رواية يأس القلوب الفصل السابع والثلاثون 37 - بقلم رودة

من وجهة وكتلة يموووو تعبان، سودة علية وبسته بخده وكلت: "اللهم إني صائمة". ابتسم بهدوء وهمس: "تخبلتي بوية، تعبان تكعد تبوس بيه. انعم الله عليج. خوش تعرفين تداويني وتوخرين التعب. واني أحبج على هاي الطريقة. لين صراحة بوية كلبي يحبها. وأني أحب هيج سوالف. كاثريلنا بوية، كاثريلنا." ضحكت بخجل وكتله: "عابت، أرجع أنام." رجع ضحك وسحبني نومني على إيده وكال بنعاس: "أي، شبيج ضايجة؟ كتله: "مادري، بس أحس روحي مختنكة."

كلت هيج وهو عدل كعدته وكال وهو يتلمس وجهي: "شبيها حبيبة روحي؟ ليش مختنكة؟ كتله وأني ألعب بشعره: "شمدريني، بس ماكو شي. أسويه وعمة نامت وعمو أجة تعبان وهم نام. وأنت نايم. واني عبالك جني. بس أني أفتر بالبيت." ابتسم وكال: "فراشة بوية، يا جني؟ ابتسمت. كال: "وين تردين أخـذج؟ كتله: "لا وين؟ هستوك جاي وتعبان وتريد تطلعني؟ أصلاً أرجع نام. باع شصاير بيك. واني راح أكعد أباع على المسلسل."

كال وهو يكوم ويطك أصابعه: "دكومي بنيتي، كومي." كتله وأني أسحب الغطة وأرجع أتغطى: "أما أرجع نام. يلا ما أكوم." كال بهدوء: "دكومي يابوية، أني أريد أطلع وأتونس وياج. صار هواي ما طالعين سوية. واليوم أريد تفطر برة بالمطعم." مدري شجاني وكتله وأني مغمضة عيوني: "الله وتوكلني ذرة حارة ومكثرين ملح." ضحك وكال: "أي مو يدلع حبيبي." ابتسمت: "الله فد اشتهيتها." كمت وكتله: "زين يعني هسة نروح؟ الساعة بالاربعة هسة؟ بعد ساعتين للفطور."

كال: "أي. أريد آخذج لمكان حلو راح يعجبج." كمت وكتله وأني أتقرب: "باع هوة. أني أريد أطلع وأغير جو. بس شسمة خاف أتعبك. ومنا أنت جاي تعبان. خليها غير مرة عادي. وهسة أرتاح." لزمني من خدودي وكال وهو يعت بية: "راحتيي وياج بويـة. يا تعب يا هاي. ديلا امشي حضري نفسج. لو تردين أرديج بطريقتي الخاصة؟ بكيفي بالخدمة. أني ضحكت وكتله: "لا شكراً عيني، رايحة رايحة." فتحت الكنتور. امم هسة شنو ألبس؟

سحبت بنطرون أسود وطلعت وياه قميص زيتوني فوك الركبة بشوية. بس يعني حلو ومستور. وطلعت شيلة لون بيجي وكعب هم لون بيجي وجنطة. وهو بالحمام واكف كدام المراية ويحلق بلحيته ويحدد بيها. لبست البنطرون ولبست كيمونة جوة القميص. وبعدين وكفت كدام المراية. مكيجت وعجبني أجر أيلاينر. هم جريت بس يعني مكياج حلو سويت. مو طوخ. لين أساساً أني ما أحب الطوخ. وحتئ الأيلاينر خفيف. بعدين لفيت الشيلة ورشيت عطر.

وهو طلع والخاولي على كتفه ومحلق. ابتسمت يمة شكد طالع حلو. شافني عقج حواجبه: "موجنة القميص قصير؟ كتله: "لا والله طوله كلش زين." كال وهو يفتح الكنتور: "دكومي بدلي. ما تطلعين بيه. كومي." كتله: "شنو؟ غير بدلت ومكيجت. أما والله ولا أبـدل." مسح وجهه وكال: "جاي أكـلج كومي بدلي. القميص ما تطلعين بي. تسمعيني لو لا؟ بلعت ريكي وكتله بضوجة وأني أكعد على الجرباية: "ما أريد. أنت عود اطلع. وجاي أنزع الشيلة."

لزمني من إيدي وكال بهدوء: "بوية ليش تعاندين؟ جاي أكلج القميص ما عاجبني. كومي بدلي وبطلي عناد." كتله وأني أدك رجلي بالكاع: "ما أبـدله. يعني ما أبـدله." مسح وجهه وكال: "دكومي يلا روحي بيه. بس خلي أشوف بعد يا سر " يطـلعج." ابتسمت وكتله: "يعني أروح بيه؟ خزرني وسكتني.

راح للكنتور سحب بنطرون أسود من الـ 526292 البنطلونات اللي لونهم أسود. يعني عنده كومة بناطير لون أسود. واحد أحلى من الثاني. وسحب قميص أسود. كبل عقجت حواجبي. شنو رايح يلبس أسود؟ والأسود حلو عليه. بدل ودكم القميص. وكف كدام المراية مشط وخلة عطر. وفتح الجرارة أخذ الساعة لبسها والمناظر. وأني صافنة عليه. يعني عباله أقبل يطلع هيج. كتله بضوجة: "هاي شنو؟ هيج راح تطلع؟ كال وهو يلبس الحذاء: "أي ليش؟ كتله: "عفية باسل بدلهم."

كال: "شبيج بوية تخبلتي؟ كتله: "بدلهم يلة بدلهم. ما تطلع هيج." كال: "تذكرين هستوج من أكلج بدلي وتعانديني؟ باوعت عليه بضوجة. كال: "يلا أمشي كدامي." برطمت ومشيت من كدامه وهو يكول: "الصبر ياللهي الصبر." أخذ محفظته والسويج والموبايل واجة وراي. نزلنا واثنينه واحد يدردم على الثاني. بعدين راح كال لعمتي: "لا تنتظرونا على الفطور. برة راح نفطر."

وأني أنتظرته بالكراج. طلع شغل السيارة وصعدت وسديت الباب. وهو بدأ يسوق. ولابس المناضر. سحبت إيده بضوجة وكتله: "لا تتحرك. خلي أصور." ابتسم بطرف شفته وكال: "عنيد. شبيك ضايج؟ كتله وأني أصور: "مضايجة. المكبسل." كال: "مبين." كرفس ورفع إيده كرص خدي وباسه. كتله وأني مبتسمة: "عابت. لا تقشمرني." وخر. ضحك بصوت عالي وكال وهو يحك لحيته: "أحبـك ولك." ابتسمت وكتله: "أموت عليك."

سحب إيدي باسها. وأني ضليت أصور. يمة صورت شكد صور حلوة. وإيدي وإيده. حليب وككو. وعروق إيده الباردة. يموووت. والحلقة والساعة. كيك بوية كيك. لحد ما وصلنه. أباوع جابني لمكان يصير يم نهر دجلة. بيه حدائق ومطاعم. مكان كلش حلو ومرتب. ابتسمت. نزلنا. "الله الهوى يموت." تتقرب لزمني إيدي ونمشي. وصلنا للحديقة. اكو مصطبات قبل النهر. كعدنا على وحدة. ولزم إيدي وأني مبتسمة. غمضت عيوني أشم بالهوى. "يمويي شكد نقي."

فتحت عيوني وكتله: "حرفياً أحلى مكان." ابتسم وكال: "نصعد بالعبارة؟ كتله بخوف: "بس أني أخاف منها." كال: "اني وياج وتخافين؟ كتله وأني أضغط على إيده: "كل الأمان وياك."

ابتسم وكمنا. تقرب دفع الحساب وصعدنا. وجانت هم اكو عوائل صاعدين. كعدنا ثنينه وهو لازم إيدي وأني راسي على كتفه. بدت تمشي العبارة. ضغطت على إيده. وهو مسح على إيدي بحنية. رفعت راسي أباوع بنية كاعدة كبالنا. كل ساعة تباوع عليه وتهمس للبنية اللي يمها. "يمة شصار بيه." كبل باوعت لباسل وكتله بضوجة: "وين عيونك؟ كال وهو مستغرب: " وياج. وياج بوية وياج." كتله وأني أضغط على سنوني: "أي. خليك وياي أحسن."

هز راسه بضحك. وأني أخزر بالبنات. ولا يستحن. عابت. اكو شي اسمه مستحة. شوية وخلصت الجولة بالعبارة. نزلنا وكلت لباسل: "عطشت. شوكت يأذن؟ باوع لساعته وكال: "اصبري مابقئ شي." هزيت راسي. ضلينا نتمشى بالحديقة ونسولف ونضحك. لحد ما صار وقت الفطور. جان حاجز بالمطعم. دخلنا وشوية وجابوا الفطور. حاجز مندي لحم. وبيتزا ومقبلات وببسي وهالسوالف. بدينا ناكل. "عزا فد جوعانة يمكن لين حامل وأتعب."

أكلت وكملت وهو هم. غسلنا وشربنا جاي ودفعنا الحساب وطلعنا. كال: "ها حبيبي شبعتي؟ كتله: "أي عمري. والاكل كلش طيب." كال: "الف عافية." تمشينا واشترى الي ذرة. وهو هم اشترى وكعد ياكل وياية. وهم نسولف ونضحك. فد غيرت جو وتغير مزاجي. بعدين كال: "ها هسة نرجع لو تردين بعد نفتر؟ كتله: "خلي نرجع لين رجليه ضلت تأذيني من الكعب." هز راسه وكال: "تمام." دنتمشى للسيارة علمود نصعد. وفاتوا اثنين

ولد بالدراجة وواحد صاح: "شدعوة هلكدد حلوة عميي." والثاني كال: "الزيتوني ياكل ويشرب عليج. اويلي يابة يمة. عز العزاني." غير بادت روحي. وأباوع باسل فتح عيونه وطاح السويج من إيده وصاح عليهم بعصبية. حسيته راح يركض وراهم. كتله بخوف وأني أرجف: "عفية باسل عوفهم. خلي نرجع. راح أوكع." من الخوف. مسح وجهه بعصبية وكال: "أمشييي كدامييي أمشيي."

يمـه مشيت. عزا العزاني. فتح السيارة وصعد وركع الباب حيل. صعدت وهو شغل السيارة وكالساع ماسح وجهه بعصبية ويدك على الاستيرن. ويكول: "كتللهااا لاتلبسيينة لاتلبسيينة بسسس شلووون تسسسمع الكلمة هييية. إذا ماتعصبنيييي وتشعل كلبيييي من الغييييرة ماتررتاح ماترتاح. اريييد أشوف بعددد منو يخليييج تطلعين هييج. الة أشعلج شعل. ليييش تعانديين لييشش. اخ كون أَلزمهممممم الة أخليهم يبجووون دم. لج أني يتغزلون بيج كدامي؟

وضرب على الاستيرن. وأني يمة بس أرجف ودموعي تنزل. كتله: "هدوء باسل. شبيك اهدأ." صاح: "اسكتييي ما أسمع صوتج." درت وجهي على الجامـة وبس أبجي. وهو يسوق. وصلنا للبيت. كبل نزلت. حتى الجنطة عفتها وسديت الباب وراية حيل. دخلت أبجي. وهو أجة وراي. لزمني من إيدي ومشاني. أو بالأحرى سحلني. دخلنا كبل صعدنا فوك. دخل للغرفة وشمر الجنطة

مالتي على الجرباية وكال: "باعي عناد. بعد ما تعانديني هيج طول قميص. بعد ما تلبسين. وإذا عاندتي ياريحانة ألعب بيج طـوبة. سمعتيي؟ كتله وأني أمسح بدموعي اللي تنزل عشرة عشرة: "أي ما أعاند بعد. ما أعاند." فتحت الكنتور سحبت دشداشة بدون ما أباع ودخلت للحمام. غسلت وجهي وبس أبجي. هسة أني شعلية؟

والله يالله. وبس اسكت بروحي. هسة لو نازعة القميص مو أشرفلي. نزعت ملابسي وسبحت وبدلت ولبست الدشداشة. وبعدين توضيت وطلعت. وأني أنشف بشعري وعيوني حمر من ورا البجي. لكيته مبدل وكاعد يصلي. وكفت مشطت ورشيت عطر. وفرشت مصلايتي ولبست الحرام وصليت وكملت. وهو متمدد على الجرباية. نزعت الحرام. شو هذا صفن عليه ورفع حاجبة. باوعتله بتك عين ودرت أباوع للمراية. "عزا العزاج ريحانة. شلابسة؟

الدشداشة الحمرة اللي اشتراها الي أمي غصب. غمضت عيوني بفشلة. ابد مو وكتها ألبسها. كعدت على القنفة وسحبت موبايلي. خابرت سارة. أحجي وياهة وكالساع أباوع عليه بزعل. وهو كالساع يباوعلي ويخزر ويدور وجهه. كملت اتصال ويه سارة وتمددت على القنفة. لو يطك ما أروح يمه على الجرباية. سحبت مخدة ولحاف وتمددت وغطيت روحي. ما أحسيت إلا لعبت نفسي. ماتحملت. كبل شمرت اللحاف وكمت ركض للحمام وتقيأت. يمة انسحنت روحي. شصار بيه؟

وهو أول ما كمت كام وياي. تفاجئ وأني أتقيأ. وهو يمسد على ضهري ويكول بقلق: "الله بوية الله. شبيج؟ لحد ما حسيت معدتي فرغت. ياله أرتاحيت. غسلت وهو دارني عليه وغسل لي وجهي. وبلل اللي ركبتي. وسد البوري يريد ينشف وجهي بالخاولي. كتله بقهر: "وخر من يمي. لا تـلزمني. ما اهتم إلي." سحبني ونشف وجهي. طلعت من الحمام. صاح: "تعالي تمددي هنا على الجرباية." كتله

وأني أحجي وعيوني مدمعة: "معليك بيه. يلا عوفني. مو هستوك تصيح عليه وتبجي بيه. يلا معليك بيه." استغفر الله. ومسح وجهه. وأني عفته وتمددت على القنفة وتغطيت وضليت أبجي. والغرفة صارت هدوء. سمعت خطواته تقرب. رفع اللحاف وحصر روحه يمي على القنفة. كتله: "باسل وخر من يمي. ما أريدك." شبكني وكال: "اش اسكتي." وباسني بخدي. دفعته. شبكني حيل وكال: "لا تحاولين. ما أوخر." درت عليه. وخصل من شعري نازلات على وجهي. كتله: "شتريـد؟

مو هستوك تصيح عليه وتبجيني وتقهر بية وتضوجني وتطلع روحي وتعصبني وتغورني؟ كال وهو يبوس بخدي: "أي. بعد كملي." كتله: "وخر. ما أكمل." كال وهو يسحبني لحضنه ويمسد على شعري: "يابوية. بعد من أحاجيج على لبسج وأكولج بدلي. معاجبني. لا تعاندين. لين أني أعرف بنظرات الناس عليج. شلون ترديني أقبلها؟ ولاتذكريني بهذولي السز بوية. كلبي محترك لحد هسة. اخ لو بس ألزمهم. الة." أجة يحجي. وكتله: "خـيولون. لا تهتم."

هز راسه لا إرادياً. خليت راسي على صدره وكتله بهدوء وأني ألعب بكيمونته: "بعد ما أعاندك. هاهية. والبس الي يعجبك ويرضيك. والشي الي ماتقبل بيه ما أوصل يمه. واسمع كلمتك. أهم شي ماتضوج مني وتعصبني." ورفعت راسي وكتله وعيوني مدمعة: "بس ها. لا تصيح عليه وتعصب. ترا والله أني أخاف. مادري بس هيج. مدري شيصير بيه." أني كلت هيج وهو كبل كعد وشالني من القنفة ووكف. كال: "بوية شكد حلوة من تصير بنية تسمع الكلمة. أبوسج." أني أبوسج.

باسني بخدودي وكال: "أشعله شعل. بعد الي يصيح عليج." ابتسمت ورجع باسني بخدودي وكال: "كافي زعل. يلة. ما أحب تضوجين مني لو تزعلين." كتله وأني أحاوط ركبته وأحجي وكصتي على كصته: "وأنت هم تسمع كلمتيي. وبعد ماتلبس بس أسود. لين تطلع كلش حلو. وأني أغار عليك. وشفت هذني اليوم شلون يباوعلك؟ هيج بعد عيونها أفسهن الي تباوعلك. أنت مالتي. بس مالتي وبس. أني أباوعلك. محد يباوعلك." ضحك بهدوء وكال: "بعد أمر. خدمة."

كتله بضوجة: "واليوم شو كلة تصيحلي ريحانة. وين ريحانتي؟ همس يم أذني وهو يبوسها: "ريحانتي. بوية ريحانتي." ابتسمت بخجل وشبكته حيل. وشبكني. تمشى خلاني على الجرباية. وفتح الجرارة طلع الدوة مالتي. اوو ناسيتة. وجاب كلاص مي. شربني الدوة وشربني مي. وأني مبتسمة وساكتة. عبالك بنته الصغيرة. وطبعاً اشك هرمونات الحمل الهن تأثير عليه. شو صايرة رومانسية ومادري شنو. تمدد يمي وضلينا نسولف ونتناكر. سارة "نجبي لاتبجيني مريم. كافي."

كالت مريم وهية تدك على الكاع من الضحك: "لج شلون عايفة نعالج ولابسة نعال الولد. وطالعة. غطيت وجهي من الفشلة. عزا العزاني. عفت النعال أبو كركوشة ببيت أمير. وطالعة بنعاله من الفشلة. واليوم أمه اجت سلمت على أمي وجايبة نعالي. بچيت من الفشلة." كال مريم وهية تضحك: "حب من أول نعال دفرتها وكلت نجبيي مريم. لاتقهريني. نوب أني الثولة. شلون ما حسيت؟ كالت: "أنت كلتيها ثولة. وين اكو أثول يحس؟

صحت بصوت عالي: "بابا صييح على مريييم. راح أكتلهها. والله. كومي طلعي. كومي." كامت وهية تضحك. وأني أبجي من الفشلة. يعني أني والله طايحة حظ. شلون عفت نعالي أبو كركوشة الأحمر ولبست نعاله. يعني ما حسيت. طالب نايم وفزيت على صوت هلهولة. مسحت وجهي واستغفرت الله. "بوية راح يجلطوني." غمضت عيوني ورجعت هلهولة ثانية. صحت بعصبية: "شنييي؟ جلبتوا؟ خوما جلبتوا؟ دخلت جوري للغرفة وكالت: "ها عيني شبيك؟ كتلها: "منو جاي يهلهل؟

كالت: "اني. أي عيني. صاير متعرف صوتي؟ استغفرت الله وكتلها: "بوية مونايم. شعندج تهلهلين؟ كالت: "غير أهل فدك ردوا الموافقة. وهلهلت." كتلها: "ها. هنا الحجي. بيها الخير ان شاء الله. يلا طفي الضوة وبعد ما أريد أسمع صوت." طفتـه وتقربت. كالت: "حترجع تنام عمري؟ كتلها وأني أخلي إيدي على عيوني: "لا بوية. راح أروح أتونس. يعني شتشوفيني؟ كالت بضوجة: "شبيك صاير متتحمل؟ هسة أني شكتلك؟ فوك ما جايين أني وبنتك يمك."

ابتسمت لا إرادياً من كالت هيج. سحبتها من إيدها نومتها على إيدي وبستها بخدها وكال: "هاهسة رضيتي؟ رفعت حاجبها وكالت: "أي رضيت." ضحكت وبستها مرة ثانية وكلت: "بوية أموت علئ هاي حركتج." أكلج. أكلج. ضحكت شبكتها حيل وكلت: "هوة منو يدلع هيج حلو ويسحن الروح. لو بس أنت؟ ضمت راسها بصدري بخجل. ضليت أمسد على شعرها. حتئ النومة طارت من عيوني. كمت طقطقت أصابعي. وهية متمددة وتباوع علية. كتلها: "ها ارتاحيتي من كعدتيني؟

يلا كومي مو خذاج الواهس وتمددتي." ضحكت وكامت. كمت غسلت وطلعت كعدت بالاستقبال. وهية شوية واجت وراية جايبة ماعون فواكه وعصير برتقال طبيعي. أخذت العصير وكتلها: "عاشت إيدج جوريتي." ابتسمت وكالت: "الف عافية." كعدت يمي. كتلها: "حسين وينة؟ وأجاني صوته وهو يدخل للاستقبال: "ها طالب. اشتاقيتلي؟ ضحكت. أخذ تفاحة من الماعون وكال: "هانت هانت. بعد كم يوم فدك تسويلي هيج ماعون."

كعد يمي وكال: "أي بوية. شوكت نروح وناخذ مشية ونتفق وياهم؟ كتله: "ان شاء الله هلايام. وورة العيد الخطبة. أنت ومحمد سوية. ما أكدر أسوي بالعيد الخطبة. لين أول يوم العيد حنة اختك مريم. وثاني يوم العرس." كال: "تخيل طالب. مريم بنتك راح تروح. وريحانة راحت. وسارة. اخ هم يجي يوم وتزوج. اخ كلبي. وأبقة أني على كلبك بالبيت. بس لا تضوج. أجيبلك خوش بنوتة وأسويك أحلى جدو." ضحكت وكتله: "دكوم منا كوم. ما عندك سالفة بيها خير." مريم

بديت أحضر وصار 3 أيام أني وماما وسارة نروح للسوك علمود أكمل جهازي. وأجي تعبانة كلش. لين نروح من 3 لحد 6 يالة نرجع. وكلشي نشتريه نرتبه أني وسارة بالجنط. ولحد الآن صارن 7 جنط مرتبات. مكياج وملابس واحتياجات وجنط وأحذية وووو. وكملت كل جهازي حرفياً. شلون الهم وانشال وهم أحمد أنطاني فلوس لجهز لبيتنا. لين أني وياه ببيت طالعين مو ويه أهله. بس يعني الأغراض مال بيت كلهم كملتهم. وأجة أحمد أخذهم وهم يدز لي صور. نختار الديكورات سوية ويشتري.

وكال لي: "أني ما راح أخلي بي شي ناقص. وإنما أجيب كل الاحتياجات. وبعد من نتزوج أنت ترتبيه على ذوقج." علاقتنا أني وياه الحمد لله كلش زينة ومرتاحين وما عدنا مشاكل. وصحته صارت كلش زينة. وما يمر يوم إذا مانحجي. يهتم لكل شي بية ويحب كل شي بية ومتقبلني بكل حالاتي. أكثر من مرة طلعنا وهماتين اشتريت وحضرت. وحرفياً تعبنا هواية. لين الاستقرار يرادله هواي جهد وتحضيرات وتعب. مصاير بس الحمد لله على كل حال. أهم شي ننجمع سوية. لين

تعبنا هواية. وحرفياً من أكثر الأمور اللي شايلة همها. شلون راح أعوف أهلي. مثل كل يوم أبجي بليل. لين راح أفارقهم. لين طول كل هالسننين أني جنت الأم والأخت والصديقة. باعتباري الكبيرة. وبوكت انتهاء علاقة أمي وأبويه صرت أني الهم كل شي. أطبخ وأنضف وأركض منا ومنا. وأخوية علاوي جان صغير ربيته على إيدي. ريحانة جنت شاهدة وياهة بكل المواقف ومداريتها. لين حالاتهـا جانت صعبة. وسارة اللي جانت تضحك بيهم. بس جان من يجي الليل جانت تجي

تبجي بحضني. وهواية أمور ما أكدر أنساها. معلقة ببالي. بس من أكثر الأشياء اللي تسعدني هوة علاقتي بأحمد. ما جنت متوقعة يجي يوم ونرجع سوية. بعد ما أنتهى كل شي. ما جنت متوقعة يجي يوم واني أصير مرته ومسجلة باسمه. بس الحمد لله أجة هذا اليوم. ومن عدها

صرت أصدك وأؤمن بمقولة: كل متوقع آت. وإجه اليوم المنتظر..... يتبع ...