رواية يأس القلوب الفصل السابع عشر 17 - بقلم رودة

الليلة كل شوغات روحي وكل بواچيها وحزنها إلتمن بـ صدري وذكرتك شلون اقنعهن خسرتك؟ ريحـانة فزيت علئ صوت المنبه طفيته وكمت بالكوة عفت فراشي كلبي ماينطيني اكوم غسلت فتحت الكنتور وكلت بحيرة يالله اليوم شنو البس؟ سحبت بنطرون اسود وسترة لون اسود وجواهة بدي يصير لونه ابيض وبي رسم باللون الاحمر وطلعت وية اللبس كعب احمر والجنطة والشيلة لبست بساع ومكيجت سمعت اجة

اشعار لمبايلي فتحته من باسل صباح الخير. اني بالباب بساع رشيت عطر واخذت الجنطة ونزلت اركض بالكعب حتئ ماتريكت من وصلت لباب الكراج كلت خلي امشي علئ كيفي لا نوب اوكع علئ وجهي وتروح الهيبة طلعت امشي علئ كيفي وبيني وبينكم تدلعت بمشيتي وصلت يم السيارة فتحت باب الصدر وصعدت وكلت بهدوء صباح الخير رد عليه صباح النور بدأ يسوق وساكت مومن عوايده ويمة كلما اتذكر موقف

البارحة اصير زركة من الخجل حتئ موحمرة كالساعة اكول هسة يسحلني لين سديت الباب بوجهة وكلت باسل كبسولة والله شوية وكفت السيارة يم باب الجامعة وجاي انزل وكال اوكفي بلعت ريكي كتلة ها مسح وجهة وكال بتحذير اول واخر مرة تطلعين بدون ماتاخذين اذني. هالمرة سماح المرة الجاية العب بيج طوبة تمام. بلعت ريكي وكتلة تمام كال وسدة الباب بعد نتحاسب عليها موهنا بالسيارة كتلة بعدم فهم

وليش بعدين خوب هسة صفي كل حساباتك وياية مالي خلك كل يومية نتعارك. حك لحيتة وكال لا بعدين تاخرتي انزلي عاندت جتفت ادية وكتلة ماانزل الة تصفي كل حساباتك وياية! اشو هذا تقرب لزم ايدي وجرني عليه وباسني بخدي ومااحس الة عضني كمزت كمزة انطك راسي بسكف السيارة كتلة بوجع وعيوني مدمعة متستحي والله متستحي رجع جرني وكال لا تعالي موردتي نصفي حساباتنا بعدني مامكمل

دفعته وكتلة فدوة وخر ماكو حسابات خلصنة مسحت خدي عدلت شالي وكتلة اخرتني ابتسم بمكر وكال اني شكو. موردتي نصفي حساباتنا وحتئ ماخليتينة نكمل عفتينا علئ النص يلا بعدين نكمل وبلكت تصير بعد عدنا حسابات درت وجهي واستغفرت الله اخذت الجنطة متعصبة ونزلت حسيت كلبي يدك كل قوته مدري شصار بية تبهذلت احوالي نزلت اباوع شو هوة هم نزل استغربت سد باب السيارة تقرب مني لزمني

من ايدي وكال امشي اني ادخل وياج اوصلح وارجع بلعت ريكي وكتلة بخجل ترا اني موصغيرة اعرف كال دمشي كدامي مشينا وهوة لازم ايدي الحمدالله لابسة كعب صايرة شوية طويلة وياه دخلنا وكلها تباوع علينة واني اباوع للبنات بضوجة شكو يباوعن علية مايستحن وهوة مامقصر الاسود ياكل ويشرب عليه ضغطت علئ ايدة بدون مادري كال ها شبيج كتلة بضوجة شكو دخلت وياية؟ كال هيج عاجبني ادخل

وياج كتلة واني اريد اضوجه شوية يمكن عندي اصدقاء اريد امشي وياهم لو اتريك وياهم مااحس الة ضغط علئ ايدي حيل وكال صارن هواي مابقئ شي وادوس بطنج تحبين واحد يدوس ببطنج ابتسمت ودرت وجهي وصلني يم النادي ونزع نضارته وباوع علية بنظرات ماعرفت افسرهم وكال هاهية اخر مرة ادخل وياج اذا ماحبيتي تمشين وياي عادي ماكو مشكلة مااجبرج علئ شي وعافني ومشئ يمة فد

انقهرت شصار بية عابت شكو جفصت اني زعل مني يالله اباوع يمشي وحتئ مادار علية مشيت واني ضايجة يافرحة ماتمت دومي اخرب اللحظات السعيدة هففف هسة من نرجع اعتذر منه مشيت واني ادور علئ وردة خابرتها ماترد استغربت كلت هااا خاف بالحديقة الي بالممر الاخير لين دوم نكعد بيها مشيت للحديقة وصلت جانت شبه فارغة بس! انصدمت واني اشوف وردة وسحر وصاحبات سحر يتمضحكن تقربت علئ كيفي سمعت وردة تكول لسحر وهية تقلد وردة اني تعبت شوكت يصلح كلشي؟

وتقلد بية وتشمت رجفت اني هيج يسون بية؟ ورجعت كال لا نوب احلئ شي ماراضية علئ خطيبها واني كاعدة اقنع بيها تحبه بس وعلي الة اخذة منها ماتستاهلة وازيدج بالحجي متحبه ههههه يعني كولي لابوج عمي جبر ريحانة علئ الزواج وخلي يتصرف وياخذوها لاخوج ماتحملت تقربت وكلت وردة! شافني كلهم كمزوا تقربت وردة وكال بخوف هلا حبيبتي شوكت اجيتي؟ كتلها بأبتسامة وعيوني مغوركة من جنتي تقلديني! تقربت

سطرتها راشدي بكل قوتي عوجت راسها وكلت بعصبية وماسمحت دمعة وحدة تطيح مني. ترحيلي انت وهذني الكاعدات ستين فدوة ومع الاسف جنت حاسبتج اخت وصديقة بس طلعتي حية مثلهم اني تقلديني وتسوين بية هيج؟ ورجعت سطرتها حيل وكلت وسالفة الصور وتدزين ابجيج دم عليها ومحمد وتقربت وهمست يم وجها شكد ماجنت حابتج كرهتج حيـل. ومامسامحتج ابدا. بس اكول حسبي الله ونعم الوكـيل عليـج وباوعت علئ الي يمها مصدومات وكلت وعليهن وكل هذا الي

سويتنة بية يجي يوم وتذوقنة ومشيت بساع وردة تصيح وراي موكفت مشيت ودمعتي طاحت مسحتها بساع يعني طلعت متفقة وية سحر علمود تتقرب الي وعود بعدين هم تخذلني ويرجعني لحالتي النفسية اني هيج تسون بية تمام خلي ارجع للبيت وشوفي شسوي ياوردة وياسحر دخلت للمحاظرة وكعـدت وشوية ودخلت وردة عيونها حمر خليت جنطتي بمكانها شافتني هيج سويت خلت وكعدت بالاخير ماعبرتها ابدا. وريلاكس وبدأت المحاظرة والتهيت اسجل ملاحظات من الاستاذ. بـاسل

ابتسمت علئ شكلهـا طالعة حلوة حـيل نزلت معصبة ضحكت والله يالله هية رادت نتحاسب اني شكو. نزلت وراهة ردت اني اوصلها مااريد احد يباوع عليها اريد الكل يعرف هية ملكي مالتي. لزمت ايدها ودخلت رغم رفضها بس مااهتميت نمشي وياهوة يباوع عليها اخزره ويدور وجهة ناس متستحي. ضوجتني مرة ثانية من ضلت تحجي وضلت للسنتر وكتلها ماحب اجبرج علئ شي ومشيت ضايج وطالعة روحي هية ماتحبني وكارهتني شكو احرجها؟

استغفرالله يالله صعدت بالسيارة ضربت الستيرن حيل وكلت اصحئ باسل اصحئ لا تعيش بوهم. رجعت ضربت السيترن حيل وكلت بعصبية واني من البداية لبسها ماعجبني وردت اخليها تنزل تبدله بس ماردت اكسر بخاطرها وماردت اخليها تضوج مني. بس اني صوجي اسوق وصلت للبيت هالكم يوم ماعندي دوام اجازة دخلت لكيت امي مسوية ريوك لابوي كعدت اتريك وياه وضايج وساكت ولاحجيت كلمة فززني صوت ابوي وهوة يكول شبيك؟ كتلة مابية شي كال لعد شبيك وجهك ميكصه السيف!

كتلة هيج سالفة عادية هز راسة صعدت لغرفتي تمددت علئ الجرباية ودك مبايلي عمي طالب يتصل جـاوبته سلمت عليه وكملت كال عمي بنـتي مسـوية شي؟ مضوجتك بشغلة؟ كتلة بأستغراب لا عمي كل الخير يجي منها بس ليش؟ كال والنعم منك، بس قبل كم يوم بنتي اجتني رايحة روحها. ومضوجها بالكلام ومخليها متسودنة. جا عمي امنتها عندك هيج تسوي؟ هيه هاي الأمانة؟ مسحت كصتي. وكتله السموحة منك عمي، هيج سالفة عادية وانحلت.

كال: ماريد هاي السالفة تتكرر، تفاهموا بيناتكم وما أريد أحد يتأذة، وإذا تبقون هيج فكل واحد يروح بطريقه. مامستعد أجازف بسعادة أحد أني. كتله بهدوء: هاهية. ما صار شي عمي، سالفة وراحت، وإن شاء الله بعد ما تنعاد. وبنتك بعيوني مخليها. سكت وكال: غالي عمي. غالي، ردت أحاجيك من البداية وأفضها أحسن، لين أدري ماتجي العيبة منك. رجال ابن رجال، بس التنبيه واجب. كتله: ما صار شي عمي، على عيني وراسي تنبيهك.

كال: ابن عزيز، بعد شرد عليك. ابتسمت. وسولفنا شوي على الشغل، وقبل لا ننهي المكالمة كال: معزوم على الغدة يمنا، منتظرك مو ماتجي. كتله: إن شاء الله. نزلت جوه والتهيت أباوع على اللعبات مال كرة القدم، لحد ما صارت الساعة 12، كمت غسلت وبدلت. لبست بنطرون أسود وبدي أبيض وفوكاه جاكيت أسود، رشيت عطر وأخذت محفظتي وطلعت. وكلت لأمي: غداي يم بيت عمي، لا تنتظروني. وطلعت. شغلت السيارة وتوجهت لجامعتها، مسافة طريق.

ووصلت لكيتها منتظرتني بالكراج. شافتني اجت، فتحت باب الصدر وصعدت وكالت: السلام عليكم. كتله: وعليكم السلام. وسويت روحي أبد ما مهتم إلها وضايج منها. أسوق وهيه كالت: باسل. هيه كالت باسل. وأني ما جاوبتها. حبيت كلمة باسل منها، سكتت علمود تعيدها. رجعت كالت: باسل. كتله: إحم. ها؟ كالت: شسمه هو أنت ضايج مني؟ كتله: ليش يهمـج؟ استغفرت الله وكالت: باع والله مو قصدي هيج، تشاقيت وياك. لفت بالسيارة وكالت: مبين تشاقين!

ترا مامطرة تدورين رضاي وانت كارهتني. ما يهمني صدكي، اتصرفي على راحتج ولا تشيلين هم. أبقي لا طبيعتج، لا تمثلين الاهتمام، وأني بالنسبة الج ولا شي. كالت بهدوء: لا تحجي هيج، وأنت ماتعرف شنو أنت بالنسبة أليه. وكفت السيارة وباوعت بوجها وكلت بعصبية: أي شنو أني بالنسبة الج بلا؟ صفنت بوجهي وكالت بهدوء: ميحتاج تعرف. تنهدت وكتلها: وتالي وياج. كالت وتباوع عليه وتكول:

بكل حنية ترا أني ما أعرف أمثل، ولا أتصنع المثالية، ولا أكذب على أحد من ناحية مشاعري، ولا أدور رضا شخص، مجرد ما أحب أشوف شخص أحبه ضايج مني. هيه كالت هيج، بويه شصار بيه وحست على روحها. شكالت؟ درت وجهي على الجامّة مبتسم، مسحت كصتي وكلت بكلبي: بويه كثرولنا هيج سحكات. درت وجهي واني أحاول أخفي ابتسامتي وكلت: عيدي شنو كلتي؟ ماسمعت. بلعت ريكها وكالت بتوتر: كلت ما أحب أشوف شخص ضايج. هزيت راسي بابتسامة وكلت: متأكدة هيج كلتي؟

هزت راسها وكالت: متأكدة. رجعت أسوق ومبتسم. هسة يالة تعدل مزاجي، عبالك مدري شنو كالتلي. هيج كلمة وحدة كافية أنو تسعدني. وصلنا، وعمي جان واكف بالشارع وية ولد جيرانهم. يمكن راح الولد، وأني نزلت سلمت على عمي ونزلت ريحانة. وكال: تفضل عمي أدخل. دخلنا وكعدت بالاستقبال، واجوي الولد وتسالمنا وكعدنا نسولف. قدموا مي شربت، وفجأة درت وجهي على باب الاستقبال ولمحتها نزلت من الدرج والشعر طاير. بويه شصار بيه.

مسحت وجهي وهمست: الصبر بويه الصبر. ريحانة. دخلت للمطبخ واني كالساعة أعض أصبعي من ورة سحكتي. اخخخ، نوب أني شلون حجيتها. والله ممتقصدة، هيه طلعت مني لا إرادياً. عرفت من أمي أنو معزوم عدنا على الغدا، ضليت أحضر وية أمي والبنات. وفرحانة مادري ليش. يالله وجوده يفرحني. مدري شنو سويت اله حلاة بسكت وككو وهالسوالف، وخليتها بالفرير، أصالح بيه. نتعبرها عربون صلح وكذا. كملنا الغدا وأمي كالت: تاكلين وياهم مو ويانة؟

كتلها بصدمة: لا ماما، استحي والله وياكم. كالت: ماكو، أمشي دخلي. كتلها: خلي ألبس شال. كالت: تلبسين شال؟ هيه تلبس شال عليمن ولج، غير زوجج المن تلبسين؟ كتلها: استحي. كالت: دمشي، أخذي اللبن وأدخلي. جنت لابسة تراكسود رياضي لون ماروني وبيهة علامة اديداس. كتلها: أبدل؟ كالت: ميحتاج، أدخلي. أخذت اللبن وعدلت ضفيرتي والكذلة ودخلت. أول مادخلت رفع راسه شافني وكبل دنك، وأني متت بمكاني.

تقدمت على كيفي وبابا كال: تعالي هنا اكعدي بابا. بنصه هوة وباسل. تقربت خجلانة، كعدت على كيفي بنصهم وخليت اللبن. انطاني بابا خاشوكة وبديت آكل وياهم. وهوة ولا باوع عليه، أكيد يستحي من بابا، بس أني كالساعة أسرق نضارات. ابتسمت بخجل من

شفته خلة كدامي لحم وهمس: أكلي لاتبقين صافنة. بديت آكل. رفعت راسي صدفة واشوفلك سارة واكفة من برة يم الشباك، هية ومريم، ويباوعن علينة ويتغامزن ويضحكن. وسارة تقلدني شلون آكل. مدري شلون ما طكيتهة بضحكة. عزا العزاج سارة، راح تفضحني يم الولد وتخلي جبار الي بداخلي يطلع يمه ويشرد. كملنا أكل وبديت آخذ بالصحون، وهوة كام يغسل. طلعت شفت سارة ومريم وضحكنا.

وماما تكول: صوتكم بنات عيب، منا الولد. غسلت وسويت الجاي، كملته صبيته واخذته قدمته ورتبت الحلا بمواعين وهم اخذته. وكعدت على القنفة يم بابا وباسل كبالنة، وأطكطك بأصابعي خجلانة، غصباً ماعلية ماما دخلتني. شوية وانسحب بابا والولد. بقينا بس أني وياه. كال: أصابعج تكسرن كافي! شو بلا تعالي أكعدي يمي. شكو كاعدة بعيد؟ كمت على كيفي وكعدت على القنفة وشوية بعيد عليه. شفته

مدياكل من الحلاة ضجت كتله: ترا هاية أني سويتها، اعتبرها عربون صلح بيناتنا. ابتسم وكال: تعرفين تسوين؟ رفعت حاجب وكتله: أعجبك عيني؟ كال بدون وعي: من زمان أصلاً عاجبتني. كال هيج، درت وجهي. يايمة راح أموع. صعد السكر، شبيه تخبلت؟ بدا ياكل بالحلام وكال: عاشت ايدج، كلش طيب. كتله: الف عافية. دنكت والعب بأصابعي وكتله: اليوم حجيت وية وردة. شرب جاي وكال: أي سولفيلي. سولفت اله شسويت. كال بابتسامة: هم تعرفين تضربين حيل أنت؟

عبالي كل قوتج العضة. كتله: لا عيني شمالني، أعرف أضرب، لاتستهين بقدراتي. وبكل ثول سويت حركة العضلات وكتله: شوف عضلاتي. أشوو هذا تقرب لزمني من ايدي وكال: بويه هذني مو عضلات. كتله بعدم فهم: لعد شنو؟ كال حك رأسه وكال: هذني زنود بويه زنود. هو كال هيج وأني كلت بعصبية وانفعال: حسين كلك اني عندي زنود ويشبهني بزنود الست؟ مو أني اله ما أحس الة ضحك حيل وضل يهتز. استغربت شبيه. مسح كصته وكال: حسين ما كلي بويه، شكو جفصتي؟

بس بالله أطلق تشبيه. هو كال هيج واني متت بمكاني من الخجل والفشل. أصلاً أني أسمي الحقيقي جفوصة. رجع كال بجدية: شنو تردين تسوين بعد وياها؟ وبالنسبة للرقم، مابقئ شي وأعرف كل معلوماته. تنهدت وكتله: كل شي بوقتة حلو. باوع للساعة وكال: "الساعة بـ 4، تاخرت." لازم اكوم. كام وكمت. كتله بدون وعي: "بعد وكت." تقرب مني واني واكفة، مد ايده يمسد علئ شعري وكال: "شنو صايرة تحبين شوفتي واني مادري؟ كتله:

"مو قصد أحب شوفتك، وانما أقصد يعني تبقى وية الولد." كال: "ها؟ كتله: "ايي." هز راسه صفن بوجهي وتلاكت عيونه. رمشت. تقرب بكل هدوء وهمس يم اذني: "ديربالج علئ روحج، لاتبجين ولا تضوجين. وتذكري اني موجود بكل وقت."

وباسني بخدي. فتح عيونه الذبلت بوجهي واديه محاوطة وجهي. رجع باسني ونزل من خدي لطرف شفتي وطبع بوسته بكل هدوء. واني مادري شصار بية بس ارمش. وفجاة بدون مقدمات ضمني لحضنه حيل وطاحت اخر ذرة قوة. مدري شلون دفعته وهوة حس علئ روحه بسرعة. سحب السويج وطلع بدون ميباوع بوجهي. كعدت علئ القنفة وجهي احمر من الخجل. شصار بية ماادري. كلبي راح يوكف. يمة ديدك حيل. ليش هيج سوة؟ وشبية اني تبهذلت؟

رفعت ايدي تلمست مكان البوسة. غمضت عيوني بخجل. شديصير يالله. نوب كلبي راح يوكف. بدي ودي الزم كلبي هسه واكله اهدأ. بشرفك اهدأ. بربك اهدأ. هي حضنة والله بس حضنة. لتدك هلكد. ابتسمت ورجعت كذلتي ورة اذاني. اول مرة احس بهذا الشعور الحلو. زين هوة كلي لاتبجين وهوة اكثر شخص يبجيني. افففف يالله. اني خسرت هواي. خسرت صديقات واشياء غالية علية. بس هوة مااريد. وسكتت. من شوكت اني هيج اهتم؟ ماعرفت نفسي. شنو الي غيرني؟

كمت صعدت لغرفتي. تمددت علئ الجرباية وحضنت روحي ومبتسمة. اجة اشعار لمبايلي. مديت ايدي جريت مبايلي. رسالة منه. كاتب: "بالمناسبة نسيت اكلج اني كلش احب زنود الست." فوك متتوقعين. قريتها وخنكت روحي بالمخدة. خرب المانيااااا. *** طالب. واكف اسكي الزرع وطلع باسل. كال: "تأخر." ودعته وراح. دخلت للبيت. جوري ماكو. استغربت. رحت للغرفة لكيت الضوة طافي ومتمددة علئ الجرباية. استغربت. مومن عوايدها تنام!

تقربت نمت يمها ومديت ايدي وخرت الغطة من راسها. شفتها تبجي وتشهك. بوية غير كلبي انمرد مرد. كتله بقلق: "شبـيج بوية ليش تبجين؟ باوعت علية وشمرت روحها بحضني وكالت: "ماكو شي بس هيج تقلصات حمل عادية." كتله بخوف: "شنو يوجعج؟ شنو تحسين؟ كالت: "لا تخاف حبيبي مابية شي والدكتورة كالت تقلصات طبيعية." والله. ضميتها لحضني وظليت امسد علئ ضهرها وابوس براسها لحد ماهدأت ونامت. الليلة بست عيونها ومسحت دموعها وهمست بهدوء:

"احبج بكـد رحمـة." *** مريـم. احمد كلي من تكملين دكي علية راح انام علمود نتراسل. ماكلت لا. كملت شغلي وصعدت متحمسة. دكيت عليه. شوي وجاوبه. اجاني صوت بنية. استغربت! تكول: "اني بت عمه لاحمد. ديسبح من يطلع يراسلج." سديت الخط بسرعة. وعيوني انملت دموع. عفت المبايل وضليت ابجي. منو هاية؟ وشيسوي المبايل يمهة؟ دقايق ودك مبايلي. احمد يتصل. ماجاوبته. اخر شي جاوبته. كتله بهدوء: "الو." كال: "ليش متردين؟ كتله: "شنو رايد؟ كال:

"شبيج ضايجة؟ واني انفجرت بالبجي وكتله واني اشهك: "يعني هاية شيسمونها. ادك عليك وتجاوبني بنية تكلي ديسبح. فهمني موكتلي راح انام. تضحك علية؟ احمد سمعته استغفرالله وكال: "بوية عليمن هالبجي هسة. غير افهم السالفة." كتله: "وحدة ردت علي تكلي ديسبح." كال: "اي وانتَ هسة شبيج؟ كتله ببجي: "شهل برود. روح بعد مااحجي وياك لو تموت." سديت الخط وضل يدك واني ابجي. يقهر بية عود لحد مادز رسالة: "جاوبي يابعد حيلي. خلي نتفاهم."

شفت الرسالة ومارديت. اخر شي جاوبت وسكتت. كبل كال: "مريومتي حبيبي. مجاوبته." كال: "وحق محمد اموت عليج. وكعدت هستوني ودخلت اسبح ومبايلي نسيته جوة واخوي راد عليج. بعد كتله: هذا صوت اخوك؟ تقشمرني. هذا صوت بنية. كال: "وحق محمد ولد بس هوة يريد يسوي مشاكل. فغير صوته هالسز وانتَ شبيج بساع تصدكين وتبجين؟ اخخ يايابة صبرني عليها. نوب تشهك مردت كلبي مرد. شلون راح تخليني اموتها." كتله بهدوء: "شمدريني. عبالي بنية." كال:

"برأيج اني اسوي هيج؟ كتله: "لا." كال: "لعد كافي بجي. اي مو هالأسبوع جايين نخطب ومااريدج زعلانة مني و متعبة عيونج الحلوات." هوة كال هيج واني مدري شصار بية. كبل سديت الخط. مادري شصار بيه. حسيت روحي صخنت. عزا عود صدك يحجي. حتئ وجهي صار احمر. وهوة ضل يدز واني مااجاوب. فد استحيت. *** باسل. كاعد بالسيارة وادخن جكارة ورة جكارة. مادري شصار بية. شلون بستها؟ شلون حضنتها؟ ماحسيت علئ نفسي. شسويتي بية؟ شسويتي!

مسحت وجهي وشمرت الجكارة وبديت أسوق وبالي كله يمها. شعرها. بويه شعرها، لو الماروني اللي مطلعها كيكة. صبرني يخو زينب صبرني. وكفت السيارة وهمست بهدوء: أحبها! أي، حيل أحبها. ميت بيها. كل شيء بيها يعجبني. ابتسمت بهدوء وكلت: أحب نفسي، حتى نفسي اللي ما أطيقها.

أحبها وياها وأشوفها حلوة. رجعت أسوق وللمرة الأولى تقبلت، وبدون ما أنفي وأقنع روحي نفس كل مرة إني ما أحبها. اقتنعت وتقبلت إني أحبها حيل. سحبت الموبايل ودزيت الها. بالمناسبة، نسيت أكلج إني كلش أحب زنود الست فوك. متتوقعين! وضحكت ورجعت أسوق. سارة. كاعدة يم حسين يوقع على أوراق ومدري شيسوي، وأني أكعد يمه علمود أكتسب خبرة من مواد القانون. لين، هو محامي ومتخرج وفاتح مكتب محاماة، فيعرف. وأني محامية أدرس.

كتله: الله شوكت أتخرج علمود أصير نفسَك وأفتح مكتب. ضحك وكال: وعليمن تفتحين مكتب؟ أخليلج كرسي بالبلكونة وتكعدين. ضحكت وكتله: بدون ما أدري. انجب لا تكول هيج. عاف الأوراق ولزمني من شعري ويعت بيه ويكول: إني شكايلج إذا تغلطين سارة. كتله بوجع: آخ العباس عليك عوفني. مادري. وكلت: عافني وكال: يلة يحلوة خلصت كروتك. اطلعي من الغرفة أريد أشتغل. صار ساعة تطلعين مواضيع من جوة الكاع.

كتله وسويت نفسي ضجت: مو صوجك صوجي إني كاعدة يمك واضحكك. بس الظاهر صاير متحب أخواتك وجاي تطلع. جرني من إيدي وكال بضحك: أشاقه. كعدي ولا تاخذين دور الحزينة. بالكوة ضاميت ضحكتي وكتله: لا لا، إلا أطلع. ما أبقى يمك اليوم وأريد أطلع. ويجر بيه. آخر شي كعدت على القنفة وكتله: يلة كعدت. لا تبجي كافي. أسكت شهرتنا. وهو رجع يشتغل بالأوراق ويباوع عليه بتك عين، ونظراته تكول: ما بقى شي وأدوس ببطنج.

سحبت موبايله داشوف شكد الساعة وشفت جاية رسالة من شخص مسمي روحه: "حبيبي مكملت شغل". ابتسمت وانطيته الموبايل كتله: داشوف شكد الساعة واجتك رسالة. آخذه. بساع فتحه وضلة مدري شيكتب ويبتسم. كتله: خطية، اشتاقتلك هاية. فدك لو منو؟ ولك هو مادري بروحه. متت. وكال: فدك. هو أني شعندي غيرها. وانتبه على روحه شنو حجة. ضحكت بصوت عالي وكتله: فديت أخوية العاشك. فديته. يوم إلي وأذبح مريم. كلت هيج. باوع عليه كال: شنو يوم إلج؟

ادبسز نوب تحجيها يمي. كام واني طلعت ركض من الغرفة. هم صدك شلون كلت. صاح وراي: سارة! بعدين أحاسبج. ضحكت ونزلت جوة. فتحت الثلاجة أخذت كنافة من مال البارحة وكعدت آكل وأردد: كلهة ملتهية والله. عشتوا! محد يهتم لمريم. بابا مكابل أمي وكاعد. ريحانة تتكافش هي وباسل. ومحمد يحجي وية وداد. واستاذ حسين فدك مشتاقتله وكعد يعبر عن اشتياقه الها. وست مريم خليني ساكتة لا بابا يسمعني. وعلاوي يلعب بسفينته. واني وين أنطي وجهي؟

طبعاً والله إذا سمنت فمن وراهم. لين من كلهة تختفي، أني أكعد آكل. لو ميختفون جان مسمنت. ههههههه. ولو أني شكد آكل ما أسمن، بس معلش. كمت أباوع بالكامرات ورجعت على تسجيل البارحة.

استغربت سيارة وكفت ببانا بنص الليل. نزل واحد منهة. استغربت باسل. شعنده جاي بنص الليل. وشوية وطلعت ريحانة. فتحت عيوني. عزا العزاكم. وفتحت باب الكراج ويحجون ومدري شبيهم. بساع دخلت على التسجيلات وحذفته. يمة لو شايفة بابا لو واحد من الولد. عزا. صعدت ركض لغرفته لكيتهة تخابر. أشرتلي بمعنئ اسكتي وكالت. ريحانة. طلعت رقم أم وردة وبداخلي خوف وبنفس الوقت شعور يكلي لا تتراجعين وسوي الي ببالج. دكيت عليها. جاوبت. داحجي ودخلت سارة.

أشرتلها بمعنئ اسكتي وكلت: الو. ها خالة شلونج؟ أني ريحانة. ضلت تسلم علية وتسأل على أخباري. تعرفني وكلش تحبني. كتلها: أريد أحجي وياج بموضوع. كالت: شنو صاير شي؟ كتلها: اهدئي خالة بس راح أسولفلج وأنتِ أحكمي. ضليت أسولفلها على وردة وشسوت بيه وأحجي بقهر. ورجعت كتلها: تقبليها تدز صوري وتلعب هيج من وراي وتريد تخرب علاقتي بخطيبي وسوتلي مشكلة كبيرة وبالكوة انحلت. وحجيت الها كلشي.

ورجعت كلت: إني ما أريد أكول لابوية وأخلي يسويها وياكم محاكم وتتحاسب قانونياً. فكتلج انتِ علمود تتصرفين وما يوصل الكلام لأبوهة. خطية انصدمت وضلت تتعذر وتتوعد لوردة. وتشكرت مني وكالت: السموحة منج بنيتي وحسابها يمي هالـحقيرة. بس فدوة يمة الكلام لا يوصل لأبوها يموتها ترة. كتلها: إن شاء الله خالة. وسدينا الخط. كالت لسارة: ها شكو؟ كالت بصدمة: عزا العزاها. شمسوية؟ عفية ممبين عليها هيج.

كتلها: عادي تعودت أنصدم. تقربت من عندي وكعدت يمي على الجرباية. حضنتني وكالت: مقهورة. هزيت راسي بمعنئ لا وكلت: ترا عادي. تغيرت مراح أبجي ولا أنهار. ريلاكس. باستني براسي وكالت: أي هيج أريدج. تصيرين لا تضعفين وتبجين. محد يستاهل. وحتى وردة الله كشف الج حقيقتها. هزيت راسي وكلت: الحمد لله. ضميت روحي بحضنها وكالت بهدوء: ريحانة، بعد انتبهي من الكامرات. ترا هسة لكيت تسجيل انتِ وباسل البارحة بالحديقة. كمزت وكلت بصدمة: عزا!

شلون ما انتبهت للكاميرات. يمة، منو شافهم؟ زين رجعت حضنتني وكالت: "اهدئي عيني، بس أنا شفتهم ومسحت التسجيل." قلت لها: "يمة فديتج بعد روحي." ابتسمت وسكتت. رجعت كالت: "تحبينه ريحانة؟ هي كالت هيج ودك قلبي حيل. همست بهدوء: "مادري." كالت: "شنو ماتدرين؟ قلتها بخجل: "هو أنا مادري أحبه لو لا، بس... " وسكتت. كالت: "بس شنو؟ قلتها: "صايرة أحب وقتي وياه." ابتسمت وكالت: "بعد."

قلتلها: "هو هم متغير، أحسه صاير لطيف وحنون وياي، يعني قبل جان ما هيج، أحسه متغير." كالت: "وردة، بدت تتحسن علاقتكم وتتولد مشاعر جديدة." قلتلها وعيوني مغرورة: "خايفة يطلع هذا التصرف والاهتمام منه مزيف وأرجع انخذل. سارة، حيل حابة اهتمامه بيه بس خايفة وفرحانة بنفس الوقت." كالت: "أنتِ تحسين اهتمامه مزيف لو شنو؟

قلتلها: "شعور بداخلي يكول مو اهتمام مزيف، بس يمكن أنا لين تعذبت بحياتي وعشت بخوف لسنين هيج دأحس، أخاف مثل الكل يسوي بيه." كالت: "أنتِ بس لو تبطلين تحسين هيج راح تعيشين بألف خير. إذا كلبج مرتاح له وحابة حياتج وياه، ليش بهذني تفكيراتج تزرعين الخوف بداخلج؟ قلتلها: "هفف، مادري مادري. بس تدرين هو اليوم دخل الجامعة وياي، وصلني." وسولفت لها شلون سحكت وزعل مني وراح. ضربتني على راسي وكالت: "وثول!

أي والله وثول، لج يغاررر عليج، يغار." قلتلها بخجل: "لا يمة، شنو يغار؟ تلكينه هيج ما عنده شغلة، كَال خلي أوصلها." كالت: "نجبي، يغار عليج ولين طالعة حلوة اليوم، ولو أنتِ كل يوم حلوة، بس اليوم طالعة تموتين، يدادة، فهوة غار عليج." قلتلها: "يعني شنو يغار عليّ؟ كالت: "يعني يحبج." ابتسمت بقهر وكتلها: "باسل يحبني؟ مستحيل. أفف سارة، لاتكولين هيج وتوهميني. أدري بيه مطايقني، بس أنا مادري شبيه."

كالت: "مدا أوهامج، أنتِ مجاي تقنعين روحج إن هو يحبج ويغار عليج، دتقنعين بروحج إن اهتمامه مزيف. غيري تفكيرج ريحانة، قوي علاقتج بي. ترا والله مبين يحبج، لا تصيرين ثولة." تنهدت وكتلها: "إن شاء الله." جوري

كعدت من النوم، طالب حاظني حيل، ما أكدر أكوم. ابتسمت. يمه، شكد أحبه رغم كل شي. لو مدري شنو يصير، أبقى أحبه. ماكو شي يكرهني بي أبداً، وكل شي بيه أحبه، اهتمامه، حبه، حنيته، كل شي. تقربت وبسته من لحيته على كيفي ورجعت شبكته حيل. حبيبي، شكد خاف عليّ. صارت عندي تقلصات عادية وتوجعت وهو بقى يمي لحد ما نمت وهو نام.

همست يم أذنه: "حبيبي طالب." مارد، نايم. سودة عليّ، تعبان من الدوام، كاعد من الخمسة الفجر واجة بـ1 الضهر. كلبي مانطاني أكعده، خلي يشبع نوم. بسته بخده وخلصت روحي من عنده وكمت على كيفي. غسلت وجهي وبدلت دشداشتي وطلعت من الغرفة. شفت علاوي كاعد يباوع على التلفزيون. رحت للمطبخ، خليت له كرزات بماعون وجبس وهالسوالف أونسه بيهم وأغير جو. متعود كل ما يباوع نسويله كعدة حلوة. وأخذت الحلويات وخليتهم يمة.

شافني كبل حضني كال: "اشتاقيتلج ماما." بسته وكتله: "يروح أمك أنت، فديت اليشتاقلي." كعدت وهو كعد بحضني وياكل كرزات وأني أعدل بشعره وأبوس بيه. وعيوني تدمع كلما أذكر فاركته. بسته بخده حيل وكتله: "يمة شكد أحبك أنا." وهو يبوس بيه ويضحك. رجع يباوع على الكارتون وأني أمسد على شعره. شفت كصته مشخوطة. كتله بخوف: "بيمن تعورت هنا؟ كال: "ها، لا، كلشي مابيه، هيج بالباب." لزمته أباع بكصته أكول ليش كالساعة ينزل شعره. اندك الباب.

هو كال: "أكوم أفتحه." كتله: "أكعد، أنا أفتحه، أخاف عليه." كلشي يصير. أخذت الشال وطلعت. فتحت الباب ومطلعة بس راسي. شفته رجال كبير وياه ولد بكد علاوي يبجي وحلكه يجري دم. كتله: "تفضل خوية." كال: "بيت أبو محمد؟ كتله: "أي." كال: "ابنكم علاوي شوف شمسوي بأبني." وفزيت على صوت طالب وهو يكول: "منو؟

" درت وجهي أباع عليه، هستوه كاعد من النوم بالبجامة والكيمونة، عيونه حمر وعصبي. يمه، لو تذبحوني قطرة دم ما تلكون. خزرني خزرة، يمة وخرت بساع من الباب وهمس بعصبية: "الي أنا الج، أمشييي أدخلييي جوة." دخلت بساع، يمة عزا العزاني، شلون طلعت هسة؟ لو مخلية علاوي يطلع. اليوم أبو علاوي يلعب بينا طوبة. طالب نايم وحسيت واحد يكعد بيه. فزيت، شفته علاوي. أباع جوري مو يمي. كتله: "ها بابا، شبيك؟

كال: "بابا، كتلت واحد واجة أبوه دك الباب وأمي طلعتله." كمزت كتله: "شنوو؟ " كمت من الجرباية، لبست الكيمونة وأحجي: "أنا شكم مرة كايتلها ماتفتحين الباب لأحد؟ " راح تموتنييي. طلعت أمشي للكراج بسرعة، أباع مادة راسها وتحجي. "وي شصار بية؟ صحت: "منو؟ " وهي فزة، خزرتهة.

وصلت يمه وكلت: "أنا الج، أمشييي أدخلييي جوة بساع." هي بساع دخلت. نوب تمشي علة السريع. أنا الها. فتحت الباب وشفت جيرانة أبو مصطفى. سلمت علي وشكى إلي من علاوي، شلون ضارب الولد بوكس على حلكه. صحت: "علاوي! علاوي! اجة يركض كال: "ها بابا." كتله بعصبية: "تعال." وكف يمي ويباع للولد. كتله: "ليش ضربته؟ كال: "سبني المايستحي." مادري شلون ضميت ضحكتي. ابن أمه شيطلع بعد. كال الولد: "جذاب، ماسبه علاوي."

علاوي باوع علي وكال: "بابا، وداعة ماما سبني." خزرته وكلت للرجال: "هاهية أبو مصطفى، حقك علينا، بس خلي ابنك يتأدب ولا يتحارش بيه." وبست الولد وكتله: "أموتة بعد بس يضربك." وراحوا. دخلت أنا وعلاوي كتله: "بعد بس تضرب، ألعب بيك طوبة بابا، الولد أصغر منك بسنة، حرام تأذيه." كال: "غير يغلط على أمي، ما أسكت له." كتله: "أنا أخوج، غلط على أمك، بعد أبوك المرة الجاية أكسر سنونه وأخليهم بحلكه." كال: "تدلل بويه."

ضحكت وكتله: "كعد عاقل بعد أبوك، لا أعلكك بالشجرة." ضحك وراح يلعب بالحديقة. وأني دخلت للبيت أريد ست جوري. لكيتها كاعدة بالاستقبال تاكل كرزات. دخلت وكتلها بعصبية: "أنا شكايل إذا تطلعين تفتحين الباب؟ " ما حجت. كلت بعصبية: "أحجي وياج." كالت: "نسيت." كتلها: "نسيتي مو؟ آخر مرة وأول مرة تنسين. الباب ماتفتحينه، سمعتييي؟ باوعت علي وكلت: "ترة أنا مو صغيرة علمود تحاسبني."

كتلهة: "لا أحاسبج وميهمني، كبيرة صغيرة، الباب ماتفتحينه." كالت: "أي، هاهية، ما أفتحه." كتلهة: "أحجي عدل، كولي صار، بعد ما أفتحه." باوعت علي وعيونهة مدمعة وعافتني وراحت. وصلت يم الباب، رجعت أخذت ماعون الكرزات وراحت تاكل بيه. ضحكت واستغفرت الله. هم زعلت وهم تاكل. الظاهر تنسى على كرزات. هسة شلون نصالحها؟

راح تفرض الحصار علينة. يابوية. كمت وراها للغرفة شفتها كاعدة علة الجرباية وتاكل كرزات وعيونها مدمعة. يابوية شكلها ينوكل هيج. تقربت جاي آخذ جوزة، وخرت الماعون، ما قبلت. كتلها: "ها، خوش هيج صارت؟ مو." رحت بدلت، عندي طلعة وية عزيز. بدلت وهية تباوع علي بزعل. أرجع وأعرف شلون نصالحها. أخذت المحفظة وطلعت. شفت بناتي بالمطبخ. شافني كالن: "الله يساعدك بابا." باسني وكتلهم: "هلا بيكم بوية." شني اليوم ماكو ضحكت سارة.

كالت: "ياماكو غير من الصبح أفتر بالبيت بس أنت نايم." عيني باباتي، ضحكت وكلت: "طالع تردون شي أجيب لكم من أرجع؟ كالت مريم: "سلامتك بابا." وجيس حب وريحانة: "سلامتك بابا، وكون حب حار مال مكينة." كالت سارة: "سلامتك بابا، وياك جيس حلويات مشكل." ضحكت على سوالفهن وكلت: "من عيوني بابا، تدللون بوية." شغلت السيارة وطلعت وخابرت على عزيز كتله: "جايك بالطريق." ريحانة كاعدة يم ماما وأمسد على شعري ونسولف والبنات يمنا.

كالت مريم: "بس مدري شبيها." حسيت اكو شي. كالت بخجل وهية تطك بأصابعها: "ماما، الولد الي كلتلكم قبل فترة يريد يتقدم إلي." ماما كالت الها: "أي ماما، شبي؟ بلعت ريكها وكالت: "هالاسبوع راح يجي هو وأهله يتقدم إلي." ابتسمت أمي وكالت: "هلا بيهم، ينورنا يمة. بناتي كبرن وصارن عرايس." كالت سارة: "بس أنا بعدني ماكبرت، شوكت أعرس؟ يالله." شمرت ماما المخدة عليها وكالت: "نوب تحجيها. يمي الما تستحي." وسارة ضحكت.

كالت: "أنتن تزوجن علمود أنزوج أبويه." أمي باقية تزعل عليه. أمي خزرتهة سارة كبل باستها وكالت: "شحدة يزوج." ضحكت وأمي باوعت علي وكالت: "وأنتِ ست ريحانة، شوكت نبدأ نحضر للنيشان؟ أشوف مغلسة." بلعت ريكي وكتلها: "مادري ماما، بكيفج." كالت: "باجر نروح للسوك ورانا كومة تحضيرات."

كتلهة: "تمام." وضلينا نسولف ونضحك لحد ما أذن وكمنا صلينا، ونوب بدينا نحضر بالعشة. طلعنا مقليات وهالسوالف. وماما واكفة تكلي، وسارة تسوي بالبتيتة، ومريم تسوي لبن، وأني أحضر بالزلاطة. اندك الجرس. ماما صاحت: "حسين يدكون بالباب." كام حسين فتح الباب ودخل محمل علاليك ووراه بابا. كلنا كلنا: "الله يساعدك بابا." وهو كال: "هلا بيكم بابا."

وكف غسل وجهه وأديه وكال: "بابا رتبوا الفاكهة بالثلاجة وبالجيس الثاني حلويات وكرزات. رايح أبدل." كلاص جاي عالسريع. راح بابا للغرفة. جنت مكملة الجاي كبل طلعت كوب، غسلته وسحبت العلبة مال شكر بدون ما أباوع عليه وخليت شكر وصبيت الجاي. وبابا صاح: "جوري تعالي." راحت تشوفه شتريد. كالت: "انطيني." أخذت الجاي وياية. أنطيته الها ورجعت كملت الزلاطة وكمت أكل بمكان ماما. طالب دخلت للغرفة وبيدها الجاي. أنطتني ياه. أخذته، شربت وبساع

شمرت الكوب وكلت بعصبية: "شنو هاييي! شكو كتلهة مخلية ليمندوزيي احترك بلعومي. كالت: مو اني. كتلها بعصبية: بطلي هالسوالف مال تخلين موشكر. عود زعلانة وزعلتهم، دفرت الكوب ودخلت للحمام اغسل وبس احجي عصبتني بحركتها هاي. غسلت وطلعت لكيتها ماموجودة. دخلت ريحانة للغرفة. كالت بتوتر: بابا ترا موماما صبت الجاي اني والله ومادري. وخليت ليمندوزي عبالي شكر. مسحت كصتي. كتلها: خرب يومك طالب دومك متسرع.

هزيت راسي وكلت: فدوة ماصار شي بس مرة ثانية انتبهي. هزت راسها وكالت: اي بابا. وطلعت. فتحت الكنتور بدلت الكيمونة تدمرت. جاي ورحت توضيت وصليت. كملت طلعت رحت للاستقبال كعدنا وجابوا العشة. سميت وبديت اكل وهية كاعدة يم محمد ولا خلت عينها بعيني. حقها عمي اذا اني ادوس بالبطن واجيت اكحلها عميتها. كملنا عشة غسلت وصبوا الجاي هالمرة شكر مخلين. كملت الجاي ورحت للغرفة. دخلت لكيتها ترتب بالملابس. تقربت كتلها: جوري. ماجاوبتني.

كلت مرة ثانية: جوري. باوعت علية وكال بعصبية وعيونها مدمعة: شتريد؟ تريد تصيح علية وتضوجني وتطلع لو هم تريد تتعارك وياية وتطلع حجج؟ مسحت دموعها وكالت: باع بطني توجعني ومابية حيل احجي عوفني بحالي ترا والله حتئ كلبي كام يوجعني. وكامت تشهك بدون تفاهم. تقربت وشبكتها حيل وهية توخر بية. وين اعوفها مثلا؟ اني شسويت يامحمد شلون هيج اقهرها واضوجها. تقربت كعدت علئ الجرباية وضميتها لحضني وهية مستمرة تبجي.

كتلها: حقج علية ياروح طالب انت. عساني بالموت يبعد حيلي. شهكت وكالت: اسكت لاتحجي هيج. كتلها: سكتت سكتت. مديت ايدي مسحت دموعها وكتلهة: حبيبتي انت. ماحجت. كتلها: كافي زعل ترا وعلي انشلع كلبي يعني نـبقئ هيج. كالت: والله كل لروحك انت باقي بس تضوج بية. نوب شهكت وكالت: وتكلي وزعلتهم. وركبت تبجي. يا بوية شني هاي هرمونات مال حمل لو هية ام دميعة؟ مسحت

دموعها وبست عيونها وكلت: معليج بية خلي اولي تدرين بية كلشي ولازعلج يالغالية انت. يبعد الكل انت. وبعد حتئ الجاي اشربه بي ملح لخاطرج شتردين بعد؟ ضحكت وضربتني علئ صدري. كتلها بابتسامة: جا شني اسويها لخاطرج ها مولخاطر واحد ثاني؟ كالت: وشنو يعني اني هسة ارضئ عليك وماازعل. كتلها واني ابوسها بخدها: غصباً ماعليج يعني وتبوسيني هم موبس ترضين. كالت: عوفني اريد اكوم يم بناتي.

بستها بخدها الثاني وكلت: وين متكومين الة تكولين هاهية رضيت وتبوسيني. كالت: ياا تحلم. كتلها: بكيفج لعد ابقي كاعدة بحضني منا لباجر بدون حركة. تنهدت وكالت: استغفرالله. كالت: هاهية رضيت. كتلها: لا هاي من ورة خشمج. تقربت بهدوء باستني بخدة وكالت: رضيت. ابتسمت بهدوء وشبكتها. كتلها: اسف ياروح طالب انت. شنو اليوجعج يبعد اليوجعني كلة من وراي. كالت بهدوء: لا هاية صرت زينة بس شوية لين ضجت وانقهرت صارت عندي اوجاع.

هزيت راسي وكتلهة: وهسة شنو تحسين؟ كالت: احسن والله. شبكتها وبستها براسها وكلت: يابة ام محمد الغالية احبج. ضحكت وكالت: اني هم احبك ابو محمد. ابتسمت وكتلها: شكد حلوة منج ابو محمد. لزمت وجها بثنين ادية وكلت: بعد حتئ لو نتعارك مااسمح الج تكعدين يم محمد مكانج يمي ومن تشوفيني بالغرفة ماتطلعين لا تبقين كاعدة وحتئ مو علئ الجرباية بحضني واريد اشوف واحد عنده اعتراض. ابتسمت وكالت: زعل جيس حب هذا؟

ضحكت بصوت عالي وكتلها: شتحسبينة حسبي المهم بكل الحالات تبقين يمي مااريدج تعوفيني يولي احبج اني. شبكتني وكالت: موبكدي موبكدي. وهيج صالحنا ام محمد ولو هية زعلها ثكيل بس اني مايمشي العندي الزعل الثكيل ترضئ يعني ترضئ. كتلها: شوفيني شكد كريم وانت بخيلة. كال: هااا اني بخيلة بلا كلي شلون؟ كتلها: ردت جوزة قبل شوية مانطيتيني واني هسة جبت الج كل انواع الكرزات. ابتسمت بخجل اشو هاية كامت فتحت الجرارة طلعت ماعون صغير متروس جوز.

كالت: شوف والله من ردت جوز وماانطيتك مااكلت ولا وحدة من عنده. ضميته الك. جريتها وشبكتها حيل وكلت: شنو انت شنو وين اضمج زين هسة شسويلج فهميني. بستها حيل بخدها وكلت: شسويتي بية جوريي طالب الي برة الغرفة مونفسة طالب هذا مونفسة. ابتسمت وكال بخجل: اي عيني هوة الواحد يم محبوبة يتغير. هسة منو يعرف طالب الي يفتر وراية يدور بوسة؟ ضحكت بصوت عالي وكتلهة: ها لازمتهة علية موصوجج صوجي اني احبج وابوسج.

ضحكت وكالت: يمعود لاتزعل هستونا تراضينا. باستني بخدي وكالت: احبك حـييل. ضميتها لصدري وكلت: موبـكدي بوية موبـكدي. وهاية احنا كلما نتعارك ورة كم ساعة نصالح كلبي ماينطيني اعوفها زعلانة مني وهية هم كابها رهيف مينطيها تزعل علية. ريحـانة ماما كالتلي كولي لباسل باجر راح اروح للسوك نبدأ نحضر النيشان. صعدت لغرفتي اخذت مبايل من الشحن كعدت علئ الجرباية وفحت المبايل وراسلته واكتب وارجف مدري شبية.

كتلة: باجر راح اروح للسوك ابدأ احضر تقـبل اروح؟ شوية ورد علية كال: اي اني اخذكم. ابتسمت. رجع كتب: مااوصيج اشتري قميص احمر وبنطرون اسود علمود اعرف شلون اتصرف وياج واتحاسب. كال هيج واني بس قريت نتحاسب كبل شمرت المبايل وغطيت وجهي بالمخدة من الفشلة. ورجع كتب.