رواية زواج تحت الأنقاض الفصل الأول 1 - بقلم هدى حسام

دخلت القسم وهي بتتلفت حواليها، وقفت قُدام ظابط قاعد على كُرسي، فَ بصلها. -أقدر أساعدك إزاي؟ حمحمت وهي بتلف إيديها في بعض وقالت بتوتر: -عاوزة أعمل محضر. بصلها بإستفهام، فَ كملت: -محضر في أحمد جوزي. -تمام، سبب المحضر؟ رفعت راسها وهي بتفتكر، عشان تبدأ تحكي. -إنتِ فين يا هانم، وسايبة الدنيا تضرب تقلب كده ليه؟ بصيتله بتعب: -والله يا أحمد إنت شايف عيالك عاملين إزاي، كل ما بروق بيبهدلو تاني، همدوني والله. بصلها بعصبية:

-أنا مالي، أنا ليا أرجع من شغلي ألاقي مكان نضيف أنام فيه وأريح، أنا قرفت منك ومن عيالك. حطت إيديها في وسطها وردت: -عيالي!! ما هما عيالك إنت كمان.. فجأة بقوا عيالي لوحدي، اقعد يا أحمد ربنا يهديك خمس دقايق وهلم الدنيا. اتعصب أكتر وقرب منها وشدها من شعرها: -إنتِ كمان بتردي عليا! أنا هعلمك إزاي تحترميني. صوتت بصوت عالي وهو مهتمش كتير، ضربها كتير جدًا، عشان تجري بعد ما ينزل وتقفل الباب على عيالها وتروح القسم.

بصلها الظابط بأسف وقالها: -تمام هحفظلك المحضر، بس لازم تعملي تقرير طبي أول بالاصابات ومدى علاجهم، هحولك على مستشفى *** تعملي التقرير الأول ووقتها يتعرض المحضر على النيابة. *** في مكان تاني، عند أحمد جوزها. -يا أمي أنا أول ما جيت من عندك كنت مغلول أوي منها، من ساعة ما قولتيلي إنها مش بتيجي تساعدك ولا بتكلمك وأنا مغلول منها، محسيتش بنفسي غير وأنا ماسكها وبضربها. عوجت أمه بوقها وهي بتبصله وبتاكل لب:

-والله يا ابني أنا قولتلك أتجوزك بنت خالتك أمينة وإنت رفضت، أديك دلوقتي بتتحمل عواقب اختيارك. بصّلها بحزن: -كنت بحبها أوي، مش عارف إيه اللي حصل، مكنتش أعرف إنها وحشة كده.. وإنها هتعاملك كده ومش هتخدمك. طبطبت عليه وهي بتقول له: -متزعلش يا حبيبي، من بُكرة وأتجوزك ست ستها، ولا يهمك يا حبيبي. بص لأمه بهم، كان مخنوق أوي، هو مش عاوز يتخلى عن عياله ولا عنها بالسهولة دي، بس هو تعب من كل حاجة، ضغط أمه والشغل وهي. ***

بعد يومين، عند والدته. سمعت خبط متكرر على الباب، فَ قامت بتُقل وهي بتقول: -براحة ياللي بتخبط، جايه. راحت فتحت عشان تلاقي قدامها واحد ماسك ورق، بص ليها وقالها: -أحمد جابر عبدالله موجود؟ قلقت وهي بتقول: -لا، بس أنا أمه، في حاجة؟ -أحمد جايله استدعاء من النيابة، اتفضلي امضيلي هنا إنك استلمتي.