين". كتلهـا: "شكو؟ ". وكعدت تسولفلي. فد انقهرت والله، أبد ما يستاهل حسين. سودة علية يا كلبي. وبعدين تعالي، هي وين تلكى نفس حسين؟ طبها مرض، هي اللي خسرته. شنو باقي عليها؟ هو مثلاً لو عايش عليها؟

والله لا تشيلين هم ولا هاي. حسين كدها وينساها ويتخطى هذا الموضوع. تدرين بيه متكسره هيج مواضيع، والف بنية تتمنى بس ياشر على يا هي يريدها. نخطبها إله؟ شنو باقي علينا؟ حضرة جناب الدكتور. فدك. أشوو أني صيدلانية وباسل نقيب. هم. كلت فديوم، ما أقبل بأي واحد إله صيدلاني. لو صارت الحياة مقامات واني ما أعرف. والله يالله شوكت يبطلون هالسوالف. ما أعرف. بس الله يهدي هاي العالم ويثبت العقل والدين عليهم.

كالت سارة: "أي والله الله يهديهم". كتلهـا: "أني أروح أصلي". كالت: "أني هم جاي أصلي". رحت لغرفة ماما شفتها جاي تصلي. أخذت مصلاية وحرام من الكنتور ورحت للاستقبال. فرشت المصلاية وبديت أصلي. شوية وكملت. عفتهم لسارة اجت تصلي عليهم. وأني رحت فتحت الثلاجة أريد أكل. شو جوعت. لكيت نمبر ون وعصير. أكيد مال سارة. يالله اشتهيتهم. أريدهم. خلي أروح أكلها وأكلهم. خذتهم ورحت للاستقبال. وهية واكفة تصلي. كتلهـا

بلطف: "سارة عادي أكلهم، جوعانة أني والبيبي مالتي". هية دكت على رجلها بعصبية وكالت: "الله وأكبر". يمة، بالكوة ضميت ضحكتي. كتلهـا: "شكراً حبيبتي. يعني أكلهم؟ رجعت كالت: "الله وأكبر". كعدت كبالها وفتحت النمبر ون والعصير وبديت أكل وأغمض عيوني بشهية. كالت وأني أعض النمبر ون: "يمويي سارة، تفوتج. وعلي أكل". وهية شمرت السبحة علية وكالت: "وسم، ألف عافية. أكلي بخيري أكلي". كتلهـا

بضحك: "شبيج عابت، راح أغص". وظليت آكل. ودك مبايلي. سحبته من القنفة. باسل يدك. جاوبت وكتله وأني أشرب بالعصير: "ها عمري؟ رد: "هلا حبيبة كلبي". ابتسمت. رجع كال: "اليوم ما أجيك بويه باتي؟ كتله باستغراب: "ليش؟ كال: "الكهرباء طافية بكل المنطقة وجاي يصلحون بيها وباجر يالة تكمل. وبس تجين تنسحن روحج وتتعبين. ومنا حامل. فخليها على باجر". كتله: "أوو باسل، شنية؟ غير أريد أنام بحضنك. مشتاقتلك". وما أحس إلا السبحة اجت براسي.

أباوع على سارة تاشر وتكول: "أي، ماتعرف تنام إلا بحضنه". السز. ضحكت وأشرت إلها بمعنى: "نعلعليج". اجاني صوت باسل وهو يكول: "بوياي، سحنتي روحي. أفدي التشتاقلي. بوية أفديها. شسوي غير علمودج". كتله بخجل: "هاهية. أحبك". كال بحنية: "أموت عليج". وشوية وسديت الخط. وسارة كاعدة كبالي وتقلّد عليّ شلون أحجي. ضحكت وسحبت التربة أكل بيها. طيبة. وسارة صاحت: "يمهههه ريحانة تاكل تربة! تعاليلها!

كبل رجعتها وكلت: "أمداج سارة، هاي رجعتها". ضحكت وكالت: "حل". وكعدنا أني وياها نسولف. وشوية واجت ماما يمنا ومقهورة على حسين وتكول: "شنو باقي عليها؟ إلا آخذ إله زينة البنات". طالب واكف بالكراج أحجي وية عزيز بالموبايل. يعني هسة نفسهم اللي اعترضوا، اللي أقارب السجين اللي محكمته بعد 5 أيام؟ زيـن، باع، ما خايف على نفسي أني يابة؟ لا نوب واحد يعترض لعائلتي.

جاوبني: "مو كتلك خلي حماية يمعود، علمود تأمن على نفسك وعلى عائلتك. ترا مو أول مرة تصير وياك. كم مرة صارت وياك؟ تنهدت وكتله: "هاهية، دبري سالفة الحماية من يمك بين ما أكمل الشغل اللي عندي". جاوبني: "تدلل، غالي والطلب رخيص". جاوبته بابتسامة: "غالي عزيز، غالي". شوية وسديت الخط. دكيت على محمد. شوية وجاوبني. كتله وية حسين: "أنت؟ رد: "أي يابة، أول ما طلع لحكته ورحت وراه. هذا يمي مابيه شي".

كتله: "زين بوية، لا تتأخرون. تعالوا. لا يعترضون الكم. ترا ما مأمن". رد: "هاهية يابة، جايين". سديت الخط وتنهدت. منين طلعت الي صفح هالسالفة. أحمدك ربي وأشكرك على كل حال. رأسي ظال يأذيني. جاي أدخل جوة وأندك باب الكراج. جاي أفتحه وبساع سيارة شخطت وراحت. فتحته بساع. لكيت ورقة بالكاع. شلتها. بيها طلقة.

فتحت الورقة مكتوب بيها: "لو بيك لو بواحد من ولدك". قريتها وإيدي رجفت من العصبية. بدون تفاهم دخلت للبيت ودكيت على عزيز. جاوبني. كتله وأني أسحب السويج من الميز: "كل المعلومات اللي سحبتوها اليوم من رقم السيارة، هي والعنوان وصاحب السيارة، أريدهم بالمركز هسة. أني يخلون إلي تهديد بباب البيت؟

كاعدلهم كعد. وأريد واحد سبع ابن سبع يتجرأ يسوي لي شي لو يسوي لولدي. جايك أني بالطريق. ما أتأخر". سديت الخط وسحبت السلاح والمحفظة وطلعت. والبنات وراي.

عطت بيهم بعصبية: "طالع والباب يبقى مسدود. ماتفتحونه لأي أحد. ومحمد وحسين مسافة طريق وجايينكم". طلعت شغلت السيارة وتوجهت للمركز. يمكن ساعتين أني بالأزدحام. ووصلت. نزلت قبل دخلت للمركز وشفتها صايرة هوسة. اللي عرفته القوا القبض على جماعة السجين اللي يرسلون تهديدات. وجايين العمام والخوال ومكلوبة كلاب. خليت السلاح على الميز بهدوء ونزعت الساعة. وعزيز منتجي على الكرسي ويباوع عليّ ويباوع الهم.

كالت بهدوء وأني مكتف ادي: "المن جايين؟ جاوبني واحد بعصبية: "المن أخذتوا ولدنا؟ كل يوم جاية دورية شرطة ومسويه إلقاء قبض. شعدكم ويانة؟ واحد انسجن ظلم. وهسة 3 ألقوا القبض عليهم بحجة معترضين لعقيد مادري شني. ماتخافون الله؟ ماتستحون؟ ". ضربت

على الميز بعصبية وكتله: "من تحجي بية تحجي بكل احترام. ما أشتغل عندك أني. لا وحق محمد. هسة كلكم أشمركم بالحبس من صغيركم لكبيركم. ترا طول اللسان ما يجيب خير. وداعتك. وبعدين احنا هنا مانتعامل لا بخال ولا عم ولا واسطات. لو تجيب لي أكبر واحد بالدولة هم ما أتعامل بالواسطة. احنا مكافحة إجرام".

غصبًا ما عليك أو بالاجبار تحترم أي واحد هنا. لين جاي يشتغلون حتى يخدمون الوطن ويوفرون الأمان للشعب. ما جاي يشتغلون علمود يتحملون أهاناتكم. استحوا على نفسكم شوية، وهنا القضاء يحكم، مو إحنا. مواهنا تطلع حقهم تريد تطلعه، روح للمحكمة وهناك بالمحكمة من تصير محاكمتهم، كول كل هذا الحجي واتحداك إذا طلعت سالم من السالفة، إذا ماشمروك وياهم ما أطلع طالب.

عفتهم يحجون وأشرت لعزيز بمعنئ وينهم، كال اشر علئ غرفة التحقيق. أشرت لضابط وياي، أجة وتوجهت، فتحت الباب دخلت ودخل وياي وسده. شفت 3 شباب كاعدين، واحد حاجبه مطبور، واحد كذلته واصلة لركبته، وواحد محفحف وجهه. رفعت حاجبي وتقدمت، واحد كال سيدي اسمعني، أشرتله بمعنئ اسكت. جاي يحجي ضربته بوكسي بعصبية، كتله: كتلك اسكتتت، كلمة ما أريد أسمع. وبدأ الحساب وما قصرت وياهم ساعة.

وكلت للضابط: سجل أقوالهم وتكفلوا بالقضية، وأريد أخبارهم توصلني أول بأول. طلعت وسديت الباب وراي، وكلبي بارد. يامحمد جان يوم طويل حيل وشكله ماناوي يخلص. وهاي الصبح اعترضولي بليل، جبتهم وطلعت حق كل دمعة طاحت من عائلتي خوفاً علية، الي يبجيهم ويخوفهم أبجي دم وأخليهم يتندمون على الساعة الفكر بيها يعترض الهم. هم عوزها يابة، بكد أيدي ويدزولي تهديدات. صحيت على طبطبة

عزيز على كتفي وهو يكول: يابة روح وارتاحلك أسبوع، هالايام جاي تصير عليك هواي ضغوطات وما مأخذ إجازة صارلك هواي. كتله بتعب: إن شاء الله. كال: أكنسلها سالفة الحماية بعد. هاهية؟ كتله: أي هاهية، أمن محد يحاول يعترضلي لو يعترض لواحد من عائلتي، الأمان أنا اوفره الهم مو غيري. هز رأسه بابتسامة وكال: متعزمني على كوب جاي؟ كتله: كوب جاي وبـ12 بليل. كال: بأي وقت أشربه. أنا ضحكت وكتله: أمشي يابة أمشي. بعد مرور أيام.

ريحانة: الساعة بـ1 بليل، باسل متمدد على الجرباية وأنا واقفة كاعدة بالكاع وأسوي تمارين رياضية يمه. غير انهد حيلي نوب، شكد فشلة الي بالفيديو تسوي عدل وأنا كلساع ممطولة بالكاع. وكلساع باسل صايح بيه يكلي كومي لا يصير شي بالطفل. وأنا مستمرة: واحد اثنين ثلاثة، هوووب، متتتت. آخر شي فحطت وشفته يباوعلي ويهز بيده. كلت بقلبي: هسة يكول شمسوي بحياتي، والله بلاني بهاي المخبلة. ابتسمت وكتله: باسل اتحداك تسوي شناو 15 مرة.

ضحك وكال: سهلة. أجة يمي وضل يسوي شناو وأنا أحسب. كملت حسب وهو مستمر. أريده يوكف ماكو. كتله: يا شكلت؟ وهو مستمر يسوي. خليته يرفع روحه وبساع تمددت وخلت راسي جواه. وهو ضحك دنك يسوي شناو ويبوس بخدودي. وأنا السز عاجبني الوضع. سوة 30 شناو ورفعني وضحك. باسني بخدي وكال: شنو عاجبج الوضع؟ كتله بضحك: كلش. ضمني لحضنه وكال: متنامين باجر مو عندج دوام لو تعودتي على السهر؟ كتله: غير ما أنعس. كلت: خلي أسوي رياضة. كال: شلون رياضة؟

كلساع طايحة على وجهج. خنكته وكتله: لا تستهين بقدراتج. باوعلي بحب وكال: بلا شوفيني قدراتج. ضحكت وكتله: عابت. نزلني خلي أنام أحسلي. شمر روحه على

الجرباية وفتح أيديه وكال: تعالي بساع راح أسدهن. تعالي. وأنا نفس الطفلة ركضت ونمت بحضنه وسد أيديه وضل يضحك ويدغدغ بية بلحيته. وأنا أروح منا وأجي منا لحد ما سكرت من الضحك يالة عافني. بدأ يغفي وأنا ألعب بلحيته ومن أوصل أصبعي يم شفايفه يعضني ويخليني أكمز. آخر شي غفيت وأنا نايمة على صدره وأيدي على لحيته وهو شابكني. فزيت على صوت المنبه وهو يدك. ضميت راسي بركبة باسل، ما أريد أكعد بعدني مشبعانة نوم.

كال بنعاس: أكعدي لا تتأخرين. ما حجيت. هزني كتله: احسبلي من واحد للخمسة وأكوم. حسبلي وكومني سحل. كمت وأنا أتافف وأريد أبجي. كتله: ما أريد أكمل دراسة ولا أريد أصير صيدلانية، أريد أصير رقاصة. هو متمدد على الجرباية ورافع حاجبه ويباوعلي. من كلت رقاصة كال: خوش تعالي، عوفي الدراسة وتعالي نامي بحضني. وأنا من كل عقلي صدكت وركضت دانام بحضنه. وصلت وصاح: أمشي أم راس، تصير رقاصة شلون راح تخليني أموتها؟ أمشي.

باوعتله بزعل وكتله: خوش باسل خوش. ضحك وأنا رحت غسلت وجهي وفرشت أسناني. وبعدين هو دخل سبح وأنا لبست بشت وجواه الفستان مالته بطوله يعني موبينصل. وكفت كدام المراية، خليت مكياج خفيف ولفيت الشيلة ورشيت عطر. وهو واكف يبدل ويباوعلي.

تقرب شبكني وكال: شحلاتج بوية شحلاتج. وباسني بخدي. ابتسمت بخجل وهو وكف يمشط وأنا لبست الحذاء أكرمكم الله. وطبعاً مو كعب، فلات، لين الكعب يأذيني لين حامل فما أكدر أمشي بيه، ظهري يوجعني. سحبت الجنطة

والملازم والأبكوت وكتله: يلة كملت. سحب السويج والمحفظة ونزل كدامي. لكينا عمو ديتريك، تريكنا وياهم وخمس دقايق وطلعنا. ركبت بالسيارة وهو ركب. شغل السيارة وبدأ يسوق. اباوعله شلون طالع حلو بالبدلة العسكرية، صافنة عليه وشلون المناظر زايدته حلا. بدون وعي همست: الله شكد حلو أنت. ضحك وسحب أيدي باسها وكال: موبحلاة حبيبة گلبي بوية. ابتسمت وطول الطريق لازم

أيدي وكلساع يبوسها ويكول: ديربالج على روحج ولاتمشين هواي، وأول متكملين دوام خابريني. كتله: تمام. وصلنا للجامعة، قبل لا أنزل باسني بخدي وبسته وكال: أحبج.

كتله: أموت عليك. سحبت الجنطة ونزلت، أنتظرني أدخل يالة راح. دخلت للجامعة، طبعاً بدأ الكورس الثاني ورجع الدوام والجامعة هوسة كالعادة. مباشرتاً رحت للقاعة كعدت لين مابيه حيل أفر، بساع أتعب. كعدت بالاستول الثاني وأكلب بالملازم ولابسة الأبكوت. شوي ودخل الأستاذ وبدأت المحاضرة. من خلصت طلعت أتمشى بالنادي واشتريت باكيت عصير وضليت أشرب بيـه وكاعدة على المصطبة. وفجأة أجت بنية تدردم وكعدت على المصطبة

يمي وتعدل بجنطتها وتكول: ناس متستحي قليلين أدب، والله أدبسزية، نوب يكلي شنو هالكيك، عود هاي أول يوم دوام، لعد بالأيام الجاية شيكولون؟ ورفعت راسها وانتبهت علية وأنا بحلكي العصير وأباوع عليه. ابتسمت بفشلة وكالت: أسفة والله ما انتبهت عليج، اعذريني. هاي راح أكوم. كتلها: بساع لا لا عادي ابقي كاعدة مصار شي. شو هاي باوعت على بطني طالعة شوية من البشت وكالت وهي تحط أيدها على حلكها: عزا، حامل؟

يمة صدقة لمحمد، تعالي ولج أنتِ شسمج؟ ضحكت وكتلها باستغراب: ريحانة. سوت حركة الحسد ودكت على المصطبة وكالت: اللهم لا حسد، يموي اسم على مسمى. ضحكت كالت: اعذريني على هذا الفضول والحماس الزايد، بس شسوي هاي أنا ما أتحمل، فرفوشة. بعد كلبي، أنا اسمي نازك، بس اسمي عكسي لين أنا لا نازكة ولا كيوت، غير الصراحة. بعد كلبي، يمة خربتني من الضحك. باوعتلي وكالت: وشسمه؟

هستوني ضليت أدردم لين واحد دامشي وكلي جنج كيكة وماتحملت وذبيت حركتي يمج. كتلها بابتسامة: عادي ولا يهمج. باوعت شافت محد ورانا وسوت حركة الصحيبة وكالت: نصاحب؟ بلعت ريكي بتردد، ماريد أمر بتجربة فاشلة مثل قبل وأندم، بس حلوة المحاولة مو كلّها وردة. مديت أصبعي وكتلها: أيي. ابتسمت وكالت: متزوجة أنتِ؟ كتلها: أي متزوجة. وأنتِ؟ كالت: لا عيني، الله يبعدنا، مستحيل ألكة واحد يتحملني أصلاً.

أمي تكلي: أنتِ ميرجعوج ثاني يوم يرجعوج بنفس اليوم بليل. يمة متت من الضحك. كتلها: طبعاً تذكريني بأخوية واختي هم هيج سوالفهم وشقاهم. كالت: يافدوة، يعني أنا لطيفة مو لزقة؟

كتلها: لا بالعكس، كلش لطيفة. وضلينا نسولف وكلش حبيتها وارتاحيت الها صراحة، وطوال الدوام حلكي مشكوك من الابتسامة وتبادلنا الأرقام. طبعاً هية مبينة من شكلها كيوت، بس هية ممقتنعة بهذا الشي. ههههه. قصيرة وجسمها شوية تارس بس مرتب وبيضة والشمس حاركتها مسويتها حمرة. وحسب ما شفت أنو كلش فرفوشة وتضحك. وانتبهت على مجموعة شباب كاعدين كبالنا يحجون وياشرون علينا، ما اهتميت الهم، التهيت وية نازك. من خلص الدوام طلعنا سوية للبوابة وهية صعدت وية أخوها وأنا وية باسل. وأشرت الي بمعنئ بيباي واني ابتسمت وأشرت الها بمعنئ بيباي.

صعدت وباسل كال: الله يساعدج حبيبي. بسته بخده وكلت: ويساعدك. كال: منو هاي؟ كتله: اليوم تعرفت عليها صديقتي الجديدة نازك، كلش محبوبة وفرفوشة. باسل لو تشوف شكد ضحكتني اليوم حتى أبد مضجت. وضليت أسولفله وهو يستمع الي ومبتسم.

من كملت هز رأسه وكال: إن شاء الله خير. وصلنا للبيت نزلنا وسلمنا على عمو وعمة وصعدت فوك. سبحت وتوضيت وأول ما طلعت فرشت المصلاية وصليت. ومن كملت صلاة مشطت شعري ونزلت. صبيت النا غدة أنا وباسل. عمو وعمة متغدين. كعدنا تغدينا، كملنا، غسلت الصينية وصعدنا. باسل تمدد وأنا نمت على أيده وشوية وغفيت.

سارة: وكفت سيارة الخط جاي أنزل من السيارة وبنفس اللحظة وكفت سيارة أمير. كلبي ضل يدك حيل. بساع سحبت الجنطة ونزلت أمشي على كيفي. دكيت الباب ورفعت راسي باتجاهه. شفته سد باب السيارة ويباوعلي. كبل درت وجهي ودكيت الباب مرة ثانية. فتحوه ودخلت ركض يمة وصرت سودة من الخجل ومن الشمس. بعد ما خلصت كلشي وتغديت وصليت تمددت على القنفة وجان حسين كاعد يشرب جاي ويقلب بالموبايل. بهل كم يوم صار قليل الكلام وحتى كعداته قلت، كمنة منشوفة بالبيت وخلة الشغل. حجيت. كتله حسين.

كال وهو يقلب بالموبايل: نعم. كتله: بيك شي؟ رد: لا متوهمة مابيه شي. هزيت راسي كتله بهدوء: لعد ليش متضحك ولاتبتسم؟ مجاوبني كبل كام طلع. تنهدت وكلت: يالله وتاليها.