💐 يوم جديد 💐
****************************************************************************
🌹 عند فارس و زوز 🌹
صحى فارس وبعد زوز عنه بخفيف وقام اخذ شور واخذ الحبوب من الدرج وطلع بهدوء توجه للمستشفى حق رائد
****************************************************************************
🌷 عند فهد و ملاك 🌷
ملاك نايمه ، و فهد يحوس بشعرها عشان يصحيها .
فهد يحوس شعر ملاك : يلا قومي .
ملاك بدت تتحرك بانزعاج : اووف فهود خلني انام .
فهد يبوس وجها بكل مكان : قومي يا الكسوله .
ملاك تبعده عن وجها : بس بس هدني .
فهد يقوم ويشيلها وملاك تصرخ وداها الحمام ودخل معاها يتروشون مع بعض .
(تتوقعون شنو يصير 🌚، والله طردوني كان وريتكم ) .
****************************************************************************
🌺 عند هيا وسديم 🌺
سديم صاحيه و رايحه لهيا تزعجها .
هيا قامت واهي معصبه : وجع شنو تبين ؟ .
سديم : قومي سولفي معاي .
هيا : روحي حق حريم اخوانك يسولفون معاك انا بنام .
سديم تنط على السرير وتصرخ : لا لا لا لا لا لا لا لا .
هيا تاخذ المخده وتطقها : يا حيوانه بسسس .
سديم انحاشت و هيا لحقتها و نزلوا تحت و صراخهم مالي المكان .
سديم تصرخ : يببببببببه الحقني من الدب الهايج .
ابو رائد يبعد عن سديم وسديم تجي تنخش وراه و هيا ماسكه النعال بتطقها .
هيا بصراخ : والله لا لعن خيرك يالزفته .
سديم تمسك ملابس ابوها من وراه وتنخش : يبه انقذني منها .
ابو رائد : سديموه ووجع هدي ملابس ، هدي هد الله حيل العدو .
هيا قطت النعال و صاب فهد و اهو نازل و عصب راح ومسك هيا وسديم من قفاهم واهو يصرخ .
فهد بصراخ : ووجع حتى وجع ، وش هالحيل اللي فيكم من صباح الله خير ، صراخ و هواش ها شصاير ؟ .
سديم : اهي بدت .
هيا : لا اهي بدت .
فهد : الحين انا ببتدي فيكم ثنتينكم .
ابو رائد يضحك : خلاص خلاص اتركهم .
هيا طالعت سديم وبحركه سديم ضربوا فهد ببطنه مع بعض و انحاشوا .
فهد نزل على بطنه بألم : هين يا الشيفات .
هيا و سديم انحاشوا فوق ركض .
نزل الكل حق الفطور خالد و يوسف و حمد و التؤام .
****************************************************************************
💐 عند فارس و رائد 💐
فارس طلع الحبوب لرائد و رماه على السرير وتنهد بضيق .
رائد : انزين ليش ما تصارحها و تسالها شنو هالحبوب .
فارس قعد قدام رائد على السرير : مادري ، بس اتوقع ما تقول الصج لان اهي خاشته اصلاً .
رائد : انزين اخذه و روح الصيدليه و اسأل عنه .
فارس : هذا شكله اللي بيصير .
قاطع عليهم دخول زياد .
زياد بأبتسامه : صباح الخير .
الاثنين : صباح النور .
زياد انتبه للحبوب : منو اللي يستخدم هالحبوب ؟ .
فارس و رائد طالعوا ببعض .
فارس : تعرف شنو هالحبوب ؟ .
زياد : اي حبوب منع حمل بس من نوع قوي .
فارس حس كان احد عطاه كف قوي و دارت اسئله كثيره براسها .
زياد قرب واخذ الحبوب و يقلب فيه : بس هذا جديد ، يعني ما قد انفتح (طالعهم) ، حق منو ؟ .
فارس بدأ تنفسه يسرع و العصبيه تبين عليه .
رائد : زياد تقدر تكتب لي خروج الحين .
زياد : اي عادي ، بس بفحصك اخر فحص بعدها اكتب لك خروج .
فحصه زياد و كتب له خروج و تبادل الارقام اهو و رائد ووصاه ينتبه على نفسه و اي شيء يصير يكلمه او يجيه المستشفى ، طلعوا فارس و رائد من المستشفى .
فارس يسوق بسرعه جنونيه و رائد يهديه .
رائد : فارس اهدأ ، الامور ما تنحل بهالطريقه .
فارس ما يرد .
وصلوا البيت ونزلوا بسرعه .
ودخلوا و اهم يفطرون ، زوز انتبهت لفارس واهي تاكل .
فارس قرب من طاوله الاكل وبصوت هز البيت : لحقيني الغرفه .
زوز نفضت يدها وقامت وراه .
رائد جاء وقعد و اهو يتنهد .
رائد : يمه يبه لحقوه ترى مجنون لا يسوي ببنت الناس شيء .
ابو رائد : ليش شصاير ؟ .
رائد سكت ما عرف شنو يقول .
****************************************************************************
🔥 عند فارس و زوز بالجناح 🔥
فارس دخل الغرفه و يتنفس عشان يحاول يهدي
دخلت زوز ووقفت جنب التسريحه ، فارس لف عليها ويطالعها .
زوز بلعت ريقها بخوف .
فارس يحاول يهدي نفسه : بسأل سؤال و ابي جواب ، و ما ابي اكرر السؤال ، مفهوم ؟ .
زوز هزت راسها وهمست : مفهوم .
فارس طلع الحبوب من جيبه ورفعه بيده : شنو هذا ؟ .
زوز شفته وصارت كذا 😨 .
فارس صوت اعلى : شنو هذا ؟ .
زوز بصوت يقطع : هذا ، ه ذا .
فارس بدأ يصرخ : انا ارد عليك ، هذي حبوب منع حمل يا مدام .
زوز الخوف بدأ يدب قلبها : فارس انتظر خل افهمك .
فارس صراخه معبي المكان : شنو افهم ، ها ؟ ، شنو ؟ ، توقعت كل شيء الا هالشيء ؟ ، ليش ؟ ، لهدرجة ما تبين تجيبين مني عيال ؟ ، انزين ليش ما ادري ، ليش ما جيتي قعدتي معاي قلتي انا ما ابي عيال ، ليش ما جيتي تفاهمنا ، ليييييييش ؟ .
زوز بدت تبكي : والله فارس ما استخدمته .
فارس : شنو يثبت لي انك ما استخدمته ؟ ، ها ؟ ، اعترفي كم حبه اخذتي ؟ ، اعتررررررررفي .
زوز اخذت العلبه : شوف العلبه جديده وربي ما استخدمته .
فارس : بس كنتي ناويه ، ليش سويت كذا ليش ؟ .
زوز بكت بقوه ولا ردت .
فارس : انا قصرت معاك بشيء ، ردديييي .
زوز صرخت : بس بس .
تركته ونزلت تحت .
فارس لحقها و اهو يصرخ : تعالي هني ، انا ما خلصت كلامي .
الكل وقف .
زوز قربت عند الباب بتطلع وقفوا عند الباب فهد و خالد و حمد و يوسف .
و فارس عند الدرج واهو يتنفس بسرعه و يصرخ : انا ما خلصت كلامي يا مدام عشان تمشين .
ام رائد : يا يمه ذكروا الله ، الشيطان دخل بينكم .
زوز واهي تبكي : قولي له خالتي ، والله ما استخدمتهم .
فارس بصراخ : انتي اللي قولي لهم ، قولي لهم اني صبرت ٤ شهور و ما قربت منك عشان ما ابي اخسرك ، ابوي انتقص رجولتي عشان اني ما قربت منك ، قولي .
سامي : فارس ورني الحبوب .
فارس حذفه بالارض ووصل لسامي .
سامي استغرب : هالحبوب انا صارفه لنوره .
فارس طالع نوره .
نوره نزلت راسها : انا قلت حق سامي يصرف هالحبوب وعطيته زوز .
زوز و اهي تبكي : انا كنت خايفه منك ، خايفه انك بلحظه تتركني فطلبت من نوره تصرف لي هالحبوب و قالت بتقول لسامي زوجها و جابته لي من يومين ، بس والله ما استخدمته ، والله .
فارس يتنفس و يحاول يهدي : زوز ابي انفصل .
الكل شهق .
ابو رائد : فارس تعوذ من ابليس .
فارس و اهو يطلع الدرج : مثل ما انتي اخترتي هالشيء بنفسك ، انا لي الحق اختار هالشيء بنفسي .
زوز لحقته و راحت فوق .
فارس بهدوء عمس اللي بداخله : جهزي ملابسك ، بوديك بيت اهلك .
زوز بنبرة عتاب : يعني خلاص ؟ .
فارس ما عطاها رد و اخذ اغراضه ونزل تحت .
رائد بصراخ : انت جنيت ؟ .
فارس بصراخ : اووووه ، خلاص خلوني بحالي اللي فيني مكفيني .
ام رائد : تحسب بنات الناس لعبه ، بكيفك تطلق .
فارس : ماني مطلق ، ماني مطلق ، بوديها بيت اهلها كم يوم ، بس خلوني ارتاح تكفون .
طلع من البيت ينتظر بالسياره ، دقايق و نزلت واهي بيدها شنطه ، وقف يوسف و راح اخذها منها ونزلها .
زوز ما تكلمت وطلعت و ركبت السياره و يوسف ركب الشنطه و حرك فارس و ساد الصمت بينهم
وصلوا لبيت زوز ، فارس نزل الشنطه ومشى بدون ما ينطق بشيء .
زوز دخلت بيت اهلها ، امها وابوها انصدموا .
ام زوز : يمه ، زهراء ، شصاير ؟ .
زوز واهي تبكي : انا وفارس بننفصل .
و راحت تركض لغرفتها تبكي .
****************************************************************************
فارس بعد ما نزل زوز بيت اهلها راح البحر ، يحس نفسه مخنوق ، يحس عقله موقف عن التفكير ، عقله يقوله طلقها من هالتصرف اهي ما تبكي ، و قلبه يقول لا انت تحب واللي يحب يسامح ، صراع بين القلب و العقل ، و ما يدري منو يفوز بالنهايه .
****************************************************************************
✨ بغرفه سامي و نوره ✨
سامي بشوي صراخ : نوره ليش سويتي كذا ؟ .
نوره بمثله : انا شعلي ، اهي طلبت .
سامي : حتى لو مفروض ما تقبلين ، مفروض تقولين لها قولي لزوجك اول مو تشجعينها تسوي هالشيء من وراه .
نوره : قلت لك اهي طلبت وانا ساعدتها بس .
سامي بعصبيه : يكون بعلمك لو اخترب بيت اخوك وانفصلوا صج ، تراك بتكونين احدى الاسباب .
وتركها وطلع ، ظلت نوره تفكر بكلامه ، معقوله يكون صح ؟ .
****************************************************************************
💥 عند فهد و ملاك 💥
راحوا المستشفى و اكتشفوا ان ملاك حامل من اسبوعين و ما كانت حاسه .
فرحوا وقرروا يفرحون العائله .
****************************************************************************
☄ بعد ٦ ساعات من اللي صار ☄
رجع فارس بشكل بارد
فهد بفرحه : البشاره يا فروس ، ملاك حامل .
فارس ببرود : مبروك ، الله يتمم لكم بخير .
ام رائد تنهدت : يمه حبيبي احط لك عشاء ؟ .
فارس : لا يمه ما ابي بروح انام ومابي احد يصحيني .
ابو رائد : خليه خليه يرتاح و يراجع افكاره .
فارس طلع لجناحه .
فهد تنهد بحزن .
ملاك حطت يدها على كتفه : حبيبي لا تزعل .
فهد : مو على ملاك ، بس اكثر واحد من اخواني ينتظر يصير عم فارس .
ام رائد : ما عليه يمه لا تشيل بخاطرك عليه .
فهد تنهد .
****************************************************************************
فارس دخل الجناح و شغل التكيف و انسدح على السرير بملابسه و شوزه و كل شيء ، دفن وجهه بمخده زوز ، يشم ريحتها فيها ، لين غفت عينه .
****************************************************************************
زوز بغرفتها منسدحه بسريرها وضامه البطانيه وحاطتها على فمها تبكي و تكتم شهقاتها .
****************************************************************************
واااااااااااااااااااستوب
كيف البارت ؟
هل صح بيصير انفصال بين زوز و فارس ؟
حبهم القوي وين راح ؟
هل اذا انفصلوا بيكون احدى الاسباب اهي نوره مثل ما قال لها سامي ؟
هل بيستمر وضع فارس و زوز كذا ، لا انفصال و لا اجتماع ، فقط كل واحد بمكان ؟
شنو بيصير بحياة يوسف و حمد و خالد و التوام و سديم و هيا ؟
وين مرام اللي كانت تهدد زوز من قبل ، هل اختفت للابد او هذا ما يسمى هدوء قبل العاصفة ؟
هل زياد بيتقرب من العائله بشكل ثاني ام فقط بيكتفي بمكانه الحالي ؟
( اتقبل الانتقاد ولكن باحترام )
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!