رواية يأس القلوب الفصل الثامن عشر 18 - بقلم رودة

واعزها كلش. وكل ضني لكيت وحدة تفهمني وتداوي جروحي. تاليها هيج. وشهكت. عفتها مارديت عليها. كلبي ماينطيني ارد عليها بشي قاسي. بس عافتني وغدرتني وتوبتني من شي اسمه صداقة. طفيت المبايل وغفيت. ودموعي تنزل عشرة عشرة. مادري ورة شكد فزيت علئ صوت المنبه. عندي دوام. كعدت بالكوة. كمت غسلت وجهي. اباوع عيوني حمر دوم ومحورة. رحت بدلت. وحتئ مكياج مخليت. مالي خلك. سمعت صوت الهورن.

اخذت جنطتي ونزلت. طلعت. فتحت باب السيارة وركبت. خليت جنطتي وكلت بهدوء. صباح الخير. لاف بالسيارة وكال. صباح النور. يسوق. نزع المناضر. باوع لوجهي ودار. كال. شبيج؟ كتلة. مابية شي. كال. متاكدة؟ كتلة بعصبية. كتلك مبيه شي. وكف السيارة وكال. صوتج نصي. لاترفعينة بوجهي. باوعت بوجهة وكتلة. اي، شسوي واذا رفعته؟ تضربني لو تغلط علية لو شتسوي؟ ها كلي. مسح وجهة وكال بعصبية. شبيج اليوم بابا؟ شبيج؟ بجيت وكتلة.

رحمة لله عوفوني. اتركوني بحالي. بعد مااتحمل. والله مااتحمل. كلهة تضغط علية. منا انت. منا وردة. منا المشاكل النفسية الي اواجها واحاربها بنفسي. منا التفاصيل الصغيرة الي احبها ومحد يهتم الها. منا ضغوطات الحياة الي دتخنكي. حسو بية شوية. حسو كل واحد يدور مصلحته. بس محد يدور مصلحتي. وكلكم اهتمامكم مزيف وعدكم مصلحة. وكلشي جذب دتعيشوني ياه. وبعدين كلكم نفس الشي. تغدروني وتعوفوني بنص الطريق وتستغلوني كالعادة. واكرهكم كلكم. اكرهكم.

وخليت ايدي علئ وجهي وانهديت بالبجي واشهك. بعد مااتحمل. رجع يسوق وماحجة ولا كلمة. واني مستمرة ابجي. كفت السيارة فجاة. اباوع رجعني يم باب بيتنا. استغربت. باوعت عليه وعيوني متروسة دموع. بمعنئ ليش رجعتني؟ دار وجهة علئ الجامة. طلع جكارة ورثها. وماباوع بوجهي ابد. وكال بهدوء. تمام. اني جذاب وواحد مصلحجي. واغدر ومااهتم لكلشي. واهتمامي مزيف. واكبر استغلالي. وكلشي داعيشه وياج جذب. واضغط عليج. وهواي بعد. هذني كلهم. اني بعد شنو؟

نسيتي شي؟ ها. واحد متناقض. يحب نفسه وميحب احد. واهم شي اهتمامي مزيف مو صحيح؟ كملتي لو بعد عندج كلام حلو وابدا مايجرح؟

حجيتي الي بكلبج والي تحسينة تجاهي. عاذرج كلش عاذرج. اني جان المفروض من البداية انهي كلشي. ومااخليج هيج تتعذبين من وراي وتعانين. وصراحة ماجنت اعرف اني هيج مأثر عليج. علئ العموم. انزل يارتاحي. واليوم لاترحين للدوام لين مبينة نفسيتج تعبانة. وها. قبل لا تنزلين. اذا اكو بعد حركة بكلبج تذبيها بية بدل ماتذبيها بالي مسببها. يحجي واني شلون عبالك واحد يدك بسامير بالجدار. وهذا الجدار كلبي. اني داحجي. كتلة. بعدني ممكملة.

اشرلي بمعنئ انزلي. وماباوع بوجهي ابد. بجيت وسحبت جنطتي ونزلت. سديت الباب. ونزل الجامة وكال. راح التحق. عندج عشر ايام. انهي بيهم كلشي. علمود من اراجع اتصرف واخلصج مني.

وكال هيج وحرك بساع. واني بعدني محاجية. دخلت للبيت. امشي علئ كيفي. صعدت لغرفتي. سديت الباب. وضليت ابجي. شسويت اني. شحجيت. يالله. شلون كلت هيج. شلون جرحته واذيته بكلامي. اني ثولة وابقئ ثولة. مااتغيير ابد. مااتغيير. نوب راح يلتحق ويكلي انهي كلشي. شلون انهي. شلون. شمرت روحي علئ الجرباية وابجي واكتم صرخاتي بالمخدة. مااريد اخسرة. هوة هم. مااريد اخسره. شوكت اعرف اتصرف. شوكت. باسل.

كاعدة علئ طرف الجرباية ومغمض عيوني. وكلامها ماجاي يروح من بالي. اني استغلالي؟ بس شلون استغلها واني احبها؟ زين شنو سويت علمود تحس اهتمامي مزيف؟ واني جاي اهتم لكل شي وانتبه لكلشي. بس علمود لا اجرحها واحببها الية. راسي ضل يأذيني. الضغط صعد. واتذكر كلامها وشي ويشتعل بداخلي وياكلني اكل. زين هوة الواحد من يصير عصبي يحجي كلشي. ويطلع الحجي. معقولة الكلام الكالته تحسه تجاهي وهيج معتبرتني؟ لو كلام ونكال بلحظة عصبية؟

دك علية صاحبي. تاخرت. طلعت الجنطة. خليت البدلة العسكرية والملابس واخذتها وطلعت. ودعت ابوي وامي ورحت للمركز. عندي التحاق للأنبار. يسوق صاحبي واني صافن علئ الجامة وادخن. وكل ضني الجكاير تطفي حركتي. بس وين؟

زين شبيها هيج عصبية. خاف صار بيها شي من ورة عصبيتها الزايدة الي راح تموتني من وراهة. اخ لو الزمها هسة الة اطلع حركتي بيها. ام دميعة. بلا خلي اشوف شتسوين بهل 10 ايام. ترحين ركض تنهين كلشي لو تبقين. فزيت علئ صوت صاحبي يسولف وياي ويحجي واني بغير عالم. طالب. سيـدي هاية مهمة صعبـة وأنت صاحب عائلة. شلون تجازف؟ عوفها علئ الضباط الباقين. همة يتصرفون. سحبت نفس من الجكارة وكتلة بعصبية.

وشنو باقي الضباط ماعدهم عوائل. شهل حجي مصعب؟ احنا الي متكفلين بحماية الناس. تريدنا نتشرد من الي يعيشهم بخوف؟ ماحبيتها منك هاي. يلزمها وتجار المخدرات والي يبيعون أسلحة من غير رخصة. ألزمهم ألزمهم. وين يروحون مني؟ دزلي كل الفايلات الخاصة بالحوادث وتسجيلات الكامرة. اليوم عندي خفر وأريد أطلع عليهم. هز راسه وكال: حاضر. سيدي، باوع الموبايل يدك. جاوبت بكل حنية: هلا بروحي وراحتي. كالت: هلا حبيبي، وينك؟ منتظرتك على الغدا.

تأخرت. كتلها: لا تنتظروني. ما أجي اليوم، عندي خفر و أتأخر. كالت: أفف، عود أنا منتظرتك. وشكد تبقى؟ كتلها: مادري. عندي هواي شغل. كالت: تمام. زين أنا راح آخذ ريحانة للسوك، هي والبنات. أريد أحضر للنيشان. كتلها: روحي وخلي واحد من الولد يروح وياكم. كالت: تمام عمري. وشوية وسديت الخط. جاب الفايلات وبديت أشتغل. كتلته: وين النقيب باسل؟ ماشفته اليوم. كال: التحق ويا الجماعة للأنبار، عدهم مهمات وهواي شغل. استغربت، مادري بي رايح.

كتلته: زين. ورجعت اشتغل. مريم متمددة على الجرباية ألعب بالموبايل. ودك موبايلي. أحمد! كمزت من الفرحة. جريت نفس وكتله: الو. حبيبي. كال: هلا. كتلته واني أرجع خصلة شعري ورا أذني: أي، كملت شغلك؟ رد علي ببرود: مريم، عندي كلام وياج. استغربت. كتلته: خير، شصاير؟ كال: أنا قررت. كتلته: شنو قررت؟ كال: ننهي كل شي. نغزني كلبي وكلت بعدم فهم: ننهي شنو؟ كال: علاقتنا تنتهي وخلاص. وكل غايتي واللي أريده صار. نزلت دمعة وكتله: شتحجي أحمد؟

إذا طلع مقلب والله بعد ما أحجي وياك. كال بعصبية: مو مقلب. اسمعيني، أنا جان كل اللي أريده آخذ حق ها السنتين. شلون خذلتيني وكسرتيني وهسة رجعتيلي؟ أريد أرد لج المثل. أحسن هيج. وباليوم اللي كلتلج اخطبج بيه أنا راح اخطب بنت خالتي. وأنتي شوفي طريقج. ترا الدنيا ما توكف علي. وهان علي كل شي، كل مواقفنا وسوالفنا هانت علي عادي، لا مقهورة ولا فرحانة. لين أخذت حقي. هو يحجي وأنا أرجف ودموعي تنزل. عشرة بعشرة. كتلته: صدك تحجي؟

تاخذ حق بكسر كلبي؟ هيج بكل سهولة استهانيت بيه وبحبي إلي؟ نسيت التضحيات والتعب والبجي والسهر وجاي تكملهم علي بالخذلان؟ وسكتت وهمست وأنا أشـهـق: أحمد لا تخذلني. كلبي كام يوجعني والله. كل جذب وطمني. وعد أسامحك وما أزعل عليك. ولا هاي. سكت ورجع كال: أنتي ما عندج كرامة؟ مو كلتلج ما أريدج وما أحبج؟ وأجذب عليج وأكرهج. وين تردين توصلين؟

ويلا باي. آخرتيني. سد الخط. ركعت الموبايل بالكاع بكل قوتي. دموعي تنزل وأمسحها وأشهق. اختنكت. مادري شصار بيه. كعدت بالكاع وانتجيت على الجرباية وأشهق. فرفحت روحي وأردد: أحبه والله أحبه. ما تهنيت بحياتي أبد. جبت عمري كله تعب بتعب.

وشهقت: ما يوم فرحت من صدك. كل ضحكي جان جذب. وتاليها هسة. ما أريد أصدك. ما أريد أصدك أحمد هيج يسوي. هو حالف ما يعوفني. بس طلع جذاب ويريد غيري. شبكت نفسي وأبجي وجسمي كله يختض. بس أنا تعودت. تعودت أحجي وياه كل يوم. أنام على صوته. كل يوم يسأل علي. كل يوم ما يتركني ولا يوم. هسة شلون؟ شسوي من بعده؟ شسوي؟ ورجعت أبجي وأدعي: وين الله يطلع حلم وهسة أكعد منه؟ وين الله هسة يدز رسالة يعتذر ويكول جذب؟

وين الله يخابرني ويكلي ما أعوفج؟ أنا وياج للموت. ومن البجي فجأة ظلمت الدنيا بعيني وبعد ما شفت كل شي. ريحانة فزيت، مدري شوكت نمت. شفت الدنيا ضلمة. كمت أمشي بالكوة، دايخة. هاي شوكت نمت؟ دخلت للحمام. غسلت وجهي صاير أحمر ومصخنة وبالكوة أمشي. يالله طلعت من الغرفة. دا أكل لمريم تسويلي كمادات. دكيت الباب، ماكو صوتهة. استغربت. فتحته ودخلت وشفتها مشمورة عالكاع. ركضت عليها أهز بيها، ما تتحرك. صرخت بصوت عالي: مريم! أكعدي!

ضليت أبجي وأحرك بيها، ماكو. وجها مدري شصاير بيه. دخلوا محمد وماما للغرفة يركضون. ركض محمد شالها يحرك بيها، ماكو. صاح: انطيني عبايتها. نسيت حتى وين العباية. دخلت سارة للغرفة مصدومة. صاح: العباية. ركضت سارة للكنتور، طلعتها وانطته إله وتبجي وتكلي: شكو؟ شبيها؟

واني أبجي وأهز راسي بمعنى ما أعرف. أبوع ماما وجها صار أصفر. لبست عبايتها وطلعت ورا محمد. تبجي وتركض. كعدت بالكاع وكبالي سارة. وحدة صافنة على الثانية ونبجي. سارة وهية تبجي مدت إيدها لوجهي وكالت: وأنتي شبيج مصخنة مو؟ وشهكت: كومي خلي أشربج مسكن. كومي. سحلتني وهية تبجي. كتلها: عوفيني، مابية شي. ما جاوبتني. أخذتني جوة تنزلني من الدرج واني شلون المصدومة، بس صافنة. كعدتني عالـميز وجابت دوة ومي.

شربتني وكال ببجي: شبيها يعني هيج لكيتيها؟ بس طايحة. حجيت واني أرجف: أني، أني دخلت للغرفة علمود أكلها تسويلي كمادات. ولكيتها طايحة. وشهكت: وجها مدري شلون. مقلوبة ملامحها. وسارة انهدت بالبجي. سدت باب الثلاجة حيل وكالت: هيه، منو مرتاحة من عدنا؟ هااا؟ منو؟ شوكت نرتاح؟ شوكت؟ صبرك ربي صبرك. تعبنا والله تعبنا. منين العمر جبنا؟ قهر بقهر حياتنا عايشينها بخوف. شوكت تفرج؟ شوكت؟

وخلت إيدها على وجها وضلت تبجي. واني بس صافنة ودموعي تنزل. سمعت صوت شهكات علاوي. كمت على كيفي. شفته كاعد عالدرج ويبجي. شافني أجة ركض شبكني وكال: مريم شبيها؟ ماماتت مو؟ شوكت يجيبوها؟ خل تجي والله بعد ما أزعلها. ومن تريدني أروح للمحل أروح والله وما أتعبها. شبكته ومسحت دموعي وكتله بهدوء: ما بيها شي يعمري أنتَ. بس راسها يوجعها وهسة تجي وتنام يمها. نفس هذاك اليوم. هز راسه وشابكني ويرجف. عرفته خايف.

صحت سارة: كتلهة جيبي مي لعلاوي. كعدت بالكاع وكعدته بحضني وصافنة أباوع بوجهه. الخوف بعيونه. كتلته بقلق: لا تخاف، يروح أختك ماكو شي. لا تخاف. هدأت شوية شوية وصار طبيعي وغفى بحضني. شلته على كيفي ونومته بغرفة ماما وبابا عالجرباية وغطيته. طلعت بهدوء وسديت الباب. وشفت سارة طلعت من المطبخ تركض للكراج. ركضت وراها. شفتهم أجو وياهم حسين ومحمد شايل مريم وهية نايمة. كتلته بخوف: ها، شبيها؟ كال: انهارت. شبيها؟ شصاير وياها؟

اكو أحد مضوجها لو شنو؟ كتلته واني أمسح دموعي: مادري والله، هية بحدها هيج صار وياها. دخل للبيت وماما يمشيها. حسين كال: جيبي مي خلي تشرب. لا يصير بيها شي. اسم الله. كعدها عالكرسي. شربتها مي وهية نزعت الشال. على كيفي وجها صاير أحمر دم من البجي. وحسين بالكوة سكتها. كالت بهدوء: لحد يكول لأبوكم عنده خفر وطريق يخوف بنص الليل. كلنا: كلنا. وكمنا بغرفة ماما. محمد نوم مريم هناك. فز علاوي وبساع كام ويبوس بيها وهية نايمة.

حسين أخذه كاله: تعال اشتريلك. وراح ويا. كعدنا يم سارة ساكتين. وحدة تباوع بوجه الثانية. باستها ماما براسها ومسحت دموعها النازلة. بس وهية مغمضة. دموعها ضلت تنزل عشرة عشرة. فتحت عيونها وباوعت علينة ورجعت تبجي بسكوت. ماما بجت وكالت وهية تمسد على راسها: ها ياروح أمج؟ شبيج؟ منو وياج؟ كوليلي هيج. متحجي بس دموعها تنزل.

همست ماما يمها: هاهية حبيبتي. ما أريد أضغط عليج. شوكت ما تردين أحجيلي. بس كافي لا تبجين. مو زين عليج. يبعد عيني أنتَ. هزت راسها مريم وشمرت روحها بحضن ماما وضلت ساكتة. وشوية شوية نامت. كمت بست مريم براسها وطلعت من الغرفة. شفت سارة بالمطبخ كاعدة عالـميز وصافنة وايدها علئ خدها. تقربت بستها وكلت بهدوء: شبيها الحلوة؟ همست بوجهي وعيونها مليانة دموع ومبتسمة: أتمنى أموت والله. ولا مرة تمنيت أموت بس هسة لا. تمنيت.

همست بقهر: اسم الله. ليش؟ همست بنفاذ صبر: تعبت. وبجي. وخلت إيدها علئ وجها. شبكتها حيل وضغطت علئ عيوني ما أريد دموعي تنزل. كتلها: كافي يروحي. نكول الحمدالله على كل حال. هاي شوفي مريم اجت ومابيها شي. شوية شوية تصير زينة واحنا وياها. منعوفها. وأنتي شيلي هايه الأفكار من راسج مال الموت. لاتفكرين بيهم. وأنتي قوية. متكسرج هيج ظروف. تمام.

هزت راسها وكالت: تمام. وشبكتها وأطمن بيها. مامتعودة أشوف سارة هيج متعودة أشوفها تضحك وفرحانة. أبد ما أحب أشوفها حزينة وتبجي. كعدت عالـميز وكعدت كبالي. شغلت الموبايل ودخلت لمحـادثـتنا أنا وباسل. أريد أدزله رسالة ومتراجعة. زين شنو أدزله؟ أعتذر لو شنو؟ فزيت على صوت سارة وهية تكول: أي وأنتي شبيج؟ باوعتلها واني أطكطك بأصابعي وكلت واني مبرطمة: تعاركنا أنا وباسل. تنهدت وكالت: ليش تعاركتوا؟ باوعتلها وبلعت ريكي.

كالت: أي شصخمتي؟ لين أدري بيج متسوين كلة تصخمين. ابتسمت وبديت أسولف الها. وهية تباوعلي بتك عين. كملت كالت: هيج رد عليج؟ بس؟ والله أنا منه أنزلج جلاليق من السيارة وأعوفج بنص الشارع يم الكلاب. عابت ريحانة. صدك تحجين؟ شلون تحجين وياه هيج؟ موعيب؟ درينا مقهورة وحزينة بس مولهل درجة؟ نوب راح التحق. كتلها ودموعي مدمعة: ما أريد أخرب كل شي. أنا أريده. ما أريد أخسره. تنهدت وكالت: أنتي جفصتي وحجيتي كل هذا الكلام. بعد شنو تردينه؟

شنو؟ مخبلة أنتِ؟ كتلها: أنتي كولتيها جفصت يعني ممتقصدة. نوب خطية زعل مني. حتئ مباوع بوجهي. أكيد زعل مني. كالت: زعل منج؟ كولي ما مني. كرهني. مو زعل مني. والله متصيرلج جارة. نوب لحد هسة ممراسلتة ومعتذرة. عابت. خطية. والله. تنهدت وكتلها: وهسة شسوي؟ كالت: شو دكي علي كدامي. كتلها: ليش؟ كالت: شو دكي. بلعت ريكي وفتحت الموبايل ودكيت عليه. طلع رنين. نوب غلق الخط. دادك مرة ثانية انطاني بلوك.

بجيت وكتلها: شوفي، انطاني بلوك. ميريدني. كالت وهية تهز بأيدها: والله عيب. انطاها بلوك. زدت بالبجي وهية تبجي بية بالزايد وتكول: دا أخذ حقه. كتلها ببجي: وهسة شلون؟ أكيد بعد ميحجي وياي أبد وانطاني بلوك. استغفر الله وكالت: دسكتي. كافي بجي. شوية ويوخر البلوك. كتلها: وشمدريج؟ كالت: معليج. شوية ويوخرة. طفيت الموبايل وكمنا نسوي عشة. وعود على أساس اليوم نروح للسوك بس تأجلت.

كالت لماما: مالي خلق. فجأة دك موبايلي. باوعت للرقم الي يدك وبلعت ريكي بخوف.