رواية يأس القلوب الفصل الثالث 3 - بقلم رودة

اليندك ببناتي ويطيح دمعة منهن اخلي يندم على اللحظة اللي فكر بيها ياذيهن. وباعي اسمعيني زين، باجر انتِ والبنات تعتذرن بالعمادة وكدام كل الطلاب. لا، والله محمد آخذك سحل تعتذرين، سامعة لو لا؟ كالت وهية تبجي: "اي خالو، والله اعتذر." هاي اخر مرة نترتها وكلت: "يلا." وخرت من يمي. طلعت وسليمة مشت وراي كالت: "امسحيها بوجهي خوية، هاي الأدبسز شهرتني." لبست الحذاء أكرمكم الله وكلت

واني اباوعلها بتك عين: "كثرت دكاتج سليمة، وترا كل شي واله حد ورصيدج بدأ يخلص. ترا وداعتج كل شي اعرف ماينضم عليه شي." طلعت وسديت الباب وراي. تمشيت للبيت، لكيت الأسواق مفتوحة. دخلت، اخذت حلويات للبنات واخذتلي باكيت جكاير ورجعت للبيت. دخلت وسديت باب الكراج وراي. دخلت للبيت صحت مريم وكتلها: "هاي الحلويات انتِ واخواتج، وهاي السمسمية لمحمد والفستق لحسين." وتعرفين بعد. ضحكت وكالت: "تاج راسي والله."

بوكتهن اجن الحلويات. ضحكت وشبكتها. اباوع ريحانة وسارة يباوعن علينة بغيرة. ضحكت وفتحت ايدي واجن ركض وشبكنهن كلهن وكلت واني اشبكهن حيل: "يا يابة شكد غاليات البنات." وابوس بيهن وهنة يضحكن. ابووع على ريحانتي شون تعدلت نفسيتها شوية وتضحك ومتونسة. مجرد ماشفتها فرحانة وطلعت من جو الحزن فرحت وكلت: "الحمد لله." وباجر تفرح اكثر من ينكشف كل شي. كعدنا نباوع على الطوبة اني والولد والبنات يسولفن. واباوع شلون متجمعين كلنا ناقصنة.

بس هية خلصت اللعبة. كمت للغرفة جاي انام. تمددت على الجرباية وفتحت المبايل. شغلت اغنية: "جذاب دولبني الوكت بمحبتك... جذاب روحي تمرمرت من عشرتك... جذاب وتريد ارد انوب الك... لا ما ارد وانسى المضى... وتريد ارد انوب الك... لا ما ارد كل شي انكضى... ولو صرت بس انت الدوة... لا ما ارد وانسى المضه... جذاب... باسل كاعد اكلب بالفيس وادخن. عفت المبايل وتذكرت ريحانة. موجني طوخت وياها؟ وجريتها.

سحبت نفس من النركيلة وكلت: "لا لا تستاهل." ومنو هية علمود ترفع صوتهة علي؟ تالي وكت القزمة تصيح علي؟ هسة يامحمد اني شكو افكر؟! وشاغل نفسي؟ والله يالله طبها مرض. سحبت نفس من النركيلة وكلت: "صحيح قزمة بس بالله موبنية ضيم." استغفرت الله وكلت: "كافي باسل عيب تفكر هيج بتالي الليل." تمددت واجتني رسالة. سحبت المبايل اباوع اسراء اللزكة دازتلي: "شلونك حبيبي؟ شمرت المبايل وكلت: "اوه هاي والله بطرانة. الله ياخذج وياخذ...

حبيبج. استغفر الله. شني ياخذني؟ كمت اعلس من ورا هالنركيلة. حسيت واحد واكف فوك راسي. كعدت اباوع ابوي وجهه احمر وعصبي. بحركة وحدة شال النركيلة وركعها بالكاع وكال بعصبية: "اني شكم مرة كايليلك لا تشرب هالسم؟! كتله: "شنو بوية تتحكم بية مثلا؟! ترة اني مو باسل الصغير، اني كبرت. كال بعصبية: "حتئ لو كبرت اكسر راسك. شكم مرة كايليلك بطل تشرب هالسوالف مو زين ابني مو زين. ماتفهم انت؟!

كتله بعصبية: "لا افهم واللي يعجبني اسويه، محد يدخل بيه." كال بعصبية وهوة يهدد: "اكسر راسك اذا رفعت صوتك مرة ثانية." علية. سكتت. اخذت المحفظة والمبايل وباكيت الجكاير وطلعت وهوة يصيح علية وكال: "باسل اذا تطلع هسة بعد لاترجع للبيت." كتله: "هوة طالع وبعد ما ارجع." اسمع امي تهدي بي. طلعت شغلت السيارة وطلعت. وكفت بالسيارة بالاعظمية ونزلت. سحبت جكارة وظليت ادخن واسحب جكارة ورة جكارة.

هدت شوي تنهدت وكلت: "ابوك هذا ابوك. شلون ترفع صوتك عليه؟ ضربت السيارة وكلت: "ابوك مو صاحبك." استغفر الله ياربي. ركبت بالسيارة وطفيتهة وتمددت وغمضت عيوني. ريحانة كاعدين نتريك علمود بابا يوصلني للدوام. كملت، اخذت الجنطة وطلعت. ركبت وبابا بدأ يسوق وكال: "توكلنا على الله." وسارة كاعدة ورة. وصلنة للجامعة. نزلت اول مادخلت للمحاظرة الاولى اجة الاستاذ وكال: "بابا ريحانة، تفضلي لغرفة العميد يردونج." استغربت شنو يردون؟

كمت ورحت لغرفة العمادة. دكيت الباب ودخلت. انصدمت واني اشوف البنات كدامي واكفات ووياهن سحر بت عمتي. درت وجهي وكلت: "نعم استاذ، سولفلي الموقف وانو البنات متفقات ويا سحر وهالسوالف وقدم الي اعتذار." ابتسمت بقهر وكتله: "استاذ مو كتلكم اني ممسوية شي؟ هسة اتاكدت؟! هز راسة باسف وفتح ملف تحقيق ويا البنات وفصل لمدة 10 ايام. كتله: "استاذ تسمحلي اطلع؟

كال: "تفضلي." طلعت ودمعتي طاحت. مسحتها. شوف اقرب الناس الك من لحمك ودمك همة الياذونك. ومنو سحر؟ سمعت سحر تصيح وراي تريدني اوكف. ماوكفت. اجة عالبالي بابا. ابتسمت. اكيد هوة خلاها تعترف وتعتذر. اخ يابابا كل مرة هوة البطل مالتي. غوركت عيوني وكلت: "الله يفتحها بوجهك ويحفظك الي." كعدت بنهاية الحديقة وطلعت

دفتري من الجنطة وكتبت: "البارحة جنت اكتب وابجي واشكي لدفتري من الناس الياذوني. اليوم اني اكتب وبين الفرح والحزن. ممكن يجي يوم واوكف بوجه الي ياذوني وما ابقى انسانة خجولة؟ يجي يوم وكل هذا التعب يروح؟ زين يجي يوم ودموعي تبطل تنزل على اتفه الشغلات؟ يجي يوم وبابا وماما يرجعون وترجع حياتنا طبيعية؟ كل شي يجي بس ماما متجي... فزيت على وحدة وراي تكول: "شتسوي الحلوة؟ درت وجهي وابتسمت. شفتها وردة. ضميت الدفتر وكمت سلمت عليها.

كعدت يمي وكالت: "خاف قاطعتج؟ اكوم؟ كتلهة بسرعة: "لا لا كلشي معندي، شسالفة." ابتسمت وكالت: "شلونج؟ كتلهة: "تمام." انتِ شلونج؟ كالت تمام. ضلينة نسولف وشوي شوي تعرفنا اكثر وتبادلنا الارقام. جانت هاي اول مرة اصادق بنية. دومي كنت انسانة وحيدة. ارتاحيت لوردة كلش وهية يعني تنحب بسرعة. كمن تمشينة شوي وكالت: "تعالي عازمتج على قهوة حلوة مثلج." ابتسمت وكتلهة: "قهوة ومنج؟

لا لا متتفوت." ضحكت وضحكت. رحنا للكافتريا وطلبنا قهوة وكيك وكعدنا ناكل ونسولف. طلعتني من الجو اللي اني بيه. هية مو ملاك لا لا هية انسانة على هيئة نسمة باردة. بخمس دقائق تغير المزاج. صحيح هذا ثاني لقاء بس وردة احسها تحس بية. وما تجرأت وسألت شنو بية. اكتفت بالسكوت وتكفلت بالموضوع وطلعتني من المود الحزين. ومن هذا اليوم وردة صارت من اقرب الاشخاص الي. باسل

الصبح رجعت للبيت. دخلت للبيت اريد ابدل علمود اروح للدوام. فتحت باب المطبخ شفت ابوي كاعد يتريك وامي تصب جاي. كالت: "صباح الخير." امي ردت بابتسامة: "هلا يمة صباح النور." وابوي ماحجة. شرب جاي صعدت ابدل. دخلت للغرفة سبحت بساع وطلعت. لبست البدل العسكرية والساعة والاسلاح ورشيت عطر ومشطت شعري وطلعت الجنطة مال دوام. خليت بيها كم تراكسود واخذتها ونزلت. شافتني امي كالت: "اكعد اتريك يمة." كتلهة: "الف عافية، طالع متأخر."

طلعت ودرت وجهي وكلت: "يمة لا يضل بالج، عشر ايام وانزل." شغلت السيارة وصلت للمركز ومن المركز طلعنا للموصل التحاق. طالب ادري انت شلون تكلة بعد لا تجي للبيت؟ جاوبني. عزيز يدري بية ما اقبل يشرب هالسم. شكو يعاند؟ سحبت نفس من الجكارة وكتلة: "وهسة شلون؟ خزرني وكال: "عوف هالسم لا تموتني." ضحكت وكتلة: "عمي هاي طفينة الجكارة." كتلة: "هوة وين؟ كال: "التحق للموصل وها... لا اخابره ولا اسئل عليه. يعلي عليه صوتة. بسيطة باسل."

طبطب علئ ضهره وكال: "خوية حقك بهاي بس يبقة هوة وحيدك وعزيز كلبك." هز راسة وكال: "هوة شنو المصبرني غير هذني الكلمات." كمت صبيت كوبين جاي اله واله وخليتهن عالمكتب وشرب جاي وكال: "اي شلونك انت؟ شربت جاي وكتلة: "عايش الحمد لله." باوعلي بتك عين وكال وهوة يهز بايدة: "اشو جنك راجع شباب؟ يولي تشرب جكاير وتصفن والاغاني؟ بس لا حنيت؟ " وغمزلي. باوعتلة بتك عين وكلت: "غلطان. ويني ووين الشباب؟ كلاني الشيب."

طق اصبع وكال: "بين علينة الكبر." طكيت ضحكت وكتلة: "اشرب جايك برد." شرب وكال: "اي تشرد؟ تشرد غير الموضوع بساع. بس وين تروح مني؟ ابتسمت اله. ااخ يا عزيز شكد عزيز علية. مريم نضفت البيت وكملت كلهة. طلعت ومحمد كالي اجيب صمون واجي. راح محمد واندك الباب. استغربت معقولة اجة بهل سرعة؟ ركضت اباوع من الكامرة

وانصدمت وضربت علئ خدي: "عزا العزا هذا شجابة." مصطفى ابن عمة ناهدة. دك مبايلي اباوع هوة يدك. راسلني كم مرة ويهدد ويكلي احبج وهالسوالف. دك الباب كمزت بساع جاوبت علي وكلت بخوف وصوتي يرجف: "ها شرايد؟ اجتني صوت ضحكته وهو يكول: "فتحي الباب يحلوة." كتله: "تحلم. امشي ولي منا. لا اخابر بابا والله واكله على كل سوالف." وحتى المحادثات عندي. اخلي يموتك وداعة امي. ضحك وكال: "عادي ميهمني. افتحي الباب ما اسوي شي بس اشوفج." كتله:

"مصطفى روح منا." كال: "اويلي يابة شكد حلو اسمي بصوتج. دفتحي الباب خلي اكحل عيوني بشوفتج." كتله: "ولي منا احسن الك. ترا اني مو وحدة من صاحباتك." كال: "ايي انتي مرتي." كتله: "حلم ابليس بالجنة. ضل احلم بكيفك وخطط بكيفك. هسة محمد جاي بالطريق."

سد الخط. و اباوع كمز فوق الباب شمر ضرف وراح ركض. طلعت ركض من الغرفة ونزلت فتحت الباب مال الاستقبال وركضت اخذت الضرف ودخلت بساع وسديت الباب. كعدت على القنفة وايدي ترجف. افتح الضرف لو لا؟ اخر شي فتحته. مجموعة صور. شفت اول صورة وضليت ارجف واكلب بالصور. شمرت الصور وضليت اضرب على خدي واكول: "عزا العزاني. عزا العزاني. هاي مو اني والقرآن مو اني. مجموعة صور مفبركة الي ومحادثات وهمية."

سمعت الباب اندك. عرفته محمد. بساع اخذت الصور وضميتهن وركضت غسلت وجهي ورحت فتحتله الباب. دخل وكال: "شني نمتي؟ صار ساعة ادك بالباب." كتله: "هامادري. ماسمعت." دخل وسد الباب. خلى العلاليك على الميز وكال: "شبيج مريم ليش باجية؟ كتله: "ههه لا وين باجية. بس داكنس ودخل بعيني مدري شنو." تقرب مسح على خدي وكال: "مريم متاكدة عينج بيهة شي؟ بلعت ريكي وكتله: "ها اي اي متاكدة."

هز راسة وكعد. وعرفته مصدكني. كالساعة الكاه صافن علي ورافع حاجبة. ضليت اشتغل والهي بروحي وهم سويت ريوك وتريكنا. واني بالي مو وياه. بالي بالمصيبة الي اني بيهة. فتحت مبايلي لكيت رسالة من عنده جايني كاتب بيهة: "شلونها الصور؟ بربج هههه يخبلن مو بس شني انتي محليتهن. وها اذا متسوين الي اكلج عليه بش يرحن لابوج واخوانج وتدرين بية اسويها. يلا باي يحلوة بليل احاجيج." طاحن دموعي. مسحتهن. لا يجي محمد. عفت المبايل

وضليت افتر بالغرفة واكول: "ياربي ساعدني. شسوي هسة. شسوي؟ واكلت اضافري اكل من الخوف. *** رجعت من الدوام اني وسارة. محمد جابنة. دخلت البيت هدوء. استغربت مريم وين؟ عفت دنطتي وصعدت. رحت لغرفتهة. شعجب كل مرة هية تتلكاني بالباب وتشبكني. اليوم ماكو. دكيت باب الغرفة ودخلت. الضوة طافي. تقربت عليهة نايمة. تلمست وجهة حار. واني امشي ايدي على خدهة طاحت دمعتهة. بساع شغلت الضوة وكتلهة: "مريم شبيج ليش تبجين؟ منو وياج؟

ماتحجي. مغمضة وعيونهة يطيحن. كعدت يمةة بستة براسة وكلت وصوتي بي رجفة: "منو منو وية امي الثانية؟ منو مزعلهة؟ فتحت عيونهة حمر. كلبي وجعني. كتلهة: "احجي موكلبي راح فدوة لكلبج." مسحت دموعهة وكالت: "مابية شي حبيبتي. هيج صداع خفيف." كتلهة بقلق: "شبيج مريضة؟ شنو ياذيج؟ ناخذج للمستشفئ." هزت راسهة وكالت وهية تكوم: "هياتني شوفيني حبيبتي مابية شي. لا تخافين." "سارة وين؟ كتلهة: "هذيج جاي تصبلنا اكل." كالت:

"امشي خلي اني احضر انتن تعبانات." كتلهة: "واني ارجعهة للجرباية نامي معليج بينة ارتاحي. اليوم احنة نتغدة وننام." كالت: "بس." كتلهة: "لا بس ولا هاي. نامي." نومتهة وبست راسهة وطلعت من الغرفة. تلتكتني سارة. سولفت الهة. كالت: "خليهة ترتاح ونشوف شبيهة. مومال صداع." هزيت راسي ورحت ابدل وبالي يمةة. غسلت وبدلت ونزلت وكاعدين نتغدة اني وسارة وساكتين. دك مبايلي جدو. فتحت خط سلمت عليه وعتب علي لين صار هواي مجاينهم. كال:

"خلي محمد يجيبج انتي واخواتج هسة اليوم متجمعين." ماكدرت اكلة مانكدر. كتله: "صار جدو هسة جاينكم." سديت الخط وكلت لسارة: "كالت والله موكت التجمعات تعبانة من الدوام." كتلهة: "اني نفس الحالة هم تعبانة بس عيب من جدو. كومي كولي لمحمد وتعالي بدلي. حخابر بابا واشوف." سارة كامت واني خابرت علئ بابا جاوبني. سلمت عليه وكتلة: "حنروح لبيت جدو." كال: "الله وياكم بابا روحوا ديربالكم على حالكم وانزل من الدوام." كتله: "ان شاء الله."

كال: "اي اليوم شصار ماصار بالجامعة؟ سولف الة وكتلة: "بابا انت تدري بيهة هية مو؟ كال: "بابا ختولي معليج بيهة واعرف سوالفهة وهاي اخر مرة تندك بريحانتي وماعليج بيهة. من ترحون." كتله: "ان شاء الله بابا." وسديت الخط. اجت سارة كالت: "ححسين راح ياخذنة محمد نايم." كتلهة: "اوك." وبابا كال: "روحوا." صعدنة رححنة لمريم. كالت: "مالي خلك اروح. روحن انتن. وموتأخرن ترا اضوج بدونجن." شبكناهة وكلنة:

"اكيد يعمري مانتاخر. كم ساعة ونرجع." رحنة نبدل. لبسنا صايات ومكياج كلش خفيف بس مرة ومسكارة. ونزلنة واخذنا اخوي ححسين بيت جدي فرعين. وصلنة لكينة الكل موجود. سلمنا وكلهة تسأل على مريم وليش مااجت. كلنة الهم مالهة خلك وهالسوالف. بعدين كعدنا نسولف وعمتي سليمة تباوع النا بتك عين وبس تتهامس عبالك مدري ششايفة. وسارة بالكوة متحملة. بعدين دخلوا ولد عمي وسلموا وضلوا يسولفون ويانة. وكال مصطفى: "شعجب مريم مااجت؟ همست الي سارة:

"هوة شعلي اللوكي الحقنة تجي متجي شدخله." كرصتهة وكتلة واني اتصنع الابتسامة: "مريضة مالهة خلك." كال: "ها سلامتهة متشوف شر." فجاة كالت عمتي سليمة لعمتي افراح: "شلون لكيت مرة لطالب تخبل." كالت هيج وكلهة باوعت عليهة وكلهة كالت: "اي وشنو خلي يزوج والمن باقي؟ وهذا الكلام وبيهم الي يبتسم النا بشماتة. يحجون وسارة عيونهة صارت حمر. همست الهة: "خلي يولون معليج بيهم. لا تبجين. صيري قوية وتدرين ببابا ميزوج عليمن بعد."

كالت بصوت مكسور: "يرحن فدوة للتراب التمشي عليه امي." عيوني غوركت وكتلهة: "طركاعة اسكتي راح ابجي وياج." ضحكت وكالت: "عابت ضحكتيني من كلتي طركاعة." ضحكت وكتلهة: "ديلا اضحكي وحركي كلبهم." وغمزت الهة وضحكت. بعدين اذن المغرب. كلهة كامت تتوضة وتصلي. توضيت ورحت للغرفة الاخيرة. جان الباب شوي مفتوح. جاي ادخل علمود اخذ مصلاية. وكفت واني اسمعنهن يكولن: "عمتي سليمة تكول لافراح وبناتهم يمهم." تكلهة:

"اصبريلي وشوفي شراح اسوي بيهة. خاف خليتهم يطلقون هالمرة اقوة اذا مااسوي بيهة مرض خبيث مااطلع سليمة." نغزني كلبي. هاي عليمن جاي تحجي؟ جاوبتهة عمتي افراح: "لج سليمة استري علينة اذا درة طالب احنة سبب طلاقهم هوة وجوري ينهينا ومحمد." كالت هيج واني مصدومة ودموعي تنزل. جاوبتهة افراح:

"ميدري يمعودة خليهة علي وماتدرين بمصطفى من ضمن الاتفاق هوة حصتة مريم. واذا انسحبنة وعفنة كلشي يفضحنا. استري علينة والسحر الي سويته لطلاق طالب وجوري." شكد قوي هالمرة ابليهم بسحر يروح الرزق والصحة. وضحكت. اجت للباب جاي تطلع. تحركت بساع مشيت دخلت للحمام وسديت الباب. كعدت بالكاع اريد استوعب الي سمعته. دموعي تنزل. مستحيل. مستحيل. ضليت اضرب على خدي واكول: "هنة سبب فراق امي وابوي." ضربت على خدي وكلت:

"6 سنين امي بعيدة بسببهن. ربي اخذني تعبت." ضليت اشهك وابجي واكتم بصوتي. "هسة شلون شاسوي؟ ويعني مريم مسويلهة شي؟ مصطفى مومريضة؟ اي مومريضة. شوف شمسوي لاختي."

كمت بساع واني اسمع سارة تدور علي. غسلت وجهي اريد دموعي توكف. ما اكدر. اريد امي. شهكت و خليت ايدي على حلكي. "6 سنين يالضالمات. 6 سنين. بس كل مرة اسكت. بس هالمرة اذا ما العب بيجن طوبة واخذ حق امي وحق ابوي وحقنا كلنا. وتعب هال6 سنين والبجي البجينا والعذاب الي عشنا بي. ما اطلع ريحانة."

غسلت وجهي وخمس دقايق انتظرت وجهي يصير لونه طبيعي. طلعت ورحت اصلي بالغرفة. كملت صلاة وكعدت علئ المصلاية ادعي وعيوني تنزل بحرارة علئ خدي. مسحتهن وفزيت علئ صوت سارة وهية تكول: "وين ادور عليج يلة راح نرجع للبيت. محمد منتضرنة بالحديقة." بساع كمت ودعناهم وطلعنة بسرعة. مشة محمد واحنة وياه واني ساكتة واحس روحي راح انفجر. وصلنة للبيت صعدت ركض لغرفة سارة. دخلت وسديت الباب. شغلت الضوة. كمزت كتلهة وعيوني حمر:

"مصطفى شنو مسوي الج؟ كالت: "شنو يامصطفى؟ كتلهة: "مريم مصطفى ابن عمو شنو مسوي الج؟ ضلت ساكتة. طاحت دموعي وكلت: "احجي بداعة بابا ترا راح اموت. وداعة ماما." اشرت الي علئ الجرارة. استغربت. فتحته ولكيت مجموعة صور. اكلب ومصدومة. اباوع مريم ايدةة علئ وجهة وتبجي. شمرت الصور وكعدت بالكاع صافنة علئ المصيبة الي احنة بيها والكلام الي سمعته يحرك بية حرك. بس خلص. سكتت هواي. هالمرة راح تبدي العواقب. احنة مولعبة بيد احد.

مسحت دموعي وكلت: "مريم خابري مصطفى." كالت: "شنو؟ كتلهة: "خابري واسمعيني شنو اكلج. كليلية...