****************************************************************************
💫 عند فارس 💫
يحوس بجناحه واهو يفكر فيها ، وقف بمكانه وحط ادينه على رأسه : تكفين اطلعي من راسي .
****************************************************************************
خل اوصف لكم تقسيم بيت ابو رائد ، تحت صالتين كبار مصممين باثاث غربي ، والدرج بالنص يفصل هالصالتين وتحت الدرج من جهة اليسار المطبخ ومن جهة اليمين حمامات ومغاسل خارجيه وفي نفس جهة المطبخ فيه طاوله طعام كبير ، وجهة الحمامات فيه اصنصير للي ما يبي يطلع الدرج
البيت مقسم الى ٤ ادوار
الدور ١ : غرفه للام والاب ، وصاله صغيره ، ومطبخ مفتوح على الصاله بعد صغير ، وغرفه لسديم ، وغرفه لنوره ، وغرفه لنور ، وغرفه يوسف ، وغرفه لحمد ، وغرفه لخالد .
الدور ٢ : نفس الشيء فيه صاله صغيره ومطبخ مفتوح عليها ، غرفه للتؤام ندى وهدى مع بعض ، وغرفه لهيا ، وغرفه فاضيه حق وحده من التؤام اذا تزوجوا .
الدور ٣ : نفس الشيء صاله ومطبخ ، جناح رائد ، جناح فهد ، جناح فارس .
الدور ٤ : فيه باب حق سطح ، و٣ اجنحه حق الاولاد اللي بقوا ( يوسف ، حمد ، خالد ) .
خل اوصف لكم الجناح
الجناح عباره عن شقه مصغره ، مكونه من صاله ومطبخ وطاوله طعام صغيره وغرفتين نوم وحده منهم ماستر بحمامها والثانيه الحمام يمها ، والغرفه الماستر فيها غرفه تبديل ملابس كبيره .
(طبعاً جميع الاجنحه مأثثه وجاهزه ، حتى الغرفه الفاضيه مأثثه وجاهزه)
هذا بالنسبه للبيت من الداخل خل نشوف من بره ، فيه حديقه كبيره تتوسطها نافوره ماي تتغير فيها الالوان وفيه جلسه متحركه ، وفيها غرفه خاصه لبركه السباحه ، وفيه مجلس خارجي للرجال ، وفي قعدات خارجيه في الهواء الطلق و مظلله .
هذي الجلسه المتحركه
هذا المسبح
(اختاروا النافوره اللي تعجبكم 😂😂🙊) نرجع للرواية
****************************************************************************
✨بجناح رائد✨
جنان قاعده بالصاله تطالع تلفزيون ، دخل رائد الجناح شافها وابتسم جاء وقرب منها وانسدح على رجولها
جنان حطت يدها بشعره وقامت تلعب فيه وهمست بحنان : شفيك ؟ .
رائد واهو مغمض عيونه : ولا شيء ، بس كذا ابي انسدح بحضنك .
جنان ضحكت : لا انا اعرفك اكثر حتى من نفسك انت ما تجي وتنسدح كذا الا اذا كنت تعبان .
رائد بلع ريقه وبربكه : لا لا .. مافيني شيء .
جنان ما حبت تضغط عليه وتمت تلعب بشعره بهدوء ، دقايق الا رائد رايح بسابع نومه .
****************************************************************************
💥 عند زوز 💥
سرحانه وتفكر باللي شافته صدفه وخافت منه ، اي فارس اخو سديم ، قاطع تفكيرها صوت ابوها
ابو زوز : اليوم شفت أبو رائد صدفه .
ام زوز : صج ، وين شفته ؟ .
ابو زوز : شفته بالكافي شوب وانا رايح حق صديقي ، عاد عرفت ان ولده فارس للحين ما تزوج .
ام زوز : ما شاء الله اهو كم عنده اعيال ؟ .
ابو زوز واهو يشرب الشاي : عنده ١٢ ، ٦ اولاد ، و٦ بنات .
ام زوز : ما شاء الله .
ابو زوز : عاد يقولي انهم يبون يزوجون فارس واهو رافض .
ام زوز : ليش اهو كم عمره ؟ .
ابو زوز : ما شاء الله دخل ال٢٤ .
ام زوز : ما شاء الله .
زوز بارتباك : يبه .
ابو زوز : هلا يبه .
زوز : انت تعرف عايلتهم معرفه عدله ؟ .
ابو زوز : اي اعرفهم ، انا و ابو رائد كنا مع بعض اصدقاء شاركنا في اسهم وتجاره بس انا للاسف خسرت واهو ما شاء الله عليه نجح وانشهر .
زوز بتفهم : اهاا ، اتذكر ايام المدرسه سديم كانت تقول احنا نعرفكم من واحنا صغار .
ابو زوز : اي يبه ، تعرفنا على بعض من سنين ، بس الدنيا والمشاغل نستنا نلتقي ونسأل .
ام زوز : اي انا تعرفت على ام رائد يوم كانوا رائد وفهد صغار يلعبون وفارس توه مولود صغير .
زوز بمزح : اجل شيبتوا مع بعض .
ام زوز : بنت استحي .
****************************************************************************
⚡️ يوم جديد⚡️
فارس بالشركه بمكتبه يقلب بالاوراق ولا يدري شنو فيها ، دخل صديق فارس(محمد) وقعد يطالعه .
محمد بضحكه : اي فارس شنو تقول الاوراق ؟ .
فارس رفع راسه وبفهاوه : هااا .
محمد قام وراح لفارس ومسوي روحه معصب : هويت ببير ماله قاع قول امين .
فارس استوعب وحط اديه بوجه ومسح وجه واهو ينافخ : اوووووف ، اخلص حمود مالي خلق .
محمد قعد قدام فارس وبجديه : شفيك ؟ شصاير لك هاليومين ، مالك خلق شيء وكله سرحان ، شوف الاوراق تجمعوا عليك ( يأشر على مكتب فارس) ، انت اللي الكل يعرفك بالشركه ما تطلع الا لمن تخلص كل الاوراق اللي عندك والحين صاير كذا .
فارس رجع على كرسيه ورجع راسه فيه وغمض وهمس : تعبااان .
محمد : تعبان من وش ؟ .
فارس ما رد عليه ، وتم على وضعه .
محمد بتنهيد : انت تحب ؟ .
فارس كان جاته صاعقه كهربائيه وفتح عيونه فجاه : هااا ؟ .
محمد : وش فيك على هاا كل ما قلت لك شيء قلت هاا ، اقولك انت تحب ؟ .
فارس عدل قعدته : وش حب وخرابيط ما عندي هالسوالف تعرفني .
محمد : مو لاني اعرفك اسألك لان ولا مره صرت بالحاله .
فارس بملل : اقول اطلع اطلع ، فكني من شرك .
محمد واهو يقوم : بطلع بس نصيحه { الا المشاعر لا تكذب فيها} .
وتركه وطلع .
فارس : انا ما صار بيني وبينها شيء عشان افكر فيها كذا ، اوووه وش هالخرابيط .
ورجع يحوس بالاوراق وسرح لبعيد تذكر لمعة عيونها يوم تجمعت فيها الدموع ، تذكر شكلها بالفستان تذكر خوفها ، تذكر صوتها واهي تغني ، تذكر صوتها واهي تنادي اخته .
فارس بعصبيه ضرب الطاوله وصرخ : طلعي من راااااسي .
فهد فتح الباب على فارس وبخوف : فارس شفيك ؟ .
فارس حط راسه على المكتب وهمس : ولا شيء بس مصدع .
رائد دخل وبيده اوراق : فهد وين ؟ .
سكت واهو يشوف فارس كذا وفهد يطالعه ، طالعهم باستغراب .
رائد واهو يطالعهم اثنينهم : شفيكم ، شصاير ؟ .
فهد حرك كتوفه بمعنى ما ادري ، رائد تقدم من فارس وهمس بحنان : فارس شفيك ؟ تعبان ؟ يعورك شيء .
فارس رفع راسه : لا بس مصدع ، شكلي برجع البيت .
فهد واهو واقف مكانه : اوك ارجع انا اقول لابوي .
فارس وقف واخذ جواله ومفتاحه ، فهد يطالعه وهمس : فيك حييل تسوق ولا اوديك ؟ .
فارس يمشي بهدوء : لا عادي اقدر اسوق كله صداع ، يلا باي . وتركهم وطلع .
فهد ورائد يطالعون ببعض ، رائد اخذ الاوراق وقال لفهد واهو بيطلع : اقص يدي اذا اخوك ذا ما يحب . وتركه وطلع ، فهد تنهد وسكر مكتب فارس وراح لمكتبه .
****************************************************************************
فارس رجع البيت شاف اخته سديم جاهزه بتطلع ، قعد بالصاله واهو يطالعها .
فارس يخزها من فوق الى تحت : على وين ؟ .
سديم تعدل الحجاب : بروح بيت صديقتي .
فارس : بروحك ؟.
سديم : لا بتروح معاي جنان وملاك وندى وهدى .
فارس : منو صديقتك ؟ .
سديم طالعته بعصبيه : يه اهو تحقيق ؟ .
فارس بعصبيه خفيفه : خلصيني مالي خلقكك منو صديقتك ؟ .
سديم واهي تميل شفايفها : اللي جات ذاك اليوم زوز .
فارس هدى اشوي : اهي اسمها كذا زوز ولا انتوا تدلعونها .
سديم : لا اهي اسمها زهراء بس احنا نحب ندلعها ونختصر اسمها بزوز .
فارس : اهاا ، انزين منو بيوديكم ؟ .
سديم بملل : السواق بعد منو ؟ .
فارس : لا انا اوديكم ماله داعي السواق وانا موجود .
سديم بتتكلم قاطعها فارس واهو يطلع ويصرخ : انتظركم بره لا تنقعوني .
وطلع ، سديم ترمش بسرعه مو مستوعبه .
****************************************************************************
🌟 تسريع للاحداث🌟
وصلوا بيت زوز وراحوا غرفتها على طول ، فارس واهو بيمشي شاف جوال سديم ونزل يعطيها اياه والباب كان مفتوح دخل من المجلس واهو ينادي باسم سديم ، الا زوز نازله من فوق بسرعه وتسال امها وين ابوها وتقولها بالمجلس وتروح تسرع واهي تنادي ابوها ، دخلت المجلس .
زوز واهي تتنفس بسرعه : يبه وين . وسكتت .
فارس سمع صوت احد يجي ولف واهو معصب : سديموه ووجع خذي .
وسكت .
التقت عيونهم ببعض ، صار هدوء ما غير صوت القلوب اللي تدق بقوه كانها تحاول الهروب من مكانها .
فارس كان ينقل عيونه في كل شيء فيها ، عيونها ، شفايفها ، رموشها ، ملامح وجها ، شعرها ، قصرها ، جسمها ، ولبسها .
فارس يحس الاكسجين انقطع عنده ، يحس الوقت وقف ، يحس انه بحلم من احلامه .
فارس يكلم نفسه : لا لا اكيد انا انجنيت انا ما اشوفها صج ، لا لا فارس اصحى انت تحلم انت تحلم ، هذا من تفكيرك فيها ، اصحى اصحى .
وحالة زوز مو اقل منه ، شافت ملامحه اللي تدل على رجولته ، طوله ، اللمعه اللي بعيونه ، شكله بالثوب ودقات قلبها اللي تحس انها وصلت له رغم بعد المسافه بينهم .
فارس بعد ما دقق في كل انش فيها استقرت عيونه اخيراً بعيونها شاف نفس اللمعه اللي قبل عرف شنو وراها ، وركض بسرعه وقفل الباب قبل لا اهي تروح .
زوز لمعة عيونها تبشر بقدوم دموعها في الطريق لفت تبي تطلع من المجلس وترجع لغرفتها ما شافت الا الباب تسكر ويده بالباب ، لفت وشافته واقف وراها .
فارس يده بالباب وزوز لاصقه في الباب وتنفسهم سريع ودقات القلب ما ترحم .
****************************************************************************
واااااااااااااااااستوب
شنو بيصير بين زوز وفارس ، وهل فعلاً كلام محمد صديق فارس صحيح ؟ هل فارس يحب زوز ؟ هل زوز تحب فارس ؟
كتبوا تحت في التعليقات وكتبوا توقعاتكم
انتظروا البارت الجاي
سلااااااام 👋🏻
1750 كلمة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!