رواية يأس القلوب الفصل الثامن والعشرون 28 - بقلم رودة

خذني يمك بعد ما ظل كل عذر لا تعتذر ليل عمري وعمرك مخلص بعد ما بي صبر خل نلم احلامنا ونحفظ صورهن گبل لا ياخذهن بدربه الفجر وخل نلم الباقيات سنيني وسنينك .. نسويهن عمر وهنّ ميكفّن عمر ونبدّي من جـد وجديد بـ واهس سنين الصغر ولو وازانـه الكبر . ريحـانة فزّيت علئ سارة وهية تكعد بيـة كتـلها بنعـاس ها شتردين؟ كالت: كومي راح نتأخر علئ الصالون يمعودة. غطيت راسي وكتلها: أما ما أروح. انعسّت. سحبت اللحاف وسحلتني كومتني.

اجيت ابجي من النعاس. دخلت للحمام سبحت وطلعت. بدلت ولبست فوك ملابسي عباية خليجية ولفيت الشيلة ومخليت مكياج. لكيت سارة مكملة ومنتظرتني. نزلت وسارة شايلة الجنطة الي بيها البدلة والتاج وهالسوالف. بوستني ماما واخذنا حسين للصالون. وصلنا وراح. دخلنا وكدامي 3 عرايس. يالله نوب اجيت. ممتريكة علئ اساس ما أشتهي. أشو هسه جعـت. شوية وسارة كامت كالت: هسة اجي. استغربت وين رايحة. طلعت من الصالون وشوية ودخلت بيدها علاليك. استغربت.

تقدمت كعدت يمي وطلعت مقبلات ولفتين كـص و2 ببسي. كتلها بأستغراب: منين جبتي ولج؟ كالت بابتسامة: عيني نسيبنا جابهم. كتله: ريحانة متقبل تاكل. واجه طلقة. ضحكت وخليت ايدي علئ حلكي وكتلها: عزا العزاج سارة ولاتكعدين راحة. كال وهية تطلع اللفة: هاج اكلي يلا لاتبقين جوعانة. وكعدنا ناكل اني وياهة وتكلي: اليوم هيج أركص وهيج أسوي. واني اضحك وياها. وسحبت المـبايل من عندي تكلي: متحجين ويا باسل لو تدزيلة صورة؟ اليوم من يجي يشوفج.

وبالكوة سحبتة مني. الادبسز. ورة كم ساعة يـالله اجة دوري. بالاول لبست البدلة وبعدين كعدت علئ المقعد كدام المراية. وبدت تسويلي بالمكياج. وسارة بالمقعد الي يمي هم تسوي مكياج. بعدين كملت المكياج. سوتلي شعري. المكياج سموكي وطلـع فد شي وتغيرت 180 درجة. وشعري تسريحة بسيطة ونازلة منها خصل وتاج يصير نازك حيـل. كملت شعري والمكياج وكمت علمود اشوف شكـلي بالبدلة والمكـياج. ولمعت عيوني من الفرحة.

بدلتي لون ماروني وتكون مخصـرة من الصدر ونازلة منفوشة. ومن المقدمة مرصعة بكرستال وتكون ضيقة بشكل وبعدين منفوشة. ومكشوفة من الظهر ومن كدام وتصميمها يصير ملكي. ابتسمت بخجل واني اباوع لشكلي. النسوان الي بالصالون ضلن يصلن علئ محمد وال محمد. وسارة هم كملت شعرها والمكياج. بعدين كعدت وضلن يسولي بأضافيري. اني اضافيري اطوال وكصتهم حلوة يعني ميحتاجلي اضافر تركيب. لبست الكعب وسارة رشتلي عطر. وخابرت علئ محمد يجي ياخذنا.

وكفت كدامي تهفّيلي. ارتبكت وهية تكلي: اهدئي شبيج راح تموتين. بلعت ريكي وهزيت راسي وكالت: صدقة لمحمد طالعة كيكة شنهاي طلعتينا كسر. ابتسمت الها وضلت تاخذ الي صور. دك مبايلهة محمد. لبستني البركع وفتحوا باب الصالون وطلعت وهية شايلة البدلة. محمد فتح باب الورة وصعدت. وعدل الي بدلتي وسارة كعدت بالصدر. صعد محمد قبل لايسوق كال: بلا اشوفج. ابتسمت بخجل ورفعت راسي. شافني مد راسة وباسني من راسي.

يمة اجيت ابجي وكالساع المحه يبـاوع بالمراية ويدور عيونة مبين مقهور. واني بالكوة لازمة دموعي. وصلنا للقـاعة. دخل السيارة ونزل نزلني علئ كيف واباوع هواية سيارات يم باب القاعة يعني كلها جايـة. تقدمت لزمني من ايدي سندت روحي عليه ودخلني للقاعة وارتفعت الهلاهل والهوسات. وسارة من ورة شايلة بدلتي وتهلهل واني مبتسمة بخجل. تقدم محمد كعدني علئ الكوشة وباس راسي وماتحمل بساع طلع من القاعة واني دموعي بعيني. مادري شلون مابجيت.

تقدمت ماما ومريم بوسني وعدلن الي البدلة. اباوع لماما صدقة لمحمد لابسة فستان زيتوني طويل مخصر علئ الجسم ومن جوة يصير شوية منفوش. وشعرها مبروم والمكياج ومخلية شال علئ اكتافها تمسح بدموعها وتصلي علئ محمد. ومريم لابسة فستان قصير لون احمر والشعر نازل والمكياج وكعب اسود. وسارة فستان ماروني بلون بدلتي وهم قصير ومخصر ومكياج وتسريحة. اخوات العروس بعد تقدمت سارة للبنية الي واكفة علئ الديجي وكالت الها تشغل اغاني.

واشتغل الردح والهوسات. اباوع كلها بالنص تركص. ابتسمت واجتي مريم كومتني ركصتني واركص واحس حينغمي علي من الخجل. شوية وكعدتني وارتفعت الهلاهل. دخلوا اهل العريس. يمة كلبي حسيته راح يطلع من مكانه. تقدمت عمتي تهوس بالنص وتكول: عيون الغزال عيون جنتنا، صلوا علئ النبي والصيدة صيدتنا. ورجعت هوست وكالت: ولاتكول محمرة جنهة طماطة. ولاتكول محمرة. وكلها بالنص وية عمتي. ابتسمت بخجل تقدمت

بوستني وشمرت جكليت وكالت: الف الصلاة والسلام عليك ياحبيب الله محمد، نتشكر من عمها وابوها نتشكر من كال اخذوها، وركبتها صواني ستيل ويلوك الذهب بيها. وكومتني وياهة وصارت عيني علئ الباب من كلها صارت علئ صفحة ودخل باسل. وارتفعت الهلاهل. انسحنت روحي من شفته لابس قاط اسود والقميص ابيض والدكمة الفوك مفتوحة. شعره مرفوع والساعة وعروق ايده البارزة الاخذت روحي. تقدم ومبين عليه الارتباك.

تقدمت عمتي هلهلت وكالت: واسمر ويخبل كل القوط تلوك عليه، اسمر ويخبل. ضحك وبوسها من راسها. وعماتة وخالتة يهوسن الة. تقدم باسني من راسي وهمس: حلقومتـي. ابتسمت بخجل. وهوست عمته وهية تكول: لفها بقميصك لايطيرها الهوة. يمة غير اجيت اموت بمكاني. ضحك وشبكني وارتفعت الهلاهل. حسيت روحي صخنت. وخر وكعدت وكعد يمي وهمس: بوية هديتي حيلي شطالعة؟ هذا اللبس المستور الكلتيلي عليه لعد بوية اذا هذا مستور الماقبلت تلبسينة شلونه؟

يمة بالكوة ضميت ضحكتي. بعد مشايف شي. الاغاني مشتغلة وكلها تركص. لحد ما سحبتني سارة كومتني وكلها وخرت من النص. بقيت بس اني وهمست الي سارة: عوفي الخجل علئ صفحة وتونسي يمعودة. باسل مسح كصته وباوعلي واشتغلت اغنية اسمر والعيون وساع جتالة. واندمجت واتمايل بخصري واهز جتف وية كل ردحة. اتمايل بشعري واهز ركبة واندمجت كلش. رفعت راسي اجتة عيني بعينة شفتة بس يرمش وكالساع ماسح كصته.

لحد ابتسمت وهزيت جتف وضحكت وهوة هز راس ومسح كصته. ومادري شلون راح الخجل وصرت ملكة الساحة وكلها تباوعلي باعجاب. لحد ماتقدمت عمتي كومته يمي بالكوة مايقبل وكف يمي واباوعله مرتبك. يمة حيكتلني. تقربت يمة و هزيت جتف وهوة عينة تركزت علئ ركبتي ونزلت عيونه. درت وجهي بخجل واستمريت اهز لحد مالزمني من ايدي. صرت قريبة عليه كلش تقريبا بحضنة وهزيت جتف وضحكت وطلعت غمازاتي. لزمني من خصري وضليت اتمايل بين اديه وهوة راح بغير عالم.

نسينا كل الموجودين وضلت عيونا تحجي وعيونه تتجول علئ جسمي. همست بهدوء وخجل: عيونك باسل. همس: عاقلات عيوني بس خصرج يعيل. يمة. كال هيج رجف جسمي وكال بهدوء: تنجوي عيوني من اشوفج شلون. لو كضيت خصرج وحاوطني من خصري. قشعر جسمي وهمس: شدعوه هلگد خصرج يهد الحيل. وشدد قبضته وهمس وعيونه ذبلانة: خصر امرايه خصرج يجرح الشوف. دنكت بخجل. يمة انتهيت. عزا العزاك. ضلينا نتمايل اني وياه وية الاغنية الي شغلوها

مال محمد عبد الجبار: راح اسجل روحي بأسمك. محاوط خصري واني محاوطته من ركبته ونتمايل وصافن علية. يمة شسويت بالولد. ابتسمت حس علئ روحة وتنهد وهمس: شسويتي بية؟ شطالعة؟ شهل حركات ماعرفتج بوية؟ نوب شلون تهزين وية كل هزة تهدين حيلي. هوة يحجي واني حسيت روحي صخنت بالخجل. خلصت الاغنية وفزينا ثنينا واشتغلت الاضوية. وخرت بخجل وكلها تهلهل وفرحانين. تقدم كعدنا واجتي سارة كال: من رخصتك عريسنا خلي تلبس الفستان الثاني.

باوع لساعتة وكال بارتباك: لا تاخرت بعد ماالحك الولد منتظريني. كتلة: لا باسل الله عليك لا تزعلني والله اخر فستان. تنهد وكال: يلة. ابتسمت وكمت كتلة: مو تعوفني وتروح. ابتسم وكال: لا ما اعوفج. اخذني سارة ومريم لغرفة التبديل ونزعت البدلة ولبست الفستان. اييي هسة راح اخذ راحتي بالركص لين البدلة قيدتني. اما هذا فستان ومخصر الجسم يعني روح للكاع. ضحكت و اباوع لروحي بالمراية كلش عاجبني شكلي والفستان اذا شافه باسل يموتني.

لونه اسود وبطانته لون بيجي ومخصر علئ الجسم وفتحة من الظهر تكون مشبكة ومن الصدر نفس الشي. وشعري نازل والمكياج. طلعت وسارة هلهلت. رفع راسة شافني شوية وعقج حواجبة. ابتسمت وسارة شغلت اغنية والحفلة والجو مشتعل ومن ركصك يشيب الطفل وبس انت وحدة بالحفل وهز يالكمر شعت شعر. كلها صارت بالنص ضلن يركصن واني وياهن. واكفة كدام عيونة ومن صار الردح ضليت اهز بخصري وهوة عيونة علئ خصري. وكلها كعدت بس اني بالنص ومن

بالاغنية كال وية الهوة: شعرك صعد. كعد الناس وماكعد. هزيت واتمايل بشعري بعدين ضليت اهز جتف ومندمجة ودرت واهز وعايشة اللحظة. تقربت مريم وهمست: اكعدي كافي فلك الولد تسودن. ضحكت ولزمت فستاني وصعدت علئ الكوشة وكعدت يمة. بلعت ريكي وكتلة بخجل: ها حبيبي؟ همس وهوة يمسح وجهة: انت وعيونج وشعرج وهذا فستانج فرهدوا حيلي علكيف بوية شني؟ وغمز وكال: صدك صرتي مغريـة. ابشرج. باوع بمكر. غمضت عيوني بخجل ونوب فتحتهم

وضربته علئ ايدة وكتلة: لاتحجي هيج عفية والله اخجل. كال بهمس: جا ماخجلتي من هزيتي كبال عيني وهزيتني هز. بلعت ريكي وكتلة: مو يعني يوم ميتعوض ومرة بالعمر كلت خلي اتونس وبعدين مكتلي حلو الفستان. مسح كصته وكال: بعدين نتحاسب عليه الفستان. بعدين بعد روحي ضحكت وهوة ضحك وجر ايدي باسها وبعدين حناني وسوينا هذي المراسيم وهالسوالف. وبعدين رجعت لبست البدلة ورحنا للمصور اني وياه وماما وعمتي وسارة ومريم.

ومن المصور كبـل للبيت لين خلصـت الحفلة. دخلوني للبيت ومريم شايلة الي البدلة من ورة وسارة تهوس وتكول بهمس: جبنالك وردة تشم بيها، بس كون الوردة تداريها. وهلا وهلا. اباوع الساعة بـ9 بليل. طلع بابا من الغرفة شافني تقدم مبتسم واني ابتسمت بخجل. ضمنني لحضنة حيـل وكال: شايفة كل الخير باباتي. هزيت راسي ودموعي تجمعت بعيني. مسد علئ شعري وكال: طالعة اميرة باباتي. واني خنست بحضنة وضل يسولف وياي وينصحني واني دموعي تنزل ويمسحها.

وحسين ومحمد هم باركولي وحضنوني واني بالكوة مصبرة نفسي وماانفجر بالبجي. نوب بابا كال: لعد وين امج؟ سارة مسحت دموعها وضحكت وكالت: دتاكل بالمطبخ جوعانة. ضحكنا وبابا دخل للمطبخ. وطبعا مبدلين وقوط وهالسوالف لين جاي يرحون لحنة الولد الي مسويها لباسل. صعدت للغرفة ووداد بقت يمنا وضلينا ناخذ صور سوية اربعتنا ومكيفين. بعدين دخلت للحمام سبحت ولبست دشداشة قصيرة ورفعت شعري كباية.

وسارة خلتلي ماسك مرطب لوجهي علمود ميتحسس من المكياج. وكعدنا نكلب بالصور وبفيدوهات الحنة. يمة اشو من شفت نفسي شلون ركصت فد خجلت خرب يومي والله اهز هز ونصبن علية كالعادة. وخلصناها سوالف وضحك واليوم اخر يوم يمهم ... طالب دخلت للمطبخ جاي اكول جوري وسكتت واني اباوع لمنضرها اليسحن الروح وهية واكفة فاتحة الثلاجة وواكفة تباوع حايرة شنو تاكل. والفستان ياكل عليها ويشرب. تقدمت وهمست: شتسوي الحلوة؟ شافتني ابتسمت

وتقدمت باستني وكالت: ها عمري دا اشوف شي اكله جعت. ابتسمت وهية وكفت كدامي ترتبلي بالقاط وتعدل بالارباط وكال: راح ترحون للحنة؟ كتلها: اي. كتلها: شلونج تعبتي؟ كالت: لا والله بالعكس كلش تونست. بس كتلها: شنو؟ كالت وهية تمسح دموعها: لو شايف ريحانة شطالعة ما جاي اتخـيل باجر تروح. وعيونها غوركت. ضميتها لحضنـي تنهدت وكتلها: بوية هية بنتج وشوكت ماتردين اخذج الها قابل طايرة؟ وهية هم تجينا ماتكطع. مسحي دموعج لاتشوفج وتنقهر.

وروحي يمها تدرين بيها بس تبجي مونوب تبجين وياهة. يايابة واني اكول بناتي عليمن طالعات امهات دميعة اثاري علئ امهن. بس شنو وطالعات حلوات علئ امهن الي يشوفج يكول اختهم. هنيالك يطالب. هنيالك. ابتسمت بخجل وكال وهية تضرب علئ صدري: اي قشمرني قشمرني. كتلها: الصراحة هاي يروح طالب. ابتسمت وبستها براسها وكالت: اكلي زين وروحي اشرب دوة وارتاحي باجر وراج تعب. هزت راسها وراحت واني مسحور بشكلها شطالعة.

بعد بيتي صحت علئ حسين ومحمد واجاني علاوي يركض لابس القاط. ضحكت وشلته وكلت: هلا بحبيب ابوه شطالع بوية عريس. ضحك وكال: اي ماما كالتلي انت العريس. ضحكت وبسته وكلت: احلئ عريس بوية. نزلوا الولد وطلعنا بالسيارة اسوق. وصلنا لبيت عزيز لكينا مرتبين الشارع والكراسي والزينة. استقبلنا عزيز وباسل سلمت وباركتله وهواي ناس جاية وشغلوا الاغاني. كاعد علئ الكرسي واباوع عليهم شلون يركصون جوبي.

وكعد عزيز يمي وكال: يـابة دبتسم شوية قابل بنتك راح اعدمها. ضحكت وكتلة: اشحدك. كال: لا يابة مبين عليك ضايج يمعود بنتك بعيوني وتدري شكد اعز ريحانة وبعدين بعد اخوك. اني لو عندي بعد ولد جا خطبت الهم بناتك بس اخ الحمدالله. ابتسمت واني اشوف الفرحة بعيونه لابنه الوحيد باسل. ضلينا نسولف ونضحك ومامخلي واحد ماعازمة وسواها حنة كلها تسولف بيها والجماعة الي ويانا هم كلهم عازمهم. منا لحد الساعة ثنتين بليل يالة رجعنا للبيت.

نزلت من السيارة والولد وياي وحسين شايل علاوي ويهوسلة ويكلة: يهل القوط ذبوا القوط. علاوي لبس قاطة ضحكت و افتح بالقفل وكال محمد حسين: شهرنا كالساع يكلي واني شوكت اعرس واني واني. بوية عرسلة وخلصنا. كال حسين: عهد مني بوية اذا زوجتني مااوصلكم بعد اكعد بغرفتي واسكت. ضحكت وكتلة: لهذا السبب اني مااريد ازوجك. ضحكوا ودخلنا وهوة مستمر يهوس. ومدري منين يألف هوساتة. بوية صرعني صرع لحد مادخلت للغرفة شمرت السترة والارباط.

اباوع جوري مو هنا اكيد فوك يم ريحانة. دخلت سبحت وطلعت لبس بجامة وكيمونة وتمددت علئ الجرباية. وشوية وانفتح الباب ودخلت جوري وريحانة. ابتسمت وفتحت ايدي واجت تركض ريحانة شمرت روحها بحضني. شبكتها حيل وبستها براسها ومديت ايدي بهدوء مسحت دموعها وهمست باذانها: ابوج وياج وبكل وقت وبكل ثانية روحي معلكة بروحج. شوكت ماتحتاجيني اني موجود بوية لاتترددين باي لحظة تجيني حضني واماني متوفر الج بكل وقت. هزت راسها وشهكت.

بوية كطعت كلبي ببجيها. نوب احير منو اسكت هية لو امها البس تبجي عليها يامحمد. شوية وسكتتها وضلينا نسولف ونضحك لحد مانامت بنصنا اني وجوري. باسل خلصت الحنة تونست وية الولد من الساعة 9 لحد الـ2 وابوي ماقصر مثل ماجان يكلي قبل لأسويلك حنة كلها تحجي بيها. ابتسمت واني اذكر شلون هوس الي بالنص: غاليي بوية غالي. دخلت للغرفة تعـبان شمرت السترة علئ القنفة وكفت كدام المراية واتذكرت شكل ريحانتي شطالعة اليوم؟ تسحن الروح !

اخذت عقلي وروحي بتصرفاتها، بحركاتها، ملامحها. كل شي بيها يجذبني ويخليني أحبها زيادة. لحد هسة شكلها باقي ببالي، بوية، طالعة أميرة. تنهدت كلت بابتسامة: "ريحانة، باسل بعد ما جايب طاري شكلها. ببالي من تركص". استغفرت. "الله." مسحت وجهي. "بوية، صدمتني صدمة! نوب حتى ما توقعتها تعرف تركص هيج". تنهدت بابتسامة واني أرجع أتخيل شكلها. "خذت عقلي". "صبرني عليها يخو زينب، صبرني".

فزيت على صوت الباب انفتح. دخلت أمي للغرفة. جابوا القاط مال عرس من الكوي، علكته وتقدمت، بستني وباركت لي. فرحانة وكالت: "يمة، يوم الفرح من شفت عرسك وليدي". بستها، بواسها وكلت: "عمرج طويل يبعد حيلي". "اي يمة، شنو هاي الهوسات؟ "اليوم صرتي مهوسجية". ضحكت وكالت: "يايمة غير عرس الغالي، لعد تريدني اسكت؟ ". "يمة ريحانة، اللهم صل على محمد وآل محمد، طالعة تجنن". وكلها تكلي: "ما عدها اخت"، لو هنيال باسل لو مادري شني.

ابتسمت وشبكتني وكالت: "يمة، يرم أشوف أطفالك إن شاء الله". شبكت أمي حيل. أكثر إنسانة قريبة عليّ صارت لي أم وأخت وكل شي. طول كل هاي السنين ما تعرف تنام إذا أني مو بالبيت. من أجيني من الدوام تحير شنو تسوي لي. وهواي سوالف. شلون أجازيها؟ بستها براسها وايدها وكلت بهدوء: "تبقين أنتِ ست الكل". مسحت دموعها وابتسمت، وبوستني. وشوية وطلعت من الغرفة. تمددت على الجرباية، سحبت المبايل.

لكيت ريحانة دازت لي: "اليوم ما أسهر ويا أم للأسف، رايحة أنام بحضن بابا". ابتسمت بغيرة وكلت: "هانت، آخر يوم باجر تنامين بحضني، تنامين. وخلي أشوف بعد منو ياخذج مني". وغمضت عيوني ويجي منظرها ببالي من تركص، وأرجع أستغفر الله. *** **ريحانة**

فزيت الصبح على صوت الهوسة. غطيت راسي. هفف، أنعس وما بيه حيل أكوم. راح أبجي والله. سحلتني ماما، كومتني. دخلت للحمام، سبحت وطلعت. لكيتها محضرت لي صينية ريوك. كعدت أتريك ومجتمعين كلنا على الصينية. وخالاتي وأقارب بابا ونسوان خوالي وكلها عدنا. مكلوبة الدنيا كلاب. وأباوع بابا والولد يركضون منا ومنا. كمت بدلت. وماما اليوم حتروح وياي للصالون والبنات يبقن. كملت تبدل ونزلت. لكيت ماما يم حسين بالسيارة تنتظرني. صعدت وسديت الباب وصافنة على الجامعة ودموعي بعيني.

بس واحد يكلي: "بز". أبجي. وصلنا للصالون. ورة مدري شكد، أجة دوري وبدوا يمكيجون الي. بچيت مرتين. لحد ما أم الصالون كالت: "ماما، شسالفة المكياج مالتج؟

كالساعة يخرب. امسحي دموعج ماما". صلت تهدأ بية لحد ما سكتت. كملوا الي المكياج والشعر. وأباوع أمي تهلهل ودموعها تنزل. باوعت لشكلَي بالمراية بالبدلة البيضة. ابتسمت وعيوني مدمعة. حتى أحلى من البارحة بالحنة. المكياج، التسريحة، البدلة، كل شي حلو. خليت عطر. وماما عدلت لي البدلة وخابرت الولد يجون ياخذونا. شوية ودك مبايل ماما.

كالت: "أجة حسين". لبستني البركع وغطت وجهي وطلعنا، وهي شايلة البدلة من ورة. نزل حسين فتح لي الباب وصعدت. والبدلة كلش منفوشة ويدخل بالبدلة ويرجع لي ورا. بعدين صعد يسوق ومشغل أغنية ويصفك. هو وماما. وكالساع مبتسم لي. وأني عيوني مدمعة وأبتسم. وصلنا، وكف السيارة يم باب الاستقبال. ونزلت وتلكوني بالهلاهل والصلاة على محمد والجكليت. مدري منين يتطافر. وطبعاً تأخرت بالصالون ساعتين. بحيث حتى أهل العريس لكينـاهم جايين.

كعدت ومرتبكة كلش. وسارة ومريم واكفات يمي. أباوع وجه سارة أحمر دم. عرفتها باجية. ومريم كالساع خازرتها. وأني باقية أعصر بعيوني علمود ما أبجي. لحد ما صارت هوسات برة. *** **سارة**

سمعت صوت هوسات. رحت أركض للشباك علمود أباوع. وكفت علمود أباوع. وصاير أزدحام على الشباك. البنات كلها تباوع. أباوع عمي عزيز لابس قاط نيلي والقميص أبيض وطالع فد شي. تقدم سلم على بابا واتحاضنوا. ومدري شكلة بس أكيد جاي يتشكرون من عده. مدري شلون. وبعدين صارت الهوسات. وعمام باسل والخوال بالنص ويهوسون ويكولون: "نتشكر من عمها وأبوها". "نتشكر من كال اخذوها". وراحت عيني على واحد شاب معضـل ولابس بنطـرون وقمـيص ومفصلات تفصل عليه.

أشر لباسل وكله: "لادبجلك دبج معدان أوصل الطين لجتافي". وضل يهوسلة. وبعدين هم ذب اله كم هوسة ورجع كال: "إحنا الطكينة إصبعنا وحتّى الحاكم وكفنا. إحنا الطكينا إصبعنا". وبعدين شبك باسل ودك على اجتافه. ومدري شنو كاله. أعتقد هم باركله. بلعت ريكي وكلت بهمس للبنية الي واكفة يمي: "هذا منو؟ ". وأشرت الها علي. باوعت وكالت: "ما أدري بس يمكن واحد من أصدقاء العريس". ورجعن يباوعن. همزين الجام مضلل.

تحركت وكلت: "آخخ بس خرب يومه والله قطعة. استغفر الله ياربي". شبيج سارة؟ رحت يم ريحانة. وشوي وعلت الهلاهل. دخل العريـس وبابا. *** **ريحانة** دخل بابا وباسل. تقدم بابا وكفني وباسني من راسي. وضل يوصي بباسل عليّ. وباسل يكل: "بعيوني عمي". ورجع باسني بابا براسي. ما تحملت وضليت أبجي وأشهك. وشمرت روحي بحضنه. وكلهة تصيح: "يا خطية". وأني أزيد بالبجي بحضن بابا ومجلبة بقميصه. وهو حاضني

ويطبطب على ضهري ويكول: "هاهية بوية، خلص. كافي بجي". وأني جسمي كلة يهتز من البجي. ما أريد أعوف بابا. خلّي إيدي بإيد باسل. ومسح عيونه الصارن حمر دم. ودخلوا أخواني. ونفس الحالة. متت من البجي. شصار بية؟ واجت سارة. رتبت وجهي. وباسل شبك أيدي بين إيده وتقرب باسني براسي.

ومسح دموعي وكال: "بوية، كافي بجي. هاي إحنا يمهم. مسافة طريق وشوكت ما تردين أجيبج". اللهم هزيت راسي. وطلعنا. عمي عزيز واكف بالباب. بوسني براسي وبارك لي وبارك لباسل. وارتفعت الهلاهل والهوسات. من طلعنة يم باب الشارع. وأني أسمع عمي عزيز يصيح: "لحد يرميييي! ضموا الأسلحة". والحمد لله ما خلى واحد يرمي. لين حتى حرام. وكل شي يصير.

صعدنا بالسيارة. وأني بعدني أحس بخنكة. أني وباسل كاعدين ورة وعمتي بالصدر. وعمي يسوق. والزفة ورانا. وأني دموعي تنزل بهدوء. باس أيدي وهمس: "ها حبيبي؟ ". كافي بجي. هزيت راسي. وضل يسولف وياي. وأني ميتة خجل ومرتبكة. وشسمة؟

أريد أمي. وصلنا للمصور. نزلنا صورنا. واللقطات الي اختاريناها كلش حلوة. كملنا تصوير ورجعنا. ويسوقون وكالساع موكفين السيارات جماعته ونازلين يركصون بنص الشارع. لحد ما وصلنا للبيت. نزل باسل ونزلني. ولزمني من أيدي. وذبحوا خروف يم رجلي. كمزت يم باسل. ضحك ودخلنا جوة. كعدني بالاستقبال وباس راسي. وطلع. وأني بقيت أباوع للباب منتظرة أمي وأخواتي يدخلن. لحد ما دخلنا. اجني يمي. وأني مجلبة بماما.

وهية تهدأ بية وتكول: "يروح أمج، كافي بجي. لا يصير فال". وبعدين أنتِ تجينا واحنا نجيج. بعد على شنو البجي؟ ومسحت لي دموعي. وهدأتني. ورجعت أضحك وية البنات. لحد ما صبوا العشة. أباوع عليهم شلون ياكلون. وسارة تاكل وتأشر لي عود شوفيني داكل. الأدبسز. وأني ميتة من الجوع. كملوا كل شي.

وعمتي كالت: "يلا حبيبتي خلي نصعدج للغرفة". بلعت ريكي وكمت. ومريم وسارة لازمات البدلة. نصعد على الدرج. وكالساع أعثر من ورا البدلة. لحد ما وصلنا للغرفة. فتحوا الباب ودخلت. ابتسمت وأني أشوف الغرفة نفس ما أردتها بالضبط. الترتيب، الأثاث، كل شي. كعدوني على الجرباية. وضلن يسولفن وياي. وأني كلبي يدك حيل. لحد ما سمعت هوسات جوة.

وهمة يكولون: "زفيناه بصاية حيدر". "زفيناه بصاية حيدر". يمة حسيت كلبي راح يوكف. ووصلوا يم باب الغرفة. وكالوا: "عريس وأربعة يزفونه". "عريس وأربعة يزفونه". انفتح باب الغرفة ودخل باسل وماما وعمتي وسارة ومريم. طلعوا. وأني مجلبة بيهم. طلعوا وسدوا الباب. بلعت ريكي والدموع بعيني. شمر السترة على الجرباية وتقدم وكف كبالي. وباسني براسي وكال بهدوء: "مبروك حبيبي". ابتسمت بخجل وكلت: "الله يبارك". انتبه علية قلقة وجسمي بيه رجفة.

حاوطني من خصري وكال بهدوء: "اهدئي رويحتي وكافي بجي". ومسح دموعي وشبكتني. وبادلته الشبكة. وأني ميتة من الخجل. شوية

وخر وكال وهو يباوع للميز: "يلا روحي بدلي علمود نتعشى. أكيد جوعانة". هزيت راسي. وتقدمت دخلت للحمام. لكيت السيت الأبيض معـلك. فتحت البدلة بهدوء ودخلت جوة الدوش. سبحت. حسيت نفسي ارتاحت. نشفت جسمي ولبست السيت. عزا فضيحة وقصير حيـل. طلعت وأني ميتة من الخجل. وأنشّف بشعري. شافني ابتسم وصفن. وبعدين أخذ ملابسه ودخل للحمام. شوية وطلع. نشف شعره ومشط.

وسحبني وكال: "تعالي أكلي". كعدني يمة. وبديت آكل على كيفي. وهو يوكلني. كملنا. ودة الصينية. وكمت غسلت. وهو غسـل. كعدت على الجرباية. وهو واكف كبالي. ابتسم بمكر وكال: "ايي هسة خوش نتحاسب". تقدم وكال: "ليش تنكدين علية هواي؟ وتتعاركين هواي؟ وتشلعين كلبي؟ ". وكلما يتقدم أني أرجع لي ورا. لحد ما حاوطني من خصري وكال: "وكال يومية تصيرين حلوة؟ هاي وهمس قريب يم ركبتي: "ماتكولين هذا الولد خطية". ابتسمت بخجل وجسمي رجف.

باسني بهدوء وهمس يم ركبتي: "أحبج بويـة". وبدأ يبوس بوجهي وحاضني حـيل. نزل لركبتي. غمضت عيوني. عضني خفيف وكال: "من أكول حلقوم محد يصدكني". عضيت شفتي بخجل. لحد ما ........ الساعة 5 الفجر. نايمة علئ صدره ومحاوطني بأديه وباس خدي وكال: "نعستي حبيبي." همست بنعاس: "هممم." باسني بشفتي بهدوء وكال: "احبج." ضميت راسي بصدره وكلت: "اني هم." وغفيت بحضنه.

فزيت الصبح علئ صوت منشف الشعر. فتحت عيوني بنعاس، شفته باسل واكف كدام المراية، مبين هستوه طالع من الحمام ولاف المنشفة علئ خصره وينشف بشعره. غطيت روحي باللحاف. هوة شافني ابتسم. تقدم كرفس روحه كدامي وكال بحنية: "شلونج حلقومتي." همست بخجل: "زينة." باسني بخدي وكال: "شهل صباح الحلو، اصبح بهل وجه اللي يرد الروح." ابتسمت وكال: "بعدج تنعسين." كتله: "امم." شكـد كال: "بـ 11 وعود جاي اكعدج. اجو اهلج علمود نتريك سوة." وهاي

فتحت عيوني بفرح وكتله: "صدك." كال: "ايي يلا كومي لو تبقين." كتله: "لا كايمة." سحبت الروب لبسته وكمت. دخلت للحمام سبحت وكملت. طلعت لافة المنشفة، نسيت مماخدة الملابس وبعـدني خجلانة منه. شفته متمدد علئ الجرباية لابـس دشداشة بيضة ويكلب بالمبايل. ابتسمت علئ شكله. فتحت الكنتور ادور علئ القفطان. سحبته ودخلت للحمام بدلت وطلعت. لكيته واكف يرش عطر. شافني تقدم باسني براسي وكال: "شهل جمال بوي." ابتسمت. دنك باسني بعيوني وكال:

"احبهن بويه." احبتهن. لا اراديا شبكته وهوة حاوطني باديه. وكفت كدام المراية وهوة مجتف اديه وواكف كدامي. كتلة بخجل: "باسل اريد امشط." كال: "اي مشطي." كتلة: "تبقئ هيج تباوعلي." ضحك وكال: "ريحانتي وبكيفي." ابتسمت وامشط. سحب المشط ضل هوة يمشط الي. سويت شعري ضفيرة وخليت مكياج خفيف ولـبست الشال ورشيت عطر. لزمني من ايدي ونزلنا سوية.