رواية زوجة للميراث الفصل الثالث 3 - بقلم شروق الجندي

_إيه شرطك؟ _تتجوزيني يا مرات الغالي. كلامه صدمني أوي، إزاي يكون لسه دافن أخوه وجاي يقول كده؟ إزاي في حد بالافترا ده؟ أما حمايا انصدم وبعدين زعق لابنه وقال: _أنت إيه يا أخي؟ زرع شيطاني، طول عمرك بتكره أخوك، بس قولت موت أخوه هيهده، بس لا الشيطان اللي جواك كسر أي رحمة. _بقولك إيه يا حج، وفر صحتك، أنت راجل كبير ومريض وروح أوضتك، وكلامي معاها، سمعيني ردك يا حلوة. _مستحيل أوافق طبعًا. _يبقى تاخدي عيالك وتغوري. كان نفسي أبكي وأنا برد عليه، بس بصيت لولادي الخايفين وحسيت أني الجدار المسنودين عليه، فرديت بثقة: _مش همشي ومش هتجوز، أنا هعيش وأموت مرات عاصم وبس. ولما أجي أطلب منك لقمة لولادي أبقى اطردني، إحنا مش محتاجين حد. _طول ما أنا عايش عيال ابني مش هيحتاجوا حاجة. _هههه، وهتاكلهم منين يا حج؟ هو أنت ناسي إن كل حاجة باسمي؟ _كان يوم أسود يوم ما عملتلك توكيل، ما كنتش أعرف أنك هتسرق أبوك. _معقول سرقت أبوك؟ _آه حصل، فما بالك بقى هعمل فيكي إيه أنتي؟ _برضه مش همشي. دخلت عزة: _آه طبعًا مش هتمشي عشان تخطفي جوزي، مش كده يا حرباية. _أخطف مين؟ أنتي مجنونة؟ وفجأة حسين ضربني بالقلم وزقني عالأوضة وحبسني وأنا بصرخ وولادي بيصرخوا وحبسهم فالأوضة التانية وقال: