رواية زهرة وسط اشواك الفصل الرابع عشر 14 - بقلم فريدة احمد

خرجت الدكتورة بعد ما كشفت على زهرة وهي بتقول بابتسامة: مبروك المدام حامل. صدمة. صدمة. صدمة. وصمت احتلهم. بصوا لبعض كلهم بعدم استيعاب. انتبهوا على صوت هاورن اللي بص للدكتورة وقال بغلظة: متأكدة يادكتورة إنها حامل. الدكتورة بتأكيد: متأكدة طبعًا. كل الأعراض اللي عندها بتأكد إن المدام حامل. ولما كشفت عليها اتأكدت أكتر. كلهم كانوا بيبصوا بقلق لحمزة اللي ملامح الصدمة والزهول على وشه ومفيش أي رد فعل منه. حتى منطقش. هارون:

وصل الدكتورة يا رحيم. وبعد ما الدكتورة نزلت، أمينة بسخرية قالت: معقولة يكون الطب اتطور لدرجة إنهم يقدروا يعرفوا الواحدة حامل ولا لأ من تالت يوم جواز. طب والله صدق اللي قال العلم نور. بصت لحمزة اللي كان لسه بيحاول يستوعب وتابعت بنفس السخرية: الف مبروك يا ابن بطني على حمل مراتك. بصتلهم كلهم وقالت: عروسة ابني الشريفة طلعت حامل وابني لسه مدخلش عليها. حمزة بص لها بصدمة وهي كملت: يتري حامل من مين. هارون بحدة:

امييينه. اخرسي. أمينة بصوت عالي: واخرس ليه. أنتو مش سامعين الدكتورة قالت إيه. بتقول إن السنيورة حامل. طب حامل إزاي. حامل إزاي وهي مكملتش 3 أيام متجوزة. كملت بثقة وهي بتبص لحمزة وقالت: دا غير إني متأكدة إن ابنك مدخلش عليها لسه. ملهاش تفسير تاني غير إنها ماشية في البطال. أنهت كلامها لتتفاجأ بصفعة قوية من هارون اللي قال بغضب: كلمة زيادة ومش هيطلع عليكي نهار. انتي فاهمة. بصت له بصدمة بعد ما حطت إيدها

على خدها وقالت بزهول: بتمد إيدك عليا يا حاجة. هارون: وأقطع لسانك لو فكرتي تتكلمي في شرف البت تاني. أخيرًا حمزة نطق وقال: بس أمي مغلطتش يا بوي. بصله بجمود وكمل: ولا انت شايف إيه يا حاجة هارون. هارون: انت بتقول إيه. هتعوم على عومها. الدكتورة دي أكيد متفهمش حاجة في الطبخ. حمزة: تمام. وأنا هتأكد بنفسي. وسابهم ودخل على زهرة الأوضة بغضب أعمى. بص لعمتو اللي قاعدة جمب زهرة اللي كانت بتفوق لسه. حمزة: سيبينا لوحدنا يا عمتي.

صفية بخوف على زهرة: لسه مفاقتش كويس يا حمزة. زهرة كانت بتفتح عينيها أول ما شافته مسكت في صافية وقالت بخوف: عمتو متسبنيش. صفية بصت له وقالت: دي تعبانة يا ابني براحة عليها. وهي بتبص له بترجي يرحمها. حمزة: يلا يا عمتي لو سمحتي. قامت صفية وخرجت بقلة حيلة. وزهرة رجعت لآخر السرير برعب من شكله. قفل باب الأوضة بالمفتاح وقرب عليها وقال بهدوء مرعب: حامل من مين.

زهرة كل ده كانت خايفة من موضوع الصور لكن متعرفش أي حاجة عن الحمل لأنها لسه فايقة. ردت بدون فهم: يعني إيه حامل. ا. انت بتقول إيه. أما كلهم بره كانوا واقفين بخوف وقلق من اللي حمزة ممكن يعمله في زهرة. صفية بقلق وخوف عليها بصت لهارون وقالت: هارون انت هتسيبه كده. دا ممكن يعمل فيها حاجة. هارون قرب على الباب وابتدي يخبط وهو بيقول: حمزززة. افتح الباب. افتح يا حمزة. لكن حمزة مكانش بيرد. فضلوا كلهم يخبطوا على الباب بخوف.

وحمزة جوة كان غير مبالي للخبط اللي على الباب. هارون بحدة: حمزة افتح بقولك. حمزة من جوا بكل هدوء: متقلقش يا بوي. بتفاهم أنا ومراتي بس. وبص لزهرة بهدوء مريب: مين أبو اللي في بطنك. انطقي. زهرة وهي لسه مش قادرة تستوعب اللي بيقوله: ا. انت بـ بتقول إيه. أنا مش فاهمة حاجة. حمزة وهو بيحاول يسيطر على نفسه: أنا لحد دلوقتي ماسك نفسي. اخلصييي. مسح على وشه وقال بغضب مكبوت: الدكتورة بتقول إنك حامل. حامل من مييييييين. زهرة بصدمة:

. ا. نت ب بتقول إيه. أنا مش حامل. وهحمل إزاي وانت ملمستنيش. حمزة: ما هو أنا مبتكلمش عن نفسي ياروح أمك. كمل بزعيق: غلطتي مع مين يابت وسلمتيلو نفسك. زهرة بغضب: انت بتقول إيه. بتقول إيه. أنا مفيش حد لمسني. الدكتورة دي أكيد شخصت غلط. أنا مش حامل. مش حامل. مسح على وشه بغضب وعصبية. بعدين مسكها من شعرها جرها من على السرير وقال وهو بيزقها ناحية الدولاب: في ثواني تكوني لابسة. هنروح لدكتور تاني يكشف عليكي. يلااا اخلصييي.

هزت راسها بالموافقة بسرعة وهي بتمسح دموعها اللي بتنزل بوجع شديد ولبست أول حاجة قابلتها. بعد وقت كانوا راحوا لدكتور تاني. وبعد ما دخلوا غرفة الكشف والدكتور ابتدا يكشف عليها. حمزة كان قاعد على أعصابه. حمزة: ها يادكتور. الدكتور: مبروك المدام حامل. حمزة بص لزهرة بعيون مشتعلة وقال للدكتور: انت متأكد يادكتور. الدكتور وهو بيبص على الجهاز: واضح قدامي أهو. حامل في شهر وكام يوم. قام الدكتور وقعد على مكتبه وابتدي يكتبلها

على علاج وهو بيقول: ودي شوية فيتامينات. قاطعته زهرة بصوت مرتعش: يادكتور حضرتك متأكد إني حامل. ط طب ممكن تكشف عليا تاني. الدكتور: أنا متأكد. بس لو انتوا حابين تتأكدوا أكتر. دي تحاليل ممكن تعملوها. وكتبلهم على التحاليل. أمينة كانت راحة جاية في أوضتها بغضب: بقي على آخر الزمن يمد إيده عليا قدام ولاده. أنا بعد العمر دا كله يهيني قدام عياله. ماشي ياهارون. دي آخرتها. حبيبة: عشان خاطري يا خالتي متزعليش نفسك.

بصت لحبيبة وقالت: انتي اتفقتي مع الدكتورة امتى يابتحبيبة. حبيبة بعدم فهم: مش فاهمة اتفقت معاها إزاي وعلي إيه. أمينة: انتي هتستهبلي. مش انتي اللي اتفقتي معاها على إنها تقول إن اللي ماتتتسمي حامل. حبيبة بصدق: بس أنا ما اتفقتش معاها على حاجة يا خالتي. أنا افتكرتك انتي اللي متفقة معاها. هو مش انتي. أمينة: لا مش أنا. بصت لها بشك: بت متكدبيش. هيكون مين غيرك. كملت وهي بتديها الأمان علشان تعترف وقالت لها:

متخبيش عليا أنا كده كده ستر وغطا عليكي. انتي اللي عملتي كده. صح. حبيبة بصدق: صدقيني يا خالتي والله ما اتفقت مع الدكتورة على حاجة. أقسم بالله ما أنا. أمينة بحيرة: يعني إيه. يعني البت دي طلعت ماشية بطال بحق وحقيقي. شرّدت ثواني وبعدين ابتسمت بخبث: يعني حامل بجد. طب حلو أوي. وهارون بيه محموق أوي على بنت أخوه. كملت بشر: اللي وحياة أبويا لكون مجرساها في البلد كلها. حبيبة: يارب بس الدكتورة متطلعش غلطانة زي ما بيقولوا.

أمينة: لا مش غلطانة. الدكتورة كان باين من كلامها إنها متأكدة. وبعدين دي دكتورة شاطرة. دي أشطر دكتورة في البلد. حبيبة بفرحة: يعني حمزة أكيد هيطلقها يا خالتي. صح. أمينة: أكيد هيطلقها. أمال هيخلي واحدة خاطية زي دي على ذمته. كملت بقلق: بس يا خوفي لا يقتلـها ويودي نفسه في داهية بسبب بت فاجرة زي دي. خرجوا حمزة وزهرة من عند الدكتور، كانت زهرة تايهة حرفيًا الصدمة ملجماها مش قادرة تستوعب اللي هي فيه. فاقت على صوت حمزة: يلا.

وقفت مكانها وقالت: أنا هعمل التحاليل. حمزة بسخرية: ملهاش لزوم يا مدام. في اتنين دكاترة كشفوا عليكي. إيه الاتنين بهايم. لكن زهرة بإصرار قالت: أنا مش هتحرك من هنا قبل ما أعمل التحاليل وأثبت لك إني مش حامل لأني محدش لمسني. وبعد ساعة كانت عملت التحليل وأخيرًا ظهرت النتيجة. قربوا على الدكتور بلهفة لكن اتصدموا للمرة التالتة لما دكتور التحاليل وهو بيديهم الملف اللي فيه النتيجة قال: النتيجة إيجابية. ألف مبروك.

زهرة غمضت عينيها وكأن حاجة نزلت على دماغها.