🌷 يوم جديد 🌷
نوره كتبوا لها خروج ورجعت البيت .
الكل مجتمع حول نوره وقاعدين يسولفون ويضحكون يحاولون يغيرون لها نفسيتها .
ام رائد تضمها : الحمد الله يا يمه على سلامتك ، عداك الله الشر .
نوره بهدوء : الله يسلمك .
سامي يمد يده لها وبحنان : روحي ، قومي اخليك ترتاحين فوق .
نوره تدور يمين ويسار : وين حامد ، ابي اشوفه ؟ .
نزلت هيا واهي ماسكه يد حامد ، حامد بس شاف امه وراح لها يركض .
نوره تشيل حامد وتضمه : هلا يا روحي انا .
سامي ابتسم لهم ، نوره بادلته وشالت حامد ووقفت .
سامي بسرعه راح واخذ حامد منها : لا لا لا تشيلنه مره ثانيه ، انتي تعبانه ما يصير تتحركين وتشيلين اشياء ثقيله .
نوره : بس حامد مو ثقيل توه مكمل سنه وكم شهر .
سامي : ما عليه حتى لو لا تشيلين .
نوره تبتسم : تمام اللي تشوفه .
اخذها سامي وطلعوا فوق عشان ترتاح نوره .
رائد كان قاعد ومهموم وسرحان ، ام رائد لاحظت وهمست لابو رائد .
ام رائد بهمس : اقول يابو رائد .
ابو رائد يقرب : هلا آمري ؟ .
ام رائد تطالع رائد : شوف رائد .
ابو رائد : شفيه ؟ .
ام رائد : صار له كم يوم مو على بعضهم ومهموم ، شنو يصير معاه ؟ .
ابو رائد : والله مادري ، خليني اكلمه واشوف .
ابو رائد بصوت عالي : رائد يبه .
رائد سرحان .
ابو رائد بصوت اعلى : رائد .
رائد مو منتبه .
فارس حركه : رائد ابوي يكلمك .
رائد انتبه ولف عليه : همم شفيك فارس ؟ .
فارس بهمس : ابوي يكلمك ، انت اللي شفيك ؟ .
رائد : مافيني شيء .
رائد يطالع ابوه : هلا يبه آمر ؟ .
ابو رائد يوقف : قوم يبه معاي ، ابيك اشوي .
رائد يوقف ويلحقه ودخلوا غرفه ابو رائد وام رائد .
ابو رائد راح قعد على السرير : تعال يبه .
رائد سكر الباب وراح لابوه وقعد قدامه : هلا يبه ، آمر ؟ .
ابو رائد : ما يأمر عليك ظالم ، قلي يبه شفيك شصاير معاك ؟ صار لك كم يوم مو على بعضك ؟ كله سرحان ومو معانا وصدرك ضايق ، قلي وانا ابوك ، مو وانت وفهد وفارس معودكم من وانتوا صغار تجون تشكون لي ، ليش تخبي الحين ؟ .
رائد نزل راسه ويلعب باصابع يده : مافيه شيء يبه .
ابو رائد : افااا ، تخش علي وانا ابوك ؟ .
رائد يكذب : صدقني يبه مافيه شيء بس شويت مشاكل صايره بيني وبين جنان .
ابو رائد صدق : ليش شبينك وبينها ؟ .
رائد : على موضوع العيال .
ابو رائد بتنهيد : انا مو عارف انت ليش مخليها تاخذ مانع للحين ؟ .
رائد يتنهد ويطالع ابوه ويكلم نفسه : آآآه يا يبه ، لا تحط على الجرح الملح .
ابو رائد يحركه : رائد قاعد اكلمك .
رائد انتبه : هلا يبه .
ابو رائد اقولك انت ليش مخليها تاخذ مانع للحين ؟ .
رائد ينزل راسه : امم لاني خايف .
ابو رائد باستغراب : خايف ! .
رائد : اي يبه .
ابو رائد : من شنو ؟ .
رائد : خايف اني اجيب عيال وبعدها انفصل عن جنان وعيالنا يتشتتون .
ابو رائد بصدمه : انت واعي للتقوله ؟ .
رائد : اي يبه .
ابو رائد : شنو يعني تنفصل عن جنان ؟ .
رائد يوقف : يبه تكفى مابي اتكلم ، انا اسف ، عن اذنك .
تركه وطلع وراح جناحه .
ابو رائد بصدمه : شنو الولد جن وانا مادري ؟ ، لا لا شكل كلام امه صح .
****************************************************************************
☄ بعد مرور اسبوعين ☄
رائد زادت حالته سوء لدرجة وصل على اي شيء يعصب وينفذ صبره ويصرخ ولحد الحين محد عارف شنو هالسبب ، صار ما ينام بمكان فيه جنان ينام بجناحه لكن بالغرفه الثانيه واغلب وقته يقضيه بالقعده بروحه .
فارس يحاول يعدل علاقته مع زوز ويخليها تقتنع ان ياخذ حقه بس بنفس الوقت ما يبي يغصبها لان هالشيء راح يخرب علاقتهم اكثر .
نوره صحتها قامت تتحسن بفضل وجود سامي معاها واهتمامه فيها بشكل ملاحظ جداً .
يوسف وما ادراك ما يوسف الكل لاحظ تعلقه بالجوال بشكل كبير وجلسته بغرفه طول الوقت وتصرفاته اللي تغير ، ونومه ينام وقت قعدت اهله ويصحى وقت نومهم ، باختصار وضع صار مشكوك فيه .
خالد الشخص المشكوك فيه الثاني ، اللي طلعاته صارت تكثر بنص الليل وجواله اللي ما يسكت من الرسايل والاتصال .
فهد وملاك علاقتهم صارت اقوى من قبل بعد ما تعافى فهد وملاك تعد الساعات اللي تكون فيه حامل ولا عارفين شنو سبب هالتأخر .
****************************************************************************
🌷 الساعه ١٢ بالليل 🌷
اليوم جمعه والكل مجتمع تحت ، خالد نزل من فوق .
خالد : سلام .
الكل : عليكم السلام .
ابو رائد : خير ان شاء الله وين رايح ؟ .
خالد بابتسامه : بطلع .
رائد رفع حاجب : اي طلعه هذي اللي الساعه ١٢ تبدي ؟ .
خالد : عادي ويكند وربعي يجتمعون هالوقت بروح .
سديم : بس كشختك مو كشخه ربع كانك رايح تقابل ريحه العطر معبيه المكان .
خالد : انتي شفيك ؟ قلت بروح لربعي .
ابو رائد يراقب بصمت .
فهد : خويلد اعقل مافيه طلعه هالوقت .
خالد : شفيكم ترى ما ارتكتب اثم ، بروح ساعتين لربعي وبرجع ما كفرت .
رائد بعصبيه اكثر : لا والله ، اشوف طلعاتك كثرانه هالاسبوعين وش سالفتك انت ها ؟ .
خالد بملل : اوووف رائد ترى مالي خلق ، انا طالع .
مشى بيطلع وقفه صوت ابوه .
ابو رائد بصراخ : وقفف .
خالد جمد بمكانه .
ابو رائد وقف وقرب من رائد : انا ما سمحت لك تطلع .
خالد بلع ريقه ولف لابوه : بس يبه .
ابو رائد : لا بس ولا شيء ، عطني جوالك اشوف .
خالد خاف : هاا ؟ .
فارس لاحظ خوف اخوه : شفيك خفت ؟ قالك عطني جوالك .
خالد بتوتر : ليش فيه جوالي ؟ .
رائد بعصبيه راح وسحب الجوال منه بقوه ، وفتحه وهني كانت الصدمه .
رائد تغيرت ملامحه الى صدمه .
ابو رائد : شفيك ، شفيه الجوال ؟ .
رائد ما قدر يرد ومده لفارس ، فارس اخذه وقعد يحوس فيه .
فارس بشوي عصبيه : شنو هذا ؟ .
خالد نزل راسه .
فارس بصراخ : قلت لك شنو هذا رد .
رائد ضحك باستهزاء : ههه ، طبعاً ما يقدر يرد لانه يدري انه بمصيبه الحين .
ابو رائد سحب الجوال من رائد وشاف اللي فيه والصدمه علت وجهه ، بحركه سريعه سحب خالد بقوه وراح للمجلس وفارس وفهد ورائد لحقوه وسكروا الباب .
ابو رائد دفه بقوه لدرجه كان بيطيح واهو يطالعه بعصبيه .
ابو رائد : اللي شفته بالجوال صج ولا فبركه ؟ .
خالد منزل راسه .
ابو رائد بصراخ : رررررررررررد .
خخالد بخوف : ص ص ص صج .
ابو رائد بعبره مخنوقه : هذي اخر التربيه يا خالد ؟ كذا تجازيني ؟ قلي انا شنو قصرت فيه معاك ، انت اخر اولادي دلعتك وما ارضى احد يمد يده عليك ، يوسف وحمد اول ما جيت كانوا يحاولون يأذونك من الغيره كنت ما اخليهم ، كنت ما تنام الا على صدري الى ان وصلت ٨ سنوات وانت تنام معاي ، من اهتمامي فيك امك واللي اهي امك قامت تغار منك ، كنت كل اسمع خله خالد صار كبير ، كنت اقول لا للحينه صغير ، كسرتني يا خالد ، كسرتني .
قعد على الكنب وقام يصيح .
رائد بعصبيه مسكه بقوه : اسمع ، ابي اعرف انت ليش مسوي كذا ؟ .
خالد بعصبيه دفه : اووووه وخر عني انا ما سويت شيء عادي .
فهد بصدمه : عادي ؟ ، انت مستوع شنو مسوي ؟ .
خالد : اي مستوعب ، طالع مع بنات وماخذ شرفهم عادي شصار ؟ .
فارس بعصبيه : وبكل وقاحه تقولها بعد وبكل ثقه .
رائد مسكه من ياقت قميصه : اسمع ، وربي لادفنك حي هني اذا ما تكلمت وقلت منو الحمار اللي مدليك على كذا .
خالد ببرود : انا اللي قايل لي .
قطع عليهم صوت تكسر بالباب وصراخ وصوت الجرس اللي احترق .
فارس : كا كملت اللي توقعناه صار .
راحوا كلهم فتحوا الباب والصدمه .......... .
****************************************************************************
وااااااااااااااااااااااااااااااستوب
توقعاتكم ؟
كيف البارت ؟
علقوا بين الفقرات .
١٠٠ كومنت = اكمل .
٤٠ تفضيل = اكمل .
٢٠ توقع = اكمل .
١٣٧٣ كلمة
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!