رواية زواج غير مدبر الفصل الثالث 3 - بقلم أسماء سلام

في الشغل الكل مستغرب أن حسام جاي الشغل يوم صبح شخص الأول: إيه يا حسام إيه اللي جابك النهاردة، إنت لسه عريس والشغل مش هيطير وكنت أنا عملتهولك بدل ما تيجي حسام: كتر خيرك يا أحمد أحمد: بس برضه إيه اللي جابك النهاردة شخص تاني: هتلاقي المزة معجبتهوش أو العكس حسام ضرب بإيده على المكتب وقال: حسام: إيه يا وس*ة يا وا** ما تحترم نفسك ولا أوريك شغلك، مبقاش غير الهفق اللي يتواكلوا ويلا كل واحد على شغله الشخص

التاني ده بيقول لشخص تالت: شكله معرفش أو البضاعة مضروبة هههههه الشخص التالت: اسكت يا عم إحنا مالنا الشخص التاني في سره: لأ مالنا ولازم أعرف السبب إيه، دي فرصة وجت لحد عندي ولازم أستغلها حسام قاعد طول الشغل ومتضايق من كلام زمايله وخصوصا كلام واحد شخص رابع: هتلاقيه قاعد هنا وهي قاعدة مع حبيب القلب ههه، شكله وحش أوي حسام قرر إنه يسكت ومردش علشان عارف إن الكلام مش هيخلص حسام: يا ترى إنتِ فين يا رحاب وبتعملي إيه

وفجأة قرر يروح يشوفها بتعمل إيه حسام راح البيت ملقهاش فقعد يستناها رحاب رجعت من الشغل لقت حسام قاعد على الكنبة وحاطط رجل على رجل وعمال يهزها وعينه حمرا وشكله ميطمنش رحاب: سلام عليكم حسام: وعليكم السلام، كنتِ فين يا هانم رحاب بخوف: هكون فين يعني، كنت في الشغل حسام: آه قولتيلي الشغل، وليه رحتي الشغل، مش المفروض النهاردة الصباحية وكده رحاب: ما إنت كمان رحت الشغل

حسام: الله الله إنتِ هتقارني نفسك بيا، متنسيش إني راجل وإنتي الست وبعدين مفيش شغل من غير لما أعرف رحاب: هو إنت مالك متضايق ليه وحاولت تحط إيدها على وشه حسام بعد إيديها وقال: متلمسنيش تاني وملكيش دعوة بيا، متضايق فرحان ميخصكيش رحاب بعياط: هو إنت ليه بتعمل كده حسام قرب منها لحد لما بقت على الحيطة

ومسك دراعها جامد وقال: إنتِ مش عارفة أنا عملت كده ليه، أنا هقولك لأني بكرهك وبتمنى تموتي وتطلعي من حياتي، دخلتي حياتي بوظتيها، كان زماني دلوقتي قاعد مع منة حبيبتي رحاب بزعيق: افهم بقى منة هربت يعني مش عايزالك وكمان أنا مالي، ما أنا كمان اتظلمت زيك واتجوزتك حسام: هو إنتِ لاقية حد يتجوزك، افهمي بقى إنتِ عانس يعني مفيش حد عايزك ولولا اللي أبوكي عمله كنتِ هتفضلي طول عمرك في بيت أهلك هههه رحاب: طب طالما مش عايزني طلقني

حسام: قولي لأبوكي علشان أنا قولته وهو رافض رحاب: هكلمه وأحاول أقنعه حسام: يا ريت علشان أخلص منك وترجعي لعنوسة هنا رحاب لم تستطع أن تصمت وصرخت فيه رحاب بزعيق: هو إنت ليه بتعاملني كده، إنت مش أحسن مني وأنا أصلاً ميشرفنيش إني اتجوز واحد زيك وبجد أحلى حاجة إن منة هربت علشان متعش مع واحد زيك شايف البنت خدامة

حسام: أنا مش شايف البنت خدامة لكن إنتِ اللي خدامة لأنك لا تصنفي كبنت، روحي شوفي نفسك باللبس ده، شكل واحدة داخلة على الخمسين، ولابسة لبس مش لائق مع بعضه أبداً هههه قال بنت قال، ظبطي نفسك الأول وبرضه مش هبصلك رحاب: مش عايزة تبصلي، هو أنا لازم ألبس ضيق وأطلع شعري عشان أعجبكم، شباب غري، ومادام كده ملكش حكم عليا ولا أروح فين ولا أعمل إيه يعني ملكش ولا حق من حقوقك كزوج

حسام: لأ كده هنغلط، أنا ليا الحق أعمل أي حاجة فيكي، إنتِ مراتي رحاب: دلوقتي مراتك لكن غير كده لأ، وأنا بسقطلك حقك فيا وسابته ومشت رحاب دخلت الأوضة وقفلت على نفسها وقعدت تعيط رحاب: يا رب كن معايا، أنا تعبت منهم، مفيش حد حاسس بيا ولا عارف أنا حاسة بإيه غيرك، كلهم عايزيني ألبس وحش بس أنا اخترت طريقك إنت يا رب فقويني وراحت غيرت حسام متضايق لأنها ردت عليه علشان كده قرر أنه يعلمها الأدب رحاب طلعت عملت الأكل

وحطته على السفرة رحاب: يلا يا حسام تعالى علشان نتغدى حسام: مليش نفس ويلا ولما شافها انزهل من جمالها رحاب كانت لابسة تريند بيتي لونه أحمر وكانت من غير طرحة ومع شعرها الأسود وعينيها السود وبشرتها البيضة مديين ليها شكل جميل حسام: مش جعان رحاب: يلا يا حسام تعالى كل ونتفاهم كويس حسام بتوهان من جمالها: يلا على السفرة حسام بياكل بس عمال يسرق كام نظرة لرحاب وبعدين خلصوا الأكل رحاب قعدت جنب حسام

رحاب: بص يا حسام أنا وإنت اتفرض علينا الجوازة دي ومحدش فينا عايزها فإحنا نعيش مع بعض إخوان وصحاب عادي يعني أعملك الأكل وشغل البيت وكده ولو عايز تحكيلي حاجة أنا موافقة وإنت تسيبني أشتغل عادي ولو إنت حبيت واحدة وعايز تتجوزها مفيش مشكلة قولت إيه حسام... رحاب: حسام يا حسام حسام: آه في إيه رحاب: إنت سمعتني قولت إيه حسام: إن نكون إخوات وصحاب رحاب: طب إيه رأيك حسام مش موافق وقام طلع بره البيت وركب عربيته حسام وقف قدام

البحر وعمال يفكر حسام: لأ مستحيل أفكر فيها كده، اعقل يا حسام إنت قوي مش كده، بس إزاي كنت بفكر فيها كزوجة وإزاي كنت عايزها ولما قالت نكون إخوات اتضايقت فاضطريت أرفض، معقول أفكر في رحاب كزوجة مستحيل وبعدين قرر أنه لازم ينتقم منها أبطال الرواية حسام

(27 سنة ضابط وليه مكانته بس عيبه إنه عصبي ومش بيثق في حد، دايماً بينجذب للبس البنت قبل كل شيء، مش بيصلي أوي علشان كده حاله مش مظبوط، ليه أعداء كتير بعدد شعر رأسه بس هو ذكي ومحدش قادر يتغلب عليه علشان ملوش نقطة ضعف) رحاب

(البطلة 31 سنة موظفة في شركة ليها علاقة بالأجهزة وكده، طيبة جدا وعندها الثقة في كل الناس، هادية وبتحكم بالعقل ومش معترفة بالحب نهائي لكن بتؤمن بالمودة والاحترام بين الزوجين، لقبها في القرية العانس لأنها لم تتزوج، بتسامح أي حد إلا أنه يأذي أهلها ومراتاتها) منة (اخت البطلة 23 سنة والمفروض كانت تتجوز البطل بس هربت، دي ليها جزء مهم جدا بالقصة بس بعدين وهنعرف هي فين وليه هربت) زياد

(29 سنة، زميل رحاب بالشغل وبيحبها جدا بالرغم إنها أكبر منه وكل اللي في الشغل ملاحظ ده إلا هي، مستعد يتجوزها لما يجهز نفسه وهو قرب يكمل شقته، وهي بتحترمه بس مش بتفكر لا فيه ولا في غيره بس هو عنده ثقة في ربنا إنها هتكون ليه في يوم من الأيام، صبور جدا ومتفوق في شغله) عمر

(35 سنة جار رحاب ويعتبر حب الطفولة بس اضطر يسافر عشان أهله سافروا بس هيرجع، وعدها وهو ماشي إنه هيرجع ويتجوزها، طيب جدا وعنده رحاب دي نجمة من السما ودائماً مان بيحميها وبيضرب الأطفال اللي كانوا بيضربوها) وباقي الأبطال هنعرفهم بعدين بيقولوا أن الاهتمام بيولد الحب والإهمال بيولد الكره فايه اللي هيحصل لو الإهمال ولد الحب وهل رحاب رفضه الجواز عشان عمر ولا في سبب تاني