رواية زوجتي الصغيرة رومنسيه خليجية الفصل الخامس وثمانون 85 - بقلم Shifaoman

في غرفة وعد

كانت جالسه مع وعد

حست انها تعرفها من زمان رغم ان وعد مستحيه منها و مو متعوده عليها بس تحكي و تمزح معاها

حست بالحزن عليها و هي تحكي لها عن فقدان امها و هي صغيرة و في عمر حرج و عمر اللي تحتاج فيه البنت لامها

و تحتاج للي وجهها و يعلمها الصحيح من الخطا

ابتسمت و هي تسمعها تقول : تدرين روابي امس الكل يسال عنك و من تكونين

قالت روابي بحياء : لا مو لهدرجه عاد

قالت وعد و هي تتربع على السرير و بحماس : لا و الله واصلا انتي جميله و كان الفستان عليك روعه

ابتسمت بسخريه على حظها اللي خلاها تاخذ فيصل و سرعان ما اخفت الابتسامه عشان

ما تنتبه لها وعد

قالت و هي تغير الموضوع : شنو بتلبسين اليوم في العزيمه

قالت وعد و هي تاخذ فستان قصير للركبه باللون الابيض و فيه على الخصر حزام من قماش بالاسود : هذا الفستان شنو رايك

قالت روابي و هي تبتسم باعجاب : بيكون عليك روعه

قالت وعد وهي تجلس جنب روابي و باحراج : روابي ممكن اطلب منك طلب

قالت روابي بابتسامه : شنو حبيبتي

قالت وعد بخجل : اذا ممكن تسوين لي مكياج ما اعرف اسويه زين

قالت روابي و هي تحضنها بحب و تضحك : هههههه حسستني انك بتطلبي شي عظيم

ايه عادي حبيبتي و اعتبريني من اليوم اختك و اللي تبينه اسويه لك اوك

قالت وعد و هي تبتسم : اوك .... مشكووورة كثير روابي

روابي و هي تبتسم عليها مبين انها طيبه و على نياتها : العفو حبيبتي

قاطعهم الطرق اللي على الباب

و صوت فيصل اللي من ورا الباب : وعد ممكن ادخل

ارتبكت وعد و خافت منه لان مو معاها لا فهد ولا فيصل اللي تحس معاهم بالامان

قالت و هي تحاول تخلى صوتها عادي : ادخل

دخل فيصل و هو مبتسم مع وعد و قال : صباح الخير وعد

و كمل كلامه بعد ما شافها منزله راسها بخوف و ارتباك و مو ناويه ترد عليه : حبيت بس اقولك اليوم

موعدك مع الدكتور جهزي نفسك شوي و نروح

رفعت راسها و قالت بخوف من ردة فعله : ابي اروح مع فارس

قال و هو متضايق من حالتها : اوك على راحتك

و لف لجهة روابي و قال بجديه : ابيك بالغرفة

و خرج من الغرفة

لفت عليها روابي باستغراب من تصرفاتها

قالت و هي تمسك يدها بحنان : وعد شنو فيك

رفعت وعد عيونها اللي لمعت من الدموع لفوق عشان ما تنزل دموعها و قالت و شفايفها ترتجف : ما فيني شي

قالت روابي بحنان وهي حاسه انه فيها شي : وعد حبيبتي شنو كنا نقول من قبل

وعد و هي تبتسم و دموعها شوي و ينزلوا

قالت روابي و هي تشوفها شوي و تبكي : خلاص وعودة وقت ما تبي تحكي لاحد تعالي عندي انا اسمع لك

و حضنتها على خفيف و خرجت من الغرفة بعد ما لبست عبايتها و حجابها و غطت وجهها

بيت ابورعد

وصلوا بسرعة لان رعد قاعد يسرع و اصلا المسافة بين الفندق و بيت ابورعد قريبه

نزلت بسرعة من السيارة و هي تحس بضيق في تنفسها

بس ترديدها الايات القرانيه خلاها تحس بالراحه و الطمانينه

مشى رعد بخطواته الواثقة باتجاه الباب الرئيسي و هي كانت وراه و متاخرة شوي بسبب الكعب و خطوات

رعد السريعه

دخلوا للبيت

شافت ام رعد و البنات الللي كانوا عند الباب و ام رعد الفرحانه و بدت تزغرط دليل على فرحها

سلم عليها رعد و باس يدها و راسها و هو مبتسم لها

سلمت عليها اميرة بابتسامه بعد ما نزلت النقاب

قاموا البنات يحضنوها و يغمزوا عشان يحرجوها و هي و لا على بالها اصلا ماكانت حاسه بشي

و الشي الوحيد اللي تحس فيه هو احساس بالراحه و الامان

لانها ما راح تكون لوحدها مع رعد

سلمت على ابو رعد اللي من صغرها تعتبره زي ابوها

جلسوا شوي بالصاله و ام رعد فرحانه بابنها

لفت لجهة رعد

اللي كان جدي لابعد حد و يتكلم بهدوء

بس مع امه يتكلم بحنان و بابتسامه

رجعت لفت لريما و ديما اللي يبونها تيجي معاهم لفووق

قالت باحراج منهم : بنات بلا احراج ... عيب اقوم

قالت ديما بعربجيه : يمه ترا راح ناخذ اميرة لفوق

قالت ام رعد بابتسامه : انا ما عندي مانع بس شوفوا رعد ممكن يرفض

و لفت ام رعد تشوف مع رعد

رعد كان جالس يتكلم مع ابوه على الشغل و لف لما سمع كلام امه و قال بهدوء : عادي ما عندي مانع

قامت مع البنات و هي فرحانه انها تبعد عنه شوي

بيت ابو خالد

كانوا جالسين في صاله جناحهم

كانت نور حاطه راسها على صدر خالد و هم يشوفون التلفزين

رفعت راسها عن خالد شوي شوي و قالت بخوف : خالد ابي اروح الدكتورة اخاف البيبي صار عليه شي

من تعب امس

قال خالد بهدوء و هو يبتسم معاها : لا تخافي و اصلا الموعد مع الدكتورة بكرا و راح نطمن عليه اوكي

قالت و هي ترجع راسها على صدره و تقول بخوف : اخاف يصير فيه شي

ابتسم خالد و هو فرحان لاهتمامها و هذا الشي راح يساعدها انه يكلمها في موضوع دراستها

قال و هو يلمها لحضنه اكثر و بعدين رفع راسها و صار وجهه مقابل لوجهها : نور ابي اتكلم معاك بموضوع

قالت و هي تنزل عيونها بخجل منه : ايه شنو الموضوع هذا

قال بجديه : الموضوع على الدراسه السنه هذي

قالت و هي تترجاه : خالد الله يخليك ابي اكمل السنه هذي على الاقل

قال و هو يقوم من مكانه و بدا يعصب لانها صارت متناقضة خايفة على الجنين و تبي تكمل دراستها

وهي عارفة انه يضر الجنين : خلاص مثل ما تبين تبي تكملين كملي

و دخل الغرفة وهو يبي يبعد عنها عشان ما يعصب عليها و تصير مشكله بينهم

جلس على السرير و هو حاط راسه بين يديه

رفع راسه على اناملها الللي وضعتها على كتفه و هي تجلس جنبه

قالت و الدموع في رموشها دليل على بكائها : خلاص ما ابي اكمل دراسه

قال و هو يحضنها على جنب عشان يهديها : هدي حبيبتي هدي

بس انا من خوفي عليك و على البيبي قلت لك وقفي السنه هذي

دفنت راسها في صدره و هي تقول : خلاص بس سنه وحده و بعدين اكمل

قال و هو يبوس خدها : اوك

رفعت راسها بهدوء و هي تشوفه مبتسم

قالت وهي تلعب باصابعها : اشتهيت اكل ....

هو بس سمعها قالت كذا و هو صار يدعي ربي انها تشتهي شي عادي

كملت كلامها و هي تقول : اشتهيت اكل مصاصه حلاوة

مسك ضحكته عليها و بعدين قال بهدوء : خلاص اللحين اروح السوبر ماركت و اشتري لك