رواية يأس القلوب الفصل الثاني والأربعون 42 - بقلم رودة

ويجيني الليل أبقى أتعذر من النوم جاشنهي السهر لو مايجي أبـوكته؟ ريحـانة فزيت المغرب مالكيت باسل موجود، كمت غسلت وتوضيت وكعدت اصلي. كملت نزلت يم عمة كعدت. كاعدة تباوع علئ مسلسل كويتية، ضليت أباوع وياها وبعدين خلص المسلسل. لكيت نازك مراسلتني، كعدت أسولف وياها وأضحك. شوية ودخل باسل، استاذنت منها وكمت بوسته وكلت: الله يساعدك حبيبي. كال وهو يبوس راسي: ويساعدج.

كعد يم عمة يسولف وياها وضامها لحضنه، واني مبتسمة وأباوع عليهم لحد ما أجه عمو وكعدنا كلنا نسولف ونضحك. بس باسل مبين ماله خلك، استغربت شبيه؟ من كمنا صعدنا فوك. هوة تمدد علئ الجرباية واني كعدت يمه وكتله بهدوء: بيك شي حبيبي؟ تنهد وكال: مابية شي بس تعبان من الشغل وجاي تصير علية هواي ضغوطات هالفترة. وغمض عيونه. مسدت علئ راسه وكال: سودة علية. يعمري. همس: اسم الله. كتلة: زين تريد مثلا نطلع اني وياك لمكان حتئ تغير جو؟

هز راسه وكال: لا مالي خلك. وسحب اللحاف ونام. انقهرت، اليوم مسحبني لحضنة. نمت بالجهة الثانية وايدي علئ خدي. ماهية الا دقيقة وضمني لحضنه حييل وهمس يم أذني: أحبج. ابتسمت ودرت عليه حضنته وهمست: أموت عليك. وضليت أمسد علئ خدة وهوة نام، واني أدردم ببحدي. لو أبوسة بخدة لو أحضنة. آخر شي غفيت واني شابكته.

ثاني يوم الصبح كعدت علئ صوت المنبه وهوة نايم، واني كمت عندي دوام. غسلت وبدلت. طلعت من الحمام وهوة لكيتة كاعد. صبحت عليه وهوة دخل غسل وطلع ينشف بشعره. بدل اليوم أجازته يعني يوصلني ويرجع. كملت وهوة سحب السويج والمحفظة وكال: يلا حبيبي لاتتأخرين. كتلة: جاي بس أجيب اللابكوت. سحبته من التعلاكة ونزلت وراه. حتئ متريكنا اليوم، لا اني أشتهي ولا هوة. وصلني للجامعة وراح.

نزلت وتلاقينا اني ونازك يم البوابة، سلمت عليها ودخلنا سوية متاخرين علئ المحاظرة. لكينا الدكتور بادي يشرح. قبل يدخلنا. الحمدالله من خلصت المحاظرات. ومنتظرة باسل كاعدة اني ونازك بالحديقة، هية هم منتظرة أخوها. وفجأة أجه شاب يمنا، باوعت لنازك باستغراب وهية باوعتلي هم مستغربة. كال: السلام عليكم ريحانة. صح؟ بلعت ريكي وكتلة: نعم تفضل. كال: علئ إنفراد. باوعت لنازك هية هزت راسها وكالت: راح أنتظرج هناك. كتلهة تمام.

راحت وكتلة: تفضل. واني عيني تباوع علئ البوابة لين باي لحظة يجيني باسل. ونوب لا أتورط. كال: صراحة اني معجب بيج من المرحلة الأولى وحاب أتقدم الج. بس بالاول حاب ندخل بعلاقة حتئ نتفاهم. يمة هوة يحجي وأحس كلبي يريد يوكف. وفجأة وكفت سيارة باسل، بساع سحبت جنطتي وكتلة: أتمنى بعد متوكف بطريقي. واني ما أصلح لهيج سوالف. تبهذلت ما أعرف شنو أحجي. طلعت بساع حتئ نازك عفتها، كبل صعدت بالسيارة وسديت الباب وكلت وصوتي يرجف: هلاو.

رد باسل وهوة ينزع المناضر: هلابيج. شبيج؟ كتلة واني أمسح كصتي: شبيه مابية شي. كال: متأكدة؟ كتلة: أي بس يمكن لين مماكلة شي من الصبح. كال بعصبية: ليش كلشي مماكلة؟ يعني مماكلة شي من الصبح؟ كتلة واني دايرة وجهي: ما أشتهي. سحبني من ايدي وكال: من أحجي وياج تباوعين بوجهي مفهوم؟ بلعت ريكي وكتلة: تمام. عاف ايدي ورجع يسوق. واثنيننا ساكتين، واني بعدني أرجف من ورة الموقف. هسة اني الثولة غير أكله متزوجة. هففف. استغفر الله.

وصلنا. نزلت ودخلت للبيت كبل سلمت علئ عمة وعمو وصعدت. كبل غسلت وبدلت. بعدين رحت توضيت وصليت. وكبل شمرت روحي علئ الجرباية تعبانة، أريد أنام. هوة دخل شمر السويج وكال: كومي تغدي. كتلة: ما أريد. كال بعصبية: جاي أكلج كومي وبطلي عناد. لا ومحمد مايصير خير. شمرت اللحاف وكتلة: كايمة كايمة. طلعت من الغرفة نزلت وتغديت وية عمة وعمو. وهوة مانزل أتغدة. وعمتي طول الغدة كلساع تباوعلي. من كام عمو كالتلي: بعد عمتج باسل ليش مااجة يتغدة؟

عود ردت أصبلة أني بس كلي: من تجي ريحانة نتغدا اني وياها سوية. وهوة مماكل شي من الريوك. كالت هيج وغصيت باللقمة والدمع ترس عيوني. كتلها واني أعوف الخاشوكة: هاي عمه. كَايمة. أشوفه. كمت غسلت وبساع صعدت فوك. شفته يكلب بالموبايل. كتله: باسل تعال تغدا. همس: بعد وكت. كتلة: كوم. كال: ما أريد. شبعان. كتلة: هو انت شماكل؟ كوم. كال وهو يسحب اللحاف: كتلج ما أريد. كافي. هزيت راسي وعفته ونزلت غسلت الماعين وصعدت. لكيته نايم.

سحبت موبايلي أقلب بيه وشفت جايتني رسالة من حساب من الإنستا. دخلت علئ الصورة وشفته نفس الولد الي اليوم حاجاني. بلعت ريكي وخايفة. دخلت وشفت رسالة كاتب: مرحبا. اخذت حسابج من كروب الجامعة بس حبيت أعرف شنو سبب رفضج ألية. ردي خلي نتفاهم. يمة غير أنجلطت. كمت ردت أكعد باسل أكله وأخليه هوة يتصرف. بس بساع تراجعت. مادري ليش.

كبل رديت عليه: أتمنى بعد متراسلني. اني متزوجة وحامل ترا. وبهذا تصرفك دتسبب ألي مشاكل. وشاف الرسائل. خليت وانطيته بلوك. دروح رحمة لمحمد شكد لزكة. عفت الموبايل وكمت أعزل بالغرفة واشتغلت الوطنية وجهت السبلت علئ باسل وغطيته. سودة علية نام وهوة جوعان. عاند بعد عاند. كملت تنضيف وشريت الملابس وسحبت موبايلي. نمت علئ الجرباية وفتحته. لكيت حساب وهمي مراسلني.

دخلت عليه شفت مكتوب: ردي ليش تطلعين حجج وسويتي نفسج متزوجة وحامل. بس أريد أتفق وياج هيج مجرد شكليات نكون كدام الي بالجامعة مرتبطين علمود أربح الرهان ويا جماعتي لين مراهنيني عليج. اني قريتها هستوني جاي أنطيه بلوك وإيدي ترجف. وأنسحب الموبايل من أيدي. كمزت شفته باسل لازم الموبايل وكال بنعاس: شبيج؟ اجيتي تطيحيه علئ راسي؟ مونايم؟ شكو؟ مشغلتة يمي وتطكطكين بيه. غير تسويه صامت. يمة هوة يحجي واني روحي أنسحنت.

كتلة وشفايفي ترجف: ان ان انطيني الموبايل. كال باستغراب: شبيج؟ كتلة: بس انطيني ياه. جاي أخذه. سحب أيده والموبايل. مشتغل. باوع بيه واني صحت: انطيني ياه. هوة كبل مسح عيونه وبدا يقرأ بالمحادثة. واني واكفة وجسمي كله يرجف. كتلة: والله اني اني معلية. واصلاً اج اج اجيت أكلك بس بس ترددت. طلع من المحادثة وكلب بالمحادثات. راح للمحادثة الي قبلها الي انطيته بيها بلوك.

كتلة: باسل مو أحجي وياك. بحركة وحدة طك الموبايل بالكاع وباوعلي وعيونه حمر وأعصابه بارزة. وأخيراً نطق وكال: تتراهنون عليج؟ رجفت وكتلة: مادري. ما أعرف. وبجيت حيل. سحبني من ايدي وكال: اني شكايل؟ اذا تضمين علية شي! واني ضميت راسي بصدرة وابجي بحركة وخايفة. سكت ورجع كال وهوة يبعدني عنه: اني شكايل ؟ ليش كل مرة تخلينا نتعارك ونتخارب علئ نفس المشكلة ؟ مو كايل ماتضمين شييي علييية لييش هيج تتصرفين دومج تتصرفيين.

من بحدج وماتخلين الي اي اعتبار منو هذا كومييي فهمينيي كومي لاتبقين ساكتة بوجهي نفس كل مرة. كلت ببجي: مااعرفه والله مااعرفه بس هوة البارحة موشهكت وكال كملييي كتلة كاعدين اني ونازك نسولف. وهمة مجموعة شباب كاعدين كبالنا واشر علينا بس مااهتميت الله شاهد واليوم قبل لاتجيني هوة وكفني. وسكتت. كال: كمليي. حجيت اله شصار وهوة يفتر بالغرفة ويركع بالغراض.

رجع جرني من ايدي وكال: من راسلج ليش ماخليتيني انيي ارد علييه ليش انت رديتييي ليش ماخليتيني خوش اتفاهم وياه وادبه بس وين يروح من ايدي ؟ شافني ابجي وايدي علئ وجهي. كال بعصبية: اييي نفس كل مرة ضلي بس ابجييي ولطمييي لج بابا كم مرة كايل من يصير شي وياج لا تضمين شي علية كوليلي علمود احل الموضوع ولا تضلين خايفة صيري قوية مايفيد اذا تبقين هيييج وهاي مو اول مرة تضمين علية كم مرة ضميتيي بس ماكو جارة متصيرلج.

كمت مسحت دموعي وكتلة: وديني لاهلي. ابتسم بيأس وكال: كلما نتعارك تكوليها ؟ شنو الاتغير ، عوفي هالجملة وخلي نحل مشاكلنا بيناتنا لا تطلع خارج الغرفة. رجع سكت وكال: اسكتي وخليني اعرف اتفاهم. كتلة بعصبية: مااتفاهم وياك لا هم تشبعني ضرب تذب حركتك وكل تعبك بية واساسا اني بعد مااتحملك ومن ورة هذا تصرفك وعدم تفاهمك كرهتك ومااريدك بعد لين متتفاهم ومخلصها علية مالك خلك وتعبان.

وذبيت كل البداخلي من كلام بوجهة وهوة صافن وايده ترجف واني ابد مااهتميت لكلامي الجارح الحجيتة. رجعت حجيت وصوتي يرجف: مااتفاهم ولا هـاي هسة توديـني لبـيت اهـلي وتسـوي فـضل اذا بعـد مااجـيتني. صفـن بوجهـي وكال: متـاكدة من كلامج هـذا الجـاي تحجـينة؟ كتلة واني اسحب الجنطـة واخـلي بمـلابسي: اي متـاكدة و100%. هز راسة وكال: هاهية امـشي وخلي اشوف بعد منو يـرجعج لو يخطي خطوة يمـج الا اخـليج انتِ تجيني بـرجليج.

كتلة واني الف بالشال: اطمئن مااوصل يمك. هز راسة وسحب السويج وكال: امشـي. سحب الجنطة شلتها ونزلت وراه. طلعنا للكراج شغل السيارة وصعـدت وبدأ يسـوق واني امسح بدموعي الي تنزل عشرة عشرة. ضحك بأستهزاء: عليمن تبجين مو انتِ ردتي هيـج؟ موهذا كلة من ايدج شتردين بعد؟ كتلة ببجي: ماعندي اي كلام وياك تعـبت كـلش تعـبت وصـلني وهاهية اعتـبر خـلص انتهـئ كلـشي. هز راسة وكال: اضعاف الي ترديه يصير موتدللين؟ وصلنا لبيت اهلي،

قبل لا انزل كال: اوكفي. كتلة: شكو. كال وهوة يضغط علئ ايدة واعصابه بارزة: شوكت شاكيلج مني ومن تعبي وذاب حركتي ؟ بيج اشو من يخلص التحاقي وانزل احير وين اطلعج واوديج واحير شجيبلج جا هية هيج تطلعيني مااتفاهم وهمجي ومقعد وبس اضرب بيج ومشبعج كتل مشكورة ماقصريتي. مسحت دموعي وهستوني نزلت وانفتح باب البيت وطلع بابا باوعلي وباوع للسيارة واستغرب. تقرب وهمس: ريحانة. واني بجيت وهوة باوع علئ باسل وكال: شكو ،

باسل كال: انزل خلي اروح، بابا مسح وجهة وكال: امشي روحي كدامي للاستقبال هسة جايج. كتلة واني مدنكة: ماادخل بحدي ادخل وياي. استغفرالله وباوع لباسل وكال: يابة شبيكم؟ سكت وكال لباسل: انزل عمي وامشي وياي خلي نتفاهم. باسل بدون كلام طفة السيارة ونزل ودخل بابا واحنا دخلنا وراه فتح باب الاستقبال دخلنا وهوة سد البيبان وصاح لحدد يدخل ، كعد باسل واني كعدت علئ القنفة المقابيلة وبابا كعد يمي وكال: متحجون قلقتوني شصاير؟

كتلة: تعاركنا. كال: ليش؟ سكتت وباسل مسح كصته وكال: كتلها خلينا نتفاهم ولاتطلعين مشاكلنا خارج الغرفة ودخلين طرف ثالث بس هية عـاندت، هز راسة بابا وباوعلي ورافع حاجبة. حجة باسل وهوة يباوعلي وعيونة حمر: ماكو شي عمي بنتك وردة مابدر منها شي موزين اني مااتفاهم ومصلحجي، واذب حركتي بيها ومااهتم بيها ولا اقدرها وهية متحملتني وهسة طكت روحها مني وبعد ماتريدني وعاذرها لين اني صاير محد يتحملني واني مااحمل روحي صاير.

وسكت ورجع كال: الي تريده يجرالها وهسة استاذن و خليها يمك. وسكت ورجع كال: الظاهر بعد ماافيدها. وسحب السويج والمحفظة وطلع. واني صافنة ودموعي تنزل ماانطة بية ابد ! ماحجة علية ولا شكة لبابا مني ولا رزلني ولا هاي واني بس سوالي بز ذبيتهم كلهن بوجهة بجيت حيل وادية علئ وجهي واردد بداخلي ماانطة بية طلع روحة هوة الغلطان وبابا ساكت ويهز برجلة بعصبية. دار علية وكال: سابج؟ كتلة: شنو؟ كال: سابج ،غالط عليج؟ شهكت وكتلة: لا.

كال: كاتلج يومية؟ كتلة: لا. رجع كال: مايتفاهم، مكرهج بعيشتج حاقد عليج، كتلة: لا اصلا مدللني. مسح وجهة وكال: الصبر بوية لعد بوييية شبيكم ليش هيييج مسوية، يلا بلا انتِ احجيلي شصاير شنو الي مضوجج بيه؟ كتلة واني امسح دموعي: ممسويلي شي بس. وحجيتلة كلشي وهوة صافن علية .... ضرب القنفة بابا وكال: جاب تستوعبين انتِ شحاجية لو لا ! ابوية انتِ جاي تهدمين بيتج بايدج شنو هالتصرفات !

وفوك هذا كلشي وماانطة بيج ولا كالي ماذيتني ولا اكالي تعاند ولا كالي كلشي تالي طلعتي انتِ الخطأنة وهوة تحمل المسؤولية ! مستوعبة الجاي تسوينه بابا؟ ليش تضمين علي وصار اكثر من مرة واني هم حذرتج وكتلج كلشي لاتضمين ،بس ياحيف صدك احجي وية حايط واني. ضليت ابجي وادية علئ وجهي هسة يالة حسيت بغلطي وهوة سكت ماراد يقهرني اكثر ضمني بابا لحضنة ويسكت بية وفتح الباب دخلت ماما وسارة واستغرباً من منظري بس محجن شي لين بابا اشر الهم.

اخذتني سارة فوك واول مدخلت للغرفة شمرت روحي علئ الجرباية وضليت ابجي بحركة واردد ماانطة بية كدام بابا واني باول موقف انطيت بيه وسارة تباوعلي بقهر. ضمتني لحضنها وتهدا بية واني احجيلها واني اشهك ،صحيح تأذيت هواي بس والله موبكد مامتاذية هسة !

شهكت ذبيت حركتي بيه وطلعته واحد موزين وكل ضني يذب الصوج بي يم بابا وتاليها طلع روحة الغلطان وطلعني مامسوية شي، وضليت ابجي حييل لا ارادياً كتلها خابري خلي احجي وياه واعتذر وشهكت واكلة احبك واريدك وهستوني كتلة اكرهك هيج مدري شلون حجيتها،صحيح تاذيت منه بس موبكد ماهوة تاذة مني.

شبكتني حيل واني انهديت بالبجي شوية شوية هدأتني وضلت تصبر بية وتكلي باسل يحبج وميعوفح وفترة وتصالحون وترجعون احسن من قبل وعادي اي اثنين تصير بينهم مشاكل. واني اهز براسي ودموعي تنزل ،لحد ماغفيت واني ماخذة وضعية الجنين كالعادة. باسل كاعد علئ الجرباية ومغمض عيوني وامي طلعت من شافتني معصب ومالي خلك احجي وراحت. همست بتعب ونبرة الحزن طغت على صوتي.

"هاهية باسل، ما تريدك. واتذكر كلامها وروحي تنحرك حرك. لأول مرة أحس الوجع مو بقلبي بروحي." تنهدت بتعب. "عيوني كمت ما أشوف بيها، صار ضغط قوي عليّ. منا ماما أكل، منا الضغط موتني، ومنا أذني تأذيني." شوية وحسيت شي بارد نزل من أذاناتي. باوعت للمراية، طكن دم من ورى الضغط. ضغطت على عيوني وكمت على كيفي للحمام. غسلت، طلعت أنشف بوجهي وشفت أمي شايلة صينية بيها أكل.

وكالت بقهر: "يمة لخاطري أكلك لكمة، لا يصير بيك شي. وين أنطي وجهي؟ تنهدت بتعب وتقربت بستها براسها، وأخذت الصينية من يمها وكعدت آكل. وهي مكابلتني وكاعدة لحد ما كملت وتطمنت عليّ. أخذت الصينية وراحت. وقبل لا تطلع كالت: "لا تضوج يمة، كل شي يتصلح، ماكو شي يبقى على حطته." هزيت راسي وكلت: "إن شاء الله."

شربت دوا وتمددت على الجرباية. شوية ارتحت وحسيت راسي استعدل. بديت أغفى ومديت إيدي جريت مخدتها حضنتها حيل ونمت بعد صراع مابين عقلي وقلبي.