رواية زواج مدبر الفصل التاسع عشر 19 - بقلم شروق خليل

علا وحسام كانوا قاعدين بيضحكوا وبيأكلوا. لقوا اللي قعد على الكرسي جنبهم وفي عيونه شرار، تحت أنظار كل الموظفين اللي انصدموا من الموقف. مروان ضحك ضحكة خبيثة واتكلم من تحت أسنانه: "يا مساء الورد." حسام بنفاذ صبر: "مروان! مش غريبة تيجي تقعد بين الموظفين؟ مش عوايدك، دايماً بتتكسر يعني." مروان رفع حاجبه: "انت مالكش فيه، اقعد في المكان اللي يعجبني. انت هتشاركني ولا إيه؟

علا كانت قاعدة مش فاهمة أي حاجة. محسّتش غير بإيد مروان اللي سحبها لحد ما خرج من مكان الغدا خالص. مروان بجمود: "إيه اللي قعدك معاه لوحدكم؟ علا: "أفندم؟ مروان بصوت عالي: "والله سؤالي واضح، ولا البعيدة مبتفهمش بسرعة؟ علا بعصبية: "انت مين عشان تكلمني كده؟ اتكلم معايا بأسلوب أحسن من كده." مروان حاول يهدأ: "انتِ عارفة مين حسام؟ ولا تعرفي حاجة عنه عشان تقعدي معاه؟

نرمين قالتلك يلا، وأنا قايلها، ملهاش علاقة بيه غير شغل وبس. مبتجيش معاها ليه؟ علا: "والله أنا خرجت اتغدى زي باقي الموظفين، وهو ماله يعني؟ ماهو إنسان كويس زي باقي الموظفين." مروان عيونه كانت كلها حدة وخوف: "هو انتِ مصممة تخلينا نتخانق دايماً؟ علا: "هو انت عايز إيه مني؟ مروان: "مش عايزك تقعدي مع حسام تاني، آخركم مع بعض الشغل. أنا لو أعرف حد أكفأ منه ما كنتش خليتكم تقربوا منه أصلاً."

علا بعناد: "أنا أتكلم مع اللي شايفه إني ينفع أتكلم معاه. وبعدين ما تخليك في حالك وفي الناس اللي بتعملك مساج." مروان: "أنا أعمل اللي أنا عايزه." علا: "وأنا كمان هعمل اللي عايزاه." مروان قرب منها واتكلم بصوت مرعب: "علا، أنا قلت اللي عندي. لو مابعدتيش عنه هتشوفي مني تصرف مش هيعجبك." حسام ونرمين كانوا وصلوا في الوقت ده: "صوتكم عالي جداً، فيه إيه؟ مروان

قرب من حسام وضربه بالبوكس: "لو قربت منها أو عملت معاها زي اللي بتعمله مع الباقي، هموتك يا حسام. علا بالذات مش هسمحلك." مروان مشي وساب علا واقفة مكانها ومخنوقة من تصرفاته اللي مش عارفة إيه هي وليه. وحسام كان ماسك بوقه بوجع. الأيام عدت ويوسف ومريم كانوا نازلين الجامعة. يوسف كان ساند مريم ودخلها الكورس تحت أنظار الكل. وساهر اللي مكنش فاهم إيه علاقتها بيوسف وانصدم. يوسف: "مكانك فين؟ مريم كانت مكسوفة من نظرات

الكل عليهم وهو شبه حاضنها: "هناك." يوسف بص على المكان لقاه جنب ساهر. حاول يمسك أعصابه وقعدها هناك. وفجأة باسها من خدها وهو لا يبالي لحد ما هي فشهقت من اللي عمله. وساهر انصدم. وفي اللحظة دي كانت هاجر داخلة المدرج وشافتهم وبصت بغل: "والله لربيكي." يوسف قعد في المكان المخصص للشرح: "أهلاً بيكم. أنا اللي هشرح ليكم النهارده. وبالنسبة للي شفتوه دلوقتي، فدي مريم مراتي."

الكل حول نظره لمريم وهاجر بدون فهم، وبدأوا يهمسوا لبعض بالكلام. إزاي هاجر حبيبته واتجوز إمتى؟ يوسف مكنش مهتم وشرح. وساهر كان بيتكلم مع مريم وبيحاول يفهم. ساهر: "ليه مقولتليش إنك متجوزة يوسف؟ مريم: "هو انت اللي كنت قايل لي إيه اللي بينك وبينه! ساهر بتهرب: "اللي بينا انتهى من زمان." مريم: "هعرفه كده كده منك وقريب. ليه تعمل كده في بنت! وليه تكسر صاحبك اللي كان بيحبك أكتر من أخوه؟

ساهر بص لها بغضب: "أنا مكسرتش حد، ويا ريت متتكلميش في الموضوع ده." يوسف كان مركز معاهم وفجأة: "الأستاذ اللي هناك." ساهر: "نعم." يوسف بعصبية: "اتفضل برا." ساهر بص له بضيق وخد حاجته وخرج. أما يوسف فخلص وكان رايح لمريم، بس هاجر وقفته: "ممكن أفهم إيه تصرفاتك دي يا يوسف؟ انت وعدتني إنك هتفضل معايا." يوسف: "أنا مش فاضي دلوقتي." يوسف خد مريم وخرج وركبوا العربية. كان ساكت طول الطريق لحد ما وصل.

مريم: "ممكن أعرف إيه اللي عملته هناك ده؟ يوسف حاول يتوه الموضوع: "أنا جعان. طلبت أكل وجاي. واعملي حسابك هنفك الجبس النهارده." مريم: "متغيرش الموضوع ليه عملت كده؟ يوسف ببرود: "مزاجي." يوسف دخل أوضته واتنفس بهدوء: "انت بتعمل إيه يا يوسف؟ بتعلق نفسك بحبال دايبة." اليوم عدى وكان يوسف بنفس البرود، ومريم كان بروده مضايقها. رجعوا، ومريم سابته ودخلت أوضتها من غير ما تتكلم معاه ونامت. يوم جديد. مريم قامت بنشاط: "ياااه هانت."

الموبايل رن. ملك: "صباح الخير. وحشتيني أوي ونفسي أحضنك." مريم: "هانت، كلها شهر وهننزل ومنرجعش تاني." ملك: "بعدهم بالأيام." مريم ضحكت: "أنا بحبك." ملك: "وأنا كمان. يلا سلام." مريم خرجت ونزلت على طول. مكنتش عايزة تروح مع يوسف ولا تحتك بيه. بقت كل ما تشوفه تتوتر وتحس إنها عندها انجذاب ليه. بقت تتهرب منه من وقت ما الكل عرف إنهم متجوزين. وصلت الجامعة وقابلت ساهر اللي تجاهلها ومشي،

بس هي جريت وراه: "ساهر، مش هسيبك غير لما تقولي. أنا مستحيل أصدق إنك عملت كده." ساهر فضل ساكت. مريم بدموع: "ساهر، انت عارف إن خلاص فاضل ليا أنا ويوسف أسبوعين ويبعد عني. انت متخيل إني هبعد عن أكتر حد حبيته ووقف جنبي بعد ما الكل سابني عشان يتجوزها! أنا حتى مش عارفة أقوله إني بحبه وإني عايزة نكمل، لأني مش هعرف أكون بحبه ومعاه وهو مع واحدة تانية." ساهر: "هو مش مضطر يتجوزها."

مريم: "ساهر، هاجر حاطة يوسف إنه هو المذنب وإنك انت اللي اغتص*بتها ووصلتها للمرحلة دي. وعشان هو السبب لازم يتجوزها." ساهر بندم: "والله أنا ما عملت كده. أنا هحكيلك كل حاجة." .......... ......... ......... عند يوسف كان نايم بملل وصحي. دخل الحمام وخرج ملقاش مريم. لقي ورقة مكتوب فيها: "أنا نزلت بدري، كنت عايزة أتمشى." زفر يوسف بضيق: "هنفضل كده كتير؟

أنا مبقتش عارف أعمل إيه. يارب. وقعت في حب واحدة مش شايفاني ومجبر أكمل مع واحدة مبحبهاش." دخل لبس بكسل وكان خارج، لقي هاجر في وشه: "انت إيه جابك هنا دلوقتي يا هاجر؟ هاجر دخلت غير مبالية لكلامه ومثلت الضعف والعياط: "ممكن أتكلم معاك." يوسف بقلق: "مالك يا هاجر؟ اتفضلي." هاجر حضنته بخبث: "أنا مش عارفة أعمل إيه يا يوسف."