رواية زوجتي الصغيرة رومنسيه خليجية الفصل المئة 145 - بقلم Shifaoman

في منصف الليل

في بيت ابو جواد

جالسة على اللاب توب تخلص الشغل اللي عليها بسبب غيابها لاسبوع عن الشركة

ابتسمت بهيام و هي تتذكر سلطان

" اه يا عمري على الرجال انا "

استغفرت بصوت مسموع :

استغفر الله شنو اقول انا

استغفر ما لقيت الا اتغزل بالرجال و منو سلطان ولد عمتي

نزلت عينها للاب مرة ثانية و هي تحاول تنتبه للشغل و تبعد اي تفكير عنها

عقدت حواجبها المرسومة بدقة طبيعية و هي تسمع الطرق اللي على الباب

شافت ابوها اللي دخل و قال بتعب و هو يناظرها :

الحمد لله انك صاحية للحين

قالت بخوف و هي تشوف وجهه الاسود من التعب :

يبه شفيك

قال بهدوء عشان ما تنفجع :

امك ما ادري وش فيها من خلصتوا العزيمة اللي مسويينها

و هي ما غير دايخة و تقول لي نادي لي روان تقيس لي الضغط و السكر

ما كمل كلامه الا و يشوفها تمشي بسرعه عشان تروح لامها

صحة امها هالايام متدهورة

و خصوصا بعد اللي صار لوليد من ذاك اليوم و هي ما تتحمل ابد

و كل مرة يصير فيها شي

وصلت للغرفة بسرعه و ابوها وراها

جلست جنب السرير اللي متمدده عليه امها

بسرعه فتحت الدرج اللي جنب السرير و سحبت جهاز قياس السكر و جهاز قياس الضغط

كانت بتموت رعب على امها اللي وجهها اصفر و مبين عليها التعب بقوة

من شوي كانت وش زينها ما تدري وش اللي صار لها اللحين

قالت بصدمة بعد ما شافت السكر عالي :

يمة السكر عالي عندك وش ماكله اليوم

قالت امها بلسان ثقيل :

اكلت من الحلى يا بنتي ما قدرت امسك نفسي

باستها بحنان على راسها و هي تقول :

يمة حبيبتي حرام عليك تسوي في نفسك كذا

على الاقل خبريني انك تبين حلا اسوي لك حلى و اقلل السكر اللي فيه

غمضت عيونها بتعب و هي تحس انها بدت تغيب عن الوعي من جديد

قالت روان بعيون تلمع من الدموع :

يمه شفيك

ماردت عليها و هذا اللي خلا روان تبكي من خوفها على امها

قال ابوها بحنان و هو يقرب من ام جواد يبي يصحيها

بس مو راضية تصحى

لف ابو جواد على رزان اللي تصير حساسة كثير في هالمواقف

انتبه لها و اطرافها يرجفوا و دموعها على خدودها و وجهها شاحب و كان ما فيه حياة

قال و هو يبي يهديها روحي البسي عبايتك عشان ناخذها المستشفى

خرجت بسرعه متوجهة لغرفتها تلبس عبايتها و نزلت مرة ثانية

دخلت الغرفة و شافت ابوها اللي لبس امها العباية وحط عليها الطرحة

قالت باهتمام و هي تمسح دموعها اللي نزلوا من جديد :

ما قامت للحين

هز راسه بلا و هو يرد على التليفون

.
.
.

في سيارة سلطان ولد عمتها جالسة من ورا و حاضنه امها بخوف

قال ابو جواد و هو يناظر سلطان :

يا ولدي ليش تتعب نفسك و تجي انا قلت لك بس ارسل السواق

عارف ان سواقنا ماخذ اجازة و انا تعبان و مو قادر اسوق

قال سلطان بصوت رجولي فيه بحه عميقة :

عادي يا عمي و اصلا تعبكم راحة و اذا ما ساعدت اهلي منو اساعد

هز ابو جواد راسه بهدوء

و هو يقول بابتسامه خفيفة :

الله يخليك لاهلك و لنا يا سلطان

قال سلطان بعد ما كح بخفة : و يخليك لنا يا خالي

وصلوا بسرعه للمستشفى

.
.
.

واقفة جنب الغرفة في الوقت اللي الدكتور يكشف على امها و يشوف شنو اللي فيها

كانت تحس انها منهارة للاخر

امها و جنتها ما تدري شنو فيها

تحس بذنب كبير برقبتها

هي اللي تسببت بمرض امها

امها صابها السكر يوم طلقها الحقير ليلة ملكتها

ما اهتم لها و لا لسمعتها

بس هي تشوف انها الغلطانه وثقت فيه و خانت ثقة اهلها عشان الحب المزعوم

بس خلاص الحين تعلمت درس عمرها ما تنساه

كل شي حرام دايما ينتهي و بابشع طريقة

شهقت بعنف و هي تنكمش بحض ابوها اللي ملامحه جامدة و الخوف ينهش روحه على امها

شد عليها بقوة و هو يحس فيها ترجف بقوة من الخوف

هذي حالتها من كانت صغيرة لما يسيطر عليها الخوف

تنهار و تجيها رجفة غير طبيعية و احيانا تفقد وعيها

اذا ما هدت بسرعه

سحبها ابوها للكراسي الموجودة في الممر

و هي كانت شوي و تطيح من طولها و مبين من مشيتها انها مو قادرة توازن جسمها

دقايق و انتبهت لابوها اللي يشكر سلطان

مد لها ابوها العصير و هي تهز راسها بالرفض مو قادرة تشرب شي

تبي بس تتطمن على امها

قال سلطان بجدية و اهتمام حاول ما يبينه :

اشربي عشان تقدري توقفي على رجولك

ما قالت شي و مسكت العصير بتردد

و لفت للجهة الثانية و هي ترفع شوي النقاب اللي على وجهها

اما هو فصد للجهة الثانية عشان ما يحرجها و عشان يبعد عيونه عن عيون عمه

اللي نظراته مو مطمنه و مبين انه حاس باللي يحس فيه بقلبه

تقدم من الدكتور اللي خرج من الغرفة

تكلم مع الدكتور بجدية و دقايق و رجع للمكان اللي جالس فيه ابو جواد و روان

قال بهدوء و هو يحاول ما يشوف مع روان اللي عيونها متعلقة فيه :

خالي الدكتور يقول ان جاتها غيبوبة سكر لان السكر ارتفع عندها

و اللحين الحمد لله هي بخير

بس لازم تاخذ ابرة الانسولين كل يوم

شهقت روان بعنف و هي تحضن ابوها بضعف و تقول بصوت باكي :

لاء لاء لا تقولها الله يخليك

كمل بهدوء و هو يحاول ان يكون صوته طبيعي :

يعني هي اللحين تحتاج الانسولين بشكل دائم

عشان السكري عندها صار من الدرجة الاولي

كانت تبكي بصوت عالي مثير للشفقة

قال ابوها بحدة لاول مرة يستعملها مع روان دلوعته :

روان استغفري ربك و هذا قضاء وقدر و ما نقدر نرده

استغفرت بصوت واطي و للحين تبكي

حتى صار الغطا لاصق على وجهها من كثرة الدموع

قال ابو جواد و هو يقوم بارهاق :

ما قالك متى بيكتبوا لها خروج

قال سلطان بعد ما ساعد عمه يوقف :

الدكتور يقول بتجلس هنا لين بكرا و بعدين يشوفوا اذا حالتها تسمح لها تخرج او لا

هز راسه بتفهم و هو يلف لروان اللي حاضنه نفسها و تبكي :

يلا اللحين نرجع البيت و امك بكرا نجي لها

قالت برفض قاطع : لا انا مو متحركة من المستشفى

و اصلا باجلس معاها ما راح اخليها لحالها

ناظرها ابوها بقلة حيلة و هو عارف انها عنيدة و ما رح تسمع كلامه :

خلاص اجلسي معها

بس انتبهي على نفسك

هزت راسها بتفهم و هي تتوجه للغرفة اللي نايمة فيها امها

و تاركة وراها قلب بدا يذوب في هواها

انتبه ابو جواد لنظرات سلطان اللي متعلقة بظهر روان

و مبين عليه انه مو راضي انها تنام بالمستشفى

قال بهدوء و هو يناظره :

تراها عنيدة و اللي براسها تسويه و ما همها من احد عشان كذا خليتها تجلس مع امها

هز راسه بخفة و شتت نظراته

الظاهر انه بدا يفضح نفسه عند خاله

بس هالشقية خلته يتعلق فيها رغم انه ما اجتمع معاها الا في صدف قليلة جدا و نادر ما يكونوا لحاله