رواية يأس القلوب الفصل العاشر 10 - بقلم رودة

يزوجنك لو شوف شنو شايف شيصير بية اموت الف موتة والله وضلت تبجي وايدهة علئ وجهة هية تحجي واني امرر بأيدي علئ وجهة وامسد علئ شعرها. همست بأنكسار وتعب: تنكسر ايدي ان شاء الله. همست بصوت خافت: اسم الله. وخرت وعيوني صارن حمر واباوع الها من كملت وسكتت انصدمت شكد تعبانة. ومحملة هموم صحيح والله موسهلة ابد موسهلة.

تقربت مديت ايدي جاي الزمها ضربت ايدي وخرتها عدلت كعدتي وجريتها لحضني وحسيت بوكتها حضنت الدنيا كلها من حضنتها وكلبي الرهيف يدك كل قوته. بستها براسها وكلت: ليش هية تحلئ الي مرة غيرج؟! بادلتني الحضن وحركتني بهاية حركتهة. كتلهة بحنية: ننسئ كلشي ونبدي صفحة جديدة وية اولادنا؟! وننسئ كل الراح ننسئ التعب والحزن والهموم ونبدي من جديد نعوف كل العتاب علئ صفحة ونعيش باقي عمرنا بكل حب؟! كالت وهية تهز راسها: اي.

بستها براسها وهية شابكتني عبالك راح اطير واني عاجبتني الوضعية وبنفس الوقت خفت لٱ يطلع حلم وافز منه. رفعت راسها وباستني بلحيتي صفنت بعيونها وكلت: ﭑنـي اعرف اليكبر يتغير شكله؟! شو انت يوم عن يوم جاي تحلين وتصيرين جنج بقلاوة الخاصكي. ضحكت بخجل واني اموت علئ ضحكتها. كلبي رهيف يحبها ويحب ضحكتها. انتجيت علئ تاج الجرباية وسحبتها لحضني وادخن وهية راسها علئ صدري وايدها متشابكة وية ايدي.

سحبت جكارة ورثتها ونفثت دخانها وغمضت عيوني. تقربت وهمست بصوت خافت وبكل حنية: جكارة بشفتك اشعلني.... فتحت عيوني وهمست بوجها: احـبج وابد مامتندم لين حبيتج انتي جوريتي ووردتي السكيتها من دمع عيني انتي وردة. طالب تقربت جـاي ابوسها بخدها وفزينة اثنينا علئ دكة الباب. قبضت ايدي بعصبية وهمست: اريد فديوم محد يكطع علينا اللحظة. ماكو اذا ﭑنـي مخلفلي جيل كامل شلون اخذ راحتي. ضحكت وكتلهة: اي اضحكي واحركي كلبي. صحت: منو اجاني؟

صوت ريحانة وهية تكول: ﭑنـي بابا اريد انام يمكم اخاف. ضحكت ودرت عليها وكتلهة: دستلمي. ابتسمت وخرتني وعدلت كعدتها وكالت: عدل كعدتك عيب هيج حركات يم بنتك. هزيت ايدي وكتلهة: هسة احنا شمسوين والله يالله. كامت تفتح الباب واني تمددت دخلت ريحانة. وكالت: هاا بابا خاف ازعجتكم. ابتسمت وكتلهة: لٱ بابا وين اصلا جنت جاي انام. دخلت ونامت بنصنا واني حولت بالجهة الثانية مامتعود انام بهذي الجهة. ريحانة:

كعدت الصبح وابتسمت علئ المنضر الي داشوفه كدامي ابوية شابك امي وراسهة علئ صدره يمويي عيوني دمعت من الفرحة ٱڅڑ مرة شفت هذا المنضر قبل 6 سنين وهسة رجعت تكحلت عيوني بشوفته اححح هههههه. مشيت علئ اطراف اصابعي وطلعت من الغرفة مااريد اكعدهم اليوم ماعندي دوام وهم بابا رد الهم الموافقة علئ الخطوبة واليوم دنروح للسوك نحظر. صراحة موهلكد عندي واهس مااعرف ليش.

توجهت للمطبخ طلعت القوري غسلته وخليت مي وحطيته علئ الطباخ وحضرت الصينية وسويت بيض سلك لبابا وماما ثنينهم يحبوا واحنا نحبه تكلاة. حضرت كلشي وشغلت الصوبة ودخل محمد جاي من الدوام وجايب وياه صمون. ابتسمت صبحت عليه وبسته من خده وهوة باسني براسي وحك راسه وكال: احم موجودة لـۆ راحت؟ ضحكت عرفته يقصد وداد كتلة: لٱ راحت البارحة. هز راسة وصعد يبدل. رحت كعدت الكل علئ الريوك تقريبا 10 دقائق وكلها تجمعت علئ الصينية.

اباوع بابا اليوم وجهة مورد من الصبح ولو هوة كل يوم مورد بس لٱ اليوم غير وكالساعة الكفه يبتسم لماما. وضحكت واني اباوع لسارة تشرب جاي وتطلع صوت وتباوع عليهم بتك عين. حسين ضربهة علئ راسهة وكللهة: ووجع من تشربين جاي لٱ تطلعين صوت. كلتلة: معليك حرية شخصية. كلهة: امدة هيج حرية اي والله وضلوا ينتاكرون لحد ما بابا سكتهم. نوب كملنا وبدينا ننضف. ماما كالت: اليوم من وكت نروح للسوك علمود نشتري ونحضر علئ راحتنا.

هزيت راسي وماما راحت واني دامسح بالاستقبال وانتبهت علئ سارة واكفة ورة باب المطبخ ومادة راسها. تقربت اشوفها علئ منو تباوع كمزت وسحبتني طكتني علئ راسي وكالت: وجع شعندج اجيتي وراي. كتلهة: ها ها شكو. سحبتني للاستقبال وهية تضحك كالت: اكتشفت شي. كتلهة: شنو. كالت: ماما عيارة. طكيتهة علئ راسهة وكلت: نجبي شهل حجي. كالت: والحسين وعندي دليل. ضحكت وكتلهة: شنو.

كالت: جاي اروح للمطبخ اشرب مي هسة وهية دخلت من الحديقة جايبة الملابس فصادفت بابا بالمطبخ جاي يشرب مي. بابا وكف بوجهة كلهة: هاا وين رايحة. كلتلة: داروح البس الجاكيت الحياكة لبست الجو يكرص. وضلت تضحك كتلهة: ووجع كملي شكو تضحكين حمستيني. كالت: بابا عاف كلاص المي وكلهة دتعالي ﭑنـي ادفيج صدك جذب ام محمد وشبكها لٱ وهية شبكته عزا عبالك عشاق طالعين ومحمد يمة متت. ابوية صاير صوبة واني

مادري وهذاك اليوم كتلة: بابا بردانة كلي اترسي الصوبة نفط واكعدي. جا شسويلج وهسة ماما كلتلة بردانة كبل اشتعل ودفاهة. باعي ماما عيارة وبابا حيال. ضحكت وكتلهة: طاحظج. سارة: شكو تتسمعين عليهم موعيب ادبسز عوفيهم بلكت ترجع علاقتهم طبيعية. كالت بضحك: ﭑنـي شعلية والله يالله ميكولون اكو بنات ويانة بالبيت عدهم نقص. حنان: هذيج غرفة واحضنها الة كدامي.

كرصتهة وكلت: نجبي هوة بابا ميسوي شي كدامنا وهسة استغل الفرصة محد موجود بس انتي ادبسز وغدرتيهم من ورة. كالت وهية ترمش: ﭑنـي شعلية اصلا ﭑنـي بريئة ومااعرف بهيج سوالف هوة شنو الحب والحنان ينوكل ينشرب؟! ضحكت وكتلها: "اي سودة علية فقيرة". "ماتعرفين بهيج سوالف، دروحي كملي شغلج." راحت وهية تدردم، واني أضحك عليها. كملت كل شغلي وصليت، وماما بدت تسوي الغدة. منا لحد ما صارت الساعة بـ 3،

ماما كالت: "يلا تحضرن، نص ساعة وتجي ام باسل ونروح للسوك." طبعًا مريم وسارة ثنينهن يرحن ويانة. صعدت لبست عبايتي الخليجية وياها شيلة لون وردي فاتح، وخليت ماسكارا وحمرة، ورتبت حواجبي وشوية مورد خدود، يعني مكياج خفيف حيل. والبنات هم لبسن عبايات خليجية. بعدين ماما صاحت: "كالت اجتي ام باسل." نزلت لين كملت، سلمت عليها وبوستها، وهية فرحانة بيه. وماما جانت تتحضر هم، لابسة عباية خليجية ولافة الشيلة ولازمة الجنطة.

ابتسمت علئ شكلها. بابا دخل كال: "يلا بابا كملتوا؟ باسل راح ياخذكم." جمدت بمكاني، عزا هوة ياخذنا؟ عبالي احنا نروح. اهوو. قبل لنطلع بابا صاحني، رحتله. كال وهوة يبوسني براسي: "باباتي، أي شي تردينه ويعجبج اشتريه." "وخاف تردين تشترين أشياء وتستحين تصرفين من فلوس الخطبة، اني مخلي يم امج خير من الله الج ولخواتج." ابتسمت وكتله بخجل: "متقصر بابا حبيبي." باسني براسي وكال: "الله يرضئ عليج بنيتي." وطلعت.

طلعنا وباسل جان واكف، لابس بنطرون أسود وتشيرت أبيض، ووياه جاكيت أسود كلش أنيق. وانتبهت علي هواية يلبس أسود، أكيد يحبه هواية. سلمنا عليه وصعدنا. وهوة كعدت بالصدر واحنا ورة. يسوق واني صافنة عليه. ندستني سارة وهمست: "شهرتينا، نزل عيونج من الولد، ترا احنا ما عدنا بنات يباوعن للولد." كتلها: "نجبي، مجاي اباوع عليه." كالت: "اي خطية." خزرته، دارت وجهة. رفعت راسي شفته يباوعلي.

وعلئ طرف شفته ابتسامة جانبية. ابتسمت لا إراديًا. وهوة رفع الي حاجبه وحسيت علئ نفسي، كبل دنكت بخجل. عزا العزاني! هسة شيكول ميتة علية؟ بس خلي يروح بعد ولا أعبره. وصلنا، وكل ضني يوصلنا ويرجع. وتاليها نزل ويانة، نزلنا وهوة يمشي كدامنا واحنا وراه.

دخلنا اول شي لمحل كوشات وتجهيزات مال أعراس. وكذا. صحيح جنت ممقتنعة بالخطبة، بس قررت كلشي يكون حسب اختياري وما أخلي شي بنفسي. عاد خلي أشوية أتانّس بهذي الأيام علمود تبقئ ذكرى حلوة. حجزت كوشة كلش حلوة، والورد الي بيها أبيض وردي فاتح وبنفسجي فاتح حيل ومرتبينها وكاملة. تعامل وية الولد وحجزها. بعد يومين يجي ياخذها علمود يركبها.

طلعنا من المحل وأخذنا لمحل البدلات. دخلنا كلبنا، ما عجبنا شي. دخلنا للمحل الثاني. راحت عيوني علئ بدلة، بس موبدلة، تموت! لونها أحمر ومنفوشة حيل وتصير مخصرة من الصدر لحد الخصر وبعدين منفوشة. ومرصعة بكرستال وقماشها من هذآ الناعم. بس العيب الي بيها مكشوف من فوك كلش، واني جنت مقررة أشتري شي مستور، ما أريد هيج لين أستحي. رحت يمها وضليت أتلمسها، وكلش حبيتها. صحت لماما وشافتها.

وهم كلش عجبتهم وقررنا نحجزها. بس القهرني جان واكف علئ صفحة وممهتم النا. حتئ مباوع علئ البدلة، حتئ راح واهسي بيها. يعني حتئ لو ما أحبك وتحبني، فكها شوية ولا تخرب فرحتي! بس وين؟ ابتسمت بقهر. حجزناها وطلعنا، وحجزنا الصالون. وهم سارة ومريم وماما وام باسل اشترن ملابس ويحضرن. وماما أخذت قاط ولادي يخبل لأخوية علاوي.

وأخذت الة ملابس تراكسودات وهالسوالف. بعدين دخلنا للكوزمتك اشترينا عطورات هيج أشياء. واخر شي رحنا لمحل الذهب، بوكتها هلكت بالكوة ضليت أمشي. دخلنا سلم علئ الولد، وبدة الولد يعرض علينا بالذهب. راحت عيوني علئ خاتم مرصع بالماس ويكون ناعم وياه حلقة. "همس الي، شنو ما عجبج شي؟ نروح لغير محل؟ همست بخجل: "هذا الخاتم." أشرت عليه. هو كل للولد انطانياه وكلهة: "بس ترا هذا سعره غالي." رد عليه

باسل وهوة يقيسه علئ أيدي: "أيدي ميهمني السعر." أخذه، خجلت من لزم أيدي وهية ناعمة وأيده كبيرة. ضاعت أيدي بأيده. لبسني ياه. باوعت لسارة، سوت حركة عود أهلهل! ضميت ضحكتي. باوعت بوجهة، خزرني. دنكت، عزا هذا شماله! هوة بس ابتسمت، خزرني. وهم اشترينا تخم كامل، ودفع الحساب وطلعنا من المحل محملين بالعلاليك. أخذهم خلاهم بالسيارة. وكال وهوة يمسح كصته: "شني يابة مكملتوا؟ فريتوا السوك فر؟ جاوبناه: "لا كملنا."

كال: "خوش، تردون اخذكم للمطعم لو اجيب عصير؟ جاوبناه لا بس عصير. منشتهي ركبنا بالسيارة وهوة سألنا شنو نريد بيا طعم. وراح شوية واجه جايب العصاير بالحافظة وزعهم علينة وصعد، بدأ يسوق. أمه كلتله: "هاك يمه اشرب." كلهن بأبتسامة: "لا يوم، ألف عافية. مااشتهي وعلي." خليت المصاصة بحلكي داشرب، رفعت راسي شفته يباوع بالمراية، كبل غصيت. "عزا العزاني." كحيت ووخرت العصير بساع. شكلت: "عندي الكحة." ماما تدك علئ ضهري. هوة مدلي بطل مي.

كال: "اشربي." أخذت المي من عنده واني خجلانة، شربت وانطيته لماما وهوة يسوق. وصلنا للبيت وماما تريدهم ينزلون، مايقبلون. عمة تكلها: "تأخر الوقت، ان شاء اللهہ غير مرة نعودها عليكم." وكلتلها: "امانة ام محمد، اي شي نقص لـۆ تحتاجوه خابرونا ومنقصر ان شاء الله." ماما تشكرت من عدها وراحوا. دخلنا للبيت تعبانين ومحملين بالعلاليك. كعدنا وبدينا نعزل بالغراض. ماما تكدر لعلاوي

بالقاط وهية تصفك وتكلة: "يهل القوط ذبوا القوط." علاوي لبس قاطه وهوة يهوس ويضحك. بابا يباوع الهم ومبتسم. كمت غسلت وبدلت. وسمعت ماما تكول لبابا: "فدشوية اذا عندك مجال تاخذنا لهذا السنتر الي يمنا بي طابق تجهيزات منزلية واريد اجهز واغير بالبيت كله." "عيوني موتدللين." ابتسمت ورحت للمطبخ اشرب مي. وأجة اشعار لمبايلي فتحته من باسل غصبا ماعلية. ابتسمت يعني جان منتبه.

كاتب الي: "ترا البدلة الأجرتيها ماعجبتني لين مكشوفة وضيكة بس ماردت اعارض واكسر خاطرج." هوة كاتب هيج واني الابتسامة شكت حلكي. عبالك شلون الفراشات تتطايو بداخلي. هسة شنو أرد عليه؟ يالله خليت وانطيت لايك علئ كلامه. رجع دز رسالة: "ترا مااقبل تطلبين اي مبلغ مالي للخطبة من ابوج. اي شي تحتاجيه راسليني واني ادزلج." دزيتله: "لا بالعكس اصلا الفلوس كفاية وزادا مقصرت والله."

دز: "امم." زين هوة كال هيج واني انمطلت بالكاع ومبتسمة. عبالك كلي احبج. مدري شصار بية. حسيت وحدة مدت راسهة وكالت: "شسوين؟ كمزت وخزرت سارة. كتلهة: "طاحظج شعليج." كالت وهية تغمز: "هاية جاي تحجون؟ كتلهة: "بطلي فضول ام حلك وكمت. يالله حتخبلني هالمجنونة." يوم الخطبة. بـاسل. كعـدت من الصبح. باب الغرفة تكسر من الدك. فتحته وكلت بنعاس: "هاا شكو؟ جاوبني ابوي: "صباح الخير يالعريس ماتكعد الساعة بـ10." كتلة واني افرك عيوني.

"هاي كعدت." دخلت للحمام سبحت ولبست تراك ومشطت شعري ورشيت عطر ونزلت. تلكتني امي بالهلاهل. شبكتها وبستها براسها. وعماتي يهوسلي من الصبح. بالكوة طلعت منهن وسلمت علئ ولد عمي والطباخ بالحديقة. بدينا نرتب بالكراسي ونساعد الطباخ. صاحتني امي علمود اتريك. دخلت للمطبخ. كعدت علئ الميز اتريك. شربت جاي كملت وطلعت ورجعت اكمل شغلي وية الولد واصدقائي كلهم اجو وياية يساعدوني.

ماانسئ وكفتهم هاية. بعدين رحت للحلاق وحددت اللحية والشعر ورجعت للبيت. صعدت للغرفة وياي الولد يهوسون ويضحكون. بـية لبـست القاط الأسود والساعة وسبحة اشيلها بايدي ورتبت شعري ورشيت عطر.

ولبست الحذاء اكرمكم الله ونزلت. وصارت الهوسات والهلاهل. واباوع ابوية عيونة تلمع من الفرحة. تقربت بست ايدة وراسة وامي نفس الحالة. صارت الساعة 4. كلها تحضرت وطلعت السيارات لبيت عمي ابو ريحانة. اخذنا مشية كاملة شيوخ ومن غير اصدقاء ابوي والشخصـيات. هذا العقيد وهذا الركن وهذا وهذا. واصدقائي والعمام. وتقريبا نص ساعة ووصلنا. ريحـانة.

كعدت الصبح علئ الهوسة الي يمي. كوموني سحل ودموعي بعيني. مااريد اروح مدري شجاني. سبحت وكملت. وبعدين تريكت. كملت رحت لبست العباية. واخذنا الغراض والبدلة. واخوية حسين وصلنا للصالون. ﭑنـي ومريم دخلنا. منا لحد 2 يالة اجة دوري حتئ مليت من الانتظار. بدت تمكيج الي وشعري ردتهة مرفوع. شوية وعلئ طوله تبقيه وتبرمه. وبدت تمكيج ويسون بشعري. ورة ساعة لـۆ

ساعة ونص كالت: "يلا ماما." باوعت علئ وجهي بالمراية انصدمت. "عزا شطالعة." ونوب البدلة فضيحة بس كلش عجبني شكلي. والحمرة طوخ وبارز شفايفي. والعيون مسحوبات وجسمي ابيض. والبدلة احمر فكلش لايكة علية. ومريم هم مكيجت بالصالون. من شافتني باستني براسي وكالت: "يمة فدوة اللهم علئ محمد وال محمد لعابة." طلعتي صورتي كم صورة. واجة حسين اخذنا. طول

الطريق يتغزل بية ويكول: "تروحلج فدوة مريم." طلعتيها كسر. ومريم تضحك. وكالساعة ويدزلي بوسة واني اضحك وعيوني مدمعة. شلون مادري. وصلني. دخل السيارة للكراج وفتحوا الباب ودخلت. وارتفعت الهلاهل والجكليت يجيني من كل الجهات. امي باستني وكعدتني وتمسح بدموعها. اباوعلها طالعة تموت. لابسة فستان طويل مخصر لونه اسود وبي لمعة. وشعرها نازل ومكياج. باعتبارها ام العروس يعني. وبعدين شغلن الي الديجي وكلهة تركص. وسارة بالنص وتتهز هز

وتضحكلي. والنسوان يباوعلي ويتهامسن. وداد اجتي باستني وباركتلي. وخطية تفتر وية ماما تساعدها. ماكعدت. وبعدين وزعوا الاكل واني بطني نغزتني. نوب ميصير اكل مكياجي والاتيكيت تبعي يخرب. خرب المانيا ههههههه. كملوا وشوية وكالوا وصلوا اهل العريس. ارتبكت مدري شصار بية. ومريم تهفيلي وتعدل بشعري. دخلوا وارتفعت الهلاهل والهوسات. اجتي امه بوستني

وصلت علئ محمد وكالت: "مااكول بس الله يساعدك ياباسل." ابتسمت بخجل. ورة نص ساعة كالوا الشيخ راح يعقد الهم. اخذوني ورة الباب وكفت وبدأ الشيخ يعقد. واردد وراه وارجف. من كال تقبلين الزواج ضليت ساكتة وخايف. عادها علية 3 مرات. وامي كالت: "يوم احجي لاتسكتين." غمضت عيون وكلت: "نعم وانتـ وكيلي." ارتفعت الهلاهل ورجعت كعدت بمكاني وهنة يركصن وفرحانات. شوية وكالوت راح يدخل يلبسني الذهب. ضليت ارجف بمكاني. وارفع بالبدلة.

صحت سارة كتلهة: "سارة تعالي." اجت كالت: "هاا." كتلهة: "فدوة جيبيلي شال اخليهہ علئ كتفي." ضحكت وكالت بمكر: "لـۆ تموتين غير خلي الولد يباوع شرايدة." منا خزرتهة وكلت: "طركاعة طاحت عليج يسارة. امشي ولي." وراحت تركص. غضب هالبنية موتتني. دخل. رفعت راسي شفته. وياريتني مارفعته. شطالع بالقاط الاسود. بويـة !

شهـل جمـال. يمة. نوب هوة لابس قاط اسود واني بدلة حمرة. التناسق فضيع. دنكت راسي بخجل. تقرب باس راسي وكعد. رفعت راسي بخجل. باوع عليه وبلع ريكة وهمس يم اذني: "شني هاي؟! همست برجفة: شنو كال هيج؟ مسح كصته وكال: بانحراج، طالعة حلوة. ابتسمت بخجل، كتله: تسلم، انت الأحلى. ضلن يصيحن: حبها ولك حبها، ولا تخاف من أمها. أني كلت: يستحي، مو مال هيج. باوعت، لزم إيدي قربني علي وباسني بخدي.

وهنة ضحكن وهلهلن، عزا فد خجلت، حسيت روحي صرت نار من الخجل. أكلنا كيك وشربنا عصير، وبدأ يلبسني بالذهب وحسيته بارد، أو يعني يحسسني مايريدني، مادري ضجت، راح فرحتي. صحيح أني هم مارايدته، بس مادري ردت أفرح روحي شوية، بس هو قضى على آخر ذرة فرح بداخلي. لبسني الذهب وكملنا، شوية وطلع. ماصدكت طلع، ردت حتى الحفلة تخلص. انقهرت حيل، أني صوجي، والدمعة ضلت بعيني.

ورة ساعات خلصت الحفلة، وخليت شال على راسي ودخل عمو عزيز وأبويه وإخواني باركولي، وبابا حاضني ويبوس براسي. ورة شوية طلعوا، وسارة اجت كالت: عزا ريحانة، ماشاء الله، ماشفتي المشية الي جايبينها؟ بوية بوية، ردت أرقّم كم واحد بس ماصحتلي فرصة، حرامات، لج جايبين الدولة وجايين الباب انترس تاهوات وجكسارات ومدري شني، ونوب بوية كلها قوط. تمنيت روحي أربط بقاط واحد. هزيت إيدي، باع هاي وين وأني وين.

ورجعت كالت: بس أحلى شي من هوسوا اله بنص الشارع. شني؟ كتلة: من الصاكين وتمشي على الأرض. وعمي عزيز هوس هوسات ماصايرة، وكل لبابا: شني تريديني أجيب بس أخواني وأجي أخطب لبنتي هايه ريحانة؟ يابة أجيب الناس كلها وأجي. وبابا فرحان بيهم ويكول: أبداً ما نادم لين وافقت. رفعوا راسنا كدام الناس كلها. كمت أريد أسبح، صعدت للغرفة، وساعدني البنات بالبدلة والتسريحة. من سبحت حسيت هم وانزاح، طلعت لبست دشداشة قصيرة ومشطت شعري. وسمعت

بت عمي الثانية تكول لمريم: أني أعرف الي يخطب وتكمل بليل يجون يتفاهمون ويسولفون شوية ويروحون. أشو هذا قبل راح؟ شني عبالك مغصوب؟ كالت هيج والدموع ترست عيني: هو هذا حظج يريحانه. طفيت الضوة وتمددت. الساعة جانت 9 ونص، لزمت مبايلي وكتبتله: جنت تكدر تبين إنو إنت فرحان شوية وتبتسم وما تبين عبالك واحد مغصوب، والابتسامة ما مرت على شفتك طول الكعدة. هيج تحرجني كدام الگرايب؟ لو هو مو صوجك!

ودزيته اله، شوية وشافها ما جاوبني. شمرت المبايل. ربع ساعة واجتني سارة تركض كالت: كومي، إجة باسل يشوفج. بابا يكول خلي تنزل. كتلها: روحي ما أجي. كالت: دكومي، والله بابا كال خلي تنزل. كمت واني أتأفف، لبست فستان تحت الركبة، بينصل ضيك، لون ماروني، وخليت حمرة وعطر ورتبت شعري ونزلت. شافتني ماما ابتسمت كالت: أبوچ دخل يسبح وإخوانج برة. يلا يوم ادخلي وتفاهموا.

دخلت واني أرجف، يمة بس لا راح يسويلي شي. دخلت، رفع راسه شافني، أبوع عيونه حمر. دخلت وسديت الباب، كعدت كباله وبس ساكتة وأطكطك بأصابعي من الارتباك والخوف. أشرلي بمعنئ تعالي اكعدي هنا. كمت على كيفي، كعدت يمه، تقرب يمي ولزمني من حنجي وكال: هاي شنو ست ريحانة؟ بعدنا بالبداية وتتجاوزين هيج بالرسالة. كتله بتوتر: ممجاوزة. حجيت بصراحة،

ضغط على فكي وكال: أول شي، ما مغصوب عليج، هاي بطلي تكولينها لين إذا عديتيها يصير عندي حساب ثاني وياج. أما بالنسبة للابتسامة، فأني بكيفي أبتسم ما أبتسم، هذا شي راجع إلي. عيوني غوركن بالدموع، وعرفت أني تورطت وياه، إذا بالبداية هيج، بالايام الجاية شيسوي بيه؟ تقرب وهمس: تردين أبين الج إنو أني فرحان؟ كتله بعدم فهم: شلون؟

ما حسيته إلا جرني لحضنه وباسني بخدي وطول بيها وإيده على شعري، فتح القراصة ونزل وسحب خصلة شمها ودحس راسه بركبتي. صخنت من حركته ودموعي نزلت وهمس بصوت خافت: بس ها، هذا كله علمود أرضيج، لا نابع من كلبي ولا هاي، لين بعدني مامقتنع بيج. غمزلي وسحب نفسه وطلع جكارة ورثها. صدمني بكلامه ودموعي تنزل، كتله بأستهزاء: ميهمني إذا اقتنعت بيه أو ما اقتنعت، لين بالنهاية أني ممجبورة أرضيج أو أقنعك بيه. هز راسه،

كمت وكال بأستهزاء: وين يمعودة، بعدنا ما متفاهمين. ما اهتميت اله، فتحت الباب وصعدت لغرفتي. وكض دخلت وسديت الباب ونمت بفراشي وضليت أبجي. شنو ذنبي ياربي؟ شنو ذنبي؟ أبد ما جنت متوقعته بهالقساوة! هايه عود بعدنا بالبداية، ياربي وأبجي. انهضمت كلش، ما تهنيت لا بخطوبة ولا هاي. فزيت على إشعارات المبايل، رسالة من عنده كاتب بيها: بعدين أحاسبج على هاي تصرفاتج. ابتسمت بقهر: يحاسبني؟ هو يحاسبني؟

إذا ما أندمك بس اصبرلي، عبالك أني سهلة لو فطيرة علمود تستغلني وترعبني بهذا كلامك. غلقت المبايل وما جاوبت عليه، مسحت دموعي: كافي بجي، حتى بهذا اليوم أبجي. استغفر الله. صاحوني، سويت روحي نايمة حتى ما أكلت، وشوية وغفيت. وسمعت المبايل يدك، عبالي أني نايمة صار كومه ودك المنبه مال دوام، مديت إيدي أعود أطفيه ومدري شنو ضغطت ونمت. بـاسل متمدد بفراشي وأتذكر شكلها اليوم بالبدلة، طالعة حورية. هو ياهو يلبس أحمر يطلع هيج حلو!

جمالها مو عادي. تنهدت بس اليوم طوختها وياها، بأسعد يوم بحياتها، هيج لعد شسوي بالباقيات؟ يامحمد، هي ما تعرف تحجي، تدوس بالبطن، وأني منا شلون أحبها؟ ههههه، هايه السالفة كلها ما مقتنع بيها، خلي فد شهر شهرين وأفسخ الخطوبة بحجة ما تفاهمنا. أكول هيج وشي بداخلي يرفض هالكلام وما يتقبله.

تقصدت أنرفزها اليوم وأعصبها. سحبت نفس من الجكارة، بس أخ الطركاعة شايلة جمال ما صاير ولداير، عطرها لهسه بخشمي منكد ما قوي وطيب. استغفر الله، باسل شبيك؟ شهالحجي؟ عوف جمالها وشكلها، إنت لا تحبها ولا تربدها، عليمن هالسوالف؟ دزيت الها رسالة، شافتها وما جاوبت. كلت: سهلة ياريحانة، توعدت الها. واستوقفني كلام أبوي اليوم،

ورة ما عقدنا كال: يابة، على كيفك وية البنية، ترا هيه مثل الوردة، إذا سگيتها تورد، وإذا عفتها تذبل. خليك طيب القول وياها، تكون طيبة وياك طول العمر. قلل من قساوتك شوية، خليك لطيف وياها. لشوكت تبقى هيج؟ حاول تغير حياتك. سحبت مبايلي ودكيت عليها، أخ يابة، تصرفاتي شكد متناقضة! دكيت، شوية وجاوبت، كالت: الو. ماكو، متحجي بس صوت أنفاسها. غمضت عيني وعضيت شفتي، خرب يومج وتالي وياج. همست: ريحانة؟

ماكو، مجاوبت بس صوت أنفاس وحدة نايمة. ضحكت بصوت خافت وكلت: أكيد ما تدري وفتحته، الله، شهالدلال والحب من أول يوم أنام على صوت أنفاسها، وهيه عبالك جاي تناغي مو تتنفس. خرب يومها. اجيت أغلق الخط، مادري كلبي ما انطاني، عفته مفتوح وشوية وغفيت. طـالب دخلت للغرفة، باوعتلها تنزع بالتراجي. ابتسمت على منظرها، طالعة تسحن الروح. تقربت وشبكتها من ورة وبست ركبتها. ابتسمت بخجل ومديت

إيدي أنزعها الكلادة وكلت: إنت متأكدة إنت أم العروس؟ خاف مشتبهة، إنت العروس. ضحكت وكالت وعيونهة مدمعة: شفت ريحانتنة شطالعة اليوم. ابتسمت واني أذكر شكل بنتي. همست: طالعة جنها أميرة. على أمها ابتسمت بخجل وبادلتني الحضن. توجهت للجرباية، تمددت وشبكتها وهيه شابكتني. كالت: أكلك شي. كتلهة: كولي. كالت: هايه اليوم جيرانة أم قاسم عبالها بعدنا مطلقين واجيت لخطبة بنتي، تكلي إذا خطبتج لأخويا مطلق وعنده 2 أطفال توافقين.

هية كالت هيج واني نار واشتعلت بيه، كلبتهة وكتلهة: أي، وإنت شگلتيلها؟ كالت وهيه ترمش: كتلها تنورنا بأي وقت، عيوني. صارت حمر من العصبية، كتلها: جوري، لا ترفعين أعصابي. شگلتيلها؟ تقربت وهمست بوجهي: كتلها، لا عيني، أني ميحلئ بعيني أي واحد بس أبو حمودي. الوردة، ابتسمت، شلون؟ سحبت العصبية من عيوني كتلها واني الزم فكها: شحدها يحلئ غير واحد، غير أموته. حلال. ابتسمت وتقرب همس بوجها: تدرين؟ كالت: شنو؟ كتلها: أني أحبج.