رواية زوجة للميراث الفصل الثامن 8 - بقلم شروق الجندي

"أخيرًا الدكتور كتب لي خروج بعد ما عمل تقرير طبي بعلاج أكثر من 21 يوم، وطبعًا ده في مصلحتي والمحامي قدم التقرير للنيابة لإن خلاص بقت قضية وأهلي حبوا ياخدوني عندهم بس أنا رفضت لإن ده بيتي وحق ولادي. وحمايا فضل جنبي هو وعزة. وأول ما دخلت شقتي شفت ولادي وفتحت حضني ليهم وجم جرى، فضلت أبوسهم زي المجنونة وفضلنا نعيط سوا. "وحشتوني أوي يا نور عيني." "أنتِ كمان يا ماما وحشتينا أوي، طنط عزة قالت لنا إنك وقعتي من على السلم ورجلك وجعتك." "آه يا ميزو عشان كده ما عرفتش أشوفكم." "يلا يا ولاد روحوا اتغدوا وأنا هجيب ماما وجاية." "حاضر." "متشكرة يا عزة لإنك اهتميتي بولادي في غيابي." "أنا اللي متشكرة لإنك قويتيني وعلمتيني أكسر خوفي." حطيت أيدي على كتفها بثقة. "ما فيش ست ضعيفة يا عزة، في ست قوية وست صابرة، لكن في ناس بتفهم الصبر ده ضعف، لكن أحنا أقوياء أوي." "أنا ما غلطتش لما قلت إنك أختي." حضنتها بحب وفجأة تليفوني رن. "آلو مين معايا؟" "حضرتك مدام سارة أرملة عاصم الدمنهوري؟" غمضت بحزن واتنهدت. "أيوه أنا." "احنا شركة النصر اللي كان عاصم الله يرحمه شغال فيها، والشركة حددت 100 ألف تعويض لكل متوفى والاستلام بكرة." قفلت معاه ومسكت صورة حبيبي وأنا ببكي. "سترني في حياتك ومماتك…"